2011-03-31

සාමාන්‍ය පෙළ අසාමාන්‍ය ප්‍රතිඵලය ජිල්මාට් ද?

(2011 මාර්තු 31, W3Lankaවිභාග ප්‍රතිඵල ඉහළ යාම හොඳ දෙයකි. වැඩි වැඩියෙන් දරුවන් විභාග සමත් වීම යනු ලංකාවේ උගතුන් ප්‍රතිශතය ඉහළ යාමයි.


ලංකාවේ මාරාන්තිත තරග විභාග යනු කොහොමත් යහපත් දෙයක් නො වේ. පහේ ශිෂ්‍යත්වයේ පටන් ම ඒවායේ අරමුණ ඉහළ ගුණාත්මක මට්ටමේ අධ්‍යාපනයට ඇති සීමිත අවස්ථා ගණනට පිරිසක් තෝරාගෙන ඉතිරි පිරිස හළා දැමීමයි.


පසුගියදා ප්‍රතිඵල නිකුත් වූ අ.පො.ස. සාමාන්‍ය පෙළ විභාගයේ ප්‍රතිඵල අති විශ්ෂ්ට ය. කෙතරම් විශිෂ්ට ද යත්, සාමාන්‍ය පෙළට ඉගැන්වූ, පාසල් වාර විභාග උත්තර පත්‍ර බැලූ හා සාමාන්‍ය පෙළ විභාගයේ උත්තර පත්‍ර අධීක්ෂකයන් ලෙස කටයුතු කළ අය පවා එතරම් හොඳ ‍ප්‍රතිඵල ලැබීම විශ්වාස නො කරති.


විභාගයේ ප්‍රශ්න පත්‍ර ද සරළ මට්ටමේ ඒවා නො වූ සංදර්භයක සාමාන්‍ය පෙළ විභාගයේ ප්‍රතිඵල මෙසේ අසාමාන්‍ය ලෙස ඉහළ යාම බොහෝ ගුරුවරුන්ගේ සැකයට භාජනය වී තිබේ.


පැතිරෙන කටකතා භයානක ය. කොම්පියුටර් ජිල්මාට් ද, එක්තරා බලධාරියකුගේ පුතකු විභාගයට ලිවීම ද, තවත් බලධාරීන්ට පෞද්ගලිකව කැපී පෙනෙන්නට අවශ්‍ය වීම ආදී කරුණු ද මේ කතා බහ අතර වේ.


විභාග ක්‍රමය පිළිබඳ ද මැතිවරණ ක්‍රමය පිළිබඳ සේ විශ්වාසය නැතිව යාම භයානක තත්වයකි. මේ වසරේ ලකුණු මට්ටම්වල සැලකිය යුතු අඩු කිරීමක් කළා නම්, එය පසුගිය වසරවල සාමාන්‍ය පෙළ ලියූ දරු දැරියන්ගේ මානව හිමිකම් උල්ලංඝනය කිරීමක් විය හැකි ය.


විභාග දෙපාර්තමේන්තුවට කළ හැකි දෙයක් ඇත. සාමාන්‍ය පෙළ විභාගයේ ඒ ඒ විෂයයන්ට අදාළව සිසුන් ලබා ගත් ලකුණු මට්ටම් පිළිබඳ විශ්ලේෂණයක් ප්‍රසිද්ධ කළ හැකි ය. සමත් ප්‍රතිශතය වැඩි කරන්නට ලකුණු මට්ටම් අඩු කළා ද යන්න එවිට පෙනෙනු ඇත.


පහත පළ වන්නේ දිනමිණ පුවත්පත සාමාන්‍ය පෙළ ප්‍රතිඵල ප්‍රසිද්ධ කළ අන්දමයි.



අපොස සා/පෙළ ඉතිහාසයේ විශිෂ්ටතම ප්‍රතිඵල මෙවරයි

- ඇමැති බන්දුල ගුණවර්ධන
විභාග දෙපාර්තමේන්තුව ඊයේ (16) නිකුත් කළ අධ්‍යයන පොදු සහතික පත්‍ර (සාමාන්‍ය පෙළ) විභාගයේ ප්‍රතිඵල අනුව උසස් පෙළ හැදෑරීම සඳහා පාසල් අයදුම්කරුවෝ 195112ක් සුදුසුකම් ලබා ඇත.

ප්‍රතිශතය 62%කි. එයින් අයදුම්කරුවෝ 182630ක් ඍජුවම උසස් පෙළට සුදුසුකම් ලබා ඇති අතර පාසල් පාදක ඇගයීම් පදනම් කර ගනිමින් ලැබෙන අතිරේක සම්මානය නිසා තවත් 12482 දෙනකුට උසස් පෙළට සුදුසුකම් හිමිවී ඇතැයි විභාග කොමසාරිස් ජනරාල් අනුර එදිරිසිංහ මහතා කියයි.

මවර ප්‍රතිඵල අනුව විෂයයන් නවයට ම ‘ඒ’ සමාර්ථ ලැබූ ගණන 3059කි. 2009 දී එම සංඛ්‍යාව 2039ක් විය. වර්ධනය 1020කි. ගණිතය හා මාධ්‍ය භාෂාව සමඟ විෂයයන් හයක් සමත් පාසල් අයදුම්කරුවන් ගණන 175000ක් වන බවත් 2009 දී එම සංඛ්‍යාව 140,000ක් වූ බවත් හෙතෙම කීවේය. පෙනී සිටි සියලුම විෂයයන් අසමත් සංඛ්‍යාව 14961 කි. ප්‍රතිශතය 4.82ක් වේ. එම සංඛ්‍යාව 2009 දී 20221ක් විය. එවර ප්‍රතිශතය වූයේ 4.82 කි.

ගණිතය සමත් ප්‍රතිශතය මෙවර 61.61කි. විද්‍යාව 59.80ක් හා ඉංගී‍්‍රසි 41.41කි. 2009 දී එම ප්‍රතිශතය පිළිවෙළින් 50.17, 44.31 සහ 37.35ක් ව තිබිණි.

2010 අ.පො.ස. සාමාන්‍ය පෙළ විභාගයට පාසල් හා පෞද්ගලික අයදුම්කරුවෝ 542,000ක් පෙනී සිටියහ.

අ.පො.ස. සාමාන්‍ය පෙළ ඉතිහාසයේ මෙතරම් විශිෂ්ට සමාර්ථයක් වාර්තා කළ පළමු අවස්ථාව මෙය බව ප්‍රතිඵල නිකුත් කිරීමේ මාධ්‍ය සාකච්ඡාවට සම්බන්ධ වූ අධ්‍යාපන ඇමැති බන්දුල ගුණවර්ධන මහතා කීවේය.

වෙනදාට වඩා සති තුනකට පෙර ප්‍රතිඵල නිකුත් කළ හැකිවූ බවත් ජාතික අධ්‍යාපන ආයතනය, අධ්‍යාපන ප්‍රකාශන දෙපාර්තමේන්තුව හා විභාග දෙපාර්තමේන්තුව යන ආයතනවල සම්බන්ධය වැඩිකිරීම, ගණිතයධ්ධ් ප්‍රශ්න පත්‍රයට පැය භාගයක අතිරේක කාලයක් ලබාදීම, ආදර්ශ ප්‍රශ්න පත්‍ර ලබා දී පාසල් සම්මන්ත්‍රණ 1250ක් පැවැත්වීම, පසුගිය ප්‍රශ්න පත්‍ර මුද්‍රණය කර සාධාරණ මිලට අලෙවි කිරීම යනාදිය මෙම විශිෂ්ට ප්‍රතිඵල අත්කරදීමට හේතුසාධක වූ බවත් ඇමැතිවරයා කීය.

සියලු විෂයයන් අසමත් ගණන මෙවර 6000කින් අඩුව ඇත. බුද්ධ ධර්මය සමත් ප්‍රතිශතය 81%කි. එය 2009 දී 79%ක් විය. සිංහල භාෂාව සමත් ප්‍රතිශතය 78.34 සිට 82.89 දක්වා වැඩිවී තිබේ. ශිව ධර්මය හා ඉස්ලාම් ධර්මය සමත් ප්‍රතිශතය පිළිවෙළින් 81 හා 90.23ක් වේ.
2009 දී එම ප්‍රතිශත 96ක් හා 93ක් වැනි අගයකින් පැවැති බවත් කොමසාරිස් ජනරාල්වරයා කීවේය. 2009 දී ඉතිහාසය සමත් ප්‍රතිශතය 59.20ක් විය. මෙවර එය 73.68ක් දක්වා වැඩිවී ඇත. පුරවැසි අධ්‍යාපනය ද 67.55 සිට 77.50 දක්වා වර්ධනයක් පෙන්වයි.
සාමාන්‍ය පෙළ ඉහළම සාමාර්ථ ලැබූ විසිපස්දෙනා ගෙන් වැඩිදෙනා ගම්බද සිසුන් බව පැහැදිලිව ප්‍රකාශ කළ හැකි බවත් එම සිසුන්ගේ නම් ඉදිරියේ දී ප්‍රකාශ කරන බවත් එදිරිසිංහ මහතා කීය.

විභාග ප්‍රතිඵල අන්තර්ජාලයට ඊයේ (16) දහවල් නිකුත් කර ඇත. කොළඹ සහ ශ්‍රී ජයවර්ධනපුර කලාපයේ විදුහල් සඳහා ප්‍රතිඵල ලේඛන එම විදුහල්පතින්ට හෙට (18) දෙපාර්තමේන්තුවට පැමිණ ලබා ගත හැකිය. සෙසු පාසල් සඳහා ප්‍රතිඵල ලේඛන ඊයේ රාත්‍රියේම තැපැල් කිරීමට පියවර ගන්නා ලද බවත් පෞද්ගලික අයදුම්කරුවන්ගේ ප්‍රතිඵල මුද්‍රණය පටන් ගත් බවත් කොමසාරිස් ජනරාල්වරයා කීවේය.
මේ අවස්ථාවට අධ්‍යාපන අමාත්‍යාංශයේ ලේකම් එච්. එම්. ගුණසේකර මහතා ඇතුළු ජ්‍යෙෂ්ඨ නිලධාරීහු සහභාගි වූහ.
.


