2009-12-31

2010ට ආසිරි!


වසරක් ගෙවී එළඹෙන නව අවුරුද්ද
නිකම් ම ගෙවී යාවිද නැතිව ම සද්ද
සාමය ගෙනෙන්නට නවතා සැම යුද්ද
දැනුවත් දනන් වෙමු කරගෙන ඔලු සුද්ද 
 !
!
!
!
!
සුබ නව වසරකට ආසිරි!   

මෛත්‍රීපාලයි ලක්ෂ්මන් යාපායි මොකාටද අඳින්නේ?

(2009 දෙසැම්බර් 31 -W3Lanka) අවුරුදු 40 ක්‌ ජනතා ඡන්දෙත් එක්‌ක හිටපු මහින්ද රාජපක්‍ෂ මහතා අවුරුදු 40 ක්‌ උණ්‌ඩෙත් එක්‌ක හිටපු සරත් ෆොන්සේකා මහතා සමග කරන දේශපාලන සංවාදය කුමක්‌දැයි ශ්‍රී ලංකා නිදහස්‌ පක්‍ෂ මහලේකම් ඇමැති මෛත්‍රිපාල සිරිසේන විමසයි. එම ප්‍රකාශයෙන් කියවෙන්නේ මහින්ද රාජපක්ෂ ඔහුට එරෙහි චෝදනා ගැන සංවාදයකට නො එන බවයි.


ජනාධිපතිතුමා සහ එම පවුල ඉලක්‌ක කර ගනිමින් විපක්‍ෂය නඟන චෝදනා තහවුරු කළ හැකි කරුණු වහාම ජනතාවට ඉදිරිපත් කරන ලෙස ජනමාධ්‍ය ඇමැති ලක්‌ෂ්මන් යාපා අබේවර්ධන පවසයි.


එම චෝදනා සම්බන්ධයෙන් කරුණු ඉදිරිපත් කළහොත් ඒ සියල්ල ඕනෑම නාලිකාවක්‌ හරහා ජනතාවට හුවා දැක්‌වීමට රජය ඉඩකඩ සලසා දෙන බවද ඇමැතිවරයා කියා ඇත.


බොරුව නිතර නිතර ප්‍රකාශ කිරීමෙන් එය ඇත්තක්‌ බවට තහවුරු කරවීමටත්, එමඟින් ජනතාව නොමඟ යෑවීමටත් නොයෙක්‌ කණ්‌ඩායම් කටයුතු කරන බව කියන ලක්ෂ්මන් යාපා ඇමතිවරයා ඒ බොරුවලට පුළුල් ප්‍රචාරයක් ලබා දීමට උත්සාහ කරන්නේ මන්ද?


ඇමති අබේවර්ධන එක්සත් ජාතික පක්ෂයේ සිට ඇමතිකමක් ලබා ගැනීම සඳහා සන්ධාන ආණ්ඩුවට පැමිණි අයෙකි. තවත් වාසියක් වෙනුවෙන් ඕනෑම මොහොතක ඔහු අනෙක් පැත්තට කරණම් ගැසීමට ඉඩ ඇත.


ශ්‍රී ලංකා නිදහස් පක්ෂයේ ලේකම් මෛත්‍රීපාල සිරිසේනගේ ඉදිරිගමනට බැසිල් රාජපක්ෂගේ අභිලාෂයන් අඩයක් වී තිබේ. හාල් හිඟයට මෛත්‍රීපාලගේ සොයුරා සම්බන්ධ බව කියමින් ආණ්ඩුව ම දැන් ඔහුට පහර දෙයි.


මේ දෙන්නා මෙවැනි මුග්ධ ප්‍රකාශ කරන්නේ කුමට ද? රාජපක්ෂ පාලනය තවත් පිරිහෙළන්න ද?




සරත් ෆොන්සේකා ජයග‍්‍රහණය කරනවා වෙනුවට අපි කියන සටන් පාඨය මහින්ද රාජපක්‍ෂ පරාජය කරනවා කියන එක - කෙලී සේනානායක


(2009 දෙසැම්බර් 31 -W3Lanka) 1983ට පෙර ජ.වි.පෙ. හිටපු ප්‍රධාන ලේකම් ලයනල් බෝපගේ, දේශපාලන මණ්ඩල සභික කෙලී සේනානායක ඇතුළු පැරණි ජවිපෙ සාමාජිකයන් පිරිසක් ප‍්‍රජාතන්ත‍්‍රවාදී ජනතා මණ්ඩපය නමින් ඒකරාශීව 2010 ජනාධිපතිවරණය හා සම්බන්ධ ප්‍රචාරක ව්‍යාපාරයක් ආරම්භ කිරීම වාමාංශික දේශපාලනයේ වැදගත් සිද්ධියක් ලෙස අපි සලකමු. 


එම ව්‍යාපාරයේ නායකයකු වූ කෙලී සේනානායක සමග ජනලංකා පුවත්පත විසින් පවත්වන ලද සම්මුඛ සාකච්ඡාවක් අපි මෙසේ පළ කරමු. 


මොකක්ද මේ ප‍්‍රජාතන්ත‍්‍රවාදී ජනතා මණ්ඩපය?


1971 ජනතා අරගලයට සහභාගී වූ සහ ඉන් අනතුරුව 88-89 දී ජ.වි.පෙ. දේශපාලනයට සම්බන්ධව සිටි අයගේ මූලිකත්වයෙන් පිහිටුවාගත් පක්‍ෂ දේශපාලනයෙන් ඍජුවම බැහැරවූ ප‍්‍රජාතන්ත‍්‍රවාදී ජයග‍්‍රහණයන් සමාජයට ලබාදීම උදෙසා වෙහෙස වන දේශපාලන ක‍්‍රියාකාරීන්ගේ සංවිධානමය එකමුතුවක්.


ඇයි ජනාධිපතිවරණ මුවවිට මේක එලියට දැම්මේ?


එහෙම තදියමකින් හෝ අදේශපාලනික පෞද්ගලික උවමනාවකින් අපි එලියට ආවා කියන එක වැරදියි. අපි බොහෝ දෙනෙක් ජ.වි.පෙ. දේශපාලනයෙන් විතැන් වුනාට පස්සේ එක්වත්, තනිතනියමත් දේශපාලන වැඩ කටයුතු වල නියැලූණා. මේ මොහොතේ අපේ ලාංකීය සමාජයට ආමන්ත‍්‍රණය කිරීම අප එයින් පැහැර නොහැරිය යුතු වගකීමක් කියලා අපි සියලූ දෙනාම කල්පනා කළා. ඒ නිසා අපිට හැකි උපරිමයෙන් අපිට සම්බන්ධතා තියෙන මාර්ග සහ මාධ්‍ය වෙතින් අපි සමාජය ආමන්ත‍්‍රනය කරනවා.


එලැඹෙන ජනාධිපතිවරණයේදී විපක්‍ෂයේ අපේක්‍ෂකයා වන සරත් ෆොන්සේකාට ඡන්දය දෙන ලෙසයි ඔබ ඉල්ලා සිටින්නේ?


ප‍්‍රශ්නයට පිළිතුර එතරම්ම සරල නැහැ. ඔබේ ප‍්‍රශ්නයට එක උත්තරයක් සහ සරල පහසුම උත්තරය ”ඔව්” කියන එක. ඒත් අවසාන පිළිතුර සමඟ දිගට ඇදෙන පුළුල් සමාජ, දේශපාලන සහ ප‍්‍රජාතන්ත‍්‍රවාදී විග‍්‍රහයක් තියෙනවා. කරුනාකර ඒක පැහැදිලි කරන්න අපිට ඉඩ දෙන්න. නැත්නම් මේ විග‍්‍රහ නොදැක, නොදැන අපව විනිශ්චය කළොත් ඒක බරපතල හානියක්.


අපේ කණ්ඩායම දේශපාලනයේදී පුද්ගල චරිත විශ්වාස කරලා වැඩ කරන අය නෙවෙයි. අපේ ගෙවුණ ජීවිත අරගලයම පුද්ගලයන් වෙනුවට වැඩ පිළිවෙලක්, අරමුණක්, ක‍්‍රියාමාර්ගයක් ජයග‍්‍රහණය කිරීම වෙනුවෙන් කැප කළේ. අපි ජ.වි.පෙ. ට එකතු වුණේ ඉතාමත් තරුණ යව්වන ජීවය පිරි වයසේදී. අපි ජ.වි.පෙ.න් ඉවත් වුණේ පුද්ගල බද්ධ කාරනා මත පදනම්ව ගත් තීරණ අනුව නෙවෙයි. අපිට තිබුණේ දේශපාලන දර්ශනය, ඉලක්ක, උපාය සහ උපක‍්‍රම පිළිබඳ ගැටලූ. ඒ නිසා අපි ජ.වි.පෙ. න් ඉවත් වුණා. අපි සමාජය සමඟ එක්ව හා වෙන්ම වැඩ කළා. විවිධ ව්‍යාපාර වල, විවිධ සංවිධාන වල වැඩ කළා. මේ හැම විටෙකම අපිව එක්තැන් කළ පොදු අරමුණ වුණේ ප‍්‍රජාතන්ත‍්‍රවාදය දිනා ගැනීමේ අරගලය.


1978 දී ජේ.ආර්. විධායක ජනාධිපති ක‍්‍රමය ගෙනයද්දී අපි ඊට එරෙහි වුණේ එහි අනිටු විපාක දේශපාලනිකව දැකලා. ’83 දෙමළ ජන සංහාරයට එරෙහි වුණේ එහි අනාගත විපාක දැකලා. 80 ජූලි වැඩ වර්ජනය මර්දනය කිරීමට එරෙහි වුණේ කම්කරු පංතියට අත්වන ඉරණම දැකලා. ත‍්‍රස්තවාදය මර්දනය කිරීමේ පනතට එරෙහි වුණේ සමාජයක් ලෙස අපිට අත්විඳින්න වෙන අනාගත ඉරණම දැකලා. 88-89 දී තරුණ සංහාරයට එරෙහිව මානව හිමිකම් කඳවුර ශක්තිමත් කරන්න උත්සහ ගත්තේ ජ.වි.පෙ. තරුණයෝ අපිව මරන්න අපේ පස්සේ එළවන බව දැනගෙනමයි. 17 වසරක එ.ජා.ප. පාලනය පරාජය කරන්න ’94 දී චන්ද්‍රිකාට සහාය දුන්නේ එ.ජා.ප. යේ දුර්දාන්න වියරු පාලනය නවතලා සමාජයට ප‍්‍රජාතන්ත‍්‍රවාදය ගෙන දීමේ උවමනාවෙන්. චන්ද්‍රිකාගේ ගජමිතුරු පාලනය අවසන් කරලා මහින්ද රාජපක්‍ෂ ජනාධිපති කරන්න සහය දුන්නේ දුරදර්ශීය දේශපාලන තීන්දුවකින්.


දැන් අපි තවත් ඓතිහාසික මොහොතකට ඇවිත්. දැන් රට අතිමහත් විනාශකාරී බලයක් සහිත විධායක ජනාධිපතිධුරය එක පවුලක සීමිත කණ්ඩායමක් අත බොනපාට්වාදී මිලිටරි ශක්තිමත් භාවයකින් ක‍්‍රියාකරනවා. ඉතිහාසයේ අන්කවරදාකටවත් වඩා වැඩි සහ දැඩි ලෙස රාජ්‍ය දේපළ කොල්ලකනවා. අල්ලස, දූෂණය විවෘතව කරගෙන යන බලලෝභී කොල්ලකාරී ක‍්‍රමයකට රට යට වෙලා. ප‍්‍රජාතන්ත‍්‍රවාදය උතුරේත් දකුණේත් සමානව මර්දනය කරලා.


දැන් ප‍්‍රධානතම සටන් පාඨය ප‍්‍රජාතන්ත‍්‍රවාදය දිනාගැනීම. ඒ සඳහා පළමු පියවර පවත්නා පාලනය වහා අවසන් කිරීම. ඒ විවර වන කෙටි ප‍්‍රජාතන්ත‍්‍රවාදී ඉඩකඩ පුළුල් මහජන සහභාගීත්වයෙන් යුත් යුද විරෝධී, කුල විරෝධී, ජාතිවාදී විරෝධී, කොල්ලකාරීත්වයට එරෙහි දිගු නිදහස් ප‍්‍රජාතන්ත‍්‍රවාදී අරගලයක ප‍්‍රවේශය බවට පත්කරගන්න ඕනේ. මේ උත්සහය ඒ සඳහායි. මේ සියල්ල අවසානයේ මහින්ද රාජපක්‍ෂ පාලන අවසන් කරන්න ඔහුට එරෙහිව මැතිවරණයේදී ඡන්දය භාවිතා කරන්න වෙනවා. අන්න එතැනදී මහින්දට එරෙහිව සරත් ෆොන්සේකාට ඡන්දය සලකුණු කිරීම අපේ දේශපාලන දැක්ම අනුව ප‍්‍රජාතන්ත‍්‍රවාදය සඳහා ඇරඹුමකි. වෙනසක් සඳහා ප‍්‍රවේශයක්.


