ඊයේ පාන්දර නන්දිකඩාල් කලපුව අද්දර 53 සේනාංකයේ පාලන ප්‍රදේශයේ සිදු වූ දරුණු ගැටුම මධ්‍යයේ ඔවුන් මුලතිව් - වැලිඔය වනානතරයට පළා ගියාද යන සැකය මතු වී ඇති අතර මෙම සටනේදී කොටි සටන්කරුවන් 70ක් මිය ගිය බව හමුදාව නිවේදනය කළේය. හමුදාවට සිදු වූ හානි පිළිබඳ තොරතුරු වාර්තා වී නැත.

මුහුදෙන් පළා යාමට ඇති ඉඩ පිළිබඳවද ඇතැම් අය සැක කරති. කොටි නායක සුසෛගේ පවුලේ අය පළා යමින් සිටියදී හසු වූයේද ගැඹුරු මුහුදේදී බව වාර්තා වේ.

තොරතුරක් නැති කොටි නායකයන් අතර ප්‍රභාකරන්, පොට්ටු අම්මාන්, කපිල් අම්මාන්, සුසෛ, භානු, ලක්ෂ්මන්, ලෝරන්ස්, ජෙයම්, වේලවන් සහ රත්නම් මාස්ටර් ආදීහුද ඇති බව කියැවේ.

මේ අතර කොටි සාමාජිකයන් 2000කට වඩා භාර වී තිබෙන අතර ඒ අතර මුහුදු කොටි නායකයකු වූ චේලියන් වැනි නායකයන්ද සිටින බව වාර්තා වේ.

එල්.ටී.ටී.ඊ. දේශපාලන අංශ නායක බී. නඩේසන්, සාම ලේකම් කාර්යාල ප්‍රධානී එස්ග පුලිදේවන් සහ රමේෂ් යුද හමුදා විශේෂ බලකාය විසින් ඊයේ මරා දමන ලද බව ආරක්ෂක අමාත්‍යාංශය නිවේදනය කළේය. නිල නොවන වාර්තා අනුව, ප්‍රභාකරන් හා ඔහුගේ පුත් චාල්ස් ඇනිතනිගේ ඇතුළු තවත් කොටි නායකයන්ගේ යයි විශ්වාස කරන මළසිරුරු ගණනාවක් කොළඹට රැගෙන විත් හඳුනාගැනීමේ නව තාක්ෂණය පාවිච්චි කෙරෙම්න් ඇති බව වාර්තා වේ.