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-30

ලංකාවට බුද්ධ ශාසන කීර්ති ශාසන බන්ධුවරයෙක් හා දේශමාමක ජනප්‍රසාදන ලංකා පුත්‍රයෙක් පහළ වෙති

(2011 මාර්තු 30, W3Lankaමහජන සම්බන්ධතා හා මහජන කටයුතු පිලිබඳ අමාත්‍ය ආචාර්ය මර්වින් සිල්වා මහතාට අනුරාධපුර මහා විහාර සංඝ සභාවේ සමාන ජන්දයකින් "බුද්ධ ශාසන කීර්ති ශාසන බන්ධු" ගෞරවනාමය අටමස්තානධිපති ආචාර්ය පල්ලේගම සිරිනිවාස නාහිමියන් විසින් පසුගිය දා අනුරාධපුර මහා විහාරයේදී පිරිනමන ලදී.


ඒ අනුව, ආචාර්ය මර්වින් සිල්වා බුද්ධ ශාසන කීර්ති ශාසන බන්ධුවරයෙකි.


ශ්‍යාමෝපාලි වංශික මහා නිකායේ අස්ගිරි මහා විහාර පාර්ශ්වයේ අති පූජ්‍ය මහානායක නාහිමි ප්‍රමුඛ විංශද්වර්ගික කාරක මහා සංඝ සභාව මගින් ජනමාධ්‍ය හා ප්‍රවෘත්ති අමාත්‍ය කැබිනට් ප්‍රකාශක ආචාර්ය කෙහෙලිය රඹුක්වැල්ල මහතාට “දේශමාමක ජනප්‍රසාදන ලංකා පුත්‍ර” ගෞරව නාමය පිරිනැමීමට තීරණය කැර ඇත.


ආචාර්ය කෙහෙලිය රඹුක්වැල්ල දේශමාමක ජනප්‍රසාදන ලංකා පුත්‍රයෙකි.


බුදු සු බැලේවා!


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-29

කෙරවළපිටියෙන් කෙළවර නො වන චම්පික - ශ්‍රීලනිප ගැටුම

(2011 මාර්තු 29, W3Lankaආණ්ඩුව ඇතුළේ ජාතික හෙළ උරුමයත්, ශ්‍රී ලංකා නිදහස් පක්ෂයත් අතර මහා සංග්‍රාමයක් ඇවිළී තිබේ. මේ ගින්න ඇවිළෙන්නේ තෙල් හා විදුලිය උපයෝගී  කරගෙනයි. තේරෙන භාෂාවෙන් කියනවා නම් ඛනිජ තෙල් කර්මාන්ත ඇමති, එක්සත් ජනතා නිදහස් සන්ධානයේ ‍ප්‍රධාන ලේකම් හා ජ්‍යේෂ්ඨ ශ්‍රිලනිප නායක සුසිල් ප්‍රේම ජයන්තත් ජාතික හෙළ උරුමයේ සැබෑ නායක පාඨලී චම්පික රණවකත් අතරයි.


මෙම ගැටුමට හේතුව චම්පික රණවක කැබිනට් සාමූහික වගකීම අමතක කර, තමන් වැඩකාරයා බව තනියෙන් පෙන්නමින් සෙස්සන් කපාගෙන යන්නට උත්සාහ කිරීමයි.


ඔහුට අවශ්‍ය වී ඇත්තේ තමන් වනාහි පාඩු ලැබූ ආයතන ලාභ ලබන තත්වයට පත් කරන විශ්වකර්මයකු බව පෙන්වමින් අනාගත රාජ්‍ය නායකත්වය සඳහා සිය යෝග්‍යතාව ප්‍රදර්ශනය කිරීමයි. මෙය කරනු ලබන්නේ ප්‍රධාන වශයෙන් ම දැවැන්ත මාධ්‍ය සංදර්ශනයකිනි.


තම අමාත්‍යංශය යටතේ ඇති ආයතනවල පාඩු වෙනත් අමාත්‍යංශ යටතේ ඇති ආයතන වෙත පවරා ලාභ පෙන්වීම චම්පිකගේ විශ්වකර්ම න්‍යායයි. අප මෙම ගැටුමේ මුල් අවධිය සුසිල් ප්‍රේම ජයන්ත අතට දරුවා දී කන්‍යාවක් සේ පෙනී සිටින චම්පික රණවක නම් ලිපියෙන් විස්තර කළෙමු.


දැන් එහි දෙවන අදියර කෙළවරපිටිය යුගදනවි බලාගාරය ආශ්‍රිතව රඟ දැක්වේ. මෙගාවොට්‌ තුන්සියයකින් සමන්විත කෙරවළපිටිය "යුගදනවි" විදුලි බලාගාරය සඳහා ලංකා ඛනිජ තෙල් සංස්‌ථාවෙන් ලබාගත් රුපියල් මිලියන 3800 ක්‌ වටිනා ඉන්ධන වෙනුවෙන් ගෙවිය යුතු මුදල නොගෙවීම නිසා ලංකා ඛනිජ තෙල් සංස්‌ථාවෙන් යුගදනවි බලාගාරයට දැවිතෙල් ලබාදීම නතර කර තිබේ. මේ හේතුව නිසා බලාගාරයේ කටයුතු නතර කර ඇත.


යුගදනවි බලාගාරයේ විදුලිය නිපදවනුයේ දැවි තෙල් මගින් ය. ලංකා ඛනිජ තෙල් නීතිගත සංස්ථාව විදෙස් වෙළෙඳපොළට දැවි තෙල් විකිණීමෙන් පසුගිය ජනවාරි මාසය තුළ ඇමරිකානු ඩොලර් කෝටි 162 ක ලාභයක් උපයා ඇති බව ඛනිජ තෙල් කර්මාන්ත අමාත්‍ය සුසිලි ප්‍රේමජයන්ත් මහතා අද දිනමිණට පවසා තිබේ. යුගදනවි බලාගාරයේ අර්බුදය පිළිබඳ අද දිනමිණ වෙබ් අඩවියේ කිසිවක් දක්නට නැත. මේ කියන්නේ යුගදනවියට ණයට තෙල් දෙනවා වෙනුවට අපනයනයෙන් ඛනිජ තෙල් සංස්ථාවට ලාභ ලැබිය හැකි බව හා සංස්ථාව පාඩු ලබන්නේ විදුලිය නිෂ්පාදනය හා සම්බන්ධ ආයතනවලට ණයට තෙල් දීම‍ට සිදු වී තිබෙන නිසා බව නො වේ ද?


ඇමති චම්පික රණවකගේ කපාගෙන යාම සුසිල් ප්‍රේම ජයන්ත‍ගෙන් අවසන් වී නැත. එය විශේෂයෙන් ම ජනාධිපති සහෝදර හා මීළඟ රාජ්‍ය නායකයා වීමට ඉඩ ඇති බැසිල් රාජපක්ෂ හා ජනාධිපතිවරයා දක්වා ද විහිදෙයි.


විදුලි බල හා බලශක්ති අමාත්‍යංශය විසින් නිකුත් කර තිබෙන අලුත් ම නිවේදනයේ සදහන් වන පරිදි යුගදනවි බලාගාරයේ හිමිකාරිත්වය දරන කොටස්‌කරුවන් වන්නේ ජනාධිපතිතුමන් යටතේ ඇති මහා භාණ්‌ඩාගාරය, සේවක අර්ථ සාධක අරමුදල සහ ලංකා විදුලි පෞද්ගලික සමාගම සහ වෙස්‌ට් කෝස්‌ට් සමාගමයි. මේ අතරින් ලංකා විදුලි පෞද්ගලික සමාගම ඍජුව ම විදුලි බල හා බල ශක්ති අමාත්‍යංශයට අයත් වේ. වෙස්‌ට් කෝස්‌ට් සමාගම රජයේ එකක් ද පෞද්ගලික එකක් ද යන්න පැහැදිලි නැති මුත් ලංකා විදුලි පෞද්ගලික සමාගම එහි කොටස්කරුවකු බව නම් Daily News පුවත්පතේ 2008 මාර්තු 27දා ‍පළ වී ඇති මෙම සඳහනෙන් පැහැදිලිව පෙනේ.


West Coast Power (Private) Limited, an independent power producer in the country was given the support from several sponsors including the government of Sri Lanka, Lakdhanavi Limited, Lanka Electricity Company Limited and the Employees Provident Trust Fund.


මේ අනුව බලන කල පෙනෙන දෙයක් නමි ලංකා විදුලි බල මණ්ඩලය යුගදනවි බලාගාරයේ පාලනයට ඍජුව ම සම්බන්ධ බවයි. එහෙත් විදුලි බල හා බලශක්ති අමාත්‍යංශය සිය නිවේදනයේ මෙසේ සඳහන් කරයි. "කෙසේ වෙතත් ලංකා විදුලිබල මණ්‌ඩලය යුගදනවි ආයතනයේ පරිපාලනයට සෘජු සම්බන්ධයක්‌ නැතත් එම ආයතනයෙන් අඩු මුදලට විදුලිය ලබා ගැනීමට ලං.වි.ම.ට ඇති හැකියාව හේතුවෙන් ඛනිජ තෙල් නීතිගත සංස්‌ථාවට පියවිය යුතු මුදල් ලංකා විදුලිබල මණ්‌ඩලයේ මැදිහත්වීමෙන් ගෙවීමට අවශ්‍ය කටයුතු සිදුකරන ලෙස විදුලිබල හා බලශක්‌ති අමාත්‍යවරයා විසින් මේ වනවිටත් ලං.වි.ම.ට උපදෙස්‌ ලබාදී එය ක්‍රියාත්මක කර ඇත."


මේ රවටන්න හදන්නේ කාව ද?


ඇමති චම්පික රණවකට මේ නිවේදනය නිකුත් කරන්නේ තම පක්ෂයෙන් ද නැතිනම් අමාත්‍යංශයෙන් ද යන්න පවා අමතක වී තිබේ. නිවේදනයේ රස ම කෑල්ල එහි අවසන් ඡේදයයි. ඒ මෙසේ ය:


"එහිදී ලංකා විදුලිබල මණ්‌ඩලය සමග අත්වැල් බැඳගෙන සිටින සියලුම පාර්ශ්ව වෙනුවෙන් සමස්‌ත මහජනතාවගේ සුභසිද්ධිය උදෙසා ඕනෑම යහපත් ඉදිරි පියවරක්‌ තැබීමට ලංකා විදුලිබල මණ්‌ඩලය පසුබට නොවන බවද අවධාරණය කර සිටියි."


බලාගෙන යන විට විදුලි බල මණ්ඩලයත් ජාතික හෙළ උරුමය වැනි වීරෝදාර, දේශප්‍රේමී වර්ගයේ එකකි.