ඔබ කියන්නේ සරත් ෆොන්සේකා රටට ප‍්‍රජාතන්ත‍්‍රවාදය දිනාදෙයි කියලද?


නැහැ. අපි ඒ තරම්ම මෝඩයි කියල ද ඔබ හිතන්නේ. අපි මුලින්ම කිව්වනේ අපි පුද්ගලයෝ විශ්වාස කරන්නේ නැහැ කියලා. ප‍්‍රජාතන්ත‍්‍රවාදය සරත් ෆොන්සේකාට තියා මිත්‍යා විශ්වාසයන් මත පදනම්වූ ජනප‍්‍රවාද අනුව එන මහබඹාටවත් ඒක කරන්න බැහැ. ඒක මිනිස් අරගල වෙතින් දිනාගන්නා ජයග‍්‍රහණයක්. ඒ සඳහා අවස්ථාවක් ලබාගන්නයි අපි මේ ආණ්ඩුව පරාජය කරන්න ඕනේ. එහෙම නැතුව හිටපු හමුදා ප‍්‍රධානියා දේශපාලනිකව විශ්වාස කරන්න තරම් අපි අද බාලයෝ නෙවෙයි.


මේ සරත් ෆොන්සේකාගේ ජයග‍්‍රහණය වටා, ආගමික මෙන්ම ජාතිකවාදී මූලධර්මවාදීන්, ජාතිකවාදී යුධවාදීන් එක්සත් මෙන්ම ඒකීයවාදීන්. ජීවිතයෙන් මෙන්ම පීඩක සහ පීඩිත බලවේගයන් එක විටම එක පෙළට සිට ගෙන සිටිනවා. ඔබත් මේ නොකියා කියන්නේ ඒ පෙළට එක්වීමේ ව්‍යාජ සටන් පාඨය නොවෙයිද?


අපොයි නැහැ. ඔබ ඔය කියන පරස්පරයන් හැම කෙනෙක්ම මහින්ද රාජපක්‍ෂ වටාත් ඉන්නවා. චන්ද්‍රිකා වටාත් හිටියා. අද ජ.වි.පෙ. වටාත් ඔය හැමෝම ඉන්නවා. ඒ අතරින් සරත් ෆොන්සේකා විතරක් වෙන්කරන්න අපිට ඕනේ නැහැ. ඔය පේළියේ උස - මහත, දිග - පළල, කළු - සුදු සියල්ල වසර 40 ක විතර ක‍්‍රියාකාරී රැඩිකල්, ක‍්‍රමවිරෝධි දේශපාලනයේ ඉන්න අපිට වීදුරුවක් වගේ පැහැදිලිව පේනවා.


අපි ඔය කුණු කන්දල් සුද්ධ කරන පරිසර ශෝකයෙන් නෙවෙයි. අපේ අරමුණ මා ඕ සේතුන්. සහෝදරයාගේ ප‍්‍රකට වැකියකින් කියන්නම්. ”අහස් කුස යට සියල්ල වියවුල්ය. තත්ත්වය කදිමය.’’ අපි කියන්නෙත් ඒ තත්ත්වය පාලක පෙලැන්තියම වියවුල්ය. ප‍්‍රජාතන්ත‍්‍රවාදී ජයග‍්‍රහණයේ මාවත පැහැදිලිය.


ජනාධිපතිවරණයෙන් ඔබ දකින ආකාරයට සරත් ෆොන්සේකා මහතා ජයග‍්‍රහණය කළහොත් ඔබේ ඊළඟ ක‍්‍රියාමාර්ගය මොකක්ද?


එකක් සරත් ෆොන්සේකා ජයග‍්‍රහණය කරනවා වෙනුවට අපි කියන සටන් පාඨය මහින්ද රාජපක්‍ෂ පරාජය කරනවා කියන එක. ඒ දෙකේ විශාල දේශාලන අර්ථ දෙකක් තියෙනවා. අපේ පුළුල් ආමන්ත‍්‍රනය මේ දේශපාලන අර්ථය වටහා ගන්නා අයටයි.


මහින්ද රාජපක්‍ෂ රෙජීමයේ පරාජයෙන් මේ රටේ ප‍්‍රජාතන්ත‍්‍රවාදයට එරෙහි එක් කාල පරිච්ඡේදයක් ස්ථිර ලෙසම අවසන් කෙරෙනවා. ආරම්භ වෙන්නේ අලූත් පරිච්ඡේදයක්. එහි වඩා වැඩි වගකීමක් ප‍්‍රගතිගාමී, ඉදිරිගාමී සමාජ ක‍්‍රියාකාරිකයන් විසින් නිශ්චිත ප‍්‍රජාතන්ත‍්‍රවාදී දේශපාලන වැඩ පිළිවෙලක් සහිතව අත්පත් කරගන්න ඕනේ. ඒ සඳහා දේශපාලන න්‍යාය පත‍්‍රයක් පොදු එකඟතාවයකින් ඇතිකරගන්න ඕනේ. මේ රටේ යන්තම් හෝ ප‍්‍රජාතන්ත‍්‍රවාදී පදනම් තියෙන කණ්ඩායම් ඉන්නවානම් , අතීතයේ ශිතලට ගල්වුණ ස්ථාන වලින් ගැලවිලා ඇවිත් අලූත් ස්ථානගත වීමකට එක්වෙන්න ඕනේ. ඒක තමයි මහින්ද රාජපක්‍ෂ පරාජයේ ප‍්‍රතිඵල ලැබෙන 2010 ජනවාරි 27 වෙනිදා කරන්න ඕනේ.


මේ පුළුල් දේශපාලන සංගායනාවට ඉඩ වෙන්වන පිටිය සකස් කිරීමයි ලයනල් බෝපගේ, ඔස්මන්, රංජිත්, බටපොල අතුල වැනි අපේ පරම්පරාවේ සහෝදරයනුත්, සරත් දේවානන්ද වැනි 88-89 සහෝදරයනුත් එක්ක එකතු වෙලා අපි කරන්නේ.


ලංකාවේ ආර්ථික උපදේශක පදවිය ඉඩම් හොරකමකට හිර දඬුවම් ලද තායිලන්ත අගමැතිට


(2009 දෙසැම්බර් 31 -W3Lanka) ශ්‍රී ලංකා රජයේ ආර්ථික උපදේශකවරයා ලෙස තායිලන්තයේ හිටපු අගමැති තක්ෂින් සිනවත්‍රා පත් කිරීමට නියමිත බව බැංකොක් පෝස්ට් පුවත්පත වාර්තා කරයි.


ඔහුට කොපමණ වැටුපක් ගෙවීමට ලංකාව එකඟ වී තිබේ ද යන්න හෙළිදරව් වී නොමැත. සිනවත්‍රා දැනට කාම්බෝජ රජයේ සහ එරට අගමැති හුන් සෙන්ගේ ද ආර්ථික උපදේශක පදවිය දරයි.


සිනවත්‍රා අගමැති පදවියෙන් පහ කරනු ලැබූ පසු එරට උසාවියක් විසින් ඉඩම් ගනුදෙනුවකදී කරන ලද වංචාවක් සම්බන්ධයෙන් ඔහු දෙවසරක සිර දඬුවමකට ලක් කළේ ය.


ලංකාවේ ජනාධිපතිගේ ආර්ථික උපදේශක පදවියට ඔහු පත් කරනු ලැබීම සඳහා ඒ සුදුසුකම ද අදාළ වීදැයි තවම දැනගන්නට නැත.


සංස්කරණය: ‍ලංකාව සිනවත්‍රා ආර්ථික උපදේශක ලෙස පත් කරන්නට යන බවට ඇති වාර්තා නිවැරදි නොවන බව ලංකාවේ රජය දෙසැම්බර් 31දා පැවසීය.

හොර වෙද්දු යනු මානසික රෝගීහු හා ජාවාරම්කරුවෝ ය

(2009 දෙසැම්බර් 31 -W3Lanka) රට පුරා රෝගීන් ගසා කමින් අමාරුවේ දමමින් සිටින හොර දොස්තරලා පිළිබඳ කටයුතු කිරීමේ බලය ප්‍රාදේශීය සෞඛ්‍ය වෛද්‍ය නිලධාරීන්ට පවරා තිබේ.


රට පුරා හොර දොස්තරවරු 6000ක් පමණ සිටින බව වාර්තා පවසයි. මේ හොර දොස්තරවරු වැඩියෙන් ම සිටින්නේ කොළඹින් දුර ඈත ප්‍රදේශවලයි.


මොවුන්ගෙන් ඇතැමෙක් ආයුර්වේද, යුනානි, හෝමියෝපති වැනි වෛද්‍ය සුදුසුකම් ඇති අය වුවත්, ඔවුන් කරන්නේ ඇලපති ප්‍රතිකාර හෙවත් බටහිර වෙදකමයි.


තවත් සමහරු වෛද්‍ය ක්ෂේත්‍රයේ වෙනත් රැකියාවල නියුතු ව සිටි අය වෙති. මොන ම සුදුසුකමක්වත් නොමැති අය ද බහුල ය. නිදසුනක් ලෙස පදවි-ශ්‍රීපුර ප්‍රදේශයේ කලක් වෛද්‍ය ප්‍රතිකාර කළ එක් පුද්ගලයකුට තිබුණු සුදුසුකම වූයේ ඔහුගේ අයියා සහකාර වෛද්‍ය නිලධාරියකු වීමයි.


මේ අතර, ආයුර්වේදයේ හා දේශීය සම්ප්‍රදායික වෙදකමේ නමින් කෙරෙන ජාවාරම් රැසක් ද රට පුරා තිබේ. මෙම ඊනියා සායන පවත්වන්නන් බොහෝ දෙනෙක් භින්නෝන්මාද රෝගී ලක්ෂණවලින් යුතු අය වෙති. එනම් තමන්ට යම් ගුප්ත බලයක් ඇතැයි සිතන්නෝ වෙති. පිළිකා වැනි මාරාන්තික රෝග පවා සිය ප්‍රතිකාරවලින් සුව කළ හැකි බව ඇතැමෙක් විශ්වාස කරති. සමහරු ඇස්වල සුද නැති කරන්නට කකුලට බෙහෙත් බඳිති. එක් අතකින් එය නරක ම නැත. මක් නිසා ද යත් ලෙඩා අන්ධ වන්නේ ඇසට දමන බෙහෙතින් අැස නරක් වී නොව කාචයේ සුද බැඳීමෙන් ම නිසා ය.


මොවුන් සමාජයට කරන හානිය සුළු පටු නොවේ. නිදසුනක් ලෙස රිය අනතුරකට ලක්ව රජයේ රෝහලක ශල්‍යාගාරයකදී සැත්කමකට පාත්‍ර කළ එක් රෝගියෙක් අනුරාධපුර ප්‍රදේශයේ එක් කැඩුම් බිඳුම් වෙදෙකු ළඟට ප්‍රතිකාර ගැනීමට ගිය විට ඔහු සමග ගිය පුද්ගලයකුට මෙම වෙදා පිහියක් දී අර ප්ලාස්ටරය කැප්පෙව්වේ ය. මාස හයකට පමණ පසු ඔහුගේ තෙලේ බලෙන් දැන් එම රෝගියා කොර ගසමින් ඇවිදියි.


ලාංකීය සමාජය සාමාන්‍යයෙන් ද විද්‍යාව පිළිගන්නේ ඉගෙගෙන රස්සාවක් කිරීම සඳහා සුදුසු දෙයක් ලෙස මිස ජීවිතය තුළ භාවිතා කළ යුතු දෙයක් ලෙස නොවේ. මෑත කාලයේදී නලින් ද සිල්වා වැනි අය විසින් ඉදිරිපත් කරන ලද දාර්ශනිත මතවාද ජාතිවාදය ඔස්සේ සමාජයට පෙරී කාන්දු වී ඇත්තේ සාමාන්‍ය මිනිසුන්ගේ මොළ තවත් කුරුවල් කරමිනි.


යන්ත්‍ර මන්ත්‍රවලින්, පිරිත් පැන්වලින්, බෝධි පූජාවලින්, දේව බලයෙන්, විශ්ව ශක්තියෙන් ලෙඩ සුව කරන්නන් හත් අටදෙනෙකු මේ දිවයිනේ ඔනෑම පඳුරකට පයින් ගැසූ විට දිව යන්නේ සමාජයේ පැතිරෙමින් තිබෙන මුග්ධකම නිසා ය.


ලංකාව සෞඛ්‍යවන්ත දේශයක් බවට පත් කිරීමට නම් මෙකී නොකී සියලු ගොඩ වෙද්දු හා රටේ වෙද්දු අල්ලා මානසික රෝහල්වලට හා සිර ගෙවල්වලට යවා පුනරුත්ථාපනය කළ යුතු ව තිබේ.


