සර්මේනියාවේ වගතුග

To Sir With Love චිත්‍රපටයේ රඟපෑ මාක් තැකරේ

මහරගම නගර සභාවේ සභාපති තමන්ට සර් කියන්නැයි උපදෙස් දුන් දැන්වීමක් දැන් සමාජ මාධ්‍යවල විහිළුවක් වී තිබේ.

ඉස්සර මං වැඩ කළේ පාසල්වල. ඒවායේ සර් කියන වදන භාවිතය සුලබයි. දැන් මා රැකියාව කරන ජාත්‍යන්තර ආයතනයේ නම් තරාතිරම කුමක් වුණත්, කවුරුත් කාටත් අමතන්නේ මුල් නමින්.

සර් හා මැඩම් කියන වදන්වල මුල් ඉංගිරිසියේ නැති තරම් සම්භාවනීය අරුතක් ලංකාව වැනි ආසියාතික රටවල තිබෙනවා. නමට මුලින් සර් යොදපු සර් ජෝන් කොතලාවල වගේ නයිට්වරු වගේ ම නයිට් ක්ලාස් කරලා උගන්වන ටියුෂන් සර්ලාත් ලංකාවේ ඉන්නවා. අපේ සර්, අපේ මිස් වැනි යෙදුම් වගේ ම ලොකු මිස්, ලොකු සර්, පොඩි මිස් වැනි යෙදුම් ද භාවිතා වෙනවා. පිටිසර පැතිවල ළමයි ගුරුවරුන්ට සේර් කියනවා. ආදරේට ඇදලා කියනකොට මේක සේර….. වෙනවා. ගම්වල මිනිස්සු සෑර් කියාත් මෙය උච්චාරණය කරනවා.

‘සර්’, ‘මිස්’ කියා ආමන්ත්‍රණය කිරීමේ සම්ප්‍රදාය පැමිණියේ යටත්විජිත සමයේ එංගලන්තයෙන්.

ගුරුවරුන් සර් කියා ඇමතීමේ අතීතය 16වන සියවස දක්වා විහිදෙනවා. එංගලන්තයේ පහළ පංතිවලින් ආ ගුරුවරුන්, විශාල වශයෙන් ඉහළ පංතිවල සිසුන්ගෙන් සමන්විත වූ පංතිවල ඉගැන්වීමේදී සිය ආධිපත්‍යය තහවුරු කර ගන්නට මෙම යෙදුම පාවිච්චි කළ බව Times Educational Supplementහි සඳහන් වෙනවා.

මිස් කියන යෙදුම භාවිතාවට ආවේ වික්ටෝරියානු යුගයේදීයි. විවාපත් කාන්තාවන් රැකියාවලින් ඉවත්ව නිවසේ රැඳීම දිරිගැන්වූ ඒ කාලයේ පාසල්වල ඉගැන්වූයේ අවිවාහක ගුරුවරියන් පමණයි. ඒ නිසා ඒ අය‍ට මිස් කියා ආමන්ත්‍රණය කළා. 20වන සියවසේ පමණ සිට නැවතත් විවාහක ගුරුවරියන් වෘත්තියට පිවිසියත්, විවාහක-අවිවාහකබව නො තකා සියලු ගුරුවරියන් මිස් කියා ආමන්ත්‍රණය කිරීම දිගටම පැවතියා.

ගුරුවරුන්ට සර් කියා ආමන්ත්‍රණය කිරීම තුළ තිබෙන තරම් ම ගෞරවයක් ගුරුවරියන්ට මිස් කියා ආමන්ත්‍රණය කිරීම තුළ නැහැ. ඒ නිසා විදුහල්පතිනියන් වැනි අයට මැඩම් කියා ආමන්ත්‍රණය කරන සම්ප්‍රදායක් තිබෙනවා.

ලංකාවේ හෙදියන්ට ආමන්ත්‍රණය කරන්නේත් මිස් කියලායි. සිසු හෙදියන්ට හෝ අලුත් හෙදියන්ට පොඩි මිස් කියා යොදන ව්‍යවහාරයක් ද තිබෙනවා. ඇතැම් විට ඉහළ නිලධාරීන්ට ලොකු සර් කියා ආමන්ත්‍රණය කරන ව්‍යවහාරයකුත් ලංකාවේ තිබෙනවා.

වතු ආශ්‍රිතව ලොකු සර්ට පෙරිය දොරේ කියනවා. පොඩි සර් සින්න දොරේ. ඒ සර්ලා තමන් ආමන්ත්‍රණය කර ගන්නේ පී.ඩී. (පෙරිය දොරේ), එස්.ඩී. (සින්න දොරේ) කියලායි.

එංගලන්තයේ නම්, නමට මුලින් සර් යන ගෞරවාර්ථ නාමය යොදන්නේ නයිට්වරුන් වෙනුවෙනුයි. හරියට සර් ජෝන් කොතලාවල වගේ. ලංකාවේ ගුරුවරුන්ගේ නම අගිනුත් සර් කියා යෙදෙනවා. ඉස්සර මටත් ළමයි අජිත් සර් කිව්වා. දැන්නම් මං නිකම්ම නිකං පැරා. ඒක හරි සරලයි.

Please follow and like us:

3 thoughts on “සර්මේනියාවේ වගතුග

  1. මහරගම නගරාධිපති තරුණයාගේ සිද්ධිය ගැන මම අද පුද්ගලිකවම විමසා බැලුවා. නගර සභාවට පත්වූ මුල් දිනවල ඔහු පළ කළ දැන්වීමක්ලු ඒ. නාගරික ලේකම්වරිය ඇතුලු අන් ජ්‍යෙෂ්ඨ නිලධාරීන්ගේ කරුණු පැහැදිලි කිරීම් වලින් අනතුරුව එදිනම එය ඉවත් කළ බවත් දැනගන්නට ලැබුණා. ඒ දැන් පැරණි සිද්ධියක්.
    එය වැඩවසම් සමාජයක සිය හීනමානය ප්‍රදර්ශනය කිරීමක් බව ඔහුට මුලින් තේරුම් ගන්නට බැරි වුවත් පසුව වැටහෙන්නට ඇති.
    ඔහු ඉතාමත් ක්‍රියාශීලී, කාර්යක්ෂම යහපත් පුද්ගලයෙක් බව මෙතෙක් ඔහුගේ පැවතුම් අනුව අවබෝධ වන බවත් පැවසිය යුතුයි.

  2. Sir = Salute in Respect කියාත් සමහරුන් කියනවා. සැලියුට් එක ලබන්නාටත් ඒ අනුව හැසිරෙන්නට සිදු වෙනවා. නිකම් ම ගරු වෙලා ඉන්නට බැහැ.

Leave a Reply

Your email address will not be published. Required fields are marked *