ඇමති සුසිල් ප්‍රේම ජයන්ත මාධ්‍ය සංදර්ශන ඔස්සේ ප්‍රතිරූප ගොඩනඟා ගැනීමෙහි ලා චම්පික රණවක තරම් දක්ෂයකු නො වේ. ඔහු උත්සාහ කරන්නේ ඇමති චම්පික රණවකගේ බොල් ප්‍රතිරූපය බිද දමන්නටයි. ඒ සඳහා ශ්‍රීලනිප ප්‍රබලයන්ගෙන් ඔහුට ශක්තිය ලැබෙමින් තිබෙන බව පෙනේ.


මේ ආයතන සියල්ල ආණ්ඩුව නම් එක ම ශරීරයක කෑලි ය. මේ ගැටුම් වනාහි අත, කකුල හා තරහ වීම, ඇඟිල්ල තමන්ගේ කොටසක් නො වේ යයි අත කීම වැනි ගොන් පාට් ය. 


මෙම තේ කෝප්පයේ කුණාටුව දක්ෂයන්, අදක්ෂයන් අතර ගැටුමක් ලෙස හුවා දැක්වීමට ඇමති චම්පික රණවක පාර්ශ්වය විසින් උත්සාහ කරනු දක්නට ලැබේ. මේ විගඩම් දකින මහජනතාව වන අපට කීමට ඇත්තේ 'ඇමතිතුමනි, ඔය පෙනෙන්නේ ඔබතුමන්ලාගේ අදක්ෂකම ම තමා ය' කියා ය.


මේ කුලල් කා ගැනීමේ සංදර්ශනය පැවැත්වෙන්නේ මහජන මුදලින් ගොඩනැඟූ දේපල තලා දමමින් බව කැබිනට් සාමූහික වගකීමේ නාමයෙන් අපි ඔබට මතක් කරන්නෙමු.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-28

ලංකාවට පෙරේ(වා)රා!

(2011 මාර්තු 28, W3Lanka1960 දශකයේ මුල් භාගයේදී මුදල් ඇමති ඇන්.ඇම්. පෙරේරා ගෙන ඒමට උත්සාහ කළ පනතකින් අදහස් කෙරුණේ පුද්ගලයකුට තමන්ට බීමට අවශ්‍ය රා නිපදවා ගැනීම සඳහා ගසක් මැද ගැනීමේ නිදහස ලබා දීමයි. එහෙත්, සුපුරුදු පරිදි ඊනියා මත්පැන් විරෝධීහු එයට විරුද්ධව කළ උද්ඝෝෂණයේ ප්‍රතිඵලයක් ලෙස පනත හකුළා ගන්නට සිදු විය. එදා අප අසා ඇති පරිදි ඩී.බී. ධනපාල මහතාගේ කර්තෘත්වයෙන් යුත් ලංකාදීප පුවත්පතේ ‍ඓතිහාසික හෙඩිමක් පළ විය. ඒ වනාහි පොල් ගෙඩි අකුරෙන් පෙරේ-රා යන්නයි.


ලේඛකයා මෙම සටහන තබන ස්ථානය පිහිටි ඉඩමේ 1970 දශකයේදී ගමේ ප්‍රසිද්ධ කිතුලක් තිබිණි. එහි මල කැපුවේ ජුලියස් සිං‍ඤෝ ය. හැන්දෑවට කිතුල අසල වන රොද තුළ ජුලියස් සිං‍ඤෝ පුංචි පහේ බාර් එකක් පවත්වා ගෙන ගියේ ය.


එක් කලෙක මෙම ගම අයිති පොලිස් ස්ථානයේ අධිපතිව එක්තරා වීරයෙක් පැමිණියේ ය. ඔහුට කිතුල් මල් පෙන්නන්නට බැරි ය. ජුලියස් සිංඤෝගේ මලට ද පොලිසිය ආවේ ය. ඔහු ගසට යවා මල මුලින් ම කැප්පවූ පොලිසිය මල ඔහුගේ ම කරේ තබා පොලිසි ගෙන ගියේ ය.


කිතුල් රා නැති වන විට කසිප්පු ආවා විනා සහ ගමේ බේබදුකම වැඩි වුණා මිස අඩුවක් නම් වූයේ  නැත.


අද වන විට ලේඛකයාගේ ගමේ මලක් මදින්නට දන්නා අය විරළ ය. කිතුල් පැණි හකුරු කර්මාන්තයක් ඇත්තේ ම නැත. දැන් කිතුල් ලී තරප්පුවල ඇතිරීමේ මෝස්තරයක් සල්ලිකාරයන් අතර පැතිර ඇත. කිතුල් ගසකින් ලී ලබා ගත හැක්කේ ස්වල්පයක් පමණක් බැවින් තරප්පු පෙළක ඇතිරීම සඳහා කිතුල් ගස් ගණනාවක ලී අවශ්‍ය වේ. දැන් කිතුල් ගසට කණ කොකා හඬමින් තිබේ.


දැන් ආණ්ඩුව ප්‍රගතිශීලී තීරණයක් ගෙන ඇත.


කිතුල් ගස් මැදීමේදී බලපත්‍රයක් ලබා ගැනීමට රජය පනවා තිබූ නීතිය අහෝසි කෙරේ.


ඒ අනුව කිතුල්ගස් මැදීම සඳහා මින් ඉදිරියට රජයෙන් බලපත්‍රයත් ලබා ගැනීමට අවශ්‍ය නොවන බව කෘෂිකර්ම ඇමැති මහින්ද යාපා අබේවර්ධන මහතා “දිනමිණ” ට පැවැසීය. තෙලිජ්ජ කර්මාන්තය දියුණු කිරීමේ අරමුණින් රජය මේ තීරණයට එළඹි බවත්, මින් ඉදිරියට නිදහස් තෙලිජ්ජ නිෂ්පාදනය කිරීමේ කර්මාන්තයේ යෙදීමට අවකාශය ලැබෙන බවත් ඒ මහතා කීය.


මින් ඉදිරියට එම කර්මාන්තයේ යෙදෙන්නන්ට බාධාකිරීම් නොකරන ලෙස පොලිසිය හා වගකිවයුතු නිලධාරීන්ට දැනුම් දුන් බව ද යාපා මහතා සඳහන් කළේය.


තෙලිජ්ජ කර්මාන්තයට යොදා නොගන්නා කිතුල් ගස් ලක්‍ෂ 28 ක් පමණ තිබෙන බව පවසන ඇමැතිවරයා, මින් නිසි ඵල ලබා ගැනීම සඳහා කටයුතු කරන ලෙස එහි නියැලෙන කර්මාන්තකරුවන්ගෙන් ඉල්ලා සිටියේය.


මෙම බලපත්‍රය වනාහි රජයට කිසිදු ආදායමක් නො ලැබුණු එකකි. මන්ද, කැළේට වැවෙන ගස්වල මල් කපන දුප්පත් ගැමියන්ට මේ බලපත්‍ර ලබා ගැනීම දුෂ්කර විය. කවුරුවත් කිතුල් වවන්නේ නැත. ඒවා වවන්නේ ඇට කා බෙටි දමන සත්තු ය. 


රා පෙරීම තහනම් වුවත්, එයට එරෙහිව පොලිසිය ක්‍රියාමාර්ග නො ගනු ඇතැයි අපේක්ෂා කළ හැකි ය. මන්ද, ඉඳ හිට කිතුල් රා පොල් කට්ටක් බීම පොලිසියේ රාළහාමිලාට වුව නරක නැති නිසා ය.  

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-27

පරණ බෝතලේ අලුත් වයින්: රාජ්‍ය දේපල විකුණන් කෑම දැන් අලුත් නමකින්

(2011 මාර්තු 27, W3Lankaමහින්ද චින්තන ප්‍රතිපත්තිය අනුව රාජ්‍ය ආයතන පෞද්ගලීකරණය කරන්නේ නැත. ඒ වෙනුවට ඒවා ප්‍රතිව්‍යූහගත කරනු ලැබේ.


ප්‍රතිව්‍යූහගත කරනවා කියන්නේ කොටස්වලින් 50%ක් රජය සන්තකයේ තබාගෙන ඉතිරි 49% පෞද්ගලික අංශයට විකිණීමයි.


කලින් ලංකා ඔක්සිජන් සමාගම ෂෙල් කොම්පැනියට විකිණීම, එයා ලංකා ගුවන්සේවය එමිරේට්ස් සමාගමට විකිණීම, ටෙලිකොම් ජපන් එන්.ටී.ටී. සමාගමට විකිණීම වැනි වැනි කටයුතු කෙරුණේ ද මේ අන්දමට ම ය. ඒවායේ පෞද්ගලික අංශයට දුන් කොටස් ප්‍රතිශතයන් මීට වඩා අඩු ය.


කලින් එයට කියුවේ පෞද්ගලීකරණය කියා ය. නැතිනම් විකුණන් කනවා කියා ය. මේ කැත වැඩේ කළ ආණ්ඩුවල කැබිනට් මණ්ඩලවල වත්මන් ජනාධිපතිතුමා ද සිටියේ ය. එහෙත්, ජනාධිපති වූ පසු එතුමා එයට විරුද්ධ ය කියා කියනු ලැබේ.


කන්න ඕනෑ වූ විට කබරගොයා තලගොයා කර ගන්නවා සේ දැන් මේ වැඩේට කියන්නේ ප්‍රතිව්‍යූහගත කිරීම කියා ය. මක් නිසා ද යත්, අපේ ජනාධිපතිතුමා පෞද්ගලීකරණය කරන්නේ නැත.


මෙන්න මුලින් ම 'ප්‍රතිව්‍යූහගත' කරන්නට යන ආයතන පහ:


ඇඹිලිපිටිය කඩදාසි සංස්‌ථාව, ලංකා පිඟන් සංස්‌ථාව, කන්තලේ සීනි කර්මාන්ත ශාලාව, මාවනැල්ල රබර් පර්යේෂණ ආයතනය, බී. සී. සී. ආයතනය


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-26

නියපොත්තෙන් යුක්තිය පසිඳලන ලංකාවේ අලුත් ආශ්චර්යය

(2011 මාර්තු 26, W3Lankaඉතිහාසය පුරා ම අධිකරණ අමාත්‍යාංශයේ විෂය පථයට අයත් වූ නීතිපති දෙපාර්තමේන්තුව පසුගිය අමාත්‍ය මණ්ඩල සංශෝධනයේදී ජනාධිපතිවරයාගේ විෂය පථයට අයත් ආයතනයක් ලෙස නම් කරන ලදී.


ආණ්ඩු පක්ෂයේ හිටපු උප ඇමතිවරයකු වූ චන්දන කත‍්‍රිආරච්චිට එරෙහිව වසර 14ක් තිස්සේ විභාග වෙමින් තිබූ මිනීමැරුම් නඩුවක චෝදනා ඉවත් කරගන්නට පෙබරවාරි මාසයේදී නීතිපතිවරයා තීරණය කළේ ය.