බටහිර විද්‍යාව සමග ඇති දාර්ශනික ප්‍රශ්න මේ හොර ජාවාරම් සහ මානසික රෝග සමග පටලවා නො ගත යුතු ය.


රාජපක්ෂලා, ෆොන්සේකලා කරන්නේ ඌරන්ගේ මාළු ඌරන්ගේ ඇඟේ තියා ඌරන් ලවා ම කප්පවා ගැනීම බව ඌරෝ නො දනිති


(2009 දෙසැම්බර් 31 -W3Lanka) එක් ජනකතාවක අසූචි තවරා ගත් ඌරෙක් සිංහයකු සටනට අභියෝග කරයි. සිංහයා ඌරා දෙස බලා මඟ හැර යයි. ඒ ඌරා සමග සටන් කිරීම තමන්ට මදිකමක් ලෙස සලකමිනි.

පසුගියදා ජනතා විමුක්ති පෙරමුණේ නායක සෝමවංශ අමරසිංහ ජනාධිපතිවරයාට විවාදයකට විවෘත ආරාධනයක් කළේ ය. එක්කෝ ජනාධිපතිතුමාට එදා විමල් හෝ ඩලස් හෝ මේ ඌරු කතාව මතක් කර දුන්නේ නැත. නැතිනම් ජනාධිපතිතුමා තමන්ට හා තම පවුලට සුබ අනාගතයක් උදා කර දීමට උදව් කළ සොමවංශට ප්‍රසිද්ධියේ ඌරා කියන්නට තරම් අශිෂ්ඨ වූයේ නැත.

නොබෝදා බෑණාගේ අවි ජාවාරම් ගැන විවාදයකට එන්නැයි විමල් වීරවංශ ජනාධිපති අපේක්ෂක සරත් ෆොන්සේකාට අභියෝග කළ විට ජවිපෙ මන්ත්‍රී අනුර කුමාර දිසානායකට මේ ඌරු කතාව මතක් විය. ඔහු පැවසුවේ සිය පක්ෂ නායකවරයා කළ අභියෝගයට උරෙකු පිළිතුරු දී ඇති බවයි.


මේ ඌරා මීට වසර කීපයකට පෙර ජවිපෙ දේශපාලන මණ්ඩල සභිකයකු, ප්‍රචාරක ලේකම් හා පාර්ලිමේන්තු කණ්ඩායම් නායක විය. මේ ඌරා දිගු කලක් සිටි ජවිපෙ දේශපාලන මණ්ඩලය ද එසේ නම් නරා වලක් ම විය යුතු ය. අනුර කුමාර දිසානායක ද ඒ ඌරා සමග ඒ වලේ ලැග සිටි අයෙකි. එහෙයින් ඔහු ද ඌරකු විය යුතු ය.

“බොරු කතා කියල මේ විවාදය මඟ හරින්න එපා. සත්තුන්ගෙ නම් කියල සත්තුන්ට අපහාස කරන්න එපා,” යි විමල් වීරවංශ ඊයේ පැවති මාධ්‍ය හමුවකදී කීවේ ය. එය මේ යුගයේ යමෙකු සත්ව හිමිකම් පිළිබඳ කර ලද විශිෂ්ඨ ම ප්‍රකාශය වන්නා සේ ම වීරවංශ විසින් කරන ලද එක ම ස්වයං විවේචනය ද වේ. අනුර කුමාර දිසානායක එය පිළි ‍නො ගතහොත් ඔහු ද සිය වර්ගයාට කරන්නේ මහත් අපහාසයකි.



එහෙත්, සිදුවෙමින් තිබෙන දේ පිළිබඳව මාක්ස්වාදීන් ලෙස අපි කණගාටු වෙමු. නිර්ප්‍රභූ නිර්ධන පංතික සම්භවයක් සහිත මේ පුද්ගලයන් ධනේශ්වර දේශපාලක ප්‍රභූන්ගේ බහිස්‍රාවයන්ගෙන් පෝෂණය වන නියම ඌරන් බවට පත් වී ඇත. උන් එකිනෙකාගේ ඇඟේ තැවරී ඇති අසූචිවලට හිනා වෙමින් සිටින අතර රාජපක්ෂලා, ෆොන්සේකලා කරන්නේ ඌරන්ගේ මාළු ඌරන්ගේ ඇඟේ තියා ඌරන් ලවා ම කප්පවා ගැනීම බව ඌරෝ නො දනිති.

2009-12-30

කඳුරට දෙමළ ඡන්ද මහින්දගෙන් ඈත් වන ලකුණු


(2009 දෙසැම්බර් 30 -W3Lanka) ලංකා කම්කරු කොංග්‍රසයේ ජාතික සංවිධායක ආර්. යෝගරාජන් සහ නියෝජ්‍ය ඇමති එම්. සචිතානන්දන් එම පක්ෂයෙන් ඉවත් වී එක්සත් ජාතික පෙරමුණේ ජනාධිපති අපේක්ෂක සරත් ෆොන්සේකාට සහයෝගය පළ කිරීම ජනාධිපතිවරණය සම්බන්ධයෙන් කඳුරට දෙමළ ජනයාගේ ප්‍රතිචාරය කෙරෙහි දැඩි බලපෑමක් කිරීමට ඉඩ ඇති බව පෙනේ.


යෝගරාජන් විපක්ෂයට එක් වෙමින් පෙන්වා දුන් කරුණක් වන්නේ තම ප්‍රජාව වන ඉන්දීය සම්භවයක් ඇති කඳුරට දෙමළ ජනතාව පසුගිය බස්නාහිර හා සබරගමු පළාත් සභා ඡන්දවලදී තම පක්ෂයේ එක් නියෝජිතයකු හෝ පළාත් සභාවලට පත් නො කිරීමෙන් තම පක්ෂය එක්සත් ජනතා නිදහස් සන්ධානය සමග ඇති සන්ධානය ප්‍රතික්ෂේප කර ඇති බවයි.


පසුගිය මධ්‍යම පළාත් සභා මැතිවරණයේදී කඳුරට දෙමළ ජනයා නියෝජනය කරන සියලු දේශපාලන පක්ෂ ජනාධිපති මහින්ද රාජපක්ෂගේ දෑත් ශක්තිමත් කරන්නට ගොස් සිටියදී පවා වතුකරයේ ජනයා මහින්දට එතරම් කැමැත්තක් පෙන්වූයේ නැත. නුවරඑළිය දිස්ත්‍රික්කයෙන් තොන්ඩමන්, චන්ද්‍රසේකරන් හා අනෙක් සියලු වතු කම්කරු නියෝජිතයන්ගේ සහයෝගයෙන් සන්ධානය ඡන්ද 146,418ක් ලබා ගනිද්දී එක්සත් ජාතික පක්ෂය ඡන්ද 128,289ක් ලබා ගත්තේ ය.


වතුකරයේ හදවත වන් නුවරඑළිය - මස්කෙළිය ආසනය වැඩි ඡන්ද 10,000කින් එජාපය ජය ගත්තේ ය.


සන්ධාන ආණ්ඩුව පසුගිය සිව් වසරක කාලය තිස්සේ ම කඳුරට දෙමළ ජනයා සම්බන්ධෙයන් අනුගමනය කළේ උතුරේ දෙමළ අරගලය මර්දනය කිරීමේ මුවාවෙන් එම ප්‍රජාව ද මර්දනයට ලක් කර බියවැද්දීම හා වරදාන ඔස්සේ ඔවුන්ගේ නායකයන් තම ග්‍රහණයට ගැනීමයි. පීඩිත කඳුරට ජනයාගේ නායකයන් සන්ධාන ආණ්ඩුවට කඩේ යාමේ ප්‍රතිඵලය වී තිබෙන්නේ බස්නාහිර හා සබරගමුවේ ‍පීඩිත දෙමළ මිනිසුන්ගේ ඡන්දයෙන් සිංහල ජාතිවාදීන් පිරිසක් පළාත් සභාවට පත් වීමයි.


ජනාධිපති තාත්තා වෙනුවෙන් නාවික නිලධාරි පුතා ප්‍රචාරයේ


(2009 දෙසැම්බර් 30 -W3Lanka) ශ්‍රී ලංකා නාවික හමුදාවේ දෙවන ලුතිනන්වරයකු වන ජනාධිපති මහින්ද රාජපක්ෂගේ දෙවෙනි පුත් යෝෂිත රාජපක්ෂ 1950 නාවික හමුදා පනත උල්ලංඝනය කරමින් ජනාධිපතිවරණ ප්‍රචාරක රැස්වීම් අමතමින් සිය පියා වෙනුවෙන් ප්‍රචාරක කටයුතුවල යෙදෙමින් සිටින බව ජවිපෙ පාර්ලිමේන්තු මන්ත්‍රී අනුර කුමාර දිසානායක පවසයි.


මේ පිළිබඳව නාවික හමුදාපතිවරයා වෙතින් කරුණු පැහැදිලි කිරීමක් බලාපොරොත්තු වන බව ද දිසානායක පවසයි.


ලංකාවේ පොතේ ඇති නීතිය අනුව කිසිදු හමුදා නිලධාරියකු දේශපාලනයේ යෙදීම තහනම් ය. ජනාධිපතිවරයාගේ පුතාට ඒ සඳහා විශේෂ අවසරයක් තිබේ යයි එහි සඳහන් වන්නේ නැත.

ජැක්සන් කඩේ යන ගමන් ම බඩුත් ව්කුණයි

(2009 දෙසැම්බර් 30 -W3Lanka) මේ දිනවල ජනාධිපති මහින්ද රාජපක්ෂගේ මැතිවරණ ප්‍රචාරක රැළිවල කලාකරුවන් නියෝජනය කරමින් කතා පවත්වන ජැක්සන් ඇන්තනි විසින් අධ්‍යක්ෂණය කරන ලද අබා චිත්‍රපටය දෙසැම්බර් 31දා රාත්‍රියේ ජාතික රූපවාහිනියෙන් ප්‍රදර්ශනය කිරීම සඳහා චිත්‍රපටයේ නිෂ්පාදකවරුන්ට අති විශාල මුදලක් ගෙවා ඇති බව ද එයින් සැලකිය යුතු පංගුවක් ජැක්සන් විසින් ලබාගෙන ඇති බව ද වාර්තා වේ.

මීට පෙර ද මෙම චිත්‍රපටය දිවයින පුරා පාසල් ළමුන්ට පෙන්වා මුදල් උපයා ගැනීම පිණිස අවශ්‍ය ප්‍රචාරය ලබා දීමට ජනාධිපති මහින්ද රාජපක්ෂ පෞද්ගලිකව ම මැදිහත් වී ප්‍රකාශයක් කළේ ය. 


කලාත්මක හෝ ඓතිහාසික වශයෙන් හෝ සම්භාවනීය කෘතියක් නො වන අබා චිත්‍රපටය ඔස්සේ කෝටිපතියකු වීමට ජැක්සන්ට අවස්ථාව ලැබිණි.



ඔබ දන් දෙන ඇසින් ලංකාව ඇස් අපනයනයෙන් ලොව දෙවෙනි තැනට


(2009 දෙසැම්බර් 30 -W3Lanka) ලංකා අක්ෂිදාන සංගමය වෙත ඔබ මිය ගිය විට දන් දෙන අක්ෂි කුනිත හෙවත් Cornea හේතුවෙන් ලංකාව එක්සත් ජනපදයට පමණක් දෙවන වන කුනිත අපනයන දේශය බවට පත් වී තිබේ.


එහෙත්, අපනයනකරුවා යන වදනට අක්ෂිදාන සංගමය එතරම් කැමැත්තක් නො දක්වන අතර පවසන්නේ තමන් කරන්නේ දන් දීමක් බවයි. මෙසේ ඇස් දන් දීම පවත්වාගෙන යාම සඳහා මෙම ලාභ නො ලබන ආයතනය විකසන ගාස්තුවක් පමණක් අය කරන බව පවසයි.


1964 ආරම්භයේ සිට අක්ෂිදාන සංගමය රට තුළ හා පිටරට ඇස් 135,000ක් දන් දී ඇති බව පවසයි. තවත් 870,000ක් දෙනා ඇස් දන් දීමට ලියාපදිංචි වී ඇති බව ද සංගමය පවසයි.


ලංකාවේ ඇස්වලින් වැඩියෙන් ම ලෝකය බලා තිබෙන්නේ පකිස්තානයේ හා ඊජිප්තුවේ මිනිස්සු ය.

2009-12-29

පෙට්‍රල්වලින් ඡන්ද ගුංඩුවක්

(2009 දෙසැම්බර් 30 -W3Lanka) පෙට්‍රල්වලින් 100%කට ආසන්න බදු අය කරමින් කාලාන්තරයක් තිස්සේ ජනතාව නිර්දය අන්දමින් ගසා කෑ ආණ්ඩුව ජනාධිපතිවරණයේදී මහින්ද රාජපක්ෂට ඡන්දය ලබා ගැනීම සඳහා ගුංඩුවක් ලෙස පෙට්‍රල් මිළ රු. 15කින් පහත හෙළීමට පියවර ගෙන ඇත. 

