2010-08-27

කේ.පී.ට සමාව දෙන එක වැරදි ද? | Is pardoning KP wrong?

(2010 අගෝස්තු 27, W3Lanka) ආණ්ඩුව කේ.පී.ට දී ඇති බව පෙනෙන සමාව ගැන සමාජයේ කතිකාවක් ඇති වී තිබේ. කලක් කොටි සංවිධානය සමග සම්මුතිය හා බලය බෙදා ගැනීම අවධාරණය කළ අය පවා දැන් කේ.පී.ට දුන් සමාව විවේචනය කරති. යුද්ධය ඇති නොවී සාම ක්‍රියාවලිය ඉදිරියට ගියේ නම් කේ.පී.ට පමණක් නොව ප්‍රභාකරන්ට ද නීතියෙන් මුක්තිය ලබා දීමට සිදු වේ. නේපාලයේ වඩාත් ම අවශ්‍යව සිටි කැරැලි නායකයා වන මාඕවාදී ව්‍යාපාරයේ නායක ප්‍රචණ්ඩා සාම ක්‍රියාවලිය ඔස්සේ පසු කලෙක එරට අගමැති වීම නිදසුනකි. ඇත්තෙන් ම කීවොත් බොහෝ දේශපාලන වීරයන් හා ත්‍රස්ත නායකයන් අතර වෙනසක් නැත. දිනන එකා වීරයා වී කිරුළු පළඳින අතර පරදින එකා ත්‍රස්තවාදියා වී සොහොන් බිමකට ද අහිමිව මිය යයි. 


කේ.පී.ට සමාව දීම හා සමාන්තරව සරත් ෆොන්සේකාගේ තරු ගැලවීම ද සිදු විය. එහෙත්, මෙම ලිවීමේදී අපි එය කේ.පී.ට සමාව දීම හා සම්බන්ධ කර ගන්නේ නැත. මෙම සිද්ධි දෙක තුලනය කර ගැනීමේ අවුල ලිහා ගැනීම රාජපක්ෂ පාලනය විසින් කළ යුතුව ඇති දෙයකි.


ආණ්ඩුව දෙමළ ඩයස්පෝරාවේ අභියෝගයට මුහුණ දීම පිණිස කේ.පී. උපයෝගී කර ගැනීම දීර්ඝකාලීනව කෙතරම් දුරට සාර්ථක වේ ද යන්න කාලය විසින් තීරණය කරනු ඇත. කෙසේ වෙතත්, කේ.පී. මෙහෙයුම විසින් මේ වන විට දෙමළ ඩයස්පෝරාවේ කැළඹීමක් ඇති කර තිබෙන බව ඊලාම් පාරජාතික පාලනය පිහිටුවීමෙන් පසු ඩයස්පෝරා ක්‍රියාකාරිත්වයේ දක්නට ලැබෙන සාපේක්ෂ පසුබෑමෙන් පැහැදිලි වේ.


දෙමළ ඊලාම් විමුක්ති කොටි සංවිධානය විනාශ වුව ද, දශක තුනක දෙමළ කැරැල්ලට හේතු පාදක වූ සමාජ තත්වයන් වෙනස් වී නැති සංදර්භය තුළ ලංකාවේ ඇති වී තිබෙන යුද රහිත තත්වය චිරස්ථායී සාමයක් බවට පරිවර්තනය වී නැත.


ආණ්ඩුව පැත්තෙන් ජාතීන්ගේ ප්‍රශ්නයට විසඳුම ලෙස ක්‍රියාත්මක කරමින් ඇත්තේ අලුත් දෙයක් නොව, සටන් විරාමය ඔස්සේ ගෝලීය ධනවාදයේ උපකාර ඇතිව එක්සත් ජාතික පක්ෂය විසින් ද ක්‍රියාත්මක කරන්නට උත්සාහ කළ දේ ම ය. එනම් ප්‍රාග්ධනය දෙමළ ප්‍රදේශවලට කඩා වදින්නට සැලැස්වීම හා ඒ ඔස්සේ ඇති වන 'සංවර්ධනය' පහළට කාන්දු වීමට සැලැස්වීම හරහා ශීඝ්‍ර සමාජ, දේශපාලනික හා සංස්කෘතික විපර්යාසයකට දෙමළ සමාජය ලක් කිරීමෙන් සමාජය පරමාණුකරණයට හෙවත් බිඳී විසිරී යාමට සලස්වා අරගල විභවයන් මුළුමනින් ම බිඳ දැමීමයි.


