උමාර් ජලීල් නම් මෙම ශ්‍රී ලාංකිකයා අහිංසාවාදී සාම බලකාය හෙවත් Nonviolent Peaceforce සංවිධානයේ සාමසාදකයකු ලෙස පිලිපීනයේ මින්දනාඕ ප්‍රදේශයේ බාසිලාන් දූපත්හි සේවය කළේය.

ජලීල් දැන් වෛද්‍ය ප්‍රතිකාර සඳහා පැමිණෙමින් සිටින බව අහිංසාවාදී සාම බලකාය නිවේදනයක් නිකුත් කරමින් පවසයි. ඔහු නිදහස් කරනු ලැබුවේ පැහැරගෙන ගිය පුද්ගලයන් අයත් සංවිධානයේ ප්‍රකාශකයකු සමග අහිංසාවාදී සාම බලකාය කළ සාකච්ඡාවල ප්‍රතිඵලයක් ලෙස බව එම සංවිධානය කියයි.

අබු සායෆ් යනු දකුණුදිග පිලිපීන දූපත් වන බංසොමෝරෝහි හෙවත් ජෝලෝ, බාසිලාන් හා මින්දනාඕ දූපත්වල වෙනම රාජ්‍යයක් සඳහා තිස් වසරක් තිස්සේ සටන් කරමින් සිටින ඉස්ලාමීය කැරැළිකාර සංවිධාන අතරින් එකකි. පිලිපීනය කතෝලික බහුතර ජනතාවක් වෙසෙන රටකි.