මෙම පහත හෙළීම ප්‍රතිශතයක් ලෙස 11.5%කි. එහෙත්, තවමත් රජය පෙට්‍රල්වලින් අධික ලෙස බදු අය කරමින් සිටියි. ආණ්ඩුවට අවශ්‍ය නම් ලෙහෙසියෙන් ම තවත් රු. 15කින් පෙට්‍රල් මිළ අඩු කළ හැකි ය. එපමණක් නොව ඩීසල් හා භූමිතෙල් මිළ ද පහත හෙළිය හැකි ය.


ඉන්දියාවත් ලංකාවත් අතර විදුලි රැහැන් පද්ධතිය 2013 වන විට ඇද අවසන්


(2009 දෙසැම්බර් 29 -W3Lanka) ඉන්දියාවත්, ලංකාවත් අතර විදුලි බලය ගනුදෙනු කිරීම සදහා විදුලි රැහැන් පද්ධතියක් ඉදි කිරීම සඳහා ලංකා විදුලි බල මණ්ඩලයත් ඉන්දියාවේ ප්‍රමුඛතම සමුප්‍රේෂණ සමාගම වන Powergrid Corporation of India Ltd අතර අවබෝධතා ගිවිසුමක් අත්සන් කිරීමට නියමිත ය.


එම ගිවිසුම අනුව 2010 පෙබරවාරි-මාර්තු මාසවලදී ඉදි කිරීම් ආරම්භ වන මෙම ව්‍යාපෘතිය 2013 වන විට අවසන් වීමට අපේක්ෂිත ය.


මෙගවොට් 500ක ධාරිතාවක් සහිත මෙම රැහැන් පද්ධතිය මදුරෛ සිට අනුරාධපුර දක්වා කිලෝමීටර 285කින් යුක්ත ය. එයින් කිලෝමීටර් 50ක් ගමන් කරන්නේ මුහුද යටිනි. මෙවැනි මුහුද යටින් දිවෙන විදුලි රැහැන් පද්ධතියක් දැනට ඇත්තේ බ්‍රිතාන්‍යය හා ප්‍රංශය අතර පමණි.


මෙම ව්‍යාපෘතිය සඳහා ශක්‍යතා අධ්‍යයනයක් ඉන්දීය සමාගම විසින් කර තිබේ. ව්‍යාපෘතිය සඳහා ඉන්දීය රු. කෝටි 2,300ක් වැය වෙතැයි ගණන් බලා තිබේ.


ඉන්දියාවේ දුරබැහැර ප්‍රදේශ බොහොමයක තවමත් විදුලි බලය නොමැති වුව ද එරට 12%ක විදුලි බල අතිරික්තයක් තිබේ. දැනට වසරකට මෙගා වොට් 109,000ක් නිෂ්පාදනය කරන ඉන්දියාව 2012 වන විට එය තවත් මෙගා වොට් 62,000කින් ඉහළ නැංවීමට අපේක්ෂා කරයි.


ලංකාවේ වාර්ෂික විදුලි බල ධාරිතාව මෙගා වොට් 2500කි.


ඒ-9 පාරේ අලුත් කොටි කවුරුද?

(2009 දෙසැම්බර් 29 -W3Lanka) 2002 සටන් විරාමයෙන් පසු ඒ-9 පාර විවෘත වූ විට බොහෝ දෙනෙකුගේ විවේචනයට ලක් වූ කරුණක් වූයේ එල්.ටී.ටී.ඊ. සංවිධානය එම මාර්ගයේ ගමන් කළ වාහනවලින් හා ප්‍රවාහනය කරන ලද භාණ්ඩවලින් බදු අය කිරිමයි. 


දැන් ප්‍රභාකරන් හෝ කොටි සංවිධානය නැත. එහෙත් ඒ-9 පාරේ අලුත් ත්‍රස්තවාදයක් බිහි වී ඇති බව එක්සත් ජාතික පක්ෂ කුරුණෑගල දිස්ත්‍රික් පාර්ලිමේන්තු මන්ත්‍රී ගාමිනී ජයවික්‍රම පෙරේරා පෙන්වා දෙයි. 


ඒ අනුව, නම් නො කරන ලද විශේෂ පුද්ගලයෝ ඒ-9 පාරේ ගමන් ගන්නා බස් රථවලින් එක් ගමන් වාරයකට රු. 50 බැගින් වු බද්දක් අය කරති.


එජාප මන්ත්‍රීවරයා පවසන පරිදි මෙම පුද්ගලයෝ තුන් ලක්ෂයක් වූ අවතැන් වූවන් වෙනුවෙන් ආහාර සැපයුම් සිදු කළ අයගෙන් ද අධික කොමිස් ලබා ගත්හ. ඔහු කිය පරිදි බිත්තරයකින් අය කළ කෙමිස් මුදල රු.3කි.

මේ අලුත් ත්‍රස්තවාදීහු කවරහුද?



සරත් හා විපක්ෂය අවංක නම් විමල්ගේ විවාද යෝජනාව භාර ගත යුතු ය.

(2009 දෙසැම්බර් 29 -W3Lanka) තම බෑණනුවන්ට අයත් යෑයි කියන අවි ආයුධ සමාගම පසුගිය සමයේ අවි වෙළඳාමෙහි යෙදුණු ආකාරය පිළිබඳව විවාදයකට පැමිණෙන්නැයි විපක්ෂ ජනාධිපති අපේක්ෂක සරත් ෆොන්සේකාට ජාතික නිදහස්‌ පෙරමුණේ සභාපති පාර්ලිමේන්තු මන්ත්‍රී විමල් වීරවංශ ඊයේ (28 වැනිදා) එම පක්‍ෂ කාර්යාලයේදී පැවැති මාධ්‍ය හමුවේදී විවෘත අභියෝගයක්‌ කළේය.


ෆොන්සේකාට කරුණු දැක්‌වීමට නොහැකි නම් ඒ මහතාගේ නියෝජිතයන් කෙනකු හෝ දෙදෙනකු ද තම පාර්ශ්වයෙන් ද ඒ සමාන නියෝජිතයන්ගෙන් ද සමන්විතව පැවැත්විය යුතු අදාළ විවාදය මෙරට සියලුම විද්යුත් හා මුද්‍රිත මාධ්‍යය ඉදිරියේ සිදුවිය යුතු යෑයි ද වීරවංශ කියා සිටියේය. ජනාධිපති අපේක්ෂක සරත් ෆොන්සේකා නිකම් ම නිකම් මන්ත්‍රීවරයකු වන විමල් වීරවංශ සමග විවාදයකට යාම තරම් නොවේ යයි සිතන්නේ නම් විකල්පයක් ද විමල් යෝජනා කරයි.


මෙය ඉතා කාලීන යෝජනාවක් බව අපේ ද අදහසයි. මේ ඔස්සේ පසුගිය යුද සමයේ සිදු වූ අවි ජාවාරම් මෙන් ම සෙසු බොහෝ දූෂණ පිළිබඳව ද දේශපාලනික සංවාදයක් ආරම්භ කළ හැකි ය. කට කතා ලෙස පමණක් පැතිර යමින් ඇති තොරතුරු බොහොමයක් දැන ගැනීමේ අවස්ථාව ද ජනතාවට ලැබෙනු ඇත. 

විශේෂයෙන් ම, 2005න් පසු අවි මිළ දී ගැනීම සඳහා පිහිටුවනු ලැබූ ලංකා ලොජිස්ටික්ස් ඇන්ඩ් ටෙක්නොලොජීස් නම් ගුප්ත ආයතනයේ කටයුතු පිළිබඳව ද මෙහිදී සංවාද කළ යුතු ය. 


බෑණාගේ ව්‍යාපාර කටයුතු ෆොන්සේකාට 100%ක් ම අදාළ නො වන මුත්, බෑණා ලාභ ලැබීම පිණිස ෆොන්සේකාගේ නිල බලය පාවිච්චි කළා ද යන්න දැන ගැනීම ජනතාවට වැදගත් වේ. 

ෆෙන්සේකාගේ බෑණා පමණක් නොව මහින්ද රාජපක්ෂගේ සහෝදරයින්, පුතුන්, ඥාති පුතුන්, ඥාති සහෝදරයන්, මස්සිනාලා, බාප්පලා, පුංචි අම්මලා, නැන්දලා, මාමලා පමණක් නොව ඈත නෑයින් දක්වා සියලු දෙනා මෙන් ම වෙනත් මැති ඇමතිවරුන්ගේ ඥාතීන් ද ‍දේශපාලන බලය පාවිච්චි කරමින් කළ ව්‍යාපාර පිළිබඳව දැනගැනීමට හිමිකමක් ජනතාවට තිබේ. 


එසේ ම, මේ මහා දූෂණ හමුවේ සුළු පරිමාණ එකක් ලෙස පෙනුනත්, වැටුප් නො ලබා මන්ත්‍රීකමක් කළ විමල් වීරවංශ ලක්ෂ දෙසීයක මන්දිරයක් ඉදි කරන්නට යන හැටි ද දැන ගැනීමට මෙවැනි විවාද හරහා පුළුවන. 


සරත් ෆොන්සේකා හා විපක්ෂය දූෂණයෙන් තොර අනාගතයක් පිළිබඳ කරන ප්‍රකාශ අවංක ඒවා නම්, විමල් වීරවංශ උදා කර දුන් මෙම අවස්ථාව ඔවුන් පැනලා භාර ගත යුතු ව තිබේ. 


ඒ ඔස්සේ ප්‍රධාන ජනාධිපති අපේක්ෂකයන් දෙදෙනා අතර විවාදයකට ද මඟ පාදා ගත හැකි ය.





රු. කෝටි 3250ක පීතෘ සත්කාරයක් නාමල් පුතාගෙන් ජනාධිපති තාත්තාට

(2009 දෙසැම්බර් 29 -W3Lanka) මෑත ඉතිහාසයේදී පුතකු පියා වෙනුවෙන් කරන ලද මිළ අධික ම කෘත ගුණ සැලකීම ලෙස දැකිය හැක්කේ නාමල් පුතා ජනාධිපති මහින්ද රාජපක්ෂ තාත්තාට ඡන්දය දෙන්නැයි ජනප්‍රිය පුද්ගලයන්ගේ කටවලින් කියවා ගන්නා දැන්වීම් පෙළයි.



රස්සාවක් නො කළ ද නාමල් පුතා සිය තාරුණ්‍යයට හෙටක් නම් සංවිධානය හරහා මේ වෙනුවෙන් කර තිබෙන වියදම අතිශය සංවේදී ය. 

මෙම ජනප්‍රිය පුද්ගලයෝ මේ දැන්වීම් සඳහා කිසිදු මුදලක් අය නො කළ බව පවසති. සාමාන්‍යයෙන් මුදලට අතිශය සංවේදී වන මෙම පුද්ගලයෝ සංවේදී නායකයාගේ සංවේදීභාවය හමුවේ සිය සාමාන්‍ය සංවේදිත්වය වන මුදලට පවා අසංවේදී වීමට තරම් සංවේදී වී තිබේ.



තාරුණ්‍යයට හෙටක් රූපවාහිනී දැන්වීම් ව්‍යාපෘතිය යටතේ දැන්වීමක් එක් වරක් පළකිරීම සඳහා වියදම (අවම වශයෙන්) රු 140,000/-ක් නම්, දිනකට එක් නාලිකාවක් සදහා දැන්වීම් වාර (අවම වශයෙන්) වාර 72ක් විකාශය කිරීම සඳහා එක් නාලිකාවක් සඳහා දිනකට වියදම (අවම වශයෙන්) රු. මිලියන 10.1ක් වේ. 

මෙම දැන්වීම් සිරස, එම්ටීවී, ටීඑන්එල්, ස්ර්ණවාහිනී, දෙරණ, අයි ටී එන්, රූපවාහිනී යන නාලිකා 7හි ම පළ කරනු ලැබේ.

මෙම නාලිකා 7හි පළකිරීමට දිනකට වැයවන මුදල රුපියල් මිලියන 70.7 කි.


නාමයෝජනා භාරදුන් දිනයේ සිට ජනාධිපතිවරණ දිනය දක්වා දින 46ක් ඇති අතර එම කාලසීමාව සදහා තාරුණ්‍යයට හෙටක් දැන්වීම් සදහා වැය වන මුළු මුදල රුපියල් මිලියන 32,500 කී. (බිලියන 3.25කි.) තේරෙන භාෂාවෙන් කීවොත් රු. කෝටි 3250කි. (මේ වනාහි රේඩියෝ, පෝස්ටර් හා කටවුට් හා අන්තර්ජාල දැන්වීම් වලට දරන ලද වියදමට අමතරව ය.)


