2011-06-25

මේ මදුරු මර්දනය තනිකර බොරුවකි. භීෂණය වැපිරීමකි.

(2011 ජුනි 25, W3Lanka) මේ දිනවල මදුරු මර්දන සතියකි. තවත් භීෂණයකි.


භීෂණය මදුරුවන්ට නො ව, මිනිසුන්ට ය. කට කතා පැතිර යන්නේ බල්ලකු ගෙනත් දැමූ පොල්කටුවක් තිබුණත් නඩු දමන බවටයි. වැහි පීලිවල වතුර රැඳී තිබුණත් නඩු දමන්නේ පීලි හැදූ එවුන්ට හෝ ඇල්ලූ බාස්ලාට නො ව ගෙහිමියන්ට ය. දැන් වැඩ කරන ජනතාවට සිදු වී තිබෙන්නේ වැඩට යන එක නවත්වා වත්ත වටේ, වහල උඩ ඇවිදිමින් මුර කරන්නට ය.


ජාතික මදුරු මර්දන සතියේ හතර වැනි දිනයේ (23) පරීක්‍ෂා කිරීම්වලදී මදුරු තවාන් පවත්වාගෙන ගිය පුද්ගලයන් 1811ට එරෙහිව නඩු පැවරීමට සෞඛ්‍ය අමාත්‍යාංශය තීරණය කර ඇති බවට ‍ආණ්ඩුව උදම් අනයි.


දැන් බලාගෙන ගියා ම මදුරුවන් බෝ වීම තනිකර මේ රටේ ජනතාවගේ වරදකි. මදුරුවන් බෝ වීම කෙරෙහි මිනිසුන්ගේ නො සැලකිල්ල හේතු නො වන බව අපි නො කියමු. එහෙත්, ඒ සඳහා මූලික හේතුව එය නො ව, ජනතාවගෙන් සූරා බදු අය කර ගන්නා ආණ්ඩුව සිය වගකීම් ඉටු නො කිරීමයි. 


නගර හැර රටේ අනෙකුත් ප්‍රදේශවල කසල කළමනාකරණය සඳහා කිසිදු වැඩපිළිවෙලක් නැත. කිසිදු නගරයක පවා හරිහමන් කසල කළමනාකරණයක් නැත. මදුරුවන් බෝ වීම කෙරෙහි වැඩිපුර බල පාන්නේ කසල බැහැර කිරීමේ අක්‍රමවත්කමයි. එහෙත් පරිසර ඇමති වගකිව යුත්තෙක් වී නැත.


පරිසරය අපවිත්‍ර කිරීමට හා ‍මදුරුවන් බෝ කිරීමට ඉවහල් වන දෑ තැන තැන දැමීමට දඩාවතේ යන බල්ලන්, බළලුන්, ගවයන් හා කපුටන් වැනි සත්තු සෑහෙන්න දායක වෙති. ඔවුන් සම්පන්ධයෙන් වග කියන්නේ කවුරු ද? තොග ගණනින් මිනිසුන් මරන ගමන්, සිඟන්නන්ගේ පවා ඔල් චප්ප කරන ගමන් බොරු සෝබනයට බල්ලන් මැරීම තහනම් කළ අය ඒවාට වගකිව යුතු ය.


අනෙක් පැත්තෙන් ආණ්ඩුව වසර කීපයකට පෙර මහා ලොකු සද්දයක් දමා මයික්‍රොන් 80ට අඩු ඝනකමින් යුත් පොලිතින් භාවිතය තහනම් කළේ ය. එහෙත්, කසල කළමනාකරණයේදී ගැටලුවක් වන මෙවැනි තුනී පොලිතින් ඕනෑ තරම් වෙළඳපොළේ විකිණේ. ඒවා අල්ලන්නේ කවුරු ද?


ඒ දිනවල පුවත්පත්වල, රූපවාහිනීවල පොලිතින්, ප්ලාස්ටික් ඇසුරුම් වෙනුවට වෙනත් ස්වාභාවික විකල්ප හඳුන්වා දෙන බවට මහා ලොකු කයිවාරුවක් තිබිණි. ඒවා කොහිද? මේ පච ප්‍රචාර සඳහා මහජන මුදල් කෙතරම් වැය කළා ද?


