2011-04-29

ලංකා ඊ නිව්ස් තහනම

(2011 අප්‍රේල් 29, W3Lankaලංකා ඊ නිව්ස් මතවාදය වූයේ සරළ, ජනප්‍රියවාදී ආණ්ඩු විරෝධයයි. අප සිතන අන්දමින් නම් බුද්ධිමත් ආණ්ඩුවක් නම් බිය වැද්දීමට තරම් බලයක් එහි තිබුණේ නැත.


දැනට රිමාන්ඩ් භාරයේ සිටින අප දන්නා ශාන්ත විජේසූරිය නම් එඩිතර වාම ක්‍රියාකාරිකයෙකි. ඔහුගේ එඩිතරකම එම වෙබ් අඩවියේ ශක්තියක් විය. ඔහු අද නීතියේ දැලේ පැටලී ඇත්තේ මාධ්‍ය වෘත්තිකභාවයේ ගැටලුවක් හේතුවෙනි.


අධිකරණයට අපහාසයක් වූ බව කියන පුවත නිවැරදි කරමින් ඒ පිළිබඳ සමා ආයාචනයක් වෙබ් අඩවියේ පළ කර ඇති බව ශාන්ත විජේසූරිය වෙනුවෙන් පෙනී සිටි නීතිඥයෝ අධිකරණයට දැනුම් දුන් හ.


එහෙත්, දිනමිණ පුවත්පතේ සඳහන් වන අන්දමට නඩුවේ පාර්ශ්වයක් ද යන්න මාධ්‍ය වාර්තාවේ සඳහන් කර නැති පූගොඩ නීතිඥ සංගමය නම් සංවිධානයක් වෙනුවෙන් පෙනී සිටි අධිනීතිඥ පීටර් මෙන්ඩිස් කියා ඇත්තේ සැකකරු අධිකරණයට අපහාසයක් කර ඇති බැවින් එය නිවැරැදි කර විකාශනය කිරීමෙන් හා වරද පිළිගැනීමෙන් පමණක් ම එම චෝදනාවෙන් නිදහස් නො වන බවයි. අපට දැන ගැනීමට ලැබී ඇති අන්දමට එදින පූගොඩ මහේස්ත්‍රාත් අධිකරණයේ සිටි සියලු නීතිඥයන් ශාන්ත විජේසූරියට එරෙහිව පෙනී සිටීමට නැගී සිට තිබේ. විදුලි සංදේශ නියාමන කොමිසම් සභාව වෙනුවෙන් ද මෙම නඩුව වෙනුවෙන් නීතිඥවරයකු පෙනී සිට ඇති බව දිනමිණ පුවත්පත පවසයි. ලාල් කුලරත්න නම් එම නිතිඥවරයා පවසා ඇත්තේ එම පුවත එම වෙබ් අඩවියේ පළවීමෙන් අපැහැදිලි ස්වභාවයක් පැන නැගී ඇති බවයි.


මාධ්‍ය සංවිධාන ආරංචි මාර්ග පවසන ආකාරයට, ලංකා ඊ නිව්ස් පූගොඩ මහේස්ත්‍රාත් අධිකරණය විසින් තහනම් කිරීමේ ක්‍රියාමාර්ගයට එරෙහිව නීතිමය ක්‍රියාමාර්ග ගැනීමට මාධ්‍ය සංවිධාන සූදානම් වෙමින් ඇත.  


මාධ්‍ය වෘත්තිකභාවයේ ගැටලු සම්බන්ධයෙන් කතා කරන විට බොහෝ සිංහල මාධ්‍ය වෙනසක් නැත. නිදසුනක් ලෙස, මහින්ද අබේසුන්දරගේ කතුවැකි හා කීර්ති වර්ණකුලසූරියගේ ආරක්ෂක වාර්තා රසවත් වන්නේ ඒවායේ ඇති විසුළු ස්වභාවය නිසා ය. එහෙත්, ඒවා රාජ පාක්ෂික ලියවිලි ය.


කෙසේ වෙතත්, අප දන්නා තරමින්, අධිකරණය හමුවේ විභාග වෙමින් ඇති අපහාස නඩුවක විභාගය අවසන් වන තෙක්, මහේස්ත්‍රාත් නියෝගයක් මත ජාතික හා ජාත්‍යන්තර මට්ටමේ ප්‍රසිද්ධියක් ඇති ජනමාධ්‍යයක් රට තුළ තහනම් කිරීම මේ සිදු වන්නේ පළමු වතාවටයි. ඇතැම් විට, මෙය ලෝකයේමත් එවැනි දෙයක් සිදු වූ පළමු අවස්ථාව වන්නට ඇත. 


මීට පෙර සිදු වූ මෙවැනි ලොකු ම සිද්ධිය වන දවස පුවත්පත සීල් තැබීම 1974 අප්‍රේල් 20 දින සිදු කළේ ද හදිසි නීතිය යටතේ ජනාධිපති නියෝගයකිනි. එමගින් සිදු වූ හානි වෙනුවෙන් දවස හිමිකාර සේපාල ගුණසේනට රජය විසින් රුපියල් කෝටි ගණනක වන්දියක් ‍ගෙවන ලදී. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-28

සල්ලි සල්ලි කියලා බලන්නෙ නැතුව ඔන්න ආණ්ඩුව පෞද්ගලික අංශයේ සේවකයන්ට හා විදේශ ශ්‍රමිකයන්ට මැරෙනකල් විශ්‍රාම වැටුප් ගෙවන්න රු. 200ක් ම දෙනවලු

(2011 අප්‍රේල් 28, W3Lanka) පෞද්ගලික අංශයේ සේවකයන්ට හා විදේශ සේවා නියුක්තිකයන්ට විශ්‍රාම වැටුප් ගෙවන්නට ය කියා අරමුදල් පිහිටුවීම පිණිස රජය ඊයේ පාර්ලිමේන්තුවට ඉදිරිපත් කරන්නට සිටි පනත් දෙක සේවක විරෝධය නිසා ඉවත් කර ගැනිණි.


මහජන මුදලින් ව්‍යාපාර කරන හා ඒවායේ ලාභ විවිධාකාරයෙන් ගරා ගන්නා, පාඩු මහජනතාව පිට ම පටවන ලංකාවේ පාලක පැළැන්තියට ඇත්තෙන් ම උවමනා වී තිබෙන්නේ පෞද්ගලික අංශයේ සේවකයන් විසින් ඉතිරි කර ඇති විශ්‍රාම පාරිතෝෂික මුදල් හා මාසිකව තපා ගන්නා තවත් මුදල් යොදවා තමන්ට පාලනය කළ හැකි තවත් දැවැන්ත ප්‍රාග්ධන අරමුදල් දෙකක් ගොඩනඟා ගැනීමයි.


පෞද්ගලික අංශයේ හා විදේශ ශ්‍රමික සේවකයන්ට ජීවත් වීමට සරිලන විශ්‍රාම වැටුපක් තහවුරු කර දීමේ හැකියාවක් මෙම විශ්‍රාම වැටුප් යෝජනාවල නැත. රජය ඔය කියන තරම් ම වැඩිහිටියන්ට ආදරය කරන්නේ නම් මුලින් ම කළ හැකි හොඳ ම දෙයක් වන්නේ රජයේ සේවකයන්ගේ විශ්‍රාම වැටුප් පිළිබඳ යළි ඇගයීමක් කර ජීවත් වීමට නො සරිලන විශ්‍රාම වැටුප් ලබන වයස්ගත දිළින්දන් වෙනුවෙන් යමක් කිරීමයි.


නිදසුනක් ලෙස, වයස 70 පසු කළ විශ්‍රාමිකයන්ට ඔවුන් විශ්‍රාම යන විට ලැබූ වැටුපෙන් 100%ක් ම විශ්‍රාම වැටුප ලෙස ලබා දීම වැනි පියවරක් ගන්නට රජයට පුළුවන. එවිට, ඇත්තෙන්ම අපේ ආණ්ඩුවට වැඩිහිට් ජනතාව ගැන මාර කැක්කුමක් ඇති බව ඔප්පු වේ.


හකුළුවා ගත් විශ්‍රාම වැටුප් යෝජනාව රජය තවමත් අතහැර ඇති බවක් නො පෙනේ. ආණ්ඩුවේ සැලැස්ම වී ඇත්තේ සංශෝධන සහිතව එය නැවත ගෙන ඒමයි.


පෞද්ගලික අංශයේ සේවකයන් සඳහා විශ්‍රාම වැටුප් අරමුදල ඇති කිරීමේදී ඊට රජය රුපියල් බිලියනයක මුදලක්‌ ලබාදීමට තීරණය කර තිබෙන බව කම්කරු ඇමැති ගාමිණී ලොකුගේ මහතා පවසයි. මේ බිලියනය මහා ලොකු මුදලක් ලෙස පෙනුණ ද, මෙම විශ්‍රාම වැටුප් ක්‍රමයට දායක වීමට සිටින ශ්‍රමිකයන් පිරිස ලක්ෂ පනහක් යයි ගණන් බැලුවොත් එක් ශ්‍රමිකයකු වෙනුවෙන් වෙන් වන්නේ රු. 200ක් පමණි. මේ රුපියල් දෙසීයේ ඉතිරියෙන් කළ හැකි දේ කුමක් ද?


හම්බන්තොට වරායේ කළු ගල කඩන්නට ද රජය රු. බිලියන 5 සිට 16 දක්වා මුදලක් වැය කරන්නට යන බව මාධ්‍ය වාර්තා පවසයි. කියවන්න: හම්බන්තොට වරායේ ගලේ පැහැරූ බළල්ලු කවුරු ද? ඒ එක්කෙනෙකුගේ දෙන්නෙකුගේ මෝඩකම් වසා ගන්නට ය. ලක්ෂ පනහක් පමණ වන පෞද්ගලික අංශයේ හා විදේශ සේවයේ ශ්‍රමිකයන්ට දෙන බව කියන විශ්‍රාම වැටුප වෙනුවෙන් යන්තම් බිලියනයකි.


ජනාධිපති මහින්ද රාජපක්‌ෂ මහතාගේ ප්‍රධානත්වයෙන් පසුගිය 24 වැනිදා පැවැති සාකච්ඡාවෙන් අනතුරුව මතුවූ කරුණු සලකා බැලීම සඳහා තමාගේ හා මුදල් අමාත්‍යාංශයේ ලේකම්වරයාගේ ප්‍රධානත්වයෙන් පැවැති සාකච්ඡාවේදී, පාර්ලිමේන්තුවට ඉදිරිපත් කොට තිබෙන විශ්‍රාම වැටුප් පනත් කෙටුම්පත සුළු සංශෝධන කිහිපයක්‌ සහිතව පිළිගැනීමට රජය, සේව්‍ය පාර්ශ්වය හා වෘත්තීය සමිති 26 වැනිදා එකඟ වූ බව ඇමති කියයි.


මෙම සාකච්ඡා‍වකදී මුදල් ආමාත්‍යංශයේ ලේකම් පී.බී. ජයසුන්දර හාම්පුතුන්ගේ සම්මේලනයේ රවි පීරිස්ට දුන් පිළිතුරකින් හෙළි වූ තවත් තරුණක් වන්නේ දැන් මෙම විශ්‍රාම වැටුප් යෝජනාවට විරෝධය පළ කරන හාම්පුතුන්ගේ සම්මේලනය සමග ආණ්ඩුව කලින් මේ පිළිබඳව සැකච්ඡා කර, ඔවුන්‍ට අමතරව ගෙවන්නට සිදු වන 2% හිලව්වට විශාල වශයෙන් බදු සහන ලබා දී ඇති බවයි. කලින් ඇති කර ගත් එකගකා අනුව කටයුතු කරන්නේ නැත්තේ ඇයිදැයි පී.බී. ජයසුන්දර රවි පීරිස්ගෙන් ඇසූ විට පීරිස් නිරුත්තර වූ බව වාර්තා වේ. 


අප සිතන අන්දමින් නම්, හාම්පුතුන් මෙම යෝජනාවට විරුද්ධ වන්නේ මෙම 2% නිසා නො වේ. රජය ව්‍යාපාර කිරීම ඔවුන් අපේක්ෂා කරන ව්‍යාපාරික ප්‍රජාතන්ත්‍රවාදයට පටහැණි නිසා ය. එසේ වන්නේ බදු නො ගෙවන, පාඩු මහජනතාව පිට පටවන රජයේ සමාගම් සමග තරග කරන්නට පෞද්ගලික අංශයට ඇති අපහසුව නිසා ය. උදාහරණයකින් කිවහොත් රජයේ බදු සහන හා වෙනත් උපකාර මත පවත්වාගෙන යන සතොස හා කෝප් සිටි කාගිල්ස් ෆුඩ් සිටියට තරගයක් දෙන්නට සමත් වී ඇති නිසා ය. 