පිය සෙනෙහසක් ගැන නො දන්නා විපක්ෂ නරුමයෝ "මේ මුදල් ලැබුණේ කොහෙන්ද, වියදම් කරන්නේ තරුණයන්ට හෙටක් සඳහා ද නැතිනම් කාගේ හෙටක් සදහා ද?" වැනි ප්‍රශ්න අසති.

2009-12-28

දඹර අමිල හිමි අත්අඩංගුවට ගැනීම පිටුපස විමල්?

(2009 දෙසැම්බර් 28 -W3Lanka) රහස් පොලිසිය විසින් අත්අඩංගුවට ගන්නා ලද දේශහිතෛෂී ජාතික මධ්‍යස්ථානයේ සභාපති පුරාවිද්‍යා විශාරද අධිකරණ සංඝ නායක පූජ්‍ය දඹර අමිල හිමියන් රිමාන්ඩ් භාරයට ගෙන යාම සදහා රැගෙන ගිය වාහනයේ සිටි පොලිස් නිලධාරියකුගේ ජංගම දුරකථනයට කතා කර විස්තර විමසූ විමල් වීරවංශ මන්ත්‍රීවරයා හිමියන් සමග කතා කිරීමට උත්සාහ කර ඇති මුත් එහිමි එය ප්‍රතික්ෂේප කර ඇති බව ද වාර්තා වේ. 

විමල් වීරවංශ සහ දඹර අමිල හිමි කලක් දේශ ශිතෛෂී ජාතික ව්‍යාපාරයේ නායකයන් ලෙස එකට කටයුතු කළ අතර විමල් ජවිපෙන් වෙන් වූ පසු අමිල හිමි එම සංවිධානයෙන් වෙන් වී දේශහිතෛෂී ජාතික මධ්‍යස්ථානය බිහි කර දිගට ම ජවිපෙට සමීපව කටයුතු කළේ ය.



දිනමිණ පුවත්පතට අනුව, පුද්ගලයන් රවටා විවිධ රටවලට යවන බවට පොරොන්දු වී දඹර අමිල හිමියන් මුදල් ලබාගත් බවට මේ වන විට පැමිණිලි 15 ක් ලැබී ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී අයි. එම්. කරුණාරත්න පවසයි. වංචාවට හසු වූ තවත් පුද්ගලයන් පැමිණිලි කිරීමට ඉදිරිපත් වනු ඇතැයි ද පොලිසිය විශ්වාසය පළ කරයි. ඒ අනුව බලන විට දඹර අමිල හිමියන් අත්අඩංගුවට ගෙන තිබෙන්නේ අනාගතයේ එන පැමිණිලි ද වෙනුවෙනි.


මේ පැමිණිලි ලැබීමෙන් පසු සිදුකළ විමර්ශන මඟින් සැකකාර හිමියන් තවත් කීප දෙනකුගේ සහාය ඇතිව දිගුකලක සිට මේ වංචාව සිදුකර තිබෙන බවට හෙළිව ඇතැයි පොලීසිය කියයි. එසේ නම් පැමිණිලි ලැබී ඇත්තේ මෑතකදී විය යුතු ය. දිගු කලක සිට කරන ලද වංචාවක් සම්බන්ධයෙන් පැමිණිලි කිරීම පමා වී ඇත්තේ මන්ද?


දඹර අමිල නාහිමි රහස් පොලිසිය විසින් අත්අඩංගුවට ගනු ලැබීම පිළිබඳව කරුණු පැහැදිලි කිරීමේ මාධ්‍ය සාකච්ඡාවක් ඊයේ දේශහිතෛෂී ජාතික මධ්‍යස්ථානය විසින් හදිසියේම කැඳවා තිබිණි. එහිදී අදහස් දක්වමින් එම මධ්‍යස්ථානයේ ලේකම්, පාර්ලිමේන්තු මන්ත‍්‍රී විජිත හේරත් මහතා මෙසේ පැවසීය.


"මේක ඉතාම පැහැදිලි දේශපාලන පලිගැනීමක්. රට වෙනුවෙන් ජීවිත පරිත්‍යාගයෙන් කටයුතු කළ පූජ්‍ය දඹර අමිල නායක හාමුරුවන්ගෙන් ඉතා පහත් අන්දමින් සිදු කළ දේශපාලන පලිගැනීමක්. මේක තමයි රාජපක්‍ෂ පාලනයේ ඒකාධිපති වියරුව. මේ වගේ පහත් බාල වර්ගයේ මර්දන ක‍්‍රියාමාර්ගවලින් අපව නතර කරන්න බැහැ. අපි තවත් ශක්තිමත් වෙනවා. තවත් ධෛර්යවත් වෙනවා. මේ තමයි රාජපක්‍ෂ මහත්තයාගේ වෛරී දේශපාලනය. මව්බිමේ නිදහස වෙනුවෙන් දඹල අමිල ස්වාමීන් වහන්සේ සමග පෙළ ගැහෙන්න අපි සූදානම්. ඒ වගේම අපි මේ රටේ සියලූ ප‍්‍රගතිශීලි ජනතාවගෙන් ඉල්ලා සිටිනවා පූජ්‍ය දඹල අමිල නාහිමි බේරා ගැනීම සඳහා පෙරමුණ ගන්නා ලෙස"


විජිත හේරත් මහතා වැඩිදුරටත් මෙසේද පැවසීය. "පූජ්‍ය දඹර අමිල හාමුදුරුවෝ කියන්නේ මේ රටේ නිදහස වෙනුවෙන්,ප‍්‍රජාතන්ත‍්‍රවාදය වෙනුවෙන් දිවි නොතකා සටන් කළ කෙනෙක්. උන්වහන්සේ පසුගිය 23 වැනිදා දේශහිතෛෂී ජාතික මධ්‍යස්ථානයේ මාධ්‍ය හමුවේදී,විධායක ජනාධිපති ක‍්‍රමය අහෝසි කරන,ප‍්‍රජාතන්ත‍්‍රවාදය ස්ථාපිත කරන නිර්පාක්‍ෂික පොදු අපේක්‍ෂක සරත් ෆොන්සේකා මහතාට සහාය පළ කරන බව පැවසුවා. ඒ වගේම 24 වැනිදා ප‍්‍රජාතන්ත‍්‍රවාදය වෙනුවෙන් කැපවූ තවත් ස්වාමීන් වහන්සේලා පිරිසක් සමග මාධ්‍ය සාකච්ඡාවක් පැවැත්වූවා. එදා සවස මේ "මහජරා" ආණ්ඩුවේ රහස් පොලිසියේ සුදු වෑන් රථයක් පැමිණ උන්වහන්සේගේ හොරණ පන්සලට ඇවිත් සොයා තිබෙනවා. ඒ වගේම ඊට පසුවදා උදේ සිවිල් ඇඳුමෙන් සැරසුනු රහස් පොලිස් නිලධාරියෙක් උන්වහන්සේව සොයා තිබෙනවා.


ඉන් පසුව අමිල හාමුදුරුවෝ පොලිස්පතිවරයාට කතා කොට මේ සම්බන්ධයෙන් ප‍්‍රශ්න කළාම ඔහු පවසා තිබෙනවා චෝදනා තුනක් ලැබී තිබෙනවා,ඒ ගැන ප‍්‍රශ්න කරන්න අවශ්‍යයි කියා. මේ දින කිහිපයම නිවාඩු දින නිසා,හාමුරුවෝ දැනුම් දුන්නා සඳුදා උදේ ඇවිත් ප‍්‍රකාශයක් දෙන්නම් කියා.


එහෙම තිබියදී උන්වහන්සේ ඊයේ හෝමාගමදී රැලියට සහභාගි වුණා. ඒ රැලියේදී නිදහස හා ප‍්‍රජාතන්ත‍්‍රවාදය උදෙසා අදහස් පළ කළා. ඉන් පසුව උන්වහන්සේගේ විශ්වවිද්‍යාල මිත‍්‍රයකුගේ දරුවකුගේ උපන් දිනයක් වෙනුවෙන් පිරිත් කියන්න ගියා. අද උදේ රහස් පොලිසියෙන් පැමිණ ප‍්‍රශ්න කරන්න තිබෙන බව පවසා රැගෙන ගොස් තිබෙනවා."


දඹර අමිල නාහිමියන් රහස් පොලිසිය විසින් අත්අඩංගුවට ගැනීමට විරෝධය දක්වමින් අද (28) සවස 2.00 ට කොටුව බෝධිය ඉදිරිපිටදී දැවැන්ත උද්ඝෝෂණයක් පැවැත්වීමට කටයුතු සංවිධානය වෙමින් පවතින බව ජවිපෙට සම්බන්ධ ලංකා ටෲත් වෙබ් අඩවිය පවසයි.






ප්‍රශ්න නො විසඳා සුනාමියෙන් අවතැන් වූ කොළඹ වැසියන් කඳවුරුවලින් පන්නන්න සැරසේ


(2009 දෙසැම්බර් 28 -W3Lanka) පසු වසරක් තිස්සේ රත්මලාන, මොරටුව වැනි ප්‍රදේශවල තාවකාලික සුනාමි සහන කඳවුරුවල ජීවත් වන අවතැන් වූ ජනතාව එම කඳවුරුවලින් පිට වී යන්නේ නම් රු. 150,000ක්ලබා දීමට රජය කැමැත්ත පළ කර තිබේ.


එහෙත්, කදවුරුවාසී ජනතාව පවසන්නේ තමනට ‍කොළඹ දිස්ත්‍රික්කයෙන් එක පර්චසයක ඉඩමක්වත් මිළ දී ගැනීමට මෙම මුදල ප්‍රමාණවත් නො වන බවයි. ඔවුන්ගේ උපන් බිම් වන කොළඹ වෙරළබඩ ප්‍රදේශ සමග ඔවුන්ගේ ආර්ථික හා සමාජ ජීවිතය බද්ධ වී ඇති බැවින් ඔවුහු වෙනත් ඈත ගම්බද ප්‍රදේශ වෙත යාමට ද කැමැත්තක් නො දක්වති.


ඔවුන් ඉල්ලා සිටින්නේ තමන්ට පැල්පතක් හෝ ඉදි කර ගැනීම සඳහා කොළඹ අවටින් ඉඩමක් ලබා දෙන ලෙසයි.


මෙම අවතැන් කඳවුරු ජනයා අප සමග පැවසූ පරිදි පසුගිය පළාත් සභා මැතිවරණය සමයේ එක්සත් ජාතික නිදහස් සන්ධානයේ අපේක්ෂක දුමින්ද සිල්වා මෙම ජනතා‍වගේ ප්‍රශ්නයට කඩිනම් විසඳුම් ලබා දෙන බව පොරොන්දු වී ඔවුන්ගේ ඡන්ද ලබා ගත්ත ද මැතිවරණයෙන් පසුව ඔවුන් කෙරෙහි අවධානය යොමු නො කළ බවයි.


2005දී රජය විසින් කරනු ලැබූ විගණනයකින් පෙන්වා දෙනු ලැබුවේ ඒ වන විට වියදම් කර තිබුණේ ලැබුණු ආධාරවලින් 13%ක් පමණක් බවයි. ලංකාවට සුනාමි ආධාර ලෙස ලැබුණු ඩොලර් බිලියන 2.2කින් (රු. කෝටි 22,000කට වැඩි මුදලකින්) ඩොලර් මිලියන 603.4ක් (රු. කෝටි 6000කට වඩා) සුනාමි ව්‍යසනයට අදාළ නො වන ව්‍යාපෘති සඳහා වැය කර ඇති බව ද, තවත් ඩොලර් මිලියන 471.9කට (රු. කෝටි 5000කට) වූ දේ අපැහැදිලි බවත් ට්‍රාන්පේරන්සි ඉන්ටර්නැෂනල් ආයතනය පවසයි.


මෙවැනි පසුබිමක් කොළඹ දිස්ත්‍රික්කයේ සුනාමියෙන් අවතැන් වූ ජනයාගේ ප්‍රශ්නය වෙනුවෙන් රු. කෝටි කීපයක් වෙන් කිරීමට රජයට බැරි ඇයි? ඔවුනට තට්ටු නිවාස ව්‍යාපෘතියක් හෝ ලබා දීමට බැරි ඇයි? ඔවුන් ධනවාදය විසින් මිනිස් කසල ලෙස සලකනු ලබන සමාජ තීරයට අයත් දුගීන් නිසා ද?



