රජීව් ගාන්ධි ඝාතනය සම්බන්ධයෙන් ඉන්දියාවටද, මහ බැංකු බෝම්බය ඇතුළු සිද්ධි රාශියක් පිළිබඳව ලංකාවටද අවශ්‍යව සිටින පොට්ටු අම්මාන්ගේ මළ සිරුර සොයාගැනීමට රජ‍ය අසමත් වී තිබේ.

රජයේ සන්ඩේ ඔබ්සර්වර් පුවත්පත වාර්තා කරන පරිදි එල්.ටී.ටී.ඊ. කණ්ඩායම් හමුදා පාලන ප්‍රදේශවලට එන්නට පෙර පොට්ටු අම්මාන් මිය ගිය බවට යටත් වූ කොටි ක්‍රියාධාරයකු හෙළි කරන තොරතුර හමුදා විශ්වාස කරයි.

ඩිෆෙන්ස් වයර් වෙබ් අඩවිය පවසන පරිදි "ඔහු මැයි 17 දින සවස හා 18දා පාන්දර වන විටත් ජීවතුන් අතර සිටි බව අලුත්ම ඇසින් දුටු සාක්ෂි පවසයි. මැයි 19 දින පාන්දර වෙල්ලමුල්ලිවයික්කාල්හි වටකිරීමකදී ඔහු කොටු විය. අනතුරුව බර අවිවලින් සහාය ලද විශේෂ බලකාය ඉදිරියට ගියේය."

පොට්ටු අම්මාන් යුද හමුදා බුද්ධි අංශයට අසු වී හිඳිමින් හමුදාවේ සිටින ඔත්තුකරුවන් ආදීන් පිළිබඳ තොරතුරු කියමින් සිටින බවට වාර්තාද එම වෙබ් අඩවිය ප්‍රතික්ෂේප කරයි.

කලින් එල්.ටී.ටී.ඊ. අණ දෙන නිලධාර්යකු වූ, දැන් ඇමතිවරයකු වන කරුණා අම්මාන් මෑතදී කීවේ එල්.ටී.ටී.ඊ.ජාත්‍යන්තර සබඳතා ප්‍රධානී කේ. පී. ගුවන් විදුලි සාකච්ඡාවකදී පොට්ටු අම්මාන් මිය ගියේ යයි පිළිගත් බවයි.