ගෝලීය ධනේශ්වර බලවතුන් එක්සත් ජාතීන් හරහා මහින්ද රාජපක්ෂ ආණ්ඩුවට මෙතරම් බලපෑමක් කරන්නේ ද ඔවුන්ගේ රාජ්‍ය ව්‍යවසාය කතිපයාධිකාරය පෞද්ගලික අංශයට අහිතකර නිසා බව අපේ අදහසයි. ඒ පිළිබඳ වැඩි විස්තර සඳහා මෙම ලිපිය කියවන්න. මහින්දගේ පසුපස එක්සත් ජාතීන්ගේ දඩ බල්ලන් හඹා ඒමට හේතු


අර්ථසාධකලාභීන්ගෙන් හා සේව්‍ය පාර්ශ්වයෙන් මාසික වැටුපෙන් සියයට දෙක (2%) බැගිනුත්, සේවකයන් උපයා ගත් විශ්‍රාම පාරිතෝෂිකයෙන් 10% ක්‌ද, සේවක අර්ථසාධක අරමුදලේ ප්‍රතිලාභ නොගත් වයස අවුරුදු 70 ඉක්‌මවූ අක්‍රීය තත්ත්වයේ පසුවන ගිණුම්වල මුදල් ද මේ ඊනියා විශ්‍රාම වැටුප් අරමුදල සඳහා යොදා ගැනීමට දැන් රජය සැලසුම් කර තිබේ. සම්පූර්ණ විශ්‍රාම පාරිතෝෂිකය කොල්ල කා හෝ තහවුරු කළ නො හැකි ජීවත් විය හැකි තරමේ විශ්‍රාම වැටුපක් ලබා දීම මේ ක්‍රමයෙන් තහවුරු කරන්නේ කෙසේ ද යන්න රජය පැහැදිලි කළ යුතු ය.


විශ්‍රාමිකයන්ට රජය මෙම අරමුදලට රු. බිලියන 200ක්වත් ආයෝජනය කළ යුතු ය. නැතිනම් සේවකයන් ඉතිරි කළ විශ්‍රාම පාරිතෝෂිකයට අත නො තැබිය යුතු ය. 


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-27

සෞඛ්‍ය ඇමතිගේ ගමේ රෝහලේ කාමරේ පොරේ

(2011 අප්‍රේල් 27, W3Lankaසෞඛ්‍ය ඇමතිතුමාගේ ගම වන පොළොන්නරුවේ මහ රෝහලේ වෛද්‍යවරු වර්ජනයක ය. වෛද්‍යවරුන්ගේ විවේක කාමරය හෙද පාලිකාවට දුන්නාට දොස්තරලා රණ්ඩු කරති. කාමරය ආපසු දොස්තරලාට දුන්නොත් හෙදියන් රණ්ඩු කරනු ඇත. හෙදියන් වර්ජනය කළත් පාඩුව රෝගීන්ට ම ය. ‍මෙතැන අභිමානය පිළිබද ප්‍රශ්නයක් ද ඇත.


ඇමති මෛත්‍රීපාල සෞඛ්‍ය ඇමතිකමට පත් වූ හැටියේ මුලින් ම කළේ පොළොන්නරුව රෝහල මධ්‍යම ආණ්ඩුවට පවරා ගැනීමයි. ඒත්, වෛද්‍යවරුන්ට විවේක කාමරයක් ලබා දීම හා හෙද පාලිකාවට නිල කාමරයක් ලබා දීම වැනි සරළ ප්‍රශ්නයක් විසඳීම‍ට හෝ ඇමතිවරයා සමත් වී නැති බවා පෙනේ. මේ කාමරේ පොරේ ඒ නිසා ය.


(ජේ. එම්. මෝර්ටන් නම් ඉංගී‍්‍රසි නාට්‍ය රචකයා ගේ ‘බොක්ස් ඇන්ඩ් කොක්ස්’(Box and Cox) නමැති විකට නාටකයේ අනුවර්තනයක් ලෙස 1960 දී දයානන්ද ගුණවර්ධනයෝ ‘කාමරේ පොරේ’ නමින් නාට්‍යයක් කළේ ය.)


ඇත්තෙන් ම, ලංකාවේ ප්‍රධාන රෝහල්වල දැඩි ඉඩකඩ හිඟයක් ඇත. බොහෝ ප්‍රධාන රෝහල්වල සායන පැවැත්වෙන කුඩා කුටි ඇඟිල්ලක් ගහන්නට තරම් හෝ ඉඩ නැති ඉරිදා පොළවල් වැනි ය. වාතාශ්‍රය පවා නැති මෙම සායන ඇත්තෙන් ම රෝග පතුරුවා හරින මධ්‍යස්ථාන ය. රෝහල් මෝචරියේ පවා ඉඩකඩ නැති හෙයින් රෝහලක මිය යන්නා මිය ගොස් දෙපැයකින් දැඩි අවමානයකට මුහුණ දෙයි.


රාත්‍රී සේවයේ යෙදෙන කාන්තාවන්ට විවේක කාමර සැපයීම කම්කරු නීති අනුව අනිවාර්ය කාරණයක් වුව ද ලංකාවේ ඇතැම් රෝහල් වාට්ටුවල හෙදියන් හා වෙනත් සේවිකාවන් තමන්ට හිමි රාත්‍රී විවේකය ලබා ගන්නේ බංකු උඩ, කාඩ්බෝඩ් උඩ ය.


තම ආයතනවල මේසයක්, පුටුවක්වත් නැති බොහෝ රජයේ සේවකයෝ සිටිති. අධ්‍යාපන දෙපාර්තමේන්තුව එවැන්නකි. එය දැන් කලක සිට ම ගුරු මේස හා පුටු සැපයීම සීමා කර ඇත. බොහෝ පාසල්වල ගුරුවරු අසුන් ගන්නේ සිසු මේස, පුටුවල ය. ගුරු වි‍වේක කාමර, වැසිකිලි ආදිය පවා අධ්‍යාපන දෙපාර්තමේන්තුව සලකන්නේ අනවශ්‍ය දේ ලෙස ය. කලාප අධ්‍යාපන කාර්යාලවල පුටු, මේස නැති අධ්‍යක්ෂවරු පවා සිටිති.


‍සිය රාජකාරි කටයුතු සඳහා පුටුවක්, මේසයක්, රාජපකාරි ලේඛන තබා ගැනීමට අල්මාරියක් තිබීම මහ මෙරක් සේ සලකන රජයේ සේවකයන් සිටින බව ඇමතිවරු දන්නවා ද? මෙවන් සංදර්භයක් තුළ කාමරයක් යනු සුළු පටු දෙයක් නො වේ. ඇතැම් රාජ්‍ය නිලධාරීන්ට තාමරයක් ලැබීම දරා ගන්නට බැරි ය. කාර්යාලවලට එන මහජනයාට මේවා තේරෙන්නේ නැත. කාමරයක සිටි පමණින් නිලධාරීන්ගේ ඇඟට මේ තරම් ඌෂ්ණයක් ඇඟට එන්නේ ඇයි ද යන්න දන්නේ රජයේ සේවකයෝ පමණි.


අප මෙහි සඳහන් කළේ රාජ්‍ය දෙපාර්තමේන්තු දෙකක් ගැන පමණි. මෙවැනි තවත් බොහෝ ගණනත් ඇත. රාජ්‍ය සේවකයන් ගණන වැඩි කළා යයි ආණ්ඩුවේ ලොකු ලොක්කෝ නිතර උදම් අනති. ප්‍රමාණය වැඩි වූ පමණින් ගුණය වැඩි වන්නේ නැත. අතෘප්තිමත් සේවකයන්ගෙන් පිරි, අකාර්යක්ෂම රාජ්‍ය සේවයක් අපට හිමි වීමට එක් ප්‍රධාන හේතුවක් වන්නේ මෙකී සම්පත් හිඟයයි. සම්පත් නාස්තිය ගැන පසුව ලියමි.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-26

මයි කාර් මයි පෙට්‍රල්! හැබැයි බදු ආණ්ඩුවට

(2011 අප්‍රේල් 26, W3Lankaධනවත් ව්‍යාපාරිකයන් හා දේශපාලකයන් පාවිච්චි කරන එන්ජින් ධාරිතාව වැඩි මෝටර් රථවලින් අය කරන ආනයන බදු වැඩි නො කරමින් මධ්‍යම පංතිකයන් පාවිච්චි කරන මෝටර් රථවලින් අය කරන ආනයනික බදු පමණක් ශීඝ්‍රයෙන් ඉහළ නැංවීමට රජය පියවර ගෙන ඇත.


ස්වයං රැකියා කරන්නන් හා පහළ ම මධ්‍යම පංතික කොටස් විසින් පාවිච්චි කරනු ලබන ත්‍රිරෝද රියවල ද ආනයන බදු වැඩි කර තිබේ.


සිලින්ඩර ධාරිතාව 1000ට අඩු කුඩා පෙට්‍රල් මෝටර් රථ සඳහා දැනට අය කරන සියයට 95ක මුළු බදු ප්‍රතිශතය සියයට 120 දක්වාද සිලින්ඩර ධාරිතාව 1001 - 1600 වාහන සඳහා වූ සියයට 119 ක් වූ බදු ප්‍රතිශතය 128 දක්වා ද වැඩි කර තිබේ.


පෙට්‍රල් හා ඩීසල් ත්‍රීරෝද රථ ආනයනයේ දී අය කරන ලද සියයට 38 ක් වූ බදු ප්‍රතිශතය ඩීසල් ත්‍රීරෝද රථ සඳහා සියයට 60 ක් පෙට්‍රල් ත්‍රීරෝද රථ සඳහා සියයට 50 ක් වශයෙන් ඉහළ දමා ඇත.


මේ අනුව, දැනට රු. 1,020,000කට විකිණෙන මරුති 800 කාරයක මිළ රු. 125,000කින් පමණ ද, ඇල්ටෝ කාරයක් රු. 150,000කින් පමණ ද වැඩි වනු ඇති බව ආරංචි මාර්ග පවසයි.


එන්ජින් ධාරිතාව ඝන සෙන්ටි මීටර් 1000-1600 අතර වන මධ්‍යම පංතිකයන් අතර ජනප්‍රිය කාර්වල මිළ ද රු. 250,000කින් පමණ ඉහළ යනු ඇතැයි අපේක්ෂා කෙරේ.


මෑත සිට ජනප්‍රිය වෙමින් ඇති පෙට්‍රල්වලින් හා විදුලියෙන් යන දෙවිධියට ම ධාවනය කළ හැකි දෙමුහුන් මෝටර් රථ සඳහා ද මේ දක්වා එන්ජින් ධාරිතාව නො තකා අය කළ 38ක බදු ප්‍රතිශතය ද වැඩි කර තිබේ. එු අනුව, සිලින්ඩර ධාරිතාව 2000ට අඩු දෙමුහුන් රථවලට සියයට 50ක් වශයෙන් ද, ධාරිතාව 2001 - 3000 වාහන සඳහා සියයට 75 ක් හා 3000ට වැඩි වාහන සඳහා සියයට 100 වශයෙන් ද බදු ඉහළ දමා ඇත.


මෝටර් රථ ආනයනයේදී අය කළ බදු පසුගිය වසරේදී රජය විසින් අඩු කරන ලදී. එමගින්, ඒ වන විට බොහෝ දුරට අඩු වී තිබුණු වාහන ආනයන බදු ආදායම ඉහළ නංවා ගැනීමට රජය සමත් විය. විශේෂයෙන් ම භාණ්ඩ වන්දනාවේ ලොල් මධ්‍යම පංතිකයන් මෝරට් රථ පාවිච්චියට පොළඹවා ගත් රජය දැන් ඔවුන්ගේ සාක්කු පල්ල පවා අත පත ගා ගැනීම පිණිස මෙසේ බදු ඉහළ නංවා තිබේ.


සමාජයේ වරප්‍රසාදිත ධනවතුන් හා දේශපාලකයන් විසින් පාවිච්චි කරනු ලබන වාහනවල බදු වැඩි වීමක් සිදු වී නැත.