ක්‍රිකට්වලදී මෙන් ම දේශපාලනයේදී ද ඉන්දියාව කරන්නේ ප්‍රතිවාදියාට නරක තණතීරු සැපයීමයි



(2009 දෙසැම්බර් 28 -W3Lanka) ලංකාවත්ඉන්දියාවත් අතර ඊයේ දිල්ලියේදී පැවැත්වීමට නියමිතව තිබුණු පස්වන එක් දින ජාත්‍යන්තර තරගය මුලින් පන්දුවට පහර දෙමින් සිටි ලංකා කණ්ඩායමේ 24වන ඕවරයේ තුන්වන පන්දුවෙන් අවසන් විය. ඉන්දියාව විසින් සපයා තිබුණු පර්වතයක් වැනි අනතුරුදායක තණ තීරුවේ ක්‍රීඩා කිරීම ලංකාව විසින් ප්‍රතික්ෂේප කරන ලදී. තරග තීරක විසින් මෙම විරෝධය පිළි ගන්නා ලදී.‍


කුපිත වූ ප්‍රේක්ෂකයෝ පු‍ටු පොළවේ දමා ගසද්දී බැටන් පොලු ගත් පොලිසිය ද තරගයට අවතීර්ණ විය. ප්‍රේක්ෂකයන්ට ඉන්දියාව දිනනවා පමණක් නොව තරග කරනවා ද බලන්නට අවශ්‍ය විය. 


තරග දිනීම සඳහා ආගන්තුක කණ්ඩායමට නරක තණ තිලි පිරිනැමීම හා ඒ අනුව තම ක්‍රීඩක සංචිතය සකසා ගැනීම ඉන්දියාවේ ක්‍රිකට් ජයග්‍රහණයන්ගේ සූත්‍රය වන්නේ යම් සේ ද දේශපාලනයේදී ද සිය කලාපීය ආධිපත්‍යය සඳහා ඔවුන් අනුගමනය කරන උපාය මාර්ගය වන්නේ අනෙකා‍ගේ බෙල්ල කැඩෙන සේ තණ තීරුව වණ කිරීමයි. 

මේ සඳහා හොඳ ම නිදසුන ලංකාවේ ජාතීන්ගේ ප්‍රශ්නය කෙරෙහි ඉන්දියාවේ ප්‍රවේශයයි. කඳවුරු, පුහුණුව සහ අවි ආයුධ පවා සපයමින් කලක් දෙමළ ජාතිකවාදී සන්නද්ධ බලවේග පෝෂණය කළ ඉන්දියාව ඇමරිකන් ගැති ජේ.ආර්.ජයවර්ධන දවා ගැනීමෙන් පසු ඊළඟට යොමු වුණේ තමන් විසින් ම පෝෂණය කරන ලද දෙමළ ජාතිකවාදී බලවේග දවා ගැනීමටයි. අනතුරුව, සිංහල අධිපතිවාදී කොළඹ ආණ්ඩුවේ පැත්ත ගත් ඉන්දියාව සටන්කරුවන්ගේ හා සිවිල් වැසියන්ගේ ජීවිත ගැන අබමල් රේණුවක් හෝ නො තකා කරන ලද ලංකාවේ ආණ්ඩුවේ අසම්මත යුද්ධය ඉවසා සිටිමින් දෙමළ සන්නද්ධ බලවේග පරාජය කළේ ය.


එහෙත්, තිස් වසරකට පසුවත් ලංකාවේ ජාතීන්ගේ ප්‍රශ්නය එහෙම ම ඉතිරි වී තිබේ. මේ මොහොතේදී ද එය ලංකාවේ ඉදිරි ගමනට තිබෙන ප්‍රධාන ම බාධකයයි. ඉන්දියාව කලාපයේ ආධිපත්‍යය තහවුරු කර ගන්නේ අසල්වැසි රටවල තණතිලි මේ අන්දමින් කඩතොලු කිරීමෙනි.


අසල්වැසි පකිස්තානය, බංග්ලාදේශය හෝ නේපාලය සම්බන්ධයෙන් පවා තත්වය එසේ ම ය.

2009-12-27

දූෂණයට එරෙහි එන්නතක් සොයා ගන්නා තුරු ජාතික ප්‍රතිශක්තිකරණ වැඩසටහන නැවිත්විය යුතු නැත.


(2009 දෙසැම්බර් 27 -W3Lanka) මාස කීපයක් නවතා තිබුණු ජාතික ප්‍රතිශක්තිකරණ වැඩසටහන 2010 ජනවාරි01 සිට යළි ආරම්භ වන බව සෞඛ්‍ය අමාත්‍යංශය පවසයි. 

මෙම වැඩසටහන නතර කරනු ලැබුවේ පසුගිය ඔක්තෝබරයේදී වාරියපොළ 12 හැවිරිදි පාසල් සිසුවියක් රුබෙල්ලා එන්නත විදීමෙන් පසු මිය යාමෙන් පසුවයි. ඊට පෙර මාර්තු මාසයේදීද මාතරදී ද මෙවැනි ම මරණයක් සිදු විය. 


මෙම සිදුවීම් සමග ම සෞඛ්‍ය අමාත්‍යංශය විසින් ආනයනය කරනු ලබන එන්තත් ප්‍රමිතියෙන් බාල බවට චෝදනාවක් එල්ල විය. 


රජයේ සියලු සැපයුම් කොන්ත්‍රාත් පිටුපස මෙන් ම වෛද්‍ය සැපයුම් පිටුපස ද කොමිස් ජාවාරම් ඇති බව රහසක් නොවේ.


එහෙත්, ලංකාවේ ජාතික ප්‍රතිශක්තිකරණ වැඩසටහන නැවැත්වීමට එය හේතුවක් නොවේ. නැවැත්විය යුත්තේ ප්‍රතිශක්තිකරණය නොව දූෂණයයි. 


අවාසනාවට මෙන් දූෂණයට එරෙහි ප්‍රතිශක්තිය ලංකාවේ රාජ්‍යයට හා දේශපාලන ප්‍රජාවට නැත. ඒ සඳහා එන්නත් කළ යුතුව තිබෙන්නේ ශිෂඨකරණය, ප්‍රජාතන්ත්‍රකරණය හා දේශපාලන සවිඥානකත්වය යන එන්නත් ය. 


සමාජය මේ එන්නත් විද ගන්නේ නම් හොරුන් ජනාධිපතිවරුන්, ඇමතිවරුන් වන්නේ නැත.



සුනාමි සල්ලි පිල්ලි ගිය තරම මෙන්න!


(2009 දෙසැම්බර් 27 -W3Lanka) ලංකාවට සුනාමි ආධාර ලෙස ලැබුණු ඩොලර් බිලියන 2.2කින් (රු. කෝටි 22,000කට වැඩි මුදලකින්) ඩොලර් මිලියන 603.4ක් (රු. කෝටි 6000කට වඩා) සුනාමි ව්‍යසනයට අදාළ නො වන ව්‍යාපෘති සඳහා වැය කර ඇති බව ද, තවත් ඩොලර් මිලියන 471.9කට (රු. කෝටි 5000කට) වූ දේ අපැහැදිලි බවත් ට්‍රාන්පේරන්සි ඉන්ටර්නැෂනල් ආයතනය පවසයි.


2005දී රජය විසින් කරනු ලැබූ විගණනයකින් පෙන්වා දෙනු ලැබුවේ වියදම් කර තිබෙන්නේ ලැබුණු ආධාරවලින් 13%ක් පමණක් බවයි. එහෙත් ඉන් පසු මේ පිළිබඳ රජය පැත්තෙන් වාර්තා ප්‍රසිද්ධ වි නැත. මේ මුදල්වලට සිදු වූයේ කුමක්දැයි දැන ගැනීමට සුනාමි පීඩිතයන්ට, පොදු මහජනතාවට පමණක් නොව ආධාර සැපයූ අයට ද අයිතියක් තිබේ.



සුනාමියෙන් 31,000ක් ලාංකිකයන් මිය ගිය අතර, උන්හිටි තැන් හා ජීවනෝපාය අහිමි වූ තවත් ලක්ෂ ගණනකගේ ජීවිත යළි ගොඩනැගීම සඳහා ජාත්‍යන්තර ආධාර හා පුණ්‍ය ආයතන විසින් ලබා දෙන ලද මුදල්වලින් වෙනත් පිරිසකට සමෘද්ධිය ළඟා වෙද්දී ලක්ෂ ගණනක් සුනාමි පීඩිතයෝ අවතැන් කඳවුරු, සුනාමි සහන කඳවුරු සහ බාගෙට ඉදි කළ නිවාසවල ළත වෙති.


සුනාමිය ආශිර්වාදයක් වූ පිරිස අතර සහන අරමුදල් පාලනය කළ කළමනාකාරවරු, ව්‍යාපෘති කළමනාකාරවරු, දේශපාලකයෝ හා ඔවුන්ගේ අන්තේවාසිකයෝ වෙති.


සුනාමි සල්ලි ගැන කතා අතරින් හොඳ ම කතාව 'හෙල්පිං හම්බන්තොට' කතාවයි. එකල අගමැති වූ මහින්ද රාජපක්ෂ‍ගේ ජාතික සහන අරමුදලට ජාත්‍යන්තර ආධාරකරුවන් විසින් එවන ලද මුදල් පෞද්ගලික ගිනුමකට බැර කිරීමෙන් රු. අට කෝටි තිස් ලක්ෂයක් පිළිබඳ විශ්වාසය කඩ වුණේ ය යන පදනම මත එකල රහස් පොලිසිය විසින් පරීක්ෂණයක් ආරම්භ කරන ලද අතර එකල අග්‍රාමාත්‍ය ලේකම් වූ ලලිත් වීරතුංගගෙන් පැය පහක් ප්‍රශ්න කරන ලදී.


මෙම පරීක්ෂණය ඔස්සේ සිය මානව හිමිකම් කඩ වන්නේ යයි රාජපක්ෂ අගමැතිවරයා විසින් ඉදිරිපත් කරන ලද පෙත්සමක් අනුව ශ්‍රේෂ්ඨාධිකරණය විසින් එම පරීක්ෂණය අත්හිටුවන ලදී. එකල අග්‍ර විනිශ්චයකාරයා නම් සරත් නන්ද සිල්වා ය. එසමයේ ජනාධිපතිවරණයට තරග කරමින් සිටි අග්‍රාමාත්‍ය මහින්ද රාජපක්ෂ නම් දැන් ජනාධිපතිවරයා ය.


කොළඹ මුහුදේ අධි ආරක්ෂක කලාපය ඉත් කළාට රජයට තුති


(2009 දෙසැම්බර් 27 -W3Lanka) කොළඹට දකුණින් වැල්ලවත්තේ සිට උතුරින් පමුණුව දක්වා මුහුදු අධි ආරක්ෂක කලාපය ඉවත් කිරීමට රජය ගත් පියවර කොළඹ ධීවර ජනයාගේ පැසසුමට ලක් වන බව සමස්ත ලංකා එක්සත් ධීවර ජනතා සංගමයේ ලේකම් එම්. විජේන්දු පවසයි. 


කොළඹ වරායේ ආරක්ෂාව පසුගිය වසර ගණනාවක් තිස්සේ රජය මෙම ප්‍රදේශයේ නොගැඹුරු මුහුදේ ධීවර කර්මාන්තයේ යෙදීමට ධීවරයන්ට ඉඩ දුන්නේ නැත. ඒ හේතුවෙන් සුළු පරිමාණ ධීවර කර්මාන්තයේ යෙදුණු ධීවරයන් විශාල පිරිසකට රැකියා අහිමි වී තිබිණි.

මෙම මුහුදු කලාපය මසුන්ට ආහාර සුලබ ප්‍රදේශයක් හෙයින් අස්වැන්න ඉතා සරු ප්‍රදේශයක් බව විජේන්ද්‍ර පවසයි. මෙම අධි ආරක්ෂක කලාපය හේතුවෙන් බේරේ වැවේ මිරිදිය ධීවර කාර්මිකයන් පිරිසකට ද රැකියා අහිමි වී තිබිණි.


2009-12-26

කොළඹ සරත්ට - ගම මහින්දට?

(2009 දෙසැම්බර් 26 -W3Lanka කොළඹ නගරයේ හා විශේෂයෙන් ම සුළු ජාතීන් අතර එක්සත් ජාතික පක්ෂයට ඇති පිළිගැනීම සමග ජනාධිපතිවරණයේ එහි වාසිය සරත් ෆොන්සේකා දෙසට කැරකෙමින් තිබේ. 


මේ මැද කොළඹ අසුන නියෝජනය කරමින් එක්සත් ජනතා නිදහස් සන්ධානයෙන් තරග කළ අජ්මාල් මව්ජූඩ් නම් මුස්ලිම් ව්‍යාපාරිකයාගේ ආධාරකරුවන් 1500ක පිරිසක් විපක්ෂ ජනාධිපති අපේක්ෂක සරත් ෆොන්සේකාට සහාය පළ කරන ආකාරයයි. 


එහෙත් ගම්වල වාසිය තවමත් මහින්ද රාජපක්ෂටයි. එහි තත්වය වෙනස් කිරීමේ හැකියාව ඇත්තේ එජාපයට නොව ජවිපෙටයි. 

හෙල්පිං හම්බන්තොට සිට බේබි 81 දක්වා පශ්චාත් සුනාමිය


(2009 දෙසැම්බර් 26 -W3Lanka) 2004 දෙසැම්බර් 26දා ශ්‍රී ලාංකිකයන් දසදහස් ගණනකට මරු කැඳවමින් සිදු වූ සුනාමි ව්‍යසනයට අදට වසර පහක් පිරේ. ඒ සමග ම පශ්ඩාත් සුනාමි ව්‍යසනයට ද වසර පහක් පිරේ. එය තව ම අවසන් නැත.