ඉලෙක්ට්‍රොනික් අපද්‍රව්‍ය බැහැර කිරීමට ය කියා දුරකථන පාවිච්චි කරන්නන්ගෙන් අය කරන බද්දෙන් කරන කාර්යය කුමක් ද?


පසුගිය කාලයේ බී.ටී.අයි. බැක්ටීරියාව ‍කියුබාවෙන් ගෙන්වීම සදහා වියදම් කළ මුදලින් කුමක් සිදු වී ද? බී.ටී. අයි. බැක්ටීරියාව දේශීයව නිෂ්පාදනය කරන බවට හා අඩු මිළට වෙළඳපොළට නිකුත් කරන බව කීව ද එය සිදු නො වුණේ ඇයි? බී.ටී.අයි. ගැන කතා කරන්නට මහජන මුදලින් නඩත්තු වන ජනමාධ්‍යවල, පාර්ලිමේන්තුවේ ආදියේ කාලය කෙතරම් කා දැමුවා ද? ඒවාට වග කිව යුත්තේ කවුරු ද?


අපි සෞඛ්‍ය බලධාරීන්ට අභියෝගයක් කරමු. රටේ මදුරුවන් බෝ වීම වැඩිපුර සිදු වන්නේ ස්වාභාවික පරිසරයේ ය. එනම්, කෙසෙල් පිත්තේ, අන්නාසි පිත්තේ, හබරල පිත්තේ, රම්පෙ කොළයේ වැනි තැන්වල ය. මදුරු පරීක්ෂකවරු ඒවා ගැන නො දන්නා සේ හැසිරෙති. උන් එක්ක තර්ක කළ විට නතර වන්නට සිදු වන්නේ උසාවියේ ය.


මේ අන්දමින් බෝ වන මදුරුවන් මර්දනය කිරීම සඳහා කෙසෙල් ගසේ සිට පෙති ගසා දමමු ද? එවිට අර ඒ දවස්වල කතා කළ 'අපි වවමු - රට නගමු'ට කුමක් සිදු වේ ද?


මේ මදුරු මර්දනය තනිකර බොරුවකි. භීෂණය වැපිරීමකි. ආණ්ඩුව තමන්ගේ වගකීම් මුළුමනින් ම පැහැර හැර බදු ගෙවන ජනතාව පිට ම වරද පැටවීමේ මාධ්‍ය ජිමික් එකකි. 

මේ ලිපියට ඔබ කැමති නම් වෙන අයත් එක්කත් බෙදා ගන්න

4 comments:

  1. Yes today the PHI , Police and one person from Navy visited my house. They could not find any object or plant that will breed mosquitoes. Then they started walking the outside in the road around house and found ice cream cups that were discarded by the members of the public who use the road.

    They say it is my responsibility to clean even the outside parameter which belongs to CMC.

    I told them I cannot hold responsibility for a public road.

    This is the wonder of Asia!!!!

    ReplyDelete
  2. මේ මදුරු උවදුර නැති කරන එක සුළු දෙයක් නේ!
    දෙන්නකෝ අනේ මයි ගෝඩ් නාථ ද සිල්වා ට කෝල් එකක්.

    ReplyDelete
  3. මට නම් හිතෙන්නේ මේක ආන්ඩුව හොඳ ආදායම් මාර්ගයක් කරගෙන ඇති බවයි.මදුරුවෝ බෝ වෙන්න ඉඩ ඇරියා කියල මිනිස්සුන්ට දඩ ගහන එකෙන්ම ආන්ඩුවට ආදායමක් ලැබෙනවනේ.නරකද හෙමෝම එකතු වෙලා සාමූහිකව නඩුවක් දැම්මොත් බී ටී අයි බැක්ටීරියාව ගෙනත් මේ කරදරය ඉවර කරන්න පුලුවන්කම තිබෙද්දි ඒක නොකර පිස්සු කෙලිනවා කියලා.

    ReplyDelete

මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.