මේ ආණ්ඩු‍වේ ඡන්ද පදනම ද බොහෝ දුරට මෙම මධ්‍යම පංතික තීරුව වන අතර, මේ වන විට මූන් දෙස බලාගෙන ඔරවමින් සිටින ඔවුන්ට ආණ්ඩුව කදිම කළ ගුණ සැලකීමක් කර ඇති බව පෙනේ.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-25

හම්බන්තොට වරායේ ගලේ පැහැරූ බළල්ලු කවුරු ද?

(2011 අප්‍රේල් 25, W3Lanka) හම්බන්තොට වරායේ පිහිටි දැවැන්ත ගල් පර්වතයක් නිසා එයට නැව් ඇතුල් කළ නො හැකි බව විපක්ෂය පවසයි.


ගල ගැන වාද කරන්නට තමන් සූදානම් බව විවාදයක් යනු කටින් හෝ අතින් පයින් ගසා අනෙකා මෙල්ල කිරීම යයි සිතා සිටින ශික්ෂණයේ ගැටලු ප්‍රදර්ශනය කර ඇති දේශපාලනඥයකු වන රෝහිත අබේගුණවර්ධන පවසයි.


පවත්වන්නට නියමිත මේ වාදය පානදුරා වාදය වැනි එකක් වනු ඇද්දැයි අපි නො දනිමු. එයට ඇතැම් විට හම්බන්තොට වාදය හෝ ගලේ වාදය යයි කියා ඉතිහාසයේ සඳහන් වන්නට පුළුවන.


ගලේ පැහැරූ බළලාට ඇති ප්‍රශ්නය වන්නේ ඒ අසූචි ගොඩ වසා ගැනීමට වැලි නැති වීමයි.


සන්ඩේ ලීඩර් පුවත්පතේ වාර්තාවකට අනුව, වරාය බේසම හා පිවිසුම් මාර්ගය හෑරීමේ අමතර කටයුතු සඳහා චීන කොන්ත්‍රාත්කරු කජු ඇට කොස් ඇට නො වන රු. බිලියන 4.8ක් ඉල්ලා ඇති බව වරාය අධිකාරියේ සභාපති හා මේ වරාය හැදූ විශ්වකර්මයා වන ප්‍රියත් බන්දු වික්‍රම පවසා ඇත. මේ වනාහි මහජන මුදල් ගෙඩි රුපියල් 4,800,000,000කි. නැතිනම් කෝටි 480කි. ගම් 480කට කෝටිය, කෝටිය දී සුළු හා මධ්‍ය පරිමාණ කර්මාන්ත  නංවන්නට වැය කරන්නට තිබූ මුදලකි. ‍දුප්පතුන්ට ‍රු. ලක්ෂ දහය බැගින් වටිනා ගෙවල් 4800ක් හදන්නට තිබූ මුදලකි. පාරවල්, පාසල්, රෝහල් විශාල ගණනක් සංවර්ධනය සඳහා යොදන්නට තිබූ මුදලකි.


තවත් සමහර මාධ්‍ය වාර්තා අනුව මේ ගල් පර්වතය පුපුරුවන්නට යන වියදම රු. බිලියන 16ක් පමණ හෙවත් කෝටි 1600ක් පමණ වේ. රජයට ඍජුව ම සම්බන්ධ වෙබ් අඩවියක් වන Colombo Pageහි ද මේ බව සඳහන් වේ.



මේ මුදල කෙතරම් විශාල එකක් ද යත්, 2010 අයවැය ලේඛනය අනුව, මුළු රටේ ම සෞඛ්‍යය හා අධ්‍යාපන ක්‍ෂේත්‍රවල රජය කරන උපරිම ආයෝජනය පුරෝකථනය කර තිබෙන්නේ ද රුපියල් බිලියන 40.8 ක්‌ ලෙසයි.


ගල කැඩීම සඳහා යන වියදම වැඩි වන්නට හේතුව වරායේ වතුර තිබීම බව ද, වරායේ ඉදි කර ඇති ස්ථාවර ඉදි කිරීම්වලට හානියත් නො වන පරිදි පරිස්සමින් එය කිරීමට සිදු වී ඇති බව ද, මාධ්‍ය වාර්තා පවසයි.‍


දැන් මතු වන ප්‍රශ්න මේවා ය. වරාය මැද මහ ගලක් තිබියදී ජවුසන් නටා ලහි ලහියේ වරායට වතුර පිරෙව්වේ ඇයි?


හම්බන්තොට වරාය හදන්නට ලංකාවේ ආණ්ඩුව ඩොලර් මිලියන 360ක් හෙවත් රුපියල් කෝටි 4000ක් පමණ වැය කරන්නට ඇස්තමේන්තු කර තිබිණි. එයින් ඩොලර් මිලියන 306ක් ම චීන රජයේ එක්සිම් බැංකුව විසින් පොලියට දුන් ණයකි. වරාය ඉදි කිරීමේ කොන්ත්‍රාත්තුව චීනයට ලබා දීම ‍මේ ණය සඳහා මූලික කොන්දේසියකි.


ඉතිරි මුදල් ද රජය වියදම් කරන්නේ දේශීය හා විදේශීය වශයෙන් ලබා ගත් ණයවලිනි.


දැන් ගල කැඩීමට අමතරව වියදම් කරන්නට යන මුදල ඩොලර් මිලියන 148ක් බව Colombo Page වෙබ් අඩවියේ දැක්වේ. මෙය වරාය හදන්නට ගිය වියදමින් අඩකට කිට්ටු වේ. 


රු. බිලියන ගණන් මහජන මුදල් සමග මේ සෙල්ලම් කරන්නේ පරම්පරා කීයක් උගසට තබා ගත් ණයවලින් ද?


මේවාට වග කිව යුත්තන් යා යුත්තේ කුමන අපායකට ද?

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-24

අඩි හතරක් උඩ සිට පදවන රේසිං කාර් හෙවත් ලංකාවේ බර වාහන

(2011 අප්‍රේල් 24, W3Lanka) වයඹ පළාත් පරිසර අධිකාරිය පැය 24ක් පුරා පවත්වන ලද ‍සෝදිසියකින් සොයාගෙන ඇති කරුණක් වන්නේ වැලි ප්‍රවාහනය කරන බර වාහනවලින් 70%ක් ම අයෝග්‍ය තත්වයේ ඇති බවයි.


සෝදිසි සිදු වී නැතත්, දිවයිනේ බොහෝ ප්‍රදේශවල ඉදිකිරීම් ව්‍යාපෘතිවලට ගල්, වැලි ආදිය සපයන බර වාහන බොහොමයක තත්වය මෙයයි.


මෙම වාහන විසින් මහා මාර්ගවල ගමන් කරන සෙසු වාහන හා පදිකයන්ට ද, මාර්ගය දෙපස නිවෙස්වලට ද ඇති කරන අනතුරුදාක තත්වය හා භීතිය බලධාරීන් කිසිවකුගේ අවධානයට ලක් වී නැත.


ගල්, වැලි, පස් ආදිය මග දිගට හලමින් අධි වේගයෙන් ධාවනය වන අබලන් ට්‍රක් රථ දිවයිනේ බොහෝ ප්‍රදේශවල සුලබ දර්ශනයකි.


දකුණු කොළඹ වරායේ ජැටිය ඉදි කරන්නට දැවැන්ත කළු ගල් ප්‍රවාහනය කිරීම පිණිස ගාලු පාරේ පොතුපිටියේ පිහිටුවා ඇති ජැටිය කරා ගල් ගෙන යන ට්‍රක් රථ නිසා කලුතර දිස්ත්‍රික්කයේ මහා මාර්ග මේ වන විට දැඩි ලෙස අනතුරුදායක ස්ථාන බවට පත් වී තිබේ. අයෝග්‍ය තත්වයේ පවතින මෙම බර වාහන බොහොමයක් ධාවනය වන්නේ අධි වේගයෙනි. මෙම රියවල රියදුරන්ට ඔවුන් ප්‍රවාහනයේ යෙදෙන වාර ගණන අනුව ප්‍රතිලාභ හිමි වන ක්‍රමයක් ක්‍රියාත්මක වීම නිසා ඔවුන් අධි වේගයෙන් ධාවනය කරන්නට පෙළඹෙන බව තතු දත් ආරංචි මාර්ග පවසති.


මෙම බර වාහන පොලිස් පරීක්ෂාවට ලක් නො වන්නේ ඒ පසුපස බලවත් පුද්ගලයන්ගේ ව්‍යාපාර ඇති නිසා බව ද දැන ගන්නට තිබේ.


මෙම බර වාහන ගමනාගමනය හේතුවෙන් මේ වන විට කලුතර දිස්ත්‍රික්කයේ මහා මාර්ග රැසක් අබලන් වී තිබේ.


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-23

එස්.බී.ට අවහ්‍ය සරසවිවල අවුලක් ඇති තරන්න ද?

(2011 අප්‍රේල් 22, W3Lankaමැයි මාසයේ සිට සරසවියට අලුකින් ඇතූළත් වන සිසුන්ට හමුදාව ලවා නායකත්ව පුහුණුවක් දීමට උසස් අධ්‍යාපන ඇමති එස්.බී. දිසානායක සැලසුම් කර තිබේ.


සරසවි සිසුන්ට හමුදාව විසින් සපයන නායකත්ව පුහුණුවක් අවශ්‍ය ද යන්න මතභේදයට තුඩු දී ඇත. නායකත්ව පුහුණුවක් සරසවි සිසුන්ට සපයන්නට විශ්ව විද්‍යාල අාචාර්යවරුන්ට බැරි ඇයි?


තමන්ට වන අවමානය පවා නො තකමින් බත් කෑමට හා තමන්ගේ වැටුප් ප්‍රශ්නය ගැන කතා කිරීමට පමණක් කට අරින විශ්ව විද්‍යාල ආචාර්යවරුන් නම් ඊනියා බුද්ධි මණ්ඩලයක් සිටින රටක මෙවැනි විකාර සිදු වීම පිළිබඳ පුදුම විය යුතු නැත.  


අපට වැටහෙන අන්දමට නම්, මේ වනාහි මෙතෙක් ජ්‍යේෂ්ඨ ශිෂ්‍යයන් විසින් කරන ලද නවක වධය ද ආණ්ඩුව සියතට ගැනීම සඳහා යොදන උපායකි. සිසුන්ගේ මොළ සෝදා අන්තරේට සහාය දිනා ගැනීම පිණිස සිසුන් නවක වධය යොදා ගන්නා නිසා එය අනෙක් පැත්තට පාවිච්චි කර තමන්ට සිසු සහයෝගය දිනා ගැනීම සඳහා මෙම නව නවක වධය හෙවත් නායකත්ව පුහුණුව යොදා ගැනීමට ආණ්ඩුව සැලසුම් කර ඇති බව පෙනේ.


අයිතිවාසිකම් දිනා ගන්නට තමන් යටතේ සටන් කළ යුතු බවට අන්තර් විශ්ව විද්‍යාල ශිෂ්‍ය බල මණ්ඩලය නවක වධය යොදා ගනිමින් කරන දේශපාලන ප්‍රචාරණය වෙනුවට රස්සාවක් ගන්න නම් ආණ්ඩුවට ගොට්ට අල්ලාගෙන, කියන දෙයක් අසාගෙන, සාන්ත දාන්ත තීන්ත කූඩු ලෙස සිටිය යුතු ය යන බොරුව සිසුන්ට ඒත්තු ගැන්වීමට මෙමගින් හැකි යයි ආණ්ඩුව සිතනවා ‍වන්නට පුළුවන.


එහෙත්, එස්.බී. මේ සැරසෙන්නේ සරසවිවල නැවතත් මහා වියවුලක් ඇති කිරීමට බව පෙනේ. කෙතරම් උත්සාහ කළත්, සරසවිවල කාලාන්තරයක සිට පවතින උප සංස්කෘතිය ප්‍රින්සිපල්ගෙන් ලොකු හාමුදුරුවන්ගෙන් කණේ පාරවල් කන සිසුන් සිටින පාසල් හෝ දහම් පාසල් සංස්කෘතියක් බවට ‍වෙනස් කරන්නට ලැබෙන්නේ නැත. විශ්ව විද්‍යාල උප සංස්කෘතිය නව යොවුන් වියෙන් වැඩිහිටි වියට සංක්‍රමණය වෙමින් සිටින පුද්ගලයාගේ පෞරුෂ වර්ධනය සඳහා සාධනීය ලෙස බලපාන එකක් මිස නිශේධනීය එකක් නො වේ. එහි ඇති ගැටලු වනාහි 100%ක් ම සිසුන්ගේ නො හික්මුණුකම් ලෙස හුවා දක්වන්නට යාම වැරදි ය. ලංකාවේ ඉහළ ම නායකත්වයේ සිට ම ශික්ෂණයේ හා හැදියාවේ බරපතල ගැටලු තිබියදී සරසවි සිසුවාගෙන් බෝ පැළ වන්නැයි ඉල්ලීම තේරුමක් නැත. කන්ද කඩා වැටුණු කල හුඹහ ඉතිරි වන්නේ නැත.