රාජපක්ෂ ආණ්ඩුවේ උපාය මාර්ගයෙහි ඇති වෙනස වන්නේ එය ක්‍රියාත්මක වන්නේ දෙමළ කැරැලි කණ්ඩායම සමූලඝාතනය කිරීමෙන් පසු වීමයි. සටන් විරාම හා සාකච්ඡා ක්‍රියාමාර්ගය තුළ සමූලඝාතනයක් තිබුණේ නැත. 


කේ.පී. අත්අඩංගුවට පත් වීමේ නාටකය තවමත් පැහැදිලි නැති අඳුරු කලාපයකි. ඔහුට ආණ්ඩුවේ කරුණාව හිමි වීම ද අද්භූත සිද්ධියකි. ඒ පිටුපස කේ.පී. විසින් හසුරුවන ලද ආර්ථික ජාලයේ හයිය තිබෙන්නට පුළුවන. කේ.පී.ත් ආණ්ඩුවත් අතර මුල සිට ම අවබෝධයක් තිබෙන්නට ද ඇත. 


එසේ නොමැති නම් කේ.පී. සම්මුඛ සාකච්ඡාවලදී පවසන ලද ආකාරයට ඔහු  අහිසංක කුකුළු පැටවකු සේ අත්අඩංගුවට පත් වී ගුවන් යානයෙන් එන විට ඔහු සමග පැමිණි නිලධාරියා සමග කළ සාකච්ඡාවේදී ඔහු ආණ්ඩුවට සහාය දක්වන්නට එකඟ වීම හා ඉන් පසු ආරක්ෂක ලේකම්වරයා සමග කතා කිරීමෙන් ඔහු හා ආණ්ඩුව අතර විශ්වාසය තහවුරු වීම වුව සිදු වන්නට බැරි දෙයක් නො වේ. 


මෙවැනි දේ සම්බන්ධයෙන් උදාහරණ ජවිපෙට සම්බන්ධ 1989 කැරැල්ලෙන් ඕනෑ තරම් සපයා ගත හැකි ය. පෝස්ටර් ගැසූ අහිංසකයන් කුරිරු අන්දමින් මරා දමද්දී, ජවිපෙ මැද පෙළේ නායකයන්ගේ ජීවිත ඔවුන් සහ ඇතැම් නිලධාරීන් අතර ඇති වූ සාකච්ඡා හේතුවෙන් බේරිණි. 


1989 කැරැල්ල අවසාන සමයේදී ආණ්ඩුවට ජවිපෙ මර්දනය කිරීම සඳහා පූර්ණ සහයෝගය දැක්වූ දේශපාලන මණ්ඩල සභිකයකු වන ගාමිනී විජේගුණසේකර නිදසුනකි. ඔහු විසින් අල්ලා දෙන ලද බොහෝ දෙනෙකුට ඔහු පහදා දුන් අන්දමින් ම සෙසු අය අල්ලා ගැනීමට උදව් කර ජීවිතය බේරා ගැනීමට ලැබිණි. තමන්ට රජය විසින් අභය දෙනු ඇති බවට විශ්වාසයක් ගාමිනී විජේගුණසේකර තුළ වූ බව ඔහු හමු වූ අය පවසති. අඩු තරමේ එම තත්වය දිනා ගැනීම සඳහා ඔහු තදබල උත්සාහයක යෙදී සිටියේ ය. ඇතැම් විට ඔහු කොහේ හෝ රටක පණ බේරාගෙන ඉන්නවා වන්නට පුළුවන. නැතිනම් ඔහුට වූ පොරොන්දු ආණ්ඩුව කඩ කළා වන්නට ද පුළුවන.


අද කේ.පී.ට දුන් සමාව පිළිබඳ ප්‍රශ්න කරන ජවිපෙට සෝමවංශ අමරසිංහ දේශපාලනය කරන්නේ ද එවන් සමාවක් මත බව අමතක වී ඇත. 1989දී සෝමවංශට රටින් පළා යාමට උදව් කළ අය පවා පසුව නීතියෙන් දඬුවම් ලැබූ හ. කැරැල්ලෙහි වගකීම් සම්බන්ධයෙන් ජවිපෙ දේශපාලන මණ්ඩල සභිකයකු වූ සෝමවංශ අමරසිංහට එරෙහිව නඩු පැවරීමට ආණ්ඩුවට පුළුවන්කම තිබුණු නමුත් ආණ්ඩුව ඔහුට සමාව දුන්නේ ය. 


1971 කැරැල්ලේ දී ද මෙවැනි සිදුවීම් සිදු විය. කැරැල්ලේ නායකයන් වූ ලොකු අතුල හෙවත් නිමලසිරි ජයසිංහ, මහින්ද විජේසේකර වැනි අය රජයේ සාක්ෂිකරුවන් බවට පත් කර නිදහස් කරන ලදී. පමා වී හෝ ජවිපෙ නායකයන් වූ රෝහණ විජේවීර සහ තවත් අය නිදහස් වූයේ ද පොදු සමාවක් යටතේ ය. 