එජාපයෙන් ආණ්ඩුවට කරණම් ගැසූ මහනුවර දිස්ත‍්‍රික් පාර්ලිමේන්තු මන්ත‍්‍රී අබ්දුල් කාදර්ට එරෙහිව තිබූ සමෘද්ධි මුදල් වංචා නඩුවේ චෝදනාවලින් ද ඔහු නිදහස් කරන ලදී.


මේ අලුත් ම ප්‍රවෘත්තියයි:


දීර්ඝ කාලයක්‌ තිස්‌සේ ඇසුරු කළ බාල වයස්‌කාර දැරියක්‌ දූෂණය කිරීමේ චෝදනාවන් සම්බන්ධයෙන් පවරා තිබූ නඩුවෙන් පාර්ලිමේන්තු මන්ත්‍රී දුමින්ද සිල්වා මහතා නිදහස්‌ කිරීමට කොළඹ මහාධිකරණ විනිසුරු සුනිල් රාජපක්‍ෂ මහතා 24 වැනිදා නියෝග කළේය.


24 වැනිදා මහාධිකරණය හමුවේ නඩුව කැඳවූ අවස්‌ථාවේදී අගතියටපත් පාර්ශ්ව වෙනුවෙන් පෙනී සිටි එම්. සී. එම්. මුනිර් මහතා කරුණු දක්‌වමින් එම දැරියගෙන් විත්තියේ නීතිඥවරයා හරස්‌ ප්‍රශ්න ඇසීමේදී එම සම්බන්ධය පිළිබඳව වැඩිදුර කරුණු හෙළි කිරීමට සිදුවන නිසා ඇය සාක්‍ෂි ලබාදීමට මැළිකමක්‌ දක්‌වන බවත් ඒ පිළිබඳව දිවුරුම් ප්‍රකාශයක්‌ මගින් නීතිපතිවරයාට කරුණු දක්‌වා නඩුව ඉල්ලා අස්‌කර ගැනීමට අවසර ඉල්ලා ඇති බවත් පෙන්වා දුන්නේය.


අගතියට පත් පාර්ශ්වයේ ඉල්ලීම අනුව අධිචෝදනා පත්‍රය ඉල්ලා අස්‌කර ගන්නා බව එහිදී පැමිණිල්ල වෙනුවෙන් පෙනී සිටි රජයේ නීතිඥවරයා පෙන්වා දුන් අතර දෙපාර්ශ්වය ඉදිරිපත් කළ කරුණු සලකා බැලූ මහාධිකරණ විනිසුරුවරයා එම නියෝගය නිකුත් කළේය. (උපුටා ගැනීම දිවයිනෙනි.)


ලංකාවේ යුක්තිය පසිඳලීම සිදු වන හැටි තේරුම් ගැනීමට තවත් පුවත් අවශ්‍ය නැත.


ඇමති මිල්රෝයි ප්‍රනාන්දු‍ගේ අනියම් බිරිඳ හා සේවිකාව මරා මරණ දඬුවමට ලක් වූ නියම බිරිඳ නිදහස් කිරීම පිණිස ජනාධිපතිවරයාට රවුම් පාරක යන්නට සිදු විය. පළමුව එක් සමාවකින් මරණ දඬුවම ජිවිතාන්තය දක්වා දඬුමක් බවට පත් කර දෙවනුව ජාත්‍යන්තර කාන්තා දිනය අල්ලා සමාවක් දී බරපතල අපරාධවලට දඬුවම් ලැබ සිටි තවත් එවැනි අපරාධකාරියන් පිරිසක් සමග ඇමති බිරිඳ නිදහස් කිරීමට එතුමාට සිදු විය. 


නියපොත්තෙන් කඩන්නට තිබූ අංකුර මහ ගස් දක්වා වැඩෙන්නට දුන් විට එහෙම සිදු වේ. දැන් එහෙම නැත. පොරෝ ඕනෑ නැත. කඩන්නේ නියපොත්තෙනි. 


(පස්ස කහ ගන්නට නියපොත්ත නැතිව සිටිද්දීත් මේ දූෂණය, අයුක්තිය වෙනුවෙන් ඡන්දෙ දෙන මෝඩයන්ට මේ යුක්තිය අදාළ නැත.)  


මේ ලිපියට ඔබ කැමති නම් වෙන අයත් එක්කත් බෙදා ගන්න

එළිසබෙත් ටේලර්ට රොකිං ප්‍රණාමයක් | A rocking tribute to Elizabeth Taylor

පසුගියදා 70 හැවිරිදි වියේදී අභාවප්‍රාප්ත වූ පුරාවෘත්තමය නිළි හා නිරූපිකා එලිසබෙත් ටේලර් වෙනුවෙන් රොක් සංගීත කණ්ඩායමක් විසින් ප්‍රදන ලද ප්‍රණාමයකි.



මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-25

අපට මොකද අපි අට සිල් උපාසක - ඉබ්බන්නේ පුච්චන්නේ අනෙක් පිට (රාමචන්ද්‍රට, දිමිත්‍රිට හා තවත් අයට පිළිතුරු)

(2011 මාර්තු 24, W3Lankaඑක් දිනක් උපාසකයෙක් සිල් පවාරණ වී ගෙදර යන කල ඉබ්බකු අල්ලා ඌ මැරීමට වලි කන කොල්ලන් පිරිසක් දුටුවේ ය. කොල්ලෝ ලිග්ගල් තුනක් තබා ඉබ්බා උඩුකුරු අතට තබා පුළුස්සන්නට සැරසෙනු දුටු උපාසක ඉහත මාතෘකාවේ ඇති කවි දෙපදය කීවේ ය. 


අප එය ලියුවේ මෙරට වාමාංශිකයන්ගේ හැසිරීම පිළිබඳ යම් විග්‍රහයක් කිරීමටයි. අප හොඳින් දන්නා පරිදි 2005ජනාධිපතිවරණයේදී වාමාංශිකයෝ හැසිරුණේ මේ අන්දමටයි. කොටි සංවිධානයේ මැතිවරණ වර්ජනය හමුවේ ශ්‍රීලනිප, ජවිපෙ, හෙළ උරුම සන්ධානයේ අපේක්ෂක මහින්ද රාජපක්ෂ ජය ගන්නා බව හා එහි අනතුරුදායකකම පෙනි පෙනී වාමාංශිකයෝ  කිසිත් නො කර අවසාන මොහොතේ හෝ කො‍ටි සිය මැතිවරණ වර්ජනය අතහැර දමනු ඇතැයි අප්‍රසිද්ධියේ සිහින දකිමින් උන් හ.


2005දී මහින්ද රාජපක්ෂ ජය ගත්තේ ය. ඔහු සැබැවින් ම ලාංකීය ඉතිහාසයේ සුසමාදර්ශීය වෙනසක් කළේ ය. නිදසුනක් ලෙස ජාතීන්ගේ ප්‍රශ්නය සියවසක් පිටුපසට ගෙන ගියේ ය. දැන් සුළු ජාතීන් නැවතත් ඉන්නේ ජාතික සමානාත්මතාව දිනා ගැනීම සඳහා කළ යුත්තේ කුමක්දැයි සිතා ගන්නට බැරි තැනක ය. 


රනිල් වික්‍රමසිංහගේ 'යළි පුබුදමු ශ්‍රී ලංකා' වැනි නව ලිබරල් ආර්ථික වැඩසටහන්වලට එරෙහිව ජාතික සම්පත් හා මානව හිමිකම් සුරැකීමේ සන්ධානය වැනි වාම හා ප්‍රගතිශීලී ව්‍යාපාර පැවති ලිබරල් සංදර්භය තුළ විශාල අරගලයක් කළ හ. අද මහින්ද රාජපක්ෂගේ ඒකාධිපති ආණ්ඩුව විසින් නැවත වතාවක් එම වැඩපිළිවෙල ම වෙනත් සංදර්භයක ක්‍රියාත්මක කරමින් සිටියි. ජාතික සම්පත් හා මානව හිමිකම් සුරැකීමේ සන්ධාන දිය වී ගොසිනි. එකී සන්ධානයේ නායක කාරකාදීහු රජයේ සමාගම්වල තනතුරු දරමින් ආණ්ඩුවේ එල්ලී රාජ්‍ය දේපල කා වැඩෙන නව සුළු ධනේශ්වර ප්‍රභූ තන්ත්‍රයට කත් අදිති. 


වාමාංශිකයෝ සියල්ලෝ ම පාහේ මහින්ද රාජපක්ෂ පාලනයට විරුද්ධ ය. ප්‍රධාන හේතුව එය විසින් ලංකාවේ පැවති ප්‍රජාතන්ත්‍රවාදී හා ලිබරල් සම්ප්‍රදායන් සියල්ල සුණු විසුණු කර දමා වැඩවසම් පවුල්වාදී, ඒකාධිපති සම්ප්‍රදායක් ගොඩනැඟීමයි. බටහිර විරෝධය හා ජාතිකවාදය වැනි ව්‍යාජයන්ට මුවා වෙමින්, කලින් ඇගැයීමට ලක් වෙමින් පැවති සියලු හර පද්ධතීන් සියල්ල බටහිර සංකල්ප යයි අර්ථ දක්වමින්, තමන්ට ඕනෑ අන්දමේ විකෘතීන්ගෙන් ඒවා ප්‍රතිස්ථාපනය කිරීම ඔවුන්ගේ පිළිවෙතයි. 


වාමාංශිකයෝ මේ මොහොතේ සටන් කරමින් ඉන්නේ ප්‍රජාතන්ත්‍රවාදය, මානව හිමිකම් හා  පුද්ගල නිදහස වැනි ලිබරල් ධනේශ්වර රාමුව තුළ සංකල්පගත වූ කරුණු නිමිති කරගෙනයි. ලංකාවේ වාමාංශික ව්‍යාපාරයේ අප දන්නා තරමින් නම් කිසිදු විප්ලවීය අරගලයක් නැත. ඇත්තේ එදා වේල වෙනුවෙන් පැවතීමේ වැඩ හා පුද්ගලවාදී ව්‍යාපෘති පමණි. වෙනසක් තිබේ නම් තිබෙන්නේ ජනතා විමුක්ති පෙරමුණ තුළ පමණි. එය ද බල්ලන් සමග ලැගීමෙන් බෝ වූ මැක්කන් වඳ කර ගැනීමේ මහා මෙහෙයුමකට වැඩි දෙයක් නො වේ. 