නැගෙනහිර විශ්වවිද්‍යාලයේ වන්දාරමුල්ල පීඨය භූමියේ පිහිටුවා ඇති පොලිස් මුරපොල වහා ඉවත් කරන ලෙස ඉල්ලමින් පසුගිය මාර්තු 30වැනිදා සිට පංති වර්ජනය කරමින් සිටින විශ්වවිද්‍යා‍ල සිසුන් සමග අදාළ ගැටලුව පිළිබඳව ඊයේ සාකච්ඡා පැවැත්වූ උසස් අධ්‍යාපන ඇමති එස්.බී. දිසානායක "මතක තියාගන්න මේ ඉන්න ඩී.අයි.ජී. මහත්වරු එස්.එස්.පී. මහත්වරු සේරම විශ්වවිද්‍යාලවලට ගිය අය. ඔය ඔක්කොම වගේම තමුන් වහන්සේලා ඔය කරන පිස්සු වැඩ එයාලත් ඒ කාලේ කරලා ඇති. මාත් හොදට පිස්සු කෙළපු විශ්වවිද්‍යාල ශිෂ්‍යයෙක්. පොලීසිය එපා කියලා හුඟක් දඟලන්න ගියොත් හමුදා යුනිට් එකක් ගේනවා. ඒක එපා කිව්වොත් නේවි යුනිට් එකක් ගේනවා. ඒක එපා කිව්වොත් එස්.ටී.එෆ්. එක ගෙනත් දානවා," යි පැවසූ බව සිරස වාර්තා කළේ ය.


සරසවි සිසුන් වනාහි පිස්සු කෙළින්නන් පිරිසකැයි ඇමති එස්.බී. දිසානායක සිතමින් සිටින බව පෙනේ. තමන්ගේ ස්වභාවය හා තමන්ට තේරෙන තරම අනුව සියල්ල විනිශ්චය කරන්නට යාම ඔහුට වැරදී ඇති තැනයි. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-22

සය වසරක් ඇමතිවරයකු ළඟ සැඟවී සිටි අපරාධකරුවෙක්‍: තවත් කී‍ දෙනෙක් ඇද්ද?

(2011 අප්‍රේල් 22, W3Lanka) ශ්‍රී ලංකා ආයෝජන මණ්‌ඩලයේ ඇරැයුමෙන් කෘෂි නිෂ්පාදන හා හෝටල් ව්‍යාපෘතියක්‌ ආරම්භ කිරීම සඳහා 2005 වසරේදී ශ්‍රී ලංකාවට පැමිණ විදේශිකයකු 2005 වසරේ ජුනි මාසයේ සිය මවුබිමට ගිය අවස්‌ථාවක දී ඔහුට අයත් ගිණුමකින් ‍හොර අත්සන් යොදා අනූඅට ලක්‌ෂ පනස්‌ දහසක මුදලක්‌ වංචනික ලෙස ලබා ගත් ජේ. එම්. බුද්ධික ජයසිංහ නම් සැකකරුවකු මෙතෙක් කල් අධිතරණයෙන් හා රහස් පොලිසියෙන් සැඟවී සිට පසුගියදා අත්අඩංගුවට පත් වී තිබේ.


මේ පුද්ගලයා සැඟවී සිට ඇත්තේ ආණ්ඩුව ඇතුළේ ය. අන්තිමට ආචාර්ය, බුද්ධ ශාසන කීර්ති ශාසන බන්ධු මර්වින් සිල්වා ඇමතිගේ මහජන සම්බන්ධීකරණ අමාත්‍යංශයේ ය. ඒ නිකම් නො වේ. ඇමතිගේ සම්බන්ධීකරණ ලේකම් තනතුරක් ද දරමින් මහජන මුදලින් වැටුප් ද ලබමිනි. ඒ සම්බන්ධීකරණ ලේකම්කම ද සුළුපටු එකක් නො ව, පාර්ලිමේන්තු කටයුතු සම්බන්ධීකරණ ලේකම් ධුරයකි. 


වසර ගණනාවක්‌ තිස්‌සේ පොලිසියේ ඇසට වැලි ගසමින් සැඟවි සිටි සැකකරු අප්‍රේල් මුල පොලිස් නිලධාරීන් දෙදෙනෙකු ද සමග ගොස් ග්‍රෑන්ඩ්පාස්‌ ප්‍රදේශයේ පරණ යකඩ ව්‍යාපාරිකයකු මරාදමන බවට තර්ජනය කර රුපියල් ලක්‍ෂ පහක කප්පමක්‌ ලබාගැනීමට තැත් කිරීමේ සිද්ධියක් සම්බන්ධයෙන් පොලිස්‌ අත්අඩංගුවට පත්වීමෙන් අනතුරුව සැකකරුගේ නම පුවත්පත් මගින් දැන ගත් රහස් පොලිසිය කලින් වංචාව පිළිබඳ වාර්තාව ද අධිකරණයට ඉදිරිපත් කර ඔහුට ඇප නො දෙන ලෙස ඉල්ලා සිටියේ ය.


කොහොම ද ආශ්චර්යයේ රහස් පොලිසියේ අපරාධ පරීක්ෂණ?


මීට වසරකට පමණ පෙර අවි ආයුධ සමග අත්අඩංගුවට ගනු ලැබූ එවකට මානව හිමිකම් ඇමති මහින්ද සමරසිංහගේ සම්බන්ධීකරණ ලේකම්වරයකු තවමත් රිමාන්ඩ් භාරයේ ය. ඔහු අත් අඩංගුවේ සිටියදී පවා මිනී මැරුමකට හවුල් වී ඇති බව පොලිස් ආරංචි මාර්ග පවසයි. 


ඇමති සම්බන්ධීකරණ ලේකම් නම් දේශපාලන පත්වීම් බොහෝ විට දෙනු ලබන්නේ මෙවැනි අපරාධ සහායකයන්ට ය. මෙවැනි අපරාධකරුවන් තවත් කී දෙනෙක් මෙසේ අමාත්‍යංශවල සැඟවී සිටිනවා ඇද්ද?


මොවුන් කරන අපරාධවලට ඇමතිලාගේ ඇති සම්බන්ධකම් පරීක්ෂණවලදී හෙළි වේ. එහෙත්, ඒවා සාමාන්‍යයෙන් යට ගසනු ලැබේ. මේ ඇමතිවරුන්ට එරෙහිව ඇති චෝදනා එළියට එන්නේ ඔවුන් මහ තැන්වලට එරෙහිව ගියහොත් පමණි. මහ තැන්වලට ද මෙම අයථා ආදායම්වල කොටස ඍජුව හෝ වක්‍රව ලැබෙනවා ඇතැයි මහජනයා සැක කිරීම අසාධාරණ නැත. 


අනේ කාලේ වනේ වාසේ කියන්නේ මෙවැනි අබුද්දස්ස කාලවලදී වන්නට ඇත. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-21

සුදු කොඩි නඩුව පාලකයන්ට ම සුදු කොඩියක් වේවි ද?

(2011 අප්‍රේල් 21, W3Lanka) එක්සත් ජාතීන්ගේ මහ ලේකම්වරයාට ලංකාව සම්බන්ධයෙන් ,උපදෙස් දීම පිණිස පත් කරන ලද විද්වත් කමිටුව ලංකාවේ රජය විසින් මුල සිට ම ප්‍රතික්ෂේප කරන ලද එකකි. 


එහෙත් රජය මෙම කමිටුව පිළිබඳ අනුගමනය කළේ දෙබිඩි පිළිවෙතකි. එළිපිට ප්‍රතික්ෂේප කළ කමිටුව හොර රහසේ හමු වීමට රජය විදේශ ඇමති ජී.එල්. පීරිස් යැවුවේ ය. 


කමිටු වාර්තාව නිකුත් වූ පසු නැවතත් ආණ්ඩුවට කමිටුව එපා වී ඇත. 


ආණ්ඩුවේ ප්‍රතිපත්ති බොහොමයක් මෙවැනි ය. නිශ්චිත එක් ජාතික ස්ථාවරයක ඉඳිමින් කටයුතු කරනවා වෙනුවට රට කරවන පුද්ගලයන්ගේ අවශ්‍යතාවන් මත රජයේ ප්‍රතිපත්ති පමණත් නො ව රටේ නීතිය හා ආණ්ඩු ක්‍රම ව්‍යවස්ථාව පවා වෙනස් කරන ආකාරය නිතර දක්නට ලැබේ. 


ආණ්ඩුවට සහාය දක්වන දේශපාලකයන් වන චන්දන කත්‍රිආරච්චිට එරෙහිව දස වසක් තිස්සේ විභාග වෙමින් තිබුණ නඩුවක මිනීමැරුම් චෝදනා නීතිපතිවරයා හිටි හැටියේ ඉවත් කර ගත්තේ ය. මන්ත්‍රී ආර්. දුමින්ද සිල්වාට එරෙහිව තිබූ බාල වයස්කාර දැරියක අපයෝජනය කිරීමේ චෝදනාව ද ඉල්ලා අස් කර ගත්තේ ය. මෙම තත්වය කෙතරම් නරක එකක් වී ද යත් අග්‍ර විනිශ්චයකාරතුමාට පවා නීතිපතිවරයාගේ ක්‍රියාකලාපය විවේචනය නො කර සිටිය නො හැකි වී තිබේ. 


හිටපු හමුදාපති සරත් ෆොන්සේකාට එරෙහිව පවරා ඇති සුප්‍රකට සුදු කොඩි නඩුව ද තවත් අර්බුදකාරී නඩු නිමිත්තකි. ආණ්ඩුවේ නායකයන්ගේ පටු අවශ්‍යතාව වන්නේ සරත් ෆොන්සේකා හිරේ ඇරීමයි.


ඒ සඳහා ඔහු ගෝඨාභය රාජපක්ෂගේ අනුදැනුම මත රජයේ හමුදා භාර වීමට පැමිණි කොටි නායකයන් ඝාතනය කළ බව පැවසුවේ යයි ඔප්පු කිරීමට ආණ්ඩුවට උවමනා වී තිබේ. සරත් ෆොන්සේකා එසේ පැවසූ බව ඔප්පු වුවහොත් එහි ඇති බරපතල ආදීනව කෙරෙහි ආණ්ඩුව අවධානය යොමු කර ඇති බවක් නො පෙනේ. 


ආණ්ඩුව යුද අපරාධ කළ බව හිටපු හමුදාපතිවරයා ප්‍රසිද්ධියේ ප්‍රකාශ කළ බව ඔප්පු කිරීම හා එම රහස හෙළි කිරීම පිළිබඳ හිටපු හමුදාපතිවරයාට එ‍රෙහිව දඬුවම් කිරීම ආණ්ඩුවට එරෙහිව එල්ල වී ඇති යුද අපරාධ චෝදනා වලට අදාළ සාක්කියක් සංයුක්ත කර ගැනීමකි. 


එවැනි ප්‍රකාශයක් කළ හිටපු හමුදාපතිවරයා ආණ්ඩුවට එරෙහි යුද අපරාධ පිළිබඳ ජාත්‍යන්තර පරීක්ෂණයකදී සාක්කි දීමට ඉදිරිපත් කරන්නට පවා ආණ්ඩුවට සිදු වන්නට ඉඩ තිබේ.


ආණ්ඩුව ජාත්‍යන්තර වශයෙන් මෙවැනි අභාග්‍ය සම්පන්න තත්වයකට මුහුණ දී සිටින්නේ එහි අමනෝඥ ක්‍රියා කලාපය නිසා ය. නීතිය සියතට ගත් ඒකාධිපති පාලනය සඳහා ගෝලීය ධනේශ්වරයෙන් සහයෝගය දිනා ගැනීමට මහින්ද රාපක්ෂ පාලනයට නො හැකි වී තිබේ. 


