සිවිල් වැසියන් විශාල සංඛ්‍යාවක් ගැටුම් සහිත කලාපයෙන් ඉවත්ව ඇති බව වාර්තා කරමින් රජයට පක්ෂපාත ස්වාධීන වෙබ් අඩවියක් වන ලංකා ඊ නිව්ස් ප්‍රකාශ කළේ සිවිල් වැසියන් විශාල ගණනක් තුවාල ලබා ඇති බවයි. අවසන් වෛද්‍ය කණ්ඩායම හමුදාවලට භාර වීමෙන් පසු හමුදාව විසින් විශේෂ වෛද්‍ය කණ්ඩායමක් ප්‍රදේශයට ගුවනින් යවා තිබෙන බව වෙබ් අඩවිය වාර්තා කළා.

එහෙත් ආරක්ෂක අමාත්‍යාංශය තහවුරු කර පවසන්නේ හමුදාව මේ වන විට ෂෙල් ප්‍රහාර හා බර අවි භාවිතය නවත්වා ඇති බවයි. සීමිත ගුවන් ප්‍රහාර ක්‍රියාත්මක වන අතර ඒවායේ ඉලක්ක වන්නේ දැඩි ලෙස කොටු කරන ලද එල්.ටී.ටී.ඊ. සැඟවුම් ස්ථාන බව අමාත්‍යංශය කියනවා.

මේ අතර, කොටි සංවිධානයේ ජාත්‍යන්තර සබඳතා ප්‍රධානී සෙල්වරාසා පත්මනාදන් ටැමිල්නෙට් වෙබ් අඩවියට ප්‍රකාශයක් කරමින් මෙසේ කීවා. "මහා විනාශයක් හා ලේ හැලීමක් හරහා පැය 48කින් යුද්ධය අවසන් කිරීමේ කොළඹ ප්‍රවේශය විසින් දශක ගණනක් තිස්සේ දිග්ගැසෙමින් පවතින යුද්ධය අවසන් කරන්නේ නැත. එමගින් සිදු වන්නේ අර්බුදය මින් පෙර නොවූ විරූ ආකාාරයෙන් උත්සන්න වීමයි.

"දෙමළ අයගේ නොවේ නම් තමන්ගේම උවමනාවන් හෝ සැලකිල්ලට ගෙන මෙය වැළැක්වීමේ වගකීමක් සිංහල ජනයාට තිබේ. අප හැම විටම මෙම දිවයිනේ අසල්වැසියන් ලෙස සිටිය යුතු බව සිංහල ජනයා අමතක කළ යුතු නැත.

"එල්.ටී.ටී.ඊ. සංවිධානය අඅවස්ථා ගණනාවකදීම සටන් විරාමයකට කැපවීම හා අර්බුදය විසඳීම සඳහා සාකච්ඡා කිරීමේ අවශ්‍යතාව ප්‍රකාශ කළේය. එහෙත් ඒ සෑම අවස්ථාවකදීම ජනාධිපති මහින්ද රාජපක්ෂ ඒ සඳහා දොර වසා දැමීය."