ගතානුගතික වාමාංශිකයන් අතර අරගල ප්‍රතිසංස්කරණවාදී හා විප්ලවීය යයි කියා බෙදා වෙන්‍ කිරීමේ සම්ප්‍රදායක් තිබේ. මේ වනාහි වාමාංශිකයන්ගේ අනන්‍යතා අර්බුදයේ ම තවත් පැතිකඩකි. අනෙකා ප්‍රතිසංස්කරණවාදියකු යයි නිර්වචනය කිරීම වනාහි, වාමාංශික පුද්ගලවාදීන්ගේ හා කණ්ඩායම්වල ආත්මාරක්ෂක උපාය මාර්ගයකි. ඒ අනුව, එක්සත් ජාතික පක්ෂයේ නායකත්වයට අවශ්‍ය මහින්දට ආදේශකයක් නොව විකල්පයකි නම් ලිපිය ලියූ අප  වාමාංශික බ්ලොග්කරුවන් වන රාමචන්ද්‍රට හා දිමිත්‍රිට පෙනෙන්නේ ප්‍රතිසංස්කරණවාදීන් ලෙසයි. 


වාමාංශිකයන් අමතක කරන කාරණයක් වන්නේ විප්ලවය ද අවසානයේදී රැඩිකල් ප්‍රතිසංස්කරණයක් ම බවයි. විප්ලවයේ ප්‍රායෝගික වෙනස වන්නේ වාමාංශික ප්‍රභූන් (නිර්ධන පංතිය ලෙස අර්ථ දැක්වේ.) පිරිසක් බලය සියතට ගෙන තමන්ට රුචි අන්දමින් ප්‍රතිසංස්කරණ සිදු කිරීමයි. 


ඉතින් මේ ඊනියා විප්ලවවාදීන් කරන්නේ කුමක් ද? සම්මුති විරහිතභාවයේ කටුව තුළ සැංගී සමාජයේ සිදු වන සියලු අපගමනයන් ඉවසා සිටීමයි. ඒ මෙසේ ය. 


ශ්‍රීලනිපය හා එජාපය යනුවෙන් ධනපති පංතියේ පක්ෂ දෙකක් පවත්වා ගැනීමේ අදහස ධනේශ්වර ක්‍රමය අවුලක් නැතිව පවත්වා ගැනීමයි.ක්‍රමය සුසර කොට තිබෙන්නේ එක් පක්ෂයක් අත ආන්ඩු බලය රැදවීම හා අනෙත් පක්ෂය විපක්ෂයේ තැබීම මත,ආන්ඩු බලයේ සිටින පක්ෂය අප්‍රසාදයට ලක්වන විට ස්වයංක්‍රීයව අනෙත් ධනපති පක්ෂය බලයට එන පරිදිය.රාජපක්ෂගේ පවුල්වාදී රෙජිමය විසින් එසේ සුසර කොට තිබූ ධනේශ්වර ක්‍රමයේ දේශපාලනය පෙරමුන එක්තරා දුරකට අවුල් කොට තිබේ.(පංතිමය අවශ්‍යතාවන්ට ඉහලින් පවුල්මය අවශ්‍යතා තැබීම හරහා)මේ නිසා ලංකාවේ ධනපති පංතියේ සාම්ප්‍රදායිකව බලය හෙබවූ දක්ෂිනාංශික කොටස් සහ මහින්දගේ පවුල්වාදී නව ප්‍රභූ කොටස් අතර ප්‍රතිවිරෝධයක් හටගෙන ඇත.මේ ප්‍රතිවිරෝධය ආධිපත්‍යය සම්බන්ධයෙන් ප්‍රභූ දෙපිරිසක් අතර හටගෙන තිබෙන ආරෝවකි.මේ ආරෝවේදී වාමාංශිකයන් ගත යුතු ස්ථාවරය කුමක්ද?එක් කන්ඩායමක් පලවා හැර ජයගන්නා අන්දම ගැන අනිත් කන්ඩායමට ටියුෂන් ලබා දීමද?එජාපය ජයගත්තත් කිරීමට නියමිත ධනේශ්වර සංවර්ධන වැඩ ඉතා අගනා ලෙස මේ වනවිටත් උතුරු නැගෙනහිර ඉඩම් කුනුකොල්ලෙට විකුනා දමමින්,ධීවරයන්ගේ ජීවිත මත සී ප්ලේන් බස්සමින් සිදුවෙමින් තිබේ.පීඩිතයාගේ පාර්ශවයේ සිට බලනවිට එජාපය නැගිට්ටාය කියා ඇතිවන යහපත කුමක්ද? - රාමචන්ද්‍ර


හරියට හරි රාමචන්ද්‍ර.. මේ කල්ලීන් අතර ඇති අර්බුද හරහා ප්‍රකාශ වන ඇඟවුම් තේරුම් ගැනීම සහ විශ්ලේශනය කිරීම ඉතාම වැදගත් බව කිව යුතුයි. ඒ හැර ඒවා සමනය වීම තුල අපට අත්වන සෙතක් නැති බව ඉතා පැහැදිලියි. -දිමිත්‍රි


මේ අනුව, වාමාංශික මාධ්‍යකරුවන්ගේ කාර්යය විය යුත්තේ විශ්ලේෂණය ඉදිරිපත් කර, අර කලින් කී උපාසක සේ වෙන්නේ මොකක්දැයි දෑත්පොරවාගෙන බලා සිටීමයි. 


මෙම ලේඛකයා වනාහි වාමාංශික මාධ්‍යකරුවෙකු මිස විප්ලවවාදී නායකයකු නො වේ. ඔහු ලංකාවේ පීඩිත පංතියේ විමුක්තිය සැලසීම යයි කියන සිය කණ්ඩායම අතට බලය ගැනීම නම් දෙය සඳහා පවතින බව කියන නහුතයක් වාමාංශික පක්ෂ කිසිවක සාමාජිකායක් ද නො වේ. 


මෙම ලේඛකයා කරන්නේ ඔහුගේ සීමාව තුළ ඔහුට කළ හැකි උපරිම මැදිහත්වීම සඳහා උත්සාහ කිරීමයි. ඔහු උත්සාහ කරන්නේ පෙරහැර බලන්නකු වී නො සිට, පෙරහරට එකතු වී, හැකි නම් පෙරහරේ ගමන වෙනස් කරන්නටයි. ඒ පිළිබඳ වාමාංශික ගතානුගතික විශ්ලේෂණ ඔහුට වැදගත් නැත.  


ධනේශ්වර ක්‍රමය සුසර කොට තිබෙන්නේ එක් පක්ෂයක් අත ආන්ඩු බලය රැදවීම හා අනෙත් පක්ෂය විපක්ෂයේ තැබීම මත,ආන්ඩු බලයේ සිටින පක්ෂය අප්‍රසාදයට ලක්වන විට ස්වයංක්‍රීයව අනෙත් ධනපති පක්ෂය බලයට එන පරිදිය.රාජපක්ෂගේ පවුල්වාදී රෙජිමය විසින් එසේ සුසර කොට තිබූ ධනේශ්වර ක්‍රමයේ දේශපාලනය පෙරමුන එක්තරා දුරකට අවුල් කොට තිබේ.(පංතිමය අවශ්‍යතාවන්ට ඉහලින් පවුල්මය අවශ්‍යතා තැබීම හරහා)මේ නිසා ලංකාවේ ධනපති පංතියේ සාම්ප්‍රදායිකව බලය හෙබවූ දක්ෂිනාංශික කොටස් සහ මහින්දගේ පවුල්වාදී නව ප්‍රභූ කොටස් අතර ප්‍රතිවිරෝධයක් හටගෙන ඇත. - රාමචන්ද්‍ර


මෙය ඇත්තකි. ප්‍රශ්නය මෙතැනදී අප කළ යුත්තේ කුමක් ද යන්නයි. රාමචන්ද්‍ර හා දිමිත්‍රි පවසන්නේ මේ අර්බුදයේදී අප කිසිදු මැදිහත්වීමක් කිරීම අවශ්‍ය නැති බවයි. පවතින තත්වය මත නම් අප කළ යුතුව තිබෙන්නේ 'මහින්දගේ පවුල්වාදී නව ප්‍රභූ' තන්ත්‍රය විසින් ලිබරල් ධනේශ්වරය බලයෙන් අතු ගා තමන්ගේ ම පන්නයේ ආදේශකවලින් හිඩැස පුරවන තෙක් බලා සිටීමයි. එනම්, ලංකාවේ දැනට බලවත්ව ඇති වැඩවසම්වාදී රාජ්‍ය කේන්ද්‍රීය සුළු ධනේශ්වර ඒකාධිපතිවාදයට එරෙහිව ලිබරල් ධනේශ්වරයෙන් මතු වන දුබල හඬ පවා යටපත් කර දැමීමට හා රාජ්‍ය ධනවාදය මත රඳා පවතින නව ප්‍රභූ තන්ත්‍රයට බලය තහවුරු කර ගන්නට උදව් කිරීම ය. 


'නැත, නිර්ධන පංතිය අතට බලය ගැනීම සඳහා අරගල කළ යුතු ය' යි ඔබ කියනවා නම්, අපි අතින් මුව වසාගෙන සිනාව මැඩගෙන කර බා ගන්නට සූදානම් ය. 


අප පිළි ගන්නා අන්දමින් නම්, සමාජවාදය යනු සමාජයේ පවත්නා සාධනීය හර පද්ධතීන් රැක ගනිමින් හා වැඩි දියුණු කරමින් ගොඩනැඟිය යුතු දෙයකි. එසේ නැතිව, සමාජවාදය යනු පවත්නා හර පද්ධතීන් සුණු විසුණු වී යාමෙන් පසු අළු මතින් ඉබේ පැන නඟින්නක් නො වේ. එහෙම පැන නගිනවා නම් පැන නඟින්නේ ම්ලේච්ඡත්වයක් මිස සමාජවාදයක් නො වේ. 


ජනතා විමුක්ති පෙරමුණේ පූර්ණකාලීනව දේශපාලනය කළ සමයේ අපට පක්ෂයෙන් ඉගැන්වූ දෙයක් වන්නේ සමාජවාදය වෙනුවෙන් ‍හොරකම් කළාට කමක් නැති බවයි. ඒ අනුව, පූර්ණකාලිකයෝ බස්වල හොරෙන් ගිය හ. කඩවලින් හොරෙන් තේ පානය කළ හ. විමල්ගේ ළඟ මිත්‍රයෙක් බයිසිකලයක් සොරකම් කර අසු වී ගුටි කා, ‍පොලිසියට භාර දෙනු ලැබ, අධිකරණයෙන් අච්චු ලැබුවේ ය. එය හරි ද?


නැත. අප අද විශ්වාස කරන්නේ අප හෙට වෙනුවෙන් යම් පරමාදර්ශයක් හිසෙහි දරන්නේ නම්, අපි අද සිට ම එය භාවිතාවේ යෙදවිය යුතු බවයි. 


එක්සත් ජාතික පක්ෂ අර්බුදයේදී අපි ඉතා විවෘතව ම මහින්ද ස්වරූපී බලවේග එහි බලවත් වීමට එරෙහිව ලියුවෙමු. ලිබරල් ධනේශ්වරය හා වැඩවසම්වාදී, රාජ්‍ය කේන්ද්‍රීය නව ප්‍රභූ සුළු ධනේශ්වරය අතර ගැටුමේදී අපි ඉතා පැහැදිලිව ම ලිබරල් ධනේශ්වරයට උදව් කරන්නෙමු. මන්ද, ලිබරල් ධනේශ්වරය තුළ අඩු තරමේ දෘෂ්ටිවාදීමය වශයෙන් හෝ ප්‍රවර්ධනය කරනු ලබන සාධනීය කාරණා තිබේ. 


කරුණාකර එය යූඇන්පියට ටියුෂන් දීමක් ලෙස නො සලකන්න. නිර්ධන පංතිය අතට හෙවත් තමන්ගේ කල්ලියේ ප්‍රභූන් අතට බලය ගන්නා තෙක් ඇට දෙක වැටෙයි කියා සිතමින් එළුවා පසුපස ගිය නරියා සේ ගාටන්නේ නැතිව අද කළ හැකි මැදිහත් වීම අද කරමු. 


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-23

එක්සත් ජාතික පක්ෂයේ නායකත්වයට අවශ්‍ය මහින්දට ආදේශකයක් නොව විකල්පයකි

(2011 මාර්තු 23, W3Lankaඑක්සත් ජාතික පක්ෂයේ නායකත්වය සඳහා විවෘතව නාම යෝජනා ඉදිරිපත් කිරීමට සජිත් ප්‍රේමදාස ඊයේ කෘත්‍යාධිකාරී කමිටුවේදී අසමත් විය. 


ජනමාධ්‍යවලට කුමන අන්දමේ කයිවාරු ගැසුවත්, පක්ෂ නායකත්වය වෙනස් කිරීම සඳහා පක්ෂ ව්‍යවස්ථාව අනුව ගත යුතුව තිබුණු මූලික පියවර වූයේ කෘත්‍යාධිකාරී කමිටුවේදී ඡන්දයකට මුහුණ දීමයි. 


කෘත්‍යාධිකාරී කමිටුවේ වැඩි බලයක් රනිල් වික්‍රමසිංහට තිබුණු බව පක්ෂ ආරංචි මාර්ග පවසයි. මෙම තත්වය හමුවේ ඡන්දයකට නො ගොස් සම්මුතිකට එළඹීමට අවසාන මොහොතේ සජිත් පාර්ශ්වය තීරණය කළ බවක් ද පෙනෙන්නට තිබේ. 


ආණ්ඩුව විසින් පුම්බන ලද සජිත්ගේ හුළං ආණ්ඩුව විසින් ම දැන් අරිමින් සිටින අන්දම රජයේ මාධ්‍ය හරහා දැකිය හැකි ය. 


සජිත් වනාහි මහින්දට විකල්පයක් නොව ආදේශයක් පමණි. මහින්දට ආදේශක ඕනෑ තරම් ශ්‍රී ලංකා නිදහස් පක්ෂය තුළින් සොයා ගත හැකි ය. ඒ සඳහා විපක්ෂයක් අවශ්‍ය නැත. 


අනෙක් පැත්තෙන් සජිත් යනු සරත් ෆොන්සේකා තරමට හෝ මහින්දට අභියෝගයක් විය නො හැකි 'ගේමක් නැති' ආදේශකයකි. තවමත් ලංකාවේ දේශපාලනයේ යට තලයේ වැදගත් සාධක වන කුලය ද සජිත්ට බලපාන්නේ අවාසි සහගත ලෙසයි. එසේ ම, ඔහු විසින් ප්‍රවර්ධනය කරනු ලබන ප්‍රේමදාස යුගයක් නැවත ඇති කිරීම වනාහි කොටින්ට ආයුධ දීම, 1989 තරුණ සංහාරය වැනි අවාසි සහගත කාරණා සමග බැඳී ඇති දෙයකි. 


සජිත්ව එක්සත් ජාතික පක්ෂය දුබල කිරීම සඳහා ඇති තරම් කඩේ යවා ගැනීමෙන් පසු ආණ්ඩුව දැන් ඔහු අතහැර දමා තිබේ. ආණ්ඩුවට ඔහු බේරා දීමට අවශ්‍ය වූවා නම්, තංගල්ල නගර සභාව හෝ දිනා ගැනීමට ඔහුට උදව් කරන්නට තිබිණි. රනිල් ප්‍රබල අභියෝගයක් බවට පත් වුවහොත් පමණක් ආණ්ඩුවට නැවත සජිත් ප්‍රේමදාස අවශ්‍ය වනු ඇත. 


එහෙත්, කොටි නැති, ජවිපෙ දුර්වල වූ වර්තමාන සංදර්භය තුළ ආණ්ඩුවට සිය පැවැත්ම සඳහා ශක්තිමත් බාහිර සතුරකු අවශ්‍ය වී තිබේ. එහෙම එකක් නැති වුවහොත්, රාජපක්ෂ පවුලට සිය පවුල් ආධිපත්‍යය පවත්වා ගැනීම දුෂ්කර විය හැකි ය. 


අවශ්‍ය වන්නේ මහින්දට විකල්පයක් නම්, රනිල් සජිත්ට වඩා ඉදිරියෙනි. ඔහු මතවාදී වශයෙන් ද, දේශපාලන පෞරුෂයෙන් ද, පංතිමය වශයෙන් ද මහින්දට විකල්පයකි. 


එක්සත් ජාතික පක්ෂයේ නායකත්වයට තිබෙන අභියෝග මධ්‍යයේ රනිල්ගේ ස්ථිරසාර පැවැත්ම ම ඔහුගේ දේශපාලන පෞරුෂයේ ප්‍රකාශනයකි. ඔහු අලෙවි කර ගැනීමට එක්සත් ජාතික පක්ෂයට බැරි වී තිබෙන්නේ ඇයි ද යන්න වෙන ම කාරණයකි. 


එක්සත් ජාතික පක්ෂයට රනිල් මාකට් කිරීමට බැරි වී තිබෙන්නේ එය උත්සාහ කරන්නේ රනිල් මහින්දට ආදේශකයක් ලෙස පෙන්නීමට උත්සාහ කිරීම නිසා ය. මහින්දගේ සිංහල බෞද්ධ ජාතිකවාදයට, ඒකාධිපතිවාදයට, ගැමිකමට, පිරිමිකමට ආදේශකයක් වීමට රනිල්ට තබා චම්පික රණවකටවත් කවදාවත් බැරි ය. 


එක්සත් ජාතික පක්ෂය උත්සාහ කළ යුත්තේ රනිල්ගේ උගත්කම, බුද්ධිමත්කම, ලිබරල් මතවාදය, පංතිමය සංස්කෘතිය වැනි මහින්දට විකල්ප වන පැතිකඩ සම්බන්ධයෙන් ‍නව වෙළඳපොලක් හැදීමටයි. 


කොටින් ම කියනවා නම්, ලංකාවේ ව්‍යාජ මනෝ පුරවැසියාගේ නායකයා වී සිටින මහින්ද රාජපක්ෂට එදිරිව ශාරීරික යථාර්ථවාදී මිනිසාගේ නායක ප්‍රතිරූපය ලෙස රනිල් වික්‍රමසිංහ ප්‍රවර්ධනය කිරීමයි. 


මෙය නිදසුනකින් පැහැදිලි කරන්නේ නම්, ලංකාවේ ව්‍යාජ මනෝ පුරවැසියා බටහිර විරෝධියෙකි. එහෙත්, සත්‍ය යථාර්ථවාදී ශාරීරික මිනිසා වනාහි ග්‍රීන් කාඩ් එකෙන් හෝ දේශපාලන රැකවරණයෙන් හෝ බටහිරට ගොස් එහි 'සෙට්ල්' වීමට සිහින දකින බටහිර වන්දනා කරන්නෙකි. රනිල්ට තිබෙන්නේ, අර ව්‍යාජ පුරවැසියා මහින්දට ම භාර දී, යථාර්ථවාදී මිනිසා වෙනුවෙන් විවෘතව පෙනී සිටීමයි. 


සටනක් නිර්මානය කළ හැක්කේ එතැනයි. එතැන පමණයි. 


රනිල් නියම නායකයකු බවට පරිවර්තනය වීමට කැමැත්තක් දක්වන්නේ නම්, දැන් ඔහු කළ යුතුව තිබෙන්නේ තමන්ට කැපූ එවුන් ටික තොග වශයෙන් ආණ්ඩුවට භාර දී චක් ගෝලයන් පිරිසක් වට කරගෙන ජෝගි නැටීම නො ව, ඔහුට අභියෝගයක් වූ සජිත් ප්‍රේමදාස පක්ෂ නියෝජ්‍ය නායකත්වයේ රඳවාගෙන තරගකාරී පරිසරය පක්ෂය තුළ දිගට ම පවත්වාගෙන යාමයි.  සජිත් ප්‍රේමදාස පක්ෂය තුළ රැඳීම පක්ෂයේ බහුවිධ ස්වරූපය පුළුල් කරන හේතුවකි. එසේ ම, ඔහු වැනි ප්‍රබල අභියෝගයක් පැවතීම නායකත්වය පරීක්ෂා වීම සඳහා යහපත් කරුණකි. 


රාජ්‍ය නායකත්වය අපේක්ෂා කිරීමට පෙර සජිත් ප්‍රේමදාස තව බොහෝ පරිණත විය යුතු ය. අංක එක වන්නේ ශූර, කපටි නායකයකු වූ මහින්ද රාජපක්ෂගේ ගැටවලට අසු වූ කඩේ යන්නකු වී එක්සත් ජාතික පක්ෂය දිය කර හරින්නකු ලෙස ඔහු කරන වත්මන් භූමිකාව ඔහු අත්හැරිය යුතු ය. නැතිනම්, දැන් ම ආණ්ඩුවට බැඳී නාමල් රාජපක්ෂ යටතේ රස්සාවක් සොයාගෙන ඔය ආණ්ඩුවට කරණම් ගැසූ මහින්ද සමරසිංහලා සේ දෙන දෙයක් කා පාඩුවේ ජීවත් විය යුතු ය. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-22

ගැටුම්වේදය ආශ්‍රිත සංස්කෘතික හා දාර්ශනික අවලෝකන 'පුරවැසි මංපෙත්'

(2011 මාර්තු 22, W3Lankaආචාර්ය සුනිල් විජේසිරිවර්ධන දීර්ඝ කාලයක සිට සමාජ ව්‍යාපාර සමග සම්බන්ධව සිටිමින් යහපත් සමාජයක් ගොඩනැඟීමේ අරගලයෙහි සංස්කෘතික, සමාජ හා දේශපාලනමය පැතිකඩ අධ්‍යයනය කරමින් හා විශ්ලේෂණය කරමින් සිටින චින්තකයෙකි.

ගැටුම්වේදය ආශ්‍රිත සංස්කෘතික හා දාර්ශනික අවලෝකන මැයෙන් ඔහු විසින් දීර්ඝ කාලයක් මුළුල්ලේ සම්පාදනය කරමින් සිටි කෘතිය අද 'පුරවැසි මංපෙත්' නමින් කොළඹ මහවැලි කේන්ද්‍රයේදී එළිදැක්වේ.

ශ්‍රී ලාංකික සමාජයේ යහපත් වෙනසක් ගැන සැබෑ ලෙස උනන්දු වන සියලු දෙනාගේ අවධානයට යොමු කරනු ලබන මෙම කෘතිය විශේෂයෙන් ම ආගමික නායකයන්, කලාකරුවන්, මාධ්‍යකරුවන්, ගුරුවරුන් හා සමාජ -දේශපාලන ක්‍රියාධරයින් යන පස්වැදෑරුම් සමාජ සන්නිවේදකයන් ඉලක්ක කොට ගන්නා බව සුනිල් විජේසිරිවර්ධන පවසයි.

යහපත් සමාජයක් සඳහා අරගලය පෝෂණය කරන මෙම කෘතිය පිළිබඳ පුළුල්, ගැඹුරු සංවාදයකට මුල පිරීමක් අද (මාර්තු 22) දින ප.ව. 3ට කොළඹ මහවැලි කේන්ද්‍ර ශ්‍රවණාගාරයේදී පැවැත්වේ.

සුසිල් සිරිවර්ධන, නිර්මාල් රංජිත් දේවසිරි, ජානකී ජයවර්ධන, ටියුඩර් වීරසිංහ, පියල් කාරියවසම් හා චන්දන සිරිමල්වත්ත මෙහිදී අදහස් දක්වති.

නොවැම්බර් ව්‍යාපාරය හා විභවි ලලිත කලා ඇකඩමිය වැඩසටහන සංවිධානය කරයි.

මේ ලිපියට ඔබ කැමති නම් වෙන අයත් එක්කත් බෙදා ගන්න

පළාත් පාලන ඡන්දයේ යල් පැන ගිය තාරුණ්‍යය

(2011 මාර්තු 22, W3Lankaමෙවර පළාත් පාලන මැතිවරණය සඳහා ඉදිරිපත් කර තිබූ නාම යෝජනා රැසක් ප්‍රතික්ෂේප වීමට හේතු වුණේ ඉචිරිපත් කරන ලද නාමයෝජනාවෙහි අවශ්‍ය තරුණ අපේක්ෂකයන් සංඛ්‍යාව නො සිටීමයි. මේ පිළිබඳව දේශපාලන පක්ෂ විසින් ඉදිරිපත් කරන ලද අභියාචනා සලකා බැලීම සඳහා ඊයේ අභියාචනාධිකරණයේදී පැවති පරීක්ෂණයේදී හෙළි වූ කරුණක් වන්නේ මෙහි තරුණ අපේක්ෂකයන්ගේ අවම වයස ව්‍යවස්ථාවට අවුරුදු 18 නො ව 20 පමණ විය යුතු බවට කොන්දේසියක් ක්‍රියාත්මකව තිබුණු බවයි.

අපේක්ෂකයෙකු ලෙස ඉදිරිපත් වීම සඳහා 1991 මැයි 31 දිනට පෙර උපත ලැබිය යුතු අතර ඉන් පසුව ඉපදුණු අයට අපේක්ෂකත්වය ලැබිය නොහැකි බව මැතිවරණ කොමසාරිස්වරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ෂවින්ද්‍ර ප්‍රනාන්දු අභියාචනාධිකරණයේදී පැවසීය.

සෑම අපේක්ෂකයෙකුම 2009 ජූලි 01 වන විට වයස අවුරුදු 18 සම්පූර්ණ විය යුතුව තිබූ බවත් එදිනට වයස අවු. 18 සම්පූර්ණ වී නොතිබූ අපේක්ෂකයින් ඇතුළත් වූ නාමයෝජනා පත්‍ර ප්‍රතික්ෂේප වූ බවද නියෝජ්‍ය සොලිසිටර් ජනරාල්වරයා පැවසී ය.

තරුණ අපේක්ෂකයන් සඳහා උපරිම වයස ද ගණනය වී ඇත්තේ මේ දිනයටයි.

පළාත් පාලන ඡන්දයේදී තාරුණ්‍යයට අදාළව ලංකාවේ රාජ්‍ය පාලනය වසර දෙකක් පමණ පසුපසිනි.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-21

ජනතාවට කුණු කවන ලංතාවේ 'හෝටල්'

(2011 මාර්තු 20, W3Lanka) කොළඹ නගරයේ පවත්වාගෙන යන හෝටල් හා ආපනශාලාවලින් ලබාගත් ආහාර සාම්පල් පරීක්‍ෂණයට භාජන කිරීමෙන් අනතුරුව ඉන් 18% ක විෂබීජ මිශ්‍රව තිබූ බවට රජයේ සෞඛ්‍ය දෙපාර්තමේන්තුව හෙළි කර ඇති බව අද දිවයින වාර්තා කරයි.


හෝටල්වල පිළියෙල කරන ආහාර මිලදී ගන්නා පාරිභෝගිකයන්ගේ සෞඛ්‍ය ආරක්‍ෂාව සහතික කිරීම සඳහා සෑම හෝටලයක්‌ම නිතර පරීක්‍ෂාවට භාජන කිරීමට දෙපාර්තමේන්තුව තීරණය කර ඇති බව ද, හෝටල් හා ආපනශාලා පවත්වාගෙන යැමට බලපත්‍ර නිකුත් කිරීමේදී ජනතාවගේ සෞඛ්‍යය ආරක්‍ෂා වන පරිදි ක්‍රියා කළ යුතු බවට දැඩි කොන්දේසි මාලාවක්‌ පැනවීමට ද දෙපාර්තමේන්තුව තීරණය කර ඇති බව දිවයින පවසයි.


අපිරිසිදු ආහාර ‍අලෙවි කළ කොළඹ හෝටල් 100 කට එරෙහිව නඩු පැවරීමට කොළඹ මහ නගර සභාව පියවර ගෙන ඇති බව එහි මහජන පරීක්ෂක ඩබ්ලිව්.ජී.කරුණාතිලක මහතා අද ඊතලය වෙබ් අඩවියට පවසා ඇත.


හෝටල් සේවකයන් අතර ක්‍ෂය රෝගය වැනි බෝවන රෝගවලින් පෙළෙන අය සිටිනවාද යන්න සොයා බැලීමට සෑම දෙනෙක්‌ම දැඩි පරීක්‍ෂාවට භාජන කිරීමට පියවර ගන්නා බව ද සෞඛ්‍ය දෙපාර්තමේන්තුව පවසයි.


කොළඹ නගරයේ හෝටල් සේවකයන් විශාල පිරිසකට සෙංගමාලය සහ ක්ෂය රෝගය වැළඳී ඇති බව වෛද්‍ය පරීක්ෂණවලින් හෙළිව ඇති බව මාර්ත 08වන දා දිනමිණ පුවත්පත පැවසී ය.


ඕනෑම නගරයක හෝටලයකට ගිය පසු මෙම තරුණු සත්‍ය බව ඇස් පනා පිට ම ඔප්පු වේ. හෝටලයක පිටුපස පැත්තට හිස පොවා බැලුවහොත් ඒ වනාහි මේ තැන් ගැන සොයා නො බලන හා ඒවා අයිතිකරුවන්ගෙන් පගා ගහන සැන්ටිපෝට් මහත්තුරුන් යැවීමට ඉතා ම සුදුසු අපායක් බව පෙනේ.


හොඳ ම අපායවල් ඇත්තේ දුර ගමන් සේවා බස් රථ නවත්වන හෝටල්වලයි. ඒවායේ සිදු වන්නේ බස් සේවකයන් සමග බෙදා හදාගෙන කරන මංකොල්ලයකි. 


බොහෝ හෝටල් සේවකයෝ කාණු පල්ලෙන් මතු වන මීයන් සේ අපිරිසිදු ය. මොවුන්ගේ අපිරිසිදුකමට හේතුව දුප්පත්කමටත් වඩා නූගත්කම, අපචාරික ජීවිත හා නො සැලකිල්ලයි. 


ලංකාවේ ආහාර පාන විකුණන කඩවල මුදලාලිලා ද මෙම සේවකයන්ට දෙවෙනි නො වෙති. රටේ මිනිසුන්ගේ සාගින්න හා පිරිසිදු හෝටලයකට යන්නට නැති බැරි දුප්පත්කම ද ඇතැමුන්ගේ අපිරිසිදු ආහාර බුදීමේ ලෝලය ද මොවුහු සිය මල්ල පුරවා ගැනීමට පාවිච්චි කරති. 


Dictionary.comහි hotel යන වදනට දී ඇති අරුත මෙසේ ය:
a commercial establishment offering lodging to travelers andsometimes to permanent residents, and often having restaurantsmeeting rooms, stores, etc., that are available to the general public.


හොඳ ම විහිළුව ඇත්තේ ශ්‍රී ලාංකික ඉංග්‍රීසියෙහි හා සිංහල ව්‍යවහාරයෙහි ය. ලංකාවේ මිනිස්සු මේ අයිලෙ කඩවලට සිංහලෙන් කියන්නේ 'හෝටල්' කියා ය. සැබෑ හෝටල්වලට කියන්නේ 'හොටෙල්' කියා ය. 




මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-20

වසර දස දහසකට පසු බල්ලන් නැවත වනගත කිරීමේ මානුෂික මෙහෙයුම කරාපිටියෙන් ඇරඹේ

(2011 මාර්තු 20, W3Lanka) ලංකාවේ කකුල් හතරේ බල්ලෝ ලක්ෂ 20ක් සිටිති. සමහර බල්ලෝ මහ මැදුරුවල සුර සැප විඳිති. අනෙක් බල්ලන්ට යන එන මං නැත.


බල්ලා ඉහළ සමාජයේදී සමාජ තත්වය පෙන්වන කැඩපතක් ද වේ. 


කෙසේ වෙතත්, තිරිසනුන් අතරින් මිනිසාට වඩාත් ම සමීප සත්වයා බල්ලා ය. බල්ලා කෙතරම් මිනිසා‍ට සමීප වූයේ ද යත්, අද වන විට කැළෑවල බල්ලන් නැති තරම් ය. ලංකාවේ නම් කැළෑ බල්ලන් විශේෂයක් ඇත්තේ ම නැත. 


බල්ලා මිනිසාගේ මිතුරකු වන්නට ගොස් සිය අනන්‍යතාව කෙතරම් නැති කර ගත්තේ ද යත්, අද වන විට ඌට මිනිසාගේ ඉඳුල් නැතිනම් කෑමක් බීමක් නැතිව මැරෙන්නට සිදු වී ඇත. ඒකත් හරියට ආණ්ඩු සමග සන්ධානගත වූ ඇතැම් විප්ලවවාදීන්ගේ ඉරණම වැනි ය. 


දැන් ලංකාව බල්ලන් ආපසු වනගත කිරීමේ මෙහෙයුමක් ආරම්භ කර තිබේ. මෙය දියත් කර ඇත්තේ ආසියාවේ ආශ්චර්යය ආරම්භ වන දකුණු පළාතේ පිහිටි ගාල්ලේ කරාපිටිය රෝහලෙනි. කරාපිටිය රෝහලේ සිටි බල්ලන් 62ක් අල්ලා ගෙන ගොස් කිලෝමීටර් 12ක් දුරින් පිහිටි කොට්ටව කැළයට මුදා හළ බව කරාපිටිය රෝහලේ වැඩ බලන අධ්‍යක්ෂ ජයම්පති පෙරේරා වෛද්‍යතුමා අද The Nation පුවත්පතට පවසා තිබේ. 


මේ කොට්ටව කැළය යනු කුඩා වනරොදකි. ඒ මැදින් ගාල්ල සිට හිනිදුම ප්‍රදේශයට දිවෙන මහා මාර්ගය ද වැටී තිබේ. ‍එහි එක් කෙළවරක ඇගලුම් කම්හලක් ඇත. අනෙක් කෙළවරේ උසාවියක් හා රජයේ කාර්යාල ඇත. වටේ ම‍ ගෙවල් ය. 


තාම අර බල්ලෝ කැළේ ය. පහත පළ වන්නේ ඒ බල්ලන් රැස්වීමක් පවත්වා ඒකමතිකව නිකුත් කරන ලද පුවත්පත් නිවේදනයකි. මෙය අපට කොට්ටව කැළයේ සිට ෆැක්ස් කර තිබිණි. 


"වසර දස දහසක‍ට පමණ පසු අප නැවත වනගත කිරීම සඳහා ගත් පියවර සම්බන්ධයෙන් අපි අතිගරු ජනාධිපතිතුමන්ට, සෞඛ්‍ය ඇමතිතුමන්ට හා මෙම මෙහෙයුමේ මහ මොළකාර කරාපිටිය රෝහලේ වැඩ බලන අධ්‍යක්ෂ ජයම්පති පෙරේරා වෛද්‍යතුමාට අපේ ස්තුතිය ප්‍රකාශ කරන්නෙමු. 


මෙය වනාහි වන්නි ජනතාව මුදා ගැනීමේ මහා මෙහෙයුමට පමණක් දෙවෙනි වන මානුෂික බලු මෙහෙයුමකි. 


මෙය අපගේ උරුමය ආරක්ෂා කිරීම සඳහා මහෝපකාරී වන පියවරකි. මිනිස් ඇසුරේ සිටිමින් අපහාසයට ලක් වෙමින් නො සිට අප අනුගමනය කරමින් කොට්ටව කැළයට එන ලෙස අපි ලංකාවේ ඉතිරි බල්ලන් 1,999,938න් දඉල්ලා සිටිමු. 


කොට්ටව කැළයට පිවිසුම් පර්යන්තයක් කරාපිටිය රෝහලේ පිහිටුවා ඇත. එතැන් සිට ප්‍රවාහනය නො මිළේ ය."


(ආදර්ශය: මෝඩ වැඩ කර ඒ පිළිබද පුවත්පත්වලින් ප්‍රචාරය ලබා ගන්නට යාම අනතුරුදායක ය.)

මේ ලිපියට ඔබ කැමති නම් වෙන අයත් එක්කත් බෙදා ගන්න

සතර සංග්‍රහ වස්තු හා ඇමති බන්දුලගේ දානමය පිංකම | Minister Bandula's alms giving and Sirasa

(2011 මාර්තු 20, W3Lanka) සිරස  අධ්‍යාපන ඇමති බන්දුල ගුණවර්ධනගේ මානව හිමිකම් බිඳ ඇත. සිය මවට සෙත් පතා දානමය පිංකමක් පැවැත්වීමට තමන්ට අයිතියක් ඇති බව හේ පවසයි. එහෙයින් තමන්ට අපහාස කිරීම ගැන සිරසට එරෙහිව නඩු දමන බව ද ඇමතිවරයා පවසයි. 


මෙම මතභේදාත්මක දානමය පිංකම පැවැත්වී තිබෙන්නේ හෝමාගම මහින්ද රාජපක්ෂ ජාතික පාසලේ ය. මේ වනාහි රටේ ම අධ්‍යාපනය භාර ඇමති බන්දුල විසින් සිය ඡන්ද  පදනම වන හෝමාගම ප්‍රදේශයේ මහජන මුදලින් ඉදි කරන ලද පාසලකි. එහෙම කියා එය එතුමන්ගේ පෞද්ගලික බූදලයක් වන්නේ නැත.   


මේ දානය පැවැත්වෙන්නේ පළාත් පාලන ඡන්දයට කලින් දවසේ ය. ඒ වන විට ඡන්දය වෙනුවෙන් පාසල්වලට නිවාඩු ලබා දී තිබුණ මුත්, සිසුන් හා ගුරුවරුන් මෙම දානය වෙනුවෙන් පාසලට කැඳවා තිබිණි. එපමණක් නොව, ඒ බදාදා දිනය මහජන දිනයක් බව හෝ නො සලකා අධ්‍යාපන අමාත්‍යංශයේ නිලධාරීහු ද දානයට වැඩම කර සිටිය හ. ඒ මහජන මුදලින් ධාවනය වන නිල රථවලිනි. 


දානයට වියදම ඇමතිගේ අතින් බව වාර්තා වේ. සිරස ඇසූ ප්‍රශ්නයක් වන්නේ නිලධාරීන් පැමිණි වාහනවල වියදම් කාගේ ද යන්නයි. එසේ ම, දුර බැහැර සිට ඉසුරුපායට එන ජනතාවට අවශ්‍ය සේවා සපයන්නට නිලධාරීන් නොමැතිකමින් ඇති වූ පාඩු යන්නේ කාගේ ගිනුමට ද? 


තවත් ප්‍රශ්න තිබේ. මින් ඉදිරියටත් ඇමතිවරු සිය ඥාතීන්ට සෙත් පැතීම සඳහා පිංකම් පැවැත්වීමට තෝරා ගන්නේ මහජන දේපල ද? 


සිරසක් නැත්තේ එය විවේචනය කළ සිරසට ද? නැතිනම් ....................


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-03-19

පල්ලෙකැලේ ක්‍රීඩංගනයට මුරලිදරන්ගේ නම වෙනුවට සුදුසු නම් කීපයක්

(2011 මාර්තු 19, W3Lanka) තාරකාවෝ බැබළෙන්නේ තමන්ගේ ම ආලෝකයෙනි. තමන්ට කියා එළියක් නැති ග්‍රහයෝ තාරකා‍වල එළිය තමන්ගේ සේ පරාවර්තනය කරති. 


මුත්තයියා මුරලිදරන් තරුවකි. ඔහු ටෙස්ට් කඩුලු 800 ලබා ගත් අවස්ථාවේ ජනාධිපති මහින්ද රාජපක්ෂ ජාතික රූපවාහිනිය හරහා පැවසුවේ අලුතින් ඉදි වන පල්ලෙකැලේ ක්‍රීඩාංගනය මුරලිදරන්ගේ නමින් නම් කරන බවයි. 


එහෙත්, පල්ලෙකැ‍ලේ ක්‍රීඩාංගනය විවෘත විය. එය මුරලිදරන් නමින් නම් කරන බව මුලින් කීව ද එසේ සිදු වූයේ නැත. 


මුරලිදරන් යනු ඉන්දීය සම්භවයකින් යුත් දෙමළ මිනිසෙකි. සිංහල අපි 1983දී මුරලිදරන්ගේ පවුලේ දේපල ගිනි තැබුවෙමු. මුරලිදරන්ට ලංකාවේ පුරවැසිකම පවා ලැබුණේ ඉපදී බොහෝ කලකට පසුවයි. 


ලංකාව විසින් බිහි කරන ලද විශිෂ්ඨ ම ක්‍රිකට් ක්‍රීඩකයා ඔහු වුණාට ඔහු දෙමළෙකි. එහෙයින් ඔහු නමින් ක්‍රීඩාංගනයක් නම් කිරීම ලෙහෙසි නැත. 


මේ ක්‍රීඩාංගනය නම් කිරීම සඳහා සුදුසු වෙනත් නම් කීපයක් අපි යෝජනා කරමු.



  • මේ දවස්වල ඕනැ කෙහෙල්මලකට දමන නම (කවුරුත් දනිති)
  • එස්.බී. දිසානායක ජාත්‍යන්තර ක්‍රීඩාංගනය (ක්‍රීඩා ඇමති කාලේ සුසන්තිකා ජයසිංහට රොඩු දමා තිබීම සුදුසුකමකි.)
  • දි.මු. ජයරත්න ජාත්‍යන්තර ක්‍රීඩාංගනය (ජාත්‍යන්තර දේශපාලකයෙකි. මෑතදී තමිල්නාඩුවේ කොටි පුහුණු කඳවුරු පිහිටවූයේ ය.)
  • මහින්දානන්ද  අලුත්ගමගේ ජාත්‍යන්තර ක්‍රීඩාංගනය (බාර් හිමියෙකි. ලංකාවේ ඇතැම් බාර්වලට ක්‍රීඩා සමාජ යයි කියනු ලැබේ.) 


මේ ලිපියට ඔබ කැමති නම් වෙන අයත් එක්කත් බෙදා ගන්න