ජාත්‍යන්තර සම්මුතීන්ට එරෙහිව යන ඒකාධිපතීන්ගේ පාලනයන්ගෙන් හෙම්බත් වී සිටින ලෝකය සමග පවතින්නට නම් වෙනස් විය යුතු ව ඇති බවට රාජපක්ෂ පවුල් පාලනයට ලැබෙන බලවත් සංඥාව කෙරෙහි ඔවුහු අවධානය යොමු කළ යුතුව තිබේ. 


එක්සත් ජාතීන්ට එරෙහිව තවත් වරක් අවි අමෝරා ගන්නට යාම වෙනුවට සිහි බුද්ධියෙන් යුතුව මෙම වාර්තාව කෙරෙහි අවධානය යොමු කිරීම පාලකයන්ගේ ආරක්ෂාව පිණිස හේතු වනු ඇත. 


සත්‍යයට මුහුණ දීම එය මගහැර යාමට උත්සාහ කිරීමට වඩා නිවැරදි උපායකි. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-20

ආශ්චර්යවත් ශ්‍රී ලංකාවේ මහජන සම්බන්ධතා යනු මොනවාද?

(2011 අප්‍රේල් 20 W3Lanka) ග්‍රෑන්ඩ්පාස්‌හි ව්‍යාපාරිකයකුගෙන් රුපියල් ලක්‍ෂ 5 ක මුදලක්‌ කප්පම් ලෙස ලබාගැනීමට තැත් කිරීම සම්බන්ධයෙන් අත්අඩංගුවට ගෙන රක්‍ෂිත බන්ධනාගාර ගත කර ඇති මහජන සම්බන්ධතා ඇමැති ආචාර්ය මර්වින් සිල්වා මහතාගේ සම්බන්ධීකරණ ලේකම්වරයා ව්‍යාජ ලේඛන ඉදිරිපත් කර රුපියල් ලක්‍ෂ 98 කට අධික මුදලක්‌ වංචා කිරීමේ සිද්ධියකට අවශ්‍ය සැකකරුවෙක්‌ බව අපරාධ පරීක්‍ෂණ දෙපාර්තමේන්තුව කොළඹ ප්‍රධාන මහෙස්‌ත්‍රාත් අධිකරණය වෙත දැනුම් දුන්නේය. (අද දිවයින)


කියවන්න: මහජන අනන්‍යතාවෙන් ඉල්ලා අස් වීමේ ප්‍රකාශය


මේ වාර්තාව එන්නේ පෑලියගොඩ දී රඟ දැක්වුණු මාළු කඩේ නාඩගමෙන් පසු ය. එහිදී කප්පම් ගැනීම සම්බන්ධයෙන් චෝදනා එල්ල වූ ඇමති මර්වින්ගේ ගෝලයන් රැසක් තවමත් රිමාන්ඩ් භාරයේ ය.


ධීවර ඇමති රාජිත සේනාරත්න කප්පම් ගැනීම සම්බන්ධයෙන් ඇමති මර්වින් සිල්වාට ඍජුව ම චෝදනා කළේ ය. ආරක්ෂක ලේකම් ගෝඨාභය රාජපක්ෂ කප්පම් කල්ලි අත්අඩංගුවට ගැනීමට දැඩිව ක්‍රියා කළේ ය. නඩුත් හාමුදුරුවන්ගේ බඩුත් හාමුදුරුවන්ගේ නිසා ඇමති මර්වින් සිල්වාට එරෙහිව ක්‍රියාමාර්ග නැත.


රාජිත සේනාරත්න යනු තවත් ආශ්චර්යයකි. ඔහු කප්පම් ගන්නේ නැත.


ඔහු වැඩ කරන්නේ මෙසේ ය: (උපුටා ගැනීම ලංකා ගාඩියන් වෙබ් අඩවියෙනි.)


කොළඹ සාන්ත ජෝන් මාළු වෙළඳ සලේ වෙළෙඳාම් කළ වෙළෙඳුන් 52 කට නව පෑලියගොඩ මාළු වෙළෙඳ සංකීර්ණයේ කඩ ලැබී නැතැයි එම වෙළෙන්දෝ පවසති. තම දුක්ගැනවිල්ල පැවසීමට ධීවර ඇමැති රාජිත සේනාරත්න හමුවීමට ගිය මෙම ව්‍යාපාරිකයන්ව ඇමැතිවරයා පන්නා ගත් බව ඔව්හු ‘ලංකා ඊ නිව්ස්’ වෙත පැවසූහ.


සැබෑ මාළු වෙළෙඳුන්ට කඩ නොලැබුනද නව සංකීර්ණයේ වෙළඳ සල් මාළු ව්‍යාපාරයට කිසිදු සම්බන්ධයක් නැති අතරමැදියන් විසින් ලබාගෙන ඇති අතර ඔවුන් දැන් එම වෙළෙඳ සල් අධික මිල ගණන් වලට කුලියට දෙමින් සිටිති.


මෙසේ වෙළෙඳ සලක් ලබා ඇති එක් පුද්ගලයෙකු නම් සිනමා නළු වින්සන්ට් කරු ය. තවත් අය අමැතිලාගේ ඩ‍්‍රයිවර්ලා ය, වරායේ ශ‍්‍රීලනිප යූනියන් නායකයන් ය. තවත් අය ඇමැති රාජිතගේ ඡන්ද ව්‍යාපාරයට මුදල් වියදම් කළ අය වෙති. රාජිත ඇමැතිවරයාගේ ගෝලයන් වන ටී.එම්. නිහාල් සහ ජයන්ත කුරේ නම් දෙදෙනාටද කඩ තිබේ.


නව මාළු වෙළඳ සංකීර්ණයේ එක් කඩයක කුලිය මසකට රුපියල් 40,000 ක් වැනි ඉහල ගණනක් වන අතර මාළු වෙළෙඳාමට සම්බන්ධයක් නැති ඉහත කී අතරමැදියන් තම වෙළෙඳ සල් දැන් අතුරු බදු දෙන්නේ මසකට රුපියල් 90,000 කුලියකට බවත් වෙළෙඳ සල් අහිමි වූ සැබෑ මාළු වෙළෙන්දෝ කියති.


මෙම වෙළඳ සල් දීම ඇමැති රාජිතගේ සොහොයුරෙකු වන ධීවර සංස්ථාවේ සභාපති මහිල් සේනාරත්න මහතා මැදිහත්ව සිදු කර ඇති අතර ඔහුගේ කඩ දීම ඉතා දුෂිත වූවක් බව කඩ නොලැබුණු ව්‍යාපාරිකයෝ චෝදනා කරති.


ධීවර සංස්ථාවට ලබා ගන්නා මාළු වලින් කොමිස් මුදලක් බලවත් කොමිස්රත්න කෙනෙක් විසින් ලබාගන්නා බවද පැවසේ. දිනකට ධීවර සංස්ථාව විසින් මාළු කිලෝ 2000 - 3000 ත් අතර ප‍්‍රමාණයක් මිලදී ගන්නා අතර එක් මාළු කිලෝ එකකින් කොමිස් ලෙස රුපියල් 50 ක් ලබා ගන්නා බවට වෙළෙන්දෝ චෝදනා කරති. එ් අනුව දිනකට ලැබෙන කොමිස් මුදල අවම වශයෙන් ලක්‍ෂ 2 කි. මේ කටයුත්තට බලවතා විසින් මංජුල එදිරිමාන්න නම් පුද්ගලයෙකු යොදවා තිබෙන බවද වෙළෙන්දෝ පවසති.


මාළු කිලෝ එකක් රුපියල් 50 කින් ගණන් වැඩිවීම මේ කොමිස්රත්න නිසා සිදුවන බව පවසන මාළු ව්‍යාපාරිකයෝ ‘සාන්ත ජෝන් වෙළඳ සලේ අවුරුදු 20 ක් වෙළෙඳාම් කළ අපි පනස් දෙදෙනාට දැන් වෙළෙඳාම් කරන්න තැනක් නෑ. ජීවත්වෙන්න විදිහක් නෑ. නව මාළු සංකීර්ණය අපිට හෙණයක් වුනා මහත්තයෝ’ යැයි ලංකා ඊ නිව්ස්’ වෙත පැවසූහ


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-19

මහින්දගේ පසුපස එක්සත් ජාතීන්ගේ දඩ බල්ලන් හඹා ඒමට හේතු

(2011 අප්‍රේල් 19, W3Lanka) ලංකාව පිළිබඳ එක්සත් ජාතීන්ගේ මහ ලේකම්ට උපදෙස් දීම පිණිස පත් කර ඇති විද්වත් කමිටුවේ වාර්තාවෙන් ලංකාවේ පසුගිය යුද සමයේ සිදු වූ මානව හිමිකම් උල්ලංඝනය කිරීම් හා යුද අපරාධ පිළිබද බරපතල කරුණු මතු කර තිබේ.


මෙම චෝදනා එල්ල කර තිබෙන්නේ රජයට පමණක් නො වේ. කොටි සංවිධානයට ද චෝදනා එල්ල වී ඇත. කොටි සංවිධානයට එල්ල වන චෝදනා සම්බන්ධයෙන් වග කියන්නට ඉතිරි වී සිටින ප්‍රබල ම පුද්ගලයා වන කුමරන් පත්මනාදන් හෙවත් කේ.පී. ද දැන් ඉන්නේ ආණ්ඩුවේ ය. ඒ නිසා දැන් යුද අපරාධ චෝදනාවලින් කොටි සංවිධානය බේරා ගන්නත් ආණ්ඩුවට සිදු වී ඇති බව පෙනේ.


අනෙක් පැත්තෙන්, ආණ්ඩුව මෙම වාර්තාවට ප්‍රතිචාර දක්වන ආකාරයෙන් පෙනෙන්නේ ඔවුන් මෙවැනි තත්වයක් බලාපොරොත්තු වී නැති බවයි.


ඇත්තෙන් ම, ආණ්ඩුව පසුගිය කාලයේ ගෝලීය ධනවාදය සමග පැමිණි සම්මුතියේ ස්වභාවය අනුව, තමන්ට කිසියම් සමාවක් ලැබේ යයි බලාපොරොත්තු වීම සාධාරණ ය. ආණ්ඩුව දැන් ජාත්‍යන්තර මුල්‍ය අරමුදල හා ලෝක බැංකුව සමග එක්ව පසුගිය සමයේ එක්සත් ජාතික පක්ෂ ආණ්ඩුව විසින් යෝජනා කරන ලද 'යළි පුබුදමු ශ්‍රී ලංකා' නම් නව ලිබරල් වැඩසටහන අපූරුවට ක්‍රියාත්මක කරමින් සිටියි. 


පෞද්ගලික අංශයේ සේවකයන් ජීවිත කාලයක් වැඩ කර උපයා ගන්නා විශ්‍රාම පාරිතෝෂිකය මංකොල්ල කා හිඟන විශ්‍රාම වැටුපක් ගෙවන ඊනියා විශ්‍රාම වැටුප් පනත් ලබන සතියේ පාර්ලිමේන්තුවට ගෙන එන්නට සැලසුම් කර තිබෙන්නේ ද ජාත්‍යන්තර මුල්‍ය අරමුදලේ උවමනාව පිට බව වෘත්තීය සමිති චෝදනා කරයි.


ශ්‍රී ලංකාවට ලබාදෙන අරමුදල් ප්‍රමාණය ලබන වසරේ සිට ක්‍රියාත්මක වන පරිදි දෙගුණයක් කිරීමට ලෝක බැංකුව පියවර ගෙන ඇති බව අද දිනමිණ වාර්තා කරයි. මේ වනාහි රට ම වෙළඳපොළකරණය කිරීම වෙනුවෙන් ලැබෙන තෑගි ය.


එසේ නම් බටහිර ධනේශ්වර අධිපතීන්ගේ උවමනාව පිට එක්සත් ජාතීන් තවමත් මහින්ද රාජපක්ෂ ආණ්ඩුව පසුපස පන්නන්නේ ඇයි?


මෙතැන ඇත්තේ ඉතා පැහැදිලි පංති ප්‍රශ්නයකි.


ලංකාවේ ක්‍රියාත්මක වන ධනවාදය වනාහි නව ලිබරල් ධනවාදයේ මෙන් ධනපති පංතිය වර්ධනයේ එන්ජිම බවට පත් කළ එකක් නො වේ. ලංකාවේ ධනවාදය එක්තරා අන්දමකින් ධනපති පංතියට එරෙහි එකකි. පාලන බලය අත්පත් කරගෙන සිටින පිරිස වනාහි අප මීට කලින් ලිපිවල ද සඳහන් කළ අන්දමින් රාජ්‍ය ව්‍යවසායයන්ගෙන් වැටුප්, දීමනා, කොන්ත්‍රාත්, නියෝජිතායතන ආදිය හරහා ලාභ ලබන නිලධාරි හා ව්‍යපාර ස්ථරයකි.


