ඇගේ ප්‍රතිවාදියා වන මහ ඇමති හා ද්‍රවිඩ මුන්නේත්‍ර කසාගම් පක්ෂයේ නායක මුතුවේල් කරුණානිධි තමන් සන්ධානගත වී සිටින පාලක කොංග්‍රස් පක්ෂයේ ස්ථාවරයට වෙනස් මතයක් ප්‍රකාශ කරමින් ජයලලිතාට සමාන අදහසක් ඉදිරිපත් කළා. කොංග්‍රසය කියන්නේ ලංකාවේ ජාතීන්ගේ ප්‍රශ්නයට එක්සත් ශ්‍රී ලංකාවක රාමුව තුළ දේශපාලන විසඳුමක් සෙවිය යුතු බවයි.

තමිල්නාඩු ආරංචි මාර්ග පවසන පරිදි ජයලලිතා සන්ධානය මේ මැතිවරණයේදී විශිෂ්ඨ ජයක් අත් කරගැනීමට නියමිතයි. දැන් එය උත්සාහ කරන්නේ තමිල්නාඩුවේ ලෝක් සභා ආසන 39ම සහ පුදුචෙරිහි ආසනය දිනාගෙන ප්‍රබල තත්වයකට පත් වන්නටයි. එම තත්වය අත් කර ගැනීමට ඇය සමත් වුවහොත් ඇය තමිල්නාඩුවේ රජුන් තනන්නිය බවට පත් වන අතර, ඇයම වුව අගමැති පදවියට පත් වීමේ ඉඩ මුළුමනින්ම බැහැර කරන්න බැහැ.

මේ මැතිවරණය ලංකාවේ ජාතීන්ගේ ප්‍රශ්නය විෂයෙහි 1977 වසරේ ලංකාවේ මහ මැතිවරණය තරම්ම වැදගත් යයි සැලකිය හැකියි. එම මැතිවරණයේදී වෙනම දෙමළ ඊලාම් රාජ්‍යයක් සඳහා ජනවරමක් ඉල්ලා සිටි දෙමළ එක්සත් විමුක්ති පෙරමුණ එකක් හැර උතුරු නැගෙනහිර දෙපළාතේ ආසන සියල්ල දිනා ගත්තා.