හෝම්ස් රජය සමග සාකච්ඡා කරන්න යන්නේ මෙම ප්‍රදේශයේ මානුෂීය සහන සැලසීමේ කටයුතුවලට හා අවතැන් වූවන් වෙත ළඟා වීමට රජය ක්‍රියාකාරීව පහසුකම් සැලසීමේ අවශ්‍යතාව හා රජය විසින් කඳවුරුවල රඳවා තබාගෙන සිටින එක්සත් ජාතීන්ගේ කාර්ය මණ්ඩලය නිදහස් කරගැනීම ආදී කරුණු බව එහි ප්‍රකාශිකා මාරි ඔකබේ පැවසුවා. ලංකාවේ රජය සිය පවුල් සමග වන්නියේ සිට වවුනියාවට පළා ආ එක්සත් ජාතීන්ගේ කාර්ය මණ්ඩලයේ 13දෙනෙක් තවමත් කඳවුරුවල රඳවාගෙන සිටිනවා.

එක්සත් ජාතීන්ගේ මානුෂීය ආධාර කණ්ඩායමට ලංකාව ඉඩ නොදෙනු ඇතැයි සිතිය හැකි ප්‍රකාශ කීපයක් මෙසේයි. ගිය සතියේ එම දූත මෙහෙය යෝජනා කරන විට තිබූ තත්වය අද වන විට වෙනස් වී ඇති බව විදේශ ලේකම් පාලිත කොහොන කියනවා. සිවිල් වැසියන් බේරාගැනීමේ මෙහෙයුම් තවමත් සිදු වෙමින් පවතින යුද කලාපයට ආධාර සංවිධාන යැවීම බුද්ධිමත් පියවරක් නොවන බව ආරක්ෂක ලේකම් ගෝඨාභය රාජපක්ෂ පවසනවා.

මේ අතර එක්සත් ජාතීන්ගේ සරණාගතයන් පිළිබඳ කොමසාරිස් කාර්යාලය සිකුරාදා නිවේදනය කළේ කූඩාරම් 5000ක් ඇතුළු සැපයුම් තොගයක් ඩුබායිහි සිට මේ සති අන්තයේ ලංකාවට ගුවනින් එවන බවයි.