මෙම ඉහළ සුළු ධනේශ්වර ස්ථරය සිය කොල්ලකාරී අරමුණු අතික් ජාතිකවාදී නිෂ්පාදක ධනේශ්වර පංති‍යට වඩා 1977න් පසු බිහි වූ බල්ලො මරා හෝ සල්ලි හෙවීමට කැමති බටහිර ගැති 'බයිං ඇන්ඩ් සෙලිං' නියෝජිතායතන ධනපති ‍ස්ථරයට සමීප ය. එහෙත්, මේ පංතිය නැගී ආවේ පසුගිය සමයේ ලංකාවේ බලගතු ම පංතිය වූ 'බයිං ඇන්ඩ් සෙලිං' ධනපති ස්ථරය ද පසුබස්වමිනි.


පාලන බලය හිමි මෙම නව සුළු ධනේශ්වර ස්ථරයට රජය යනු තමන්ගේ පෞද්ගලික සමාගමයි. මහජන මුදල් හා පරම්පරා ගණනක් උගස් කර ගත් ණය ප්‍රාග්ධනය කර ගන්නා රජය නම් සමාගම සැමදා පාඩු ලබන මුත්, මෙම පංතියේ ලාභ දිනෙන් දින ඉහළ යයි. රජයේ පාඩු මහජනතාව පිට ය.


මෙම පාලක පංතිය ලංතාවේ ශක්තිමත් රාජ්‍ය අංශයක් හෙවත් රජය නමින් හැදින්වෙන ඔවුන්ගේ සමාගමක් ගොඩනඟමින් සිටියි. මෙම කතිපයාධිකාරී (Oligarchic) රාජ්‍යය ධනේශ්වර පංතියට තර්ජනයකි. මන්ද, බදු සහන ලබන, මහජනයා මත පාඩු පටවන රජය නම් කතිපයාධිකාරී සමාගම ධනපති පංතියට අවශ්‍ය ආර්ථික ප්‍රජාතන්ත්‍රවාදය හා සමානාත්මතාව නො සපයන බැවිනි. වෙනත් වචනවලින් කියනවා නම්, මහජනයා සූරා කෑම සඳහා ධනේශ්වර සමාගම්වලට ඇති නිදහස් සීමා කර, සූරා කෑමේ තනි අයිතිය ලබා ගැනීමට රජය උත්සාහ කරන බැවිනි.


මෙම තත්වය ලංකාව තුළට බටහිර ප්‍රාග්ධනය සංචලනය වීමට බාධා කරයි. එපමණක් නො ව, තරගකාරී චීන රජයේ ප්‍රාග්ධනයට දොරටු විවර කර දෙයි. 


ලංකාවේ 'ප්‍රජාතන්ත්‍රවාදය' පිළිබඳ බටහිර නව ලිබරල් ධනපති බලවේගවලට ඇති ගැටලුව එයයි. මහින්දගේ ඒකාධිපතිවාදය හා පවුල්වාදය පිළිබඳ ධනවාදයට ගැටලුවක් මතු වී ඇත්තේ ඔහුගේ රාජ්‍ය මූලික ධනවාදය නිසා ය. සංවර්ධනයේ යන්ත්‍රය ලෙස පෞද්ගලික අංශය පිළි ගන්නා රනිල් වික්‍රමසිංහ වැනි නායකයකු පත් කර ගැනීමේ දැවෙන අවශ්‍යතාවක් බටහිරට ඇත්තේ මෙම සංදර්භය තුළයි.


මහින්දගේ පසුපස එක්සත් ජාතීන්ගේ දඩ බල්ලන් හඹා ඒම පසුපස ඇති පංති දේශපාලනය මෙයයි.


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-18

අපේ 'කොල්ලෙකු' දිනවන්න - ඔබත් මනාපයක් දෙන්න

(2011 අප්‍රේල් 18, W3Lanka) ටයිම් සඟරාවට සිටින පාඨක පිරිස අතරින් වැඩි දෙනා ලාංකිකයන් බව ඔප්පු වෙමින් තිබේ. මේ පිටුව බලන්න. මෙහි ඇති කමෙන්ටු අතරින් වැඩි හරියක් ලංකාවේ ජනාධිපති ගැනයි.


'ටයිම් 100' ලෙස නම් කර ඇති මෙම තරගයේ තෝරන්නේ ලොව වඩා ම influential පුද්ගලයන් 100යි.


influential people නම් යෙදුමෙහි අරුත දිනමිණේ කියන අන්දමට නම් 'ආකර්ෂණීය පුද්ගලයා' ය. දිවයිනේ සඳහන් වන අන්දමට නම් 'බලගතුම පුද්ගලයා' ය. ඒ වදන් තෝරා ගන්නට ඇත්තේ ඒ ඒ පුවත්පතේ කර්තෘවරුන්ගේ රාජ පක්ෂපාතිත්වයට සරිලන අන්දමින් වන්නට ඇත. 


අප ශබ්ද කෝෂ පරිශීලනය කර සොයා ගත් දේ අනුව influential යනු influence එකක් ඇති කිරීමේ හැකියාව තිබෙන යන අරුත දෙයි. 


ඒ අනුව, influential යන වදන ලේඛකයාට පරිවර්තනය කළ හැකි හොඳ ම ආකාරය වන්නේ 'බලපෑමක් ඇති කළ හැකි' යනුවෙනි.


මේ වන විට ජනාධිපති මහින්ද රාජපක්ෂ ලොව වැඩි ම බලපෑමක් ඇති කළ හැකි පුද්ගලයන් අතරින් පාඨක ඡන්දයෙන් සිව්වන ස්ථානයට තේරී පත් වී තිබේ. ඔහුට පළමු ස්ථානයට පත් වන්නට ඔබට ද උදව් කළ හැකි ය. ඔබේ මනාපය හෝ මනාප ලබා දීමට මෙතැනින් පුළුවන. 


බිය විය යුතු නැත. මෙහිදී Sunday Observer පුවත්පතේ Most Popular Schoolboy Cricketer තරගයේදී මෙන් පුවක්පතේ පළ වන කූපනය පුරවන්නට ඕනෑ නැත. 


එසේ ම සුපර් ස්ටාර් තරගවලදී මෙන් SMS එකක් යැවීමට විසි, තිස් ගුණයක් වැඩිපුර මුදල් අය කරන අන්දමේ කට්ට සූත්තර ද මෙහි නැත. 


ලංකාවේ සිරස දන්න මාකටිං නො දන්න Time පර සුද්දාට මෙවැනි තරග පවත්වන හැටි ගැන පාඩමක් උගන්නන්නට ඔබේ මනාප ද දෙන්න. මේ වන විට දේශප්‍රේමියෝ විශාල පිරිසක් මනාප දීමෙහි යෙදී සිටිති. අපේ කොල්ලෙකු දිනවන්න - ඔබත් මනාපයක් දෙන්න. 


ලේඛකයා ද ජනාධිපති මහින්ද රාජපක්ෂට ඡන්දයක් දුන්නේ ය. මේ තරගයේ ඔහුට උඩින් සිටින්නේ එංගලන්තයේ සුපර් ස්ටාර් තරගයක පෙනී සිටි සුසාන් බොයිල් ය. ඔවුන්ට සාපේක්ෂව අපේ කොල්ලා වනාහි ඇත්තෙන් ම ලංකාවේ ඉතිහාසයටත්, ජාත්‍යන්තර දේශපාලනයටත් සෑහෙන බලපෑමක් කළ කෙනෙකි. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-17

සුනාමි අනතුරු ඇඟවීම් හා භීතිය විකුණන සරසවි මන්ත්‍රාචාර්යවරු

(2011 අප්‍රේල් 17, W3Lanka) සුනාමි පිළිබඳ කටකතා පැතිර යාම නිසා මේ දිනවල වෙරළබඩ ප්‍රදේශවල ජනයා නිතර කලබල වෙති.


සුනාමි අවදානමක් ඇතැයි පැතිරෙන කටකථා වලට නොරැවටෙන ලෙසත්, කාලගුණ විද්‍යා දෙපාර්තමේන්තුව සහ ආපදා කළමනාකරණ මධ්‍යස්ථානය ඒවා පිළිබඳ නිරන්තර අවධානයෙන් සිටින බවත්, අවදානම් කලාපවල සිටින ජනතාව දැනුවත් කිරීම සඳහා සියලු කටයුතු සිදුකරන බවත් ආපදා කළමනාකරණ මධ්‍යස්ථානය තොතරම් කීවත් මිනිස්සු කට කා අසා බිය වෙති.


විද්‍යාවට වඩා අවිද්‍යාව, මිථ්‍යාව හා අද්භූත බලවේග විශ්වාස කරන්නට ලංකාවේ මිනිස්සු කොහොමත් ප්‍රිය කරති. එවැනි විශ්වාසයන්ට රාජ්‍ය අනුග්‍රහය පවා හිමි වේ. ජාතීන් අතර ගැටුමේදී සිංහල පාර්ශ්වයේ ශක්තිය වැඩි කර ගැනීම පිණිස ජාතිවාදී බලවේග විසින් ප්‍රවර්ධනය කරන ලද ස්වෝත්තමවාදී ආකල්ප මෙම මිථ්‍යාවන්ට සරු පසක් විය.


අද වන විට, ලංකාවේ පඳුරක්, පඳුරක් ගානේ විශ්ව ශක්තියෙන් හා වෙනත් අද්භූත බලවේගවලින් වැඩ ගන්නා වැඩකාරයෝ සිටිති. මොවුන්ගෙන් වැඩි දෙනෙක් සායනික ප්‍රතිතාර අවශ්‍ය මානසික රෝගීන් වන අතර, තවත් ඇතැමෙක් කූට ජාවාරම්කරුවෝ ය. ලංකාවේ මහජන මුදලින් ජාවාරම් කරන පාලක පැළැන්තිය මොවුන්ගේ ප්‍රධාන ගනුදෙනුකාර බලවේගය වේ. ලංකාවේ ජනයාගෙන් බහුතරය ඒ ජාවාරම් පැළැන්තිය වන්දනා කරන්නන් වන අතර ඔවුහු ද මේ පිස්සන් හා කපටින් පසුපස දුවති.


අද කාලයේ පහසුවෙන් ජනප්‍රිය වීමේ හා ධනවත් වීමේ මාර්ගය වැටී ඇත්තේ මෙවැනි අද්භූත බල හරහා ය. ශාස්ත්‍ර ගවේශනය පිණිස මහජන මුදලින් වැටුප් ලබන සරසවි ඇදුරන්ට පවා දැන් මහන්සි වී විද්‍යාත්මක පර්යේෂණ කරනවාට වඩා අද්භූත බලවේග පසුපස යාමේ පහසුව වැටහී තිබේ. නලින් ද සිල්වාගේ ඊනියා ජාතික චින්තනය මේ සියලු සොරුන්ට මුවා වීමට ආවරණයකි. විද්‍යාවේ පරාසයට එපිටින් ඇති කලාප අත පත ගෑමට ලංකාවේ සරසවි මන්ත්‍රාචාර්යවරු සුරුවෝ වෙති.


ජපානයට බල පෑ සුනාමියෙන් පසු නැවතත් සුනාමි අනතුරු ඇඟවීම්වලට ජනමාධ්‍යවල වෙළඳපොළක් නිර්මානය වී තිබේ. ඒකත් හරියට පිටසක්වල ජීවීන් ගැන ටෙලි නාට්‍යයක් ජනප්‍රිය වූ විට රට පුරා තැන් තැන්වලට පිටසක්වල ජීවීන් පැමිණි බවට වාර්තා පුවත්පත්වල පළ වීම වැනි ය. මේ වෙළඳපොළට බඩු සප්ලයි කරන සරසවි මන්ත්‍රාචාර්යවරු පිරිසක් ද දැන් බිහි වී සිටිති. ගැඹුරු ශාස්ත්‍රීය පර්යේෂණ වෙනුවට පුවත්පත් සඳහා සරළ විජ්ජා ඉදිරිපත් කරන මොවුහු සමාජය බිය වද්දා සිය ඡායාරූප පුවත්පත්වල පළ කරවා ගෙන තුටු වෙති. එයින් සිදු වන සමාජ ව්‍යසනය අති මහත් ය. 


මෙහි ප්‍රතිඵලයක් ලෙස ජනතාව නිරතුරු බිය පත් වෙති. පහත උපුටා ගැනීම අප මීට කලකට පෙර මෙම බ්ලොගයේ තැබූ සටහනකින් උපුටා ගත් කොටසකි.


"භීතියෙන් පෙළෙන මිනිසාට තාර්කික මිනිසා කරන අයුරින් මැදහත් සිතකින් යුතුව, තමන්ට ලබාගත හැකි සියළුම තොරතුරු භාවිතා කර හොඳ නරක මැනවින් කිරා බලා නිගමන වලට එලඹීමට නොහැකිය. මිනිසා තාර්කික ලෙස හැසිරෙන්නේය යන පදනමින් අර්ථ ශාස්ත්‍රඥයින් ගොඩනැඟූ න්‍යායන් සියල්ලේම පදනම බියෙන් පෙළෙන අතාර්කික මිනිසා ඉදිරියේ බිඳ වැටිණි. හැසිරීම පිළිබඳ අර්ථ ශාස්ත්‍රය පැන නඟින්නේ මෙකී බියෙන් පෙළෙන අතාර්කික මිනිසා තීරණ ගන්නා ආකාරය විග්‍රහ කිරීමටයි."


ඊශ්‍රායල් ජාතික මනෝ විද්‍යාඥයකු වන කැලිෆෝනියාවේ ප්‍රින්ස්ටන් විශ්වවිද්‍යාලයේ ගෞරව සහිතව විශ්‍රාම ලත් මහාචාර්ය ඩැනියල් කැහ්නමන් ඉදිරිපත් කළ 'ඉදිරි දර්ශන න්‍යාය' (prospect theory)හා 'හැසිරීම පිළිබඳ අර්ථ ශාස්ත්‍රය' පිළිබඳ අප තැබූ සටහනක් කෙරෙහි අපි ඔබේ අවධානය නැවත යොමු කරන්නෙමු.

කියවන්න: භීතිය විකුණමුද? සහෝදරත්වයට මං පෙත් සොයමුද? | Prospect theory and selling fear


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-13

අවුරුදු ආසිරි

සු ලුත් වුරුද්ක් වේවා!


අප්‍රේල් 17 සිට නැවත දිනපතා අලුත් වෙමු.

2011-04-12

ඉන්දියාවේ බලයට එරෙහිව මොළය පාවිච්චි කිරීම හා ජවිපෙ

(2011 අප්‍රේල් 12, W3Lanka) "ශ්‍රී ලංකාවේ දෙමළ ජනතාවට සමාන අයිතීන් හා සමාන තත්ත්වයන් සහතික කරමින්" ශ්‍රී ලංකාව සිය ආණ්‌ඩුක්‍රම ව්‍යවස්‌ථාව සංශෝධනය කළ යුතු බවට ඉන්දියාව බලකරන බව ඉන්දීය කොංග්‍රස්‌ පක්‍ෂ නායිකා සෝනියා ගාන්ධි කළ ප්‍රකාශයෙන් ලංකාවේ ඉන්දීය විරෝධය සඳහා පේටන්ට් බලපත්‍රය ඇත්තේ තමන්ට යයි සිතන ජනතා විමුක්ති පෙරමුණ උදහස් වී තිබේ.


ජවිපෙ නැවතත් කියන පරිදි "ශ්‍රී ලංකාවේ දෙමළ ජනතාව මුහුණපාන ගැටලු විසඳමින් සැබෑ ජාතික සමගිය ඇති කිරීමට වත්මන් පාලනයට හෝ වත්මන් ධනපති ක්‍රමයට නොහැකි බවත් එය සිදුකළ හැක්‌කේ වංචාකාරී ව්‍යවස්‌ථා වෙනසකින් නොව සියලු ජනතාවන්ට සම අයිතීන් හා සම අවස්‌ථා ලබාදෙන, ප්‍රජාතන්ත්‍රවාදය තහවුරු කරන, සියලු වර්ගයේ ජාතිවාදයන් හා පීඩනයන් පිටුදකින සමාජවාදී සමාජයකදී" ය. වෙනත් වචනවලින් කියන්නේ නම් ජාතීන්ගේ ප්‍රශ්නයට විසඳුම් නැත. මන්ද, ඔය කියන අන්දමේ සමාජවාදය හුදු පරමදර්ශයක් පමණක් වන බැවිනි.


'ඉන්දීය ආධිපත්‍යවාදීන්ගේ' අරමුණ හඳුනා ගන්නා ලෙස ජනතාවට අවධාරණය කරන ජවිපෙ අරමුණ හඳුනා ගැනීම ජනතාවට වැදගත් වේ යයි අපි සිතමු.


1971ට පෙර ජවිපෙ පංති පහෙන් එකක් වූයේ 'ඉන්දියානු ව්‍යාප්තවාදය'යි. ජවිපෙ එදා පීඪිත දෙමළ වතු කම්කරුවන් පවා එකී ව්‍යාප්තවාදයේ කොටස්කරුවන් ලෙස සැලකූ අතර ජවිපෙ තුළ දෙමළ විරෝධය නිදන්ගත වන්නට මේ පංතිය එක් හේතුවක් විය. 1987දී ලංකාවේ ජාතීන්ගේ ප්‍රශ්නය විසඳීමට ඉන්දියාව කළ අත පුච්චා ගත් මැදිහත්වීම හමුවේ ජවිපෙ හැසිරුණේ ද අද මේ නිවේදනයෙන් ප්‍රකාශ වන අන්දමට ම ය.


ජවිපෙ කියන ආකාරයේ 'ආධිපත්‍යවාදී' ස්වරූපයක් ඉන්දීය රජයෙහි නැතැයි අපි නො කියමු. එහෙම එකක් ඇත. බලවත් රටවල් අසල සිටින ලංකාව වැනි බනානා හෙවත් කෙහෙල්මල් රාජ්‍යවලට ජවිපෙ කියන අන්දමේ පරම ස්වෛරීත්වයක්, ස්වාධීනත්වයක් අත් පත් කර ගන්නට ප්‍රායෝගිකව නො හැකි ය.


රාජ්‍යයන් අතර තබා ජවිපෙ අභ්‍යන්තරයේවත් ඔය කියන අන්දමේ 'ස්‌වාධීනත්වය, ස්‌වෛරීභාවය' තිබේ ද? ජවිපෙ තුළ ඇති දකුණේ සංස්තෘතික ආධිපත්‍යය තුළ කොළඹ සාමාජිකයා පවා 'ඔහේ', 'හත්වලාමේ' වැනි වචන පාවිච්චි කරන්නේ ජවිපෙ තුළ ඇති රුහුණේ සංස්කෘතික ආධිපත්‍යය නිසා ය. ජවිපෙ මෙවැනි නිවේදන නිකුත් කරන්නේ එතුළ ඇති සෝමවංශ, ටිල්වින්, විමල් වීරවංශ බලවේගයේ ආධිපත්‍යය නිසා ය.


මුහුදේදී මිය ගිය ඉන්දීය ධීවරයකුගේ මරණය සම්බන්ධ කටයුතු සඳහා එම ධීවරයාගේ පවුලේ අය ඉන්දීය නාවික හමුදාව විසින් නීත්‍යානුකූල ගමන් බලපත්‍ර හා වීසා ආදියෙන් තොරව යාපනයට කැටුව ඒම පිළිබඳව ද සන්ඩේ ටයිම්ස් පුවත්පත මහත් ආන්දෝලනයක් ඇති කර තිබේ.‍


ඉන්දියාව හා ලංකාව අතර මුහුදේ මාළු ඇල්ලීම පිළිබඳ සංකීර්ණ ප්‍රශ්නයක් තිබේ. ඉන්දීය ධීවරයන් ලංකාවේ මුහුදු සීමාවට ඇතුල් වන්නා සේ ම ලංකාවේ ධීවරයෝ ද අන්දමන් දූපත් වැනි ප්‍රදේවලට පවා ගොස් මාළු අල්ලති. ඉන්දීය ධීවර ව්‍යාපාරිකයන්ගේ බෝට්ටුවල එන ඇතැම් ධීවරයන් වැටුප ලෙස ලබන්නේ බත් පත පමණි. වෙඩි කන්නේ එවැනි පිරිසක් මිස මුදලාලිලා නො වේ.


සමාජවාදීන් සිය දේශපාලන උපාය මාර්ග පදනම් කර ගත යුත්තේ ධනේශ්වර දේශ සීමා මත නො වේ ය යන්න අපේ අදහසයි. ප්‍රශ්නවලට විසඳුම් සෙවීමේදී ධනේශ්වර දේශ සීමා ධනවාදීන් විසින් ම නොතකා හරින සංදර්භයක සමාජවාදීන් ඒවා කර පින්නා ගන්නේ 'මොන හත්වලාමකට ද මහත්තයෝ?'


ඉන්දියාවත් සමග යළි ගැටුමකට යාම තරම් අමනෝඥ ක්‍රියාවක් සිංහලයන්ට තවත් කළ නො හැකි බව අපේ අදහසයි. එසේ ම, ඉන්දියාව සමග සහජීවනය බලහත්කාරී වටපිටාවකින් තොරව පවත්වා ගෙන යන්නට නම් ලංකාවට අනිවාර්යයෙන් ජාතීන්ගේ ප්‍රශ්නයට (විශේෂයෙන් ම දෙමළ ප්‍රශ්නයට) විසඳුම් ලබා දීමට සිදු වේ.


ස්වාධීනත්වය, ස්වෛරීභාවය වැනි වචන හරි මිහිරි ය. එහෙත්, එවායේ ප්‍රායෝගික, දේශපාලන තේරුම් නැත. ලෝකය එක යායකි. එහි ජාතිකවාදී දේශ සීමා බොඳ වෙමින් තිබේ. එහෙත්, ඒ වනාහි සමාජවාදී සංදර්භයක නො වේ. අප කැමති වුණත්, අකැමැති වුණත්, ධනේශ්වර බල තුලනය තුළයි. 'බලය' ස්වාධීනත්වය, ස්වෛරීභාවය වැනි සුන්දර වචනවලට වඩා අර්ථ සම්පන්න ය. එහෙයින් ඉන්දියාව බලය පාවිච්චි කර කරන දේ ලංකාව වැනි රටවල් විසින් කළ යුතුව තිබෙන්නේ මොළය පාවිච්චි කර ය.


අපේ රටේ අපේ සහෝදර ජනතාවක් වන දෙමළ ජනයා සමග සංහිඳියාව සඳහා තිරසර ක්‍රියාමාර්ග ගැනීමට කොටි සංවිධානය මර්දනය කිරීමෙන් දෙවසරකට පසු පවා ඉන්දියාව යළි බලපෑම් කරන තුරු බලා සිටීම සිංහලයන්ගේ අනුවණකමකි. "ලංකාවේ දෙමළ ජනතාවට සමාන අයිතීන් හා සමාන තත්ත්වයන් සහතික කිරීම" ජයග්‍රාහී සිංහලයන් විසින් ඇති කළ යුතු දෙයක් මිස ඉන්දියාව බලපෑම් කරන තුරු තෙපර බෑ යුතු තත්වයක් නො වේ. 


ධනවාදය සිය උපාය මාර්ග වෙනස් කර තිබේ. සිංහල සමාජවාදීහු 1971 උපාය මාර්ගයෙහි ම තවමත් එල්ලී සිටිති. මෙයින් රටට, ජනතාවට හා විශේෂයෙන් ම පීඩිතයන්ට සිදු වන කිසිදු යහපතක් නැත.


"ගාන්ධි මහත්මිය හා තවත් ඉන්දීය නායකයන් ශ්‍රී ලංකාවේ ස්‌වාධීනත්වය, ස්‌වෛරීභාවය හෑල්ලුවට ලක්‌ කරමින් ආධිපත්‍යවාදී සාහසික ප්‍රකාශ කරද්දී ශ්‍රී ලංකාවේ බලධාරීන් එම ප්‍රකාශ දැඩි ලෙස හෙළා දැකිය යුතු වුවත් මෙතෙක්‌ එසේ සිදුවී නොමැත. ජනතා විමුක්‌ති පෙරමුණ හැර ශ්‍රී ලංකාවේ සෙසු දේශපාලන පක්‍ෂ සියල්ලම මේ පිළිබඳ මුනිවත රකිමින් ඉන්දීය ආධිපත්‍යවාදයට යටවී සිටිනු පෙනේ."


හෙළ උරුමය ද වැඩේ අතහැර ඇති සංදර්භයක ජවිපෙ මේ ගූ හැලියට තනිව කර ගැසීමට සුදානමින් සිටින බව පෙනේ. ලංකාවේ ජනතාව වෙනුවන් කතා කරමින් අපට නම් කියන්නට ඇත්තේ 'අපි නම් ඕවාට නැතිය කියා ය.'

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-11

පෑලියගොඩ මාළු, ෆෙඩරල් මර්වින් හා අලකේශ්වර

(2011 අප්‍රේල් 11, W3Lanka) පෑලියගොඩ මාළු වෙළඳපොළේ ජංජාලය වැදගත් දේශපාලන සිද්ධියකි. මන්ද, එය හුදු මර්වින් සිල්වා හා රාජිත සේනාරත්න යන ඇමතිවරුන් දෙපළ අතර ගැටුමක් නො ව, ධනවාදය හා පසුගාමිත්වය අතර ගැටුමක් වන බැවිනි.


ධීවර ඇමති රාජිත සේනාරත්න ම පවසන පරිදි පෑලිගොඩ කප්පම් කල්ලි පිටුපස ඇමති මර්වින් සිල්වා සිටියි. පෑලිගොඩ නගර සභාවේ උප නගරාධිපතිවරයා ඇතුළු මර්වින් සිල්වාගේ මැරයන් බව කියන පුද්ගලයන් 14ක් මේ වන විට කප්පම් ගැනීම සම්බන්ධයෙන් අත්අඩංගුවට ගෙන රිමාන්ඩ් බන්ධනාගාර ගත කර තිබේ. පෑලියගොඩ නාගරික මන්ත්‍රීවරයකු ඇතුළු තවත් හයදෙනෙක් නීතියෙන් බේරීමට සැඏවී සිටිති. මර්වින් සිල්වා ද මරු විකාරෙන් මෙන් ඩී.ඒ. රාජපක්ෂ මහින්ද පියාණන් ගැන නන් දොඩවමින් සිටියි. ඔහුට අන්තිම ගැලවිල්ල ඇත්තේ ඒ සම්බන්ධයෙහි ය.


පෑලියගොඩ මාළු වෙළඳ සංකීර්ණය මේ වන විට ප්‍රදේශයේ පොලිසියේ ආරක්ෂාවෙන් ඉවත් කර ජ්‍යේෂ්ඨ පොලිස් අධිකාරි අනුර සේනානයත යටතට පත් කර තිබේ.


මර්වින් සිල්වාගේ තර්කය වන්නේ පෑලියගොඩ මාළු වෙළඳ සංකීර්ණයේ පාලනය පෑලියගොඩ නගර සභාවට හිමි විය යුතු බවයි. මෙය ෆෙඩර්ල්වාදී තර්කනයකි. ගමේ දේ පාලනය කිරීමේ බලය ගමට හිමි විය යුතු බව අපි හැමදාමත් කියන්නෙමු. උතුරු-නැගෙනහිර දෙමළ ජනයාගේ ස්වයං නිර්ණ හිමිකමට අප ගරු කරන්නේ ද මේ පදනමිනි. තමන් පාරම්පරිකව ජීවත් වන භූමියේ කටයුතු පාලනය කිරීමේ හිමිකම ඔවුන්ට ලැබිය යුතු ය.


අප පාලනය යන්නෙන් අදහස් කරන්නේ බදු හෝ කප්පම් හෝ ලබා ගැනීම නො වේ. මේ දෙ‍ක අතර වෙනස වන්නේ බදු නීතිගත වීම හා කප්පම් නීති විරෝධී වීම පමණි. දෙකෙන් ම කරන්නේ බිය වද්දා මුදල් ගරා ගැනීමයි. මර්වින් සිල්වා ගන්නා කප්පම් මෙන් ම රජය ගන්නා බදු ද මහජනතාවගේ දේපල නො වේ. 


මර්වින් සිල්වා දන්නා පාලනය කිරීම පිණිස ඔහු මාළු වෙළඳ සංකීර්ණය පෑලියගොඩ නගර සභාවට ඉල්ලයි. මෙය දෙනවා නම් හොඳ බව අපේ අදහසයි. මන්ද, අද නගර සභාවල ඉන්න කුණු කාණුවක් සුද්ද කිරීම වැනි දෙයකට වැඩි දේකට අයෝග්‍ය මැරවරයන් වෙනුවට දේශපාලනඥයන් සභාවට තෝරා පත් කර එවන්නට අවසානයේදී පෑලියගොඩ 'බුද්ධිමත්' ජනතාවට සිදු වන බැවිනි.


මර්වින් සිල්වා අයත් වන්නේ වීර අලකේශ්වර වැනි රජුන් නො වූ ප්‍රාදේශීය බලවතුන් විසූ සිංහල උරුමයේ විකෘතියකටයි. වීර අලකේශ්වර හා මර්වින් සිල්වා අතර ඇති ප්‍රධාන වෙනස මර්වින් සිල්වා කිසිදු වීරත්වයක් නැති හුදු මැරමරයකු පමණක් වීමයි.


අලකේශ්වර පන්නයේ තවත් නායකයකු වූ ප්‍රභාකරන් පරාජය කර දැමීමෙන් පසු වේගයෙන් ඉදිරියට යමින් තිබෙන ලංකාවේ රාජ්‍ය කේන්ද්‍රීය ධනවාදයට තව දුරටත් මර්වින් සිල්වා පන්නයේ පසුගාමී ප්‍රාදේශීය බලවතුන් දරා ගත නො හැකි ය.


ඒ වෙනුවට මධ්‍යම රාජ්‍යයේ බලය දුර්වල නො වන විධිමත් බලය බෙදා ගැනීමේ රාමු වෙත නම් ආණ්ඩුව තල්ලු වීමට ඉඩ ඇකි බව මේ වන විට දෙමළ ජාතික සන්ධානය සමග කෙරෙමින් ඇති සාකච්ඡාවලින් පෙනේ.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-04-10

අවුරුද්දට තෑග්ගට පොතක්! සයිබර් අවකාශයෙන් බැහැර මහ පොළවේ අත්දැකීමක්

(2011 අප්‍රේල් 10, W3Lanka) සයිබර් අවකාශයෙන් මහ පොළවට එන්නැයි ඇතැම් පණ්ඩිතයෝ අපට උපදෙස් දුන් හ. තවත් සමහරු අපට අභියෝග කළේ කොළඹින් ගමට එන්නැයි කියා ය.


ඒත්, අපි හැමදාමත් ජීවත් වුණේ ගමේ ය. සයිබර් අවකායට පිවිසුණේ ද ගමෙන් ම ය. සයිබර් අවකාශයට වඩා වැඩි කාලයක් අපි මහ පොළවේ කරක් ගැසුවෙමු.


මහ පොළව කටුක වුණත්, ෆේස්බුක්, ට්විටර්, බ්ලොගර් හා ජීමේල්වලට වඩා සජීවී ය. ඒ නිසා අපි මහ පොළවට ආදරය කරමු.


අපි අලුතෙන් වැඩකට අත ගැසුවෙමු. මහ ලොකු දෙයක් නො ව සංස්කෘතික කේන්ද්‍රයක් ඇරඹීමේ උත්සාහයකි. මතුගම, අගලවත්ත පාරේ, අංක 220 යන ස්ථානයේ අපි සංස්කෘති නමින් මධ්‍යස්ථානයක්, ආයතනයක් වැනි දෙයකට මුල පිරුවෙමු.


අලුත් අවුරුද්දට පොතක් තෑගි දෙන්න යන තේමාවෙන් අපි පොත් ප්‍රදර්ශනයක් පවත්වන්නෙමු. ‍අගහස් ප්‍රකාශන ආයතනයේ රංජිත් දිසානායක සහෝදරයා අපට ‍පොත් රැසක් ණයට දුන්නේ ය.


අප මුහුණ දුන් ප්‍රධාන අභියෝගය ප්‍රචාරයයි. මේ පිළිබඳවා පාසල් සිසුන් හා ‍ජනතාව දැනුවත් කරන ලෙස අප ප්‍රදේශයේ විදුහල්පතිවරුන්ගෙන් හා සෙසු ආයතන ප්‍රධානීන්ගෙන් කළ ඉල්ලීමට ප්‍රතිචාර දැක්වූයේ සුළු පිරිසකි. කොළඹ පත්තරවලින් ද ඒ පිළිබඳ ප්‍රචාරයක් ලබා ගැනීමට බැරි විය.


අමිල ජයරත්න නම් අප නො දන්නා ටියුෂන් ගුරුවරයෙක් අප මේ පිළිබඳව ප්‍රචාරය කිරීම පිණිස රාත්‍රියේ ඇලවූ පෝස්ටර් උදේ වන විට වසා දමා තිබිණි. පාප්ප වේලී හෝ නො තිබුණු අපගේ පෝස්ටර් මත ඔහු පෝස්ටර් අලවන්නට ඇත්තේ ඇලවීමේ පහසුව පිණිස වන්නට ඇත. ඕවා ඉතින් එහෙම තමා ය.


පත්තර ඇතුළට පත්‍රිකාවක් දැමීමට පුවත්පත් ඒජන්සිකරුවන් හමු වීමට ගිය ද එය සමාගම් විසින් තහනම් කර ඇති බව කියා ඔවුහු මුලදී එය ප්‍රතික්ෂේප කළ හ.පසුව පුවත්පත් මිළ දී ගැනීමට එන අයට පත්‍රිකාව බැගින් බෙදා දීමෙන් අනුග්‍රහ දැක්වීමට ඔවුහු එකඟ වූ හ.


පසුගිය කාලයේ මැතිවරණ අපේක්ෂකයන්ට බල නො පැවැත්වුණු නීතියක් මත මේ පිළිබඳ ශබ්ද විකාශන මගින් නිවේදනය කරන්නට ත්‍රිරෝද රියකින් යමින් සිටියදී පොලිසිය අපට බාධා කළේ ය. එහෙත්, නීතිඥ ගාමිනී නල්ලපෙරුම මහතාගේ මැදිහත් වීම හා මතුගම සහකාර පොලිස් අධිකාරිවරයාගේ කාරුණිකත්වය නිසා පොලිස් කූඩුවේ නො නැඟ එම කාර්යය කරගෙන යාමට අපට අවස්ථාව ලැබිණි.


අවුරුද්දට පොතක් තෑගි දීම පිණිස පොත් මිළ දී ගන්නට මහ විශාල පිරිසක් ආවේ නැත. පොත්වලට 40%ක් දක්වා වට්ටම් දුන්නත් ගම්වල මිනිස්සුන්ට රෙදි මෙන් නො ව පොත් මිළ වැඩි ය. එහෙත්, අපි සතුටු වෙමු. අප මුහුණ දෙන සංස්කෘතික අභියෝගය එයයි.


මේ වනාහි කොළඹ සංස්කෘතික ක්‍රියාකාරකම් ගමට ගෙන යාමක් නො වේ. තමන්ගේ සාක්කුවේ සිටින හා තමන්ට පගා දෙන පුද්ගලයන්ගේ සංස්කෘතික ක්‍රියාකාරකම් පමණක් අගයමින් සෙස්ස ඝාතනය කරන්නට වැර දරන, කොළම ඊනියා සංස්කෘතික ප්‍රභූන්ගේ ආධිපත්‍යය බිඳ දමන්නට නම් විකල්ප සංස්කෘතික කේන්ද්‍රස්ථාන ප්‍රාදේශීයව ගොඩනැඟිය යුතු යයි අපි සිතමු.


අපට ඇති අභියෝගය එවැනි ආයතන පවත්වා ගන්නේ කෙසේ ද යන්නයි. මූලිකව ම රාජ්‍ය නො වන සංවිධාන ව්‍යාපෘති මත රඳා නො පවතින්නට අපි අදහස් කරන්නෙමු. එහෙත්, අප රාජ්‍ය නො වන සංවිධානවලට විරුද්ධ බවක් ඉන් අදහස් වන්නේ නැත. දැනටත් අපට උදව් කරන්නට කැමති වූ රාජ්‍ය නො වන සංවිධාන ඇත.


අප රඳා පවතින්නේ වෙළඳපොල මත ය. මෙහෙම කීවාම ධනවාදයට විරුද්ධව අප ලියූ දේවලින් උදහස් වී සිටින අය අපට