සුනාමි ව්‍යසනය පිළිබඳ කම්පා වී ප්‍රධාන වශයෙන් ම බටහිර රටවල ත්‍යාගශීලීන් විසින් එවන ලද ඩොලර් කෝටි ගණනක් ලංකාවේ සංසරණය වූ මුත් කොළඹ දිස්ත්‍රික්කයේ පවා දහස් ගණනක් උන්හිටි තැන් අහිමි වූවෝ තවමත් අනාථ කඳවුරුවල වෙසෙති. සුනාමියෙන් බැට කා යන්තම් දෙපයින් නැඟී සිටින්නට උත්සාහ කරද්දී ඇවිළුණ යුද ගින්නෙන් යළි බැට කා බොහෝ දේ අහිමි වූ තවත් දසදහස් සංඛ්‍යාත පිරිසක් තවමත් .උතුරේ අනාථ කඳවුරුවල ය. දිවයින පුරා ම සුනාමියෙන් පීඩාවට පත් බොහෝ අයගේ නිවාස තවමත් බාගෙට ඉදි කළ ගමන් ය. 


සුනාමියෙන් හැදුණු අය අතර රාජ්‍ය නොවන සංවිධාන ලොක්කෝ මෙන් ම දේශපාලකයෝ ද වෙති. ඇතැම් දේශපාලක අතවැසියන්ට සුනාමියෙන් වූ කිසිදු හිරිහැරයක් නැතත් ඔවුන්ට නිවාස දෙක තුන ලැබී තිබේ. දැන් ඒවායින් බොහොමයක් කුලියට දී තිබේ. 


සුනාමි අවස්ථාවේදී මව්පියන් මගහැරී අතරමං වී දිවි ගලවාගෙන සිටියදී අසල්වැසියකු විසින් රෝහල්ගත කරන ලදුව පසුව දිවි බේරාගෙන පැමිණි මව්පියන් විසින් අයිතිය ඉල්ලා කරන ලද සටනක් හේතුවෙන් ලෝක ප්‍රසිද්ධියට පත්, අවසානයේදී ඩී.එන්.ඒ. පරීක්ෂණයකින් සැබෑ මව්පියන් හඳුනා ගනු ලැබූ 'බේබි 81' ලෙස ප්‍රසිද්ධ වූ කල්මුණේ අභිලාෂ් සුනාමි විපත විකුණාගෙන කෑමේ මාධ්‍ය නිරුවත හෙළි කරන කදිම නිදසුනකි. 


‍අභිලාෂ්ගේ අයිතිය පතා මව්වරුන් නවයක් සටන් කළ පුවත බොරුවක් බව දැන් හෙළි වී තිබේ. එයින් ඒ දෙමව්පියන් හා දරුවා විඳි පීඩාව අපමණ ය. ඇමරිකාවේ NBC රූපවාහිනිය ඔවුන්ගේ Good Morning America නම් වැඩසටහනට මෙම පවුල කැඳවා ගත් මුත් එම වැඩසටහනවෙනුවෙන් ඔවුන්ට මුදල් ගෙව්වේ නැත.



ඇමරිකාවේ Black Rebel Motorcycle Club නම් රොක් සංගීත කණ්ඩායම 2007දී නිකුත් කළ 'බේබි 81' නම් ගීත එකතුව මුල් සති දෙක තුළ පමණක් පිටපත් 14,000ක් විකිණුනේ අභිලාෂ් නිසා ය. එහෙත් ඔවුන්ට කිසිවක් හිමි වූයේ නැත. තවමත් එම පවුල ජීවත් වන්නේ බාගෙට ඉදි කළ නිවසකයි. විදේශ ආධාර ලැබුණේ යයි කතාවක් පැතිර ගිය නිසා ඔවුන්ට සාමාන්‍ය ආධාර ද සීමා විය.


ලංකාවේ ද සුනාමියේ දුක්බර කතා 'අනේ අපොයි', ‍'දෙයියෝ සාක්කි' ආදී ශීර්ෂ යටතේ පළ කරමින් මාධ්‍ය මුදල් ගරා ගත්හ. සුනාමියෙන් විපතට පත් වූවන් වෙනුවෙන් විවිධ දේ කරන බව කියමින් මාධ්‍ය ඔස්සේ ප්‍රචාරය ලබා ගත් ඇතැම් පිරිස් දැන් සද්ද බද්ද නැත. 

සුනාමිය මුවාවෙන් රාජ්‍ය නො වන සංවිධාන විසින් නො කළ ජාවාරමක් නැත. ඒ පිළිබඳ කතා කිරීම ‍සඳහා මෙවැනි සටහනක් ප්‍රමාණවත් නොවේ.



ජනතාවාදී කොටි සංවිධානය හා ජනතා විමුක්ති පෙරමුණ පවා සුනාමියෙන් ගසා කෑවේ ය. සුනාමි සහන අරමුදල් වෙනුවෙන් යයි කියමින් මෙම සංවිධාන විසින් කෝටි ගණනින් එක් රැස් කරන ලද මුදල්වලට වුණේ කුමක්දැයි කිසිවෙකු නො දනිති.


සුනාමි සල්ලි ගැන කතා අතරින් හොඳ ම කතාව 'හෙල්පිං හම්බන්තොට' කතාවයි. එකල අගමැති වූ මහින්ද රාජපක්ෂ‍ගේ ජාතික සහන අරමුදලට ජාත්‍යන්තර ආධාරකරුවන් විසින් එවන ලද මුදල් පෞද්ගලික ගිනුමකට බැර කිරීමෙන් රු. අට කෝටි තිස් ලක්ෂයක් පිළිබඳ විශ්වාසය කඩ වුණේ ය යන පදනම මත එකල රහස් පොලිසිය විසින් පරීක්ෂණයක් ආරම්භ කරන ලද අතර එකල අග්‍රාමාත්‍ය ලේකම් වූ ලලිත් වීරතුංගගෙන් පැය පහක් ප්‍රශ්න කරන ලදී. 

මෙම පරීක්ෂණය ඔස්සේ සිය මානව හිමිකම් කඩ වන්නේ යයි රාජපක්ෂ අගමැතිවරයා විසින් ඉදිරිපත් කරන ලද පෙත්සමක් අනුව ශ්‍රේෂ්ඨාධිකරණය විසින් එම පරීක්ෂණය අත්හිටුවන ලදී. එකල අග්‍ර විනිශ්චයකාරයා නම් සරත් නන්ද සිල්වා ය. එසමයේ ජනාධිපතිවරණයට තරග කරමින් සිටි අග්‍රාමාත්‍ය මහින්ද රාජපක්ෂ නම් දැන් ජනාධිපතිවරයා ය.


සනත්ගේ ක්‍රිකට් දිවියට වසර 20යි


(2009 දෙසැම්බර් 26 -W3Lanka) 1989 දෙසැම්බර් 26 දා ඔස්ට්‍රේලියාවට එරෙහිව මෙල්බර්න් පිටියේ දී පළමු ජාත්‍යන්තර එක් දින තරගයට සහඵාගි වෙමින් සිය ක්‍රිකට් දිවිය ආරම්භ කළ සනත් ටෙරාන් ජයසූරිය අද සිය ජාත්‍යන්තර ක්‍රීඩා දිවියේ විසි වන වසර සපුරයි.


1969 ජුනි 30දා උපන් සනත් දැන් සතළිස්වන වියට එළඹ සිය ද තවමත් ඔහු යව්වනයකු සේ ක්‍රිකට් ක්‍රීඩාවේ යෙදෙන්නේ ක්‍රීඩාව පිළිබඳ ගතානුගතික අදහස් අභියෝගයට ලක් කරමිනි.


වයස වැඩි යයි කියමින් ඔහුව ක්‍රිකට්වලින් දවා ලන්නට නිලධාරීන් නිපන්දු එවමින් දැරූ උත්සාහයන් හමුවේ සනත් කෙසේ හෝ තවමත් නො සැලී සිටියි. 

1998 මැයි 08දා සනත් හා එයා ලංකා හිටපු බිම් සත්කාරිකාවක් වූ සුමුදු කරුණාරත්න අතර සිදු වූ විවාහය ලංකාවේ වැඩියෙන් ම කතා කළ විවාහය වූ මුත් කෙටි කලකින් සිදු වූ දික්කසාදය අඩුවෙන් ම වාර්තා කළ එකක් වූයේ ක්‍රිකට් ගැසීමට පමණක් නොව ලංකාවේ ජනමාධ්‍ය හැසිරවීමටත් සනත්ට තිබූ හැකියාව ප්‍රදර්ශනය කරමිනි. නිහඬව දෙවන විවාහයට එළැඹි සනත් දැන් තිදරු පියෙකි. 



1991 පෙබ. 22-26 නවසීලන්තයට එරෙහිව හැමිල්ටන්හිදී පළමු ටෙස්ට් තරගයට සහභාගි වූ සනත් මේ වන විට ටෙස්ට් තරග 110කට ද එක් දින තරග 443කට ද සහභාගි වී තිබේ.


එක් දින තරගවල මුල් ඕවර 15 තුළදී අධි වේගයෙන් ලකුණු රැස් කිරීමේ ශෛලියේ නිර්මාතෘවරයකු වන සනත් ඉනිම 431කචී නොදැවීම් 18ක් සමග ලකුණු 13,397ක් රැස් කර තිබේ. ඔහු රැස් කළ වැඩි ම ලකුණු සංඛ්‍යාව 189කි. සාමාන්‍යය 32.43කි. ශතක 28ක් හා අර්ධ ශතක 68ක් ඔහුගේ මල්ලේ ඇත.


පන්දු යවන්නකු ලෙස කඩුලු 322ක් ලබාගෙන ඇති සනත්ගේ හොඳම පන්දු යැවීම 26/6 ලෙස වාර්තා වේ.




2009-12-25

මැතිවරණ නීතිය වල් වදී -පීපල්ස් මාච්

(2009 දෙසැම්බර් 25 -W3Lanka) ජනාධිපතිවරණ නාම යෝජනාවලින් පසු සෑම අපේක්ෂකයකුගේම නීති විරෝධී පෝස්ටර් කටවුට් දැන්වීම් ඉවත්කිරීමට කටයුතු කරන බව මහත් ගාම්භීරව මැතිවරණ කොමසාරිස්වරයා කළ ප‍්‍රකාශය අද වනවිට හුදු වචනවලට පමණක් සීමාවී තිබේ. මැතිවරණ නීතිය සියළු පාර්ශවයන්ට අදාළ වුවත් ආණ්ඩු පක්ෂයේ අපේක්ෂකයා වෙනුවෙන් එහි සෑම විධිවිධානයක් ම උල්ලංඝනය කිරීමට ඉඩ දී ඇති බලධාරීන් සෙසු අපේක්ෂකයන්ගේ නීත්‍යානුකූල හිමිකම් පවා අහෝසි කරමින් තිබේ.


ආණ්ඩු පක්ෂයේ අපේක්ෂක ජනාධිපතිවරයාගේ රුව රැගත් කටවුට්, පෝස්ටර් හා බැනර් රට පුරාම ප‍්‍රදර්ශනය කිරීමට ඉඩදී ඇති පොලීසිය ඔහුගේ ප‍්‍රධානතම ප‍්‍රතිවාදියා වන විපක්ෂයේ පොදු අපේක්ෂකයාගේ පෝස්ටරයක් හෝ ඉතිරි නොකිරීමට තරම් නීතිය ක‍්‍රියාත්මක කරමින් ඇත.


නාම යෝජනා පත‍්‍ර බාරදීමට ප‍්‍රථමයෙන් තම නීති විරෝධී ප‍්‍රචාරක පුවරු ඉවත් කරන ලෙස ජනාධිපතිවරයා පොලිස්පති වරයාට නියෝග කරනු ලැබුවේ සාධාරණත්වය ඉහළින්ම අගයන මහා ප‍්‍රජාතන්ත‍්‍රවාදියෙකු ලෙස ය. එහෙත් ජනාධිපතිවරයා එසේ නියෝග කළ බව රටටම කී පොලිස්පතිවරයා එම නියෝගය ඉටු කර නැත. එසේ නම් ජනාධිපතිවරයා දැන් කළ යුත්තේ මැතිවරණ කොමසාරිස්වරයාගේ පමණක් නොව තමාගේ ද උපදෙස් නොසලකා සිටින පොලිස්පති ඇතුඵ නිළධාරීන්ට විරුද්ධව වහා පියවර ගැනීම ය. එනමුත් තමාගේ මුළු වැඩ රටාවම බොරු රංගනවලින් පුරවා ගෙන ඇති ජනාධිපතිවරයාගෙන් මෙවැනි පියවර ගැනීමක් කිසිවිටකත් බලාපොරොත්තු නොවිය යුත්තා සේම මෙය ද ඒවා අතුරෙන් තවත් එකක් පමණි.