කොටි සංවිධානය සමග එක්ව ජනාධිපති මහින්ද රාජපක්ෂ මරන්නට කුමන්ත්‍රණය කර රු. ලක්ෂ දහයක් ද ලබා ගත් බව රහස් පොලිසිය විසින් අධිකරණයට වාර්තා කරන ලද ජොන්ස්ටන් ප්‍රනාන්දුට සමාවක් පමණක් නොව කැබිනට් ඇමතිකමක් ද හිමි වී තිබේ. 


මෙසේ විමසා බැලූ කල කේ.පී.ට සමාව දීම කිසි සේත් ම අස්වාභාවික සිද්ධියක් නො වේ. 


පීඩිතයන්ට තමන් කළ වරදකට කිසිදු සමාවක් හිමි නො වීම පංති ප්‍රශ්නයකි. 


Bookmark and Share
You may also like to read our English blog  Lanka Polity

2 comments:

  1. me lipiye mata penena prashna wishala ganak thiyanawa.
    1. KP sambandawa anduwa karana de kisima paradushya bawak nethi weema. KPge salli walata mokada une?? kiyana de danne rajapaksha waru keepa denek withama wenna ona.KPge namata thibuna newu(ships) saha anekuth de gena ratata heli uneth ne..ewa rate sanwardaneta labuneth ne..ewa wetune kage sakkuwatada kiyala thama heli uneth ne.
    2. Me sambandawa prabalawa hada naganne jvp nisa, oba uthsaha karanne 89 aduru kalaya gena kiyala, e osse jvp handa pussak karanna..eth api e anduru wakawanuwa ekka me kalaya sansandanaya karama wenne, anduren alokayata yama nemei..anduren andurata yama. api alokaye idan siddi katha karamu, anduwa karanawa wage andura pennala bada wiyatha reka ganne nethuwa.
    3.SF ta salakana widiya adamai..thuchchai..eka gena katha karala wedak ne. dutugemunu rajathuma thamange hathura una demala rajawa marala ethana sohonak heduwa.eth MR ge thiyenne paligenima.pehedili paligeneema..
    4. oba obawath danne nethi KPge rahas rangapema gena sundara heena mawanna hadanawa..tamil desporado eke mehema wenawa kiyala heena pennala e lakunu tika gvmnt ekata daanawa..eththama kiwwoth KP dan karanne monawada kiyala oba thiya gvmnt eke MP lawath danne nehene..
    5. poddak sanwediwa hithala balanna KP balen uddeta yewwa e civil wesiyo hiragewal wala apa duk widinawa..un gena wistharakwath thama hariyata unge demapiyanta deela ne..unge paul anathen anathai.karanna rassawak ne. padinchi karawala thiyenne kudaram wala..yanna lagapatha iskola ne..Eth salli thiyana KP wa aran sakkuwe dagaththa..

    ReplyDelete
  2. මහින්ද රාජපක්ෂ සම්බන්ධ වික්ටර් අයිවන්ගේ සැර බාල කිරීමේ සූත්‍රය -
    එම් ආර් ගේ පාලනය තුල අකටයුතුකම් සිදුවේ.නමුත් මේවා එම් ආර් ට සුවිශේෂී ඒවා නොවේ.ඊට හපන් ඒවා ජේආර් ගේ කාලයේ සිදුවිය.එම් ආර් රෙජිමයේ ගැටලු ගැටලු විය හැකි වුවද ජේ ආර් ගේ කාලයේත් ඕවා වූ නිසා හා කාලාන්තරයක් තිස්සේ සිදුවෙමින් තිබෙන දේවල් නිසා සැර බාල කොට එදෙස බැලිය යුතුය.

    කේපී සම්බන්ධ අජිත් පැරකුම්ගේ සැර බාල කිරීමේ සූත්‍රය -
    කැරලිකරුවන්ගෙන් පන්න පන්නා පලිගනිද්දී හා ඔවුන්ගේ මානුශික අයිතිවාසිකම අහිමි කරද්දි කැරලි නායකයන්ට සැප දීම කේපී සම්බන්ධව පමනක් නොව 71/88 කාලවලද වුන පොදු දෙයකි.කේපී ගේ සිදුවීම යනු මේ නිසා එතරම් "කලබල" විය යුතු දෙයක් නොවේ.කේපීට සැප දීම "නරක" විය හැකි වුවද සැර බාල කොට එදෙස බැලිය යුතුය.

    ReplyDelete

මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.