රාජ්‍ය මාධ්‍ය භාවිතය පිළිබඳ විවිධ වර්ගයේ උපදෙස් සහ මාර්ගෝපදේශ මැතිවරණ කොමසාරිස්වරයා විසින් නිකුත් කරනු ලැබූ උපදෙස් වගකිවයුත්තන් විසින් තඹයකටවත් ගණන් නොගනු ලබන බව එම උපදෙස් අමු අමුවේ උල්ලංඝනය කරමින් රජයේ විද්‍යුත් හා මුද්‍රිත මාධ්‍ය ක‍්‍රියා කරන ආකාරයෙන් පැහැදිලි ය. කිසියම් ගුවන් විදුලි හෝ රූපවාහිනී හෝ මුද්‍රිත ආයතනයක සේවකයෙකු හෝ අධ්‍යක්ෂ මණ්ඩල සාමාජිකයෙකු දේශපාලන පක්ෂයක කිසියම් නිලයක් දරන්නෙකු බවට ප‍්‍රසිද්ධියක් දරන්නේ නම් එම පුද්ගලයා මැතිවරණය නිමාවන තෙක් එකී ආයතනයන්හි මාධ්‍යවේදීන් ලෙස කටයුතුවලින් ඉවත් විය යුතු බවටත් එම කටයුතුවල යෙදීමට අවසර නොදිය යුතු බවටත් දුන් උපදෙස සම්පූර්ණයෙන් ඉවත ලා ඇත. රජයේ විද්‍යුත් මාධ්‍යවල වැඩි ගුවන් කාලයක් ද මුද්‍රිත මාධ්‍යවල වැඩි ඉඩක් ද ජනාධිපතිවරයාගේත් ගෝල බාලයන්ගේත් කථාවලින් හා ප‍්‍රකාශවලින් පිරී ඉතිරී ගොස් ඇත. අඩුම තරමින් කුඩා ඉඩක් හෝ විපක්ෂයේ ප‍්‍රධාන අපේක්ෂකයාට පවා නොදීමට තරම් රාජපක්ෂ ප‍්‍රජාතන්ත‍්‍රවාදය යටතේ රාජ්‍ය මාධ්‍ය ආයතන සාධාරණ හා ප‍්‍රජාතන්ත‍්‍රවාදී වී ඇත!


රටේ බලපවත්වන නීතී ක‍්‍රියාත්මක කිරීම සඳහා බැඳී සිටින ආයතන ඒවා ක‍්‍රියාත්මක නොකීරීමෙන් මග පෑදිය හැක්කේ අනීතික බලයට එරෙහිව අනීතිකව ප‍්‍රතිකි‍්‍රයා කරන්නට තත්ත්වයන් නිර්මාණය වීමට ය. මෙවන් තත්ත්වයක් උද්ගත වුවහොත් රට අරාජිකත්වය කරා ගමන් කිරීම කිසිවෙකුටත් නැවැත්විය නොහැකි වනු ඇත.


මෙම තත්ත්වයන් නිවැරදි කරන ලෙස ආණ්ඩුවටත් මැතිවරණ කොමසාරිස්වරයාටත් පැමිණිලි කිරීම හෝ ආයාචනය කිරීම කිසිදු පලප‍්‍රයෝජනයක් නොමැති බව විශ්වාස කරන අපි මෙවැනි ක‍්‍රියා ආපස්සට හැරවිය හැක්කේ පුළුල් මහජන උද්ඝෝෂණ ක‍්‍රියාමාර්ගයන්ගෙන්‍ පමණක් බව අවධාරණය කරමු .


-ඒ. ඞී. රත්නායක, ප‍්‍රධාන ලේකම්, පීපල්ස් මාච්

ජයවේවා! ආණ්ඩුවෙන් වැඩිහිටියන්ට පමණයි උද්ඝෝෂණයක් කොටුවේ


(2009 දෙසැම්බර් 25 -W3Lanka) වැඩිහිටියන්ට පමණයි තහනම ඉවත් වී ඇත. කොයි තරම් ඉවත් වී තිබේදැයි කීවොත් දැන් වැඩිහිටියන්ට පමණයි පුවරු රැගෙන පිකටිං පැවැත්විය හැකි ය.


අප නම් කිසි දිනෙක මේ ක්‍රියාවලට විරුද්ධ වූයේ නැත. ඒ අප දේශද්‍රෝහීන් නිසා නොව නිදහස ගරු කරන්නන් නිසා ය.මව්බිම, ජාතිය, සංස්කෘතිය රැක ගන්නට ම උපන් පුතකු වන විමල් වීරවංශ නායකත්වය දෙන උද්ඝෝෂණයක මෙම ඡායාරූපයේ දැක්වෙන පුවරුව ප්‍රදර්ශනය වීම පුදුමයක් වුව ද අපි නම් ඒ ගැන සතුටු වෙමු.


අනාගතේ යම් දවසක බටහිර රටවල මෙන් විමල් වීරවංශ, අචල ජාගොඩ වැනි සුන්දර තරුණයන්ට මෙම පුවරුවේ දැක්වෙන ආකාරයෙන් පවා වෙඩි නොකා විරෝධය දැක්විය හැකි ප්‍රජාතන්ත්‍රවාදී නිදහස් වාතාවරණයක් රටේ ඇති වේවා යි අපි ප්‍රාර්ථනා කරමු.


මෙම උද්ඝෝෂණයට පියසිරි විජේනායක ගරු සංස්කෘතික ඇමතිතුමා සහභාගි වූයේ ද යන්න පිංතූරවලින් පැහැදිලි නොවේ.

බිත්තර මිළ බස්සන්න "අපි බිත්තර දාමු - රට නඟමු"


(2009 දෙසැම්බර් 25 - W3Lanka අද නත්තල් ය. ලාංකික කිතුනුවෝ හොඳට කන බොන මිනිස්සු ය. ඔවුන් මස්, මාළු කන්නේ හොරෙන් නොවේ. කෑමෙන් පසු පශ්චාත්තාපයක් ද නැත. බීම පිළිබඳ කීමට ඇත්තේ ද එය ම ය. එහෙයින් නත්තල් සමරන්නට යහමින් කෑම බීම අවශ්‍ය ය. නත්තල් කනවා කියන්නේ ඒ නිසා ය. 


රට කන දේශපාලකයන්ට නම් හැමදා ම නත්තල් ය. උන්ගේ බිල් බදු ඔස්සේ ගෙවන මහජනතාව නත්තල් කේක් ගෙඩිය හදන්නට බිත්තරයක් ගත්තේ ඉතිහාසයේ වැඩි ම මිළට ය. කුකුළු මස් හා බිත්තර හිඟ බැවින් ඒවා වහා ම ආනයනය කරන බව පශු සම්පත් සංවර්ධන ඇමැති සී. බී. රත්නායක පවසයි. 


තදියමේ කරන මේ ආනයන ඔස්සේ කුරුළු උණ රටට ඒම වැළැක්වීම සඳහා ගනු ලබන පියවර මොනවාදැයි අපි නො දනිමු. 


පසුගිය කාලයේ දේශපාලකයන් අමුඩ ගසාගෙන "අපි වවමු- රට නඟමු" යයි කියමින් සී සෑවේ දේශීය ආහාර නිෂ්පාදනය වැඩි කරන්නට ය. 


එහෙත්, වෙළඳ ඇමති බන්දුල ගුණවර්ධන නොවැම්බර් මුල පාර්ලිමේන්තුවට ඉදිරිපත් කරන ලද සංඛ්‍යාලේඛන පෙන්නුම් කරන්නේ ආහාර ආනයනය වැඩි වී ඇති බවයි. 

කිරිපිටිවලින් අධික ලෙස බදු අය කරන්නේ දේශීය කිරි ගොවියා නැංවීම සඳහා යයි ජනාධිපතිවරයා පසුගියදා පැවති ජනපති ජනහමුවකදී පැවසුව ද ගිය අවුරුද්දේ රටේ කිරිපිටි අවශ්‍යතාවෙන් 90%ක් ම පිටරටින් ආනයනය කර ඇති බව බන්දුල ගුණවර්ධන පැවසීය. 2005 අවුරුද්දේ මෙම ප්‍රතිශතය 89.1%ක් විය. 



2005දී රටේ අර්තාපල් අවශ්‍යතාවෙන් ආනයනය කෙරුනේ 33.%ක් පමණක් වුව ද, 2008දී සමස්ත අවශ්‍යතාවෙන් 57%ක් ම ආනයනය කර ඇත.


2005දී රටේ ලොකු ළූනු අවශ්‍යතාවෙන් ආනයනය කළේ 66.6% ක් වුව  ද 2008දී 71.9%ක් ම පිටරටින් ගෙන්වා තිබේ. 


2005දී රටේ මිරිස් අවශ්‍යතාවෙන් ආනයනය කෙරුනේ 67%ක් පමණක් වුව ද 2008දී 73%ක් මආනයනය කර ති‍බේ. 

මේ අතර රටේ සමස්ත සීනි නිෂ්පාදනයෙන් 92.7%ක් ද ආනයනය කෙරිණි. 2005දී ආනයනය කරනු ලැබුවේ 89.6%ක් පමණි. 


මෙම තොරතුරු හෙළිදරව් වූයේ ජවිපෙ මන්ත්‍රී රණවීර පතිරණ විසින් අසන ලද ප්‍රශ්නයකට සපයන ලද පිළිතුරුවලිනි. 



අමුඩ ගසාගෙන කුඹුරු හෑ ජනාධිපති හා ඇමතිවරු දැන් පිටරටින් හාල් ගෙන්වන්නේ මෙට්‍රික් ටොන් ලක්ෂ ගණනේ ය.


දැන් කුකුළු මස් හා බිත්තර ද ආනයනය කරනු ලැබේ. දේශීය බිත්තර නිෂ්පාදනය වැඩි කිරීම සඳහා ද දැන් "අපි බිත්තර දාමු - රට නඟමු" වැනි වැඩපිළිවෙලක් දියත් කිරීමට පුළුවන. එම වැඩපිළිවෙලේ සමාරම්භක උළෙල පවත්වන ආකාරය යෝජනා කිරීමේ අවස්ථාව කරුණාකර  පශු සම්පත් සංවර්ධන ඇමැති සී. බී. රත්නායකට යෝජනා කරන්න. මෙහි තබන සටහන් අදාළ ඇමතිවරයා වෙත යැවීම සඳහා අපට කුමවේදයක් නැති බව කරුණාවෙන් සලකන්න.


මැතිවරණ නිරීක්ෂණයේදීත් ආණ්ඩුවට එක්සත් ජාතීන් අසාත්මික වෙයි

(2009 දෙසැම්බර් 25 - W3Lanka ලංකාව එක්සත් ජාතීන්ගේ සංවිධානයේ සාමාජික රටක් වුව ද දැන් එය එක්සත් ජාතීන් භීතිකාවකින් පෙළෙන රාජ්‍යයක් බවට පත් වී තිබේ. නිශ්චල හා චංචල පොදු දේපල රැසක් තම අපේක්ෂකයාගේ ජයග්‍රහණය වෙනුවෙන් මහත් අසාධාරණ අන්දමින් යොදාගෙන තිබෙන පාලක එක්සත් ජනතා නිදහස් සන්ධානය ජනාධිපතිවරණයේ නිරීක්‍ෂණ කටයුතු සඳහා එක්සත් ජාතීන්ගේ සංවිධානයේ විශේෂඥයන් පැමිණෙන්නේ නම් ඊට විරෝධතාව පළකරන බව මැතිවරණ කොමසාරිස්වරයාට දන්වා ඇත.


එක්සත් ජනතා නිදහස් සන්ධානයේ මහලේකම් අධ්‍යාපන ඇමැති සුසිල් ප්‍රේමජයන්ත මහතා මැතිවරණ කොමසාරිස් දයානන්ද දිශානායකට ලිපියක් මගින් ඒ බැව් දන්වා තිබේ.


ජනපතිවරණයේ නිරීක්‍ෂණ කටයුතු සඳහා එක්සත් ජාතීන්ගේ සංවිධානයේ නිරීක්‍ෂකයන් සහභාගි කර ගැනීම සම්බන්ධයෙන් විරුද්ධත්වයක් නැති නමුත් විශේෂඥයන් පැමිණෙන්නේ නම් විරුද්ධ බව ඔහු පවසයි.


සාධාරණ මැතිවරණ පැවැත්වීම එක්සත් ජාතීන්ගේ සංවිධානය විසින් අගය කරනු ලබන යහපාලන ප්‍රතිපත්තියකි. එවැනි මූලධර්මවලට ගරු නො කරන රටවල් ජාත්‍යන්තර දේශපාලනයේදී නීච රාජ්‍ය හෙවත් pariah states තත්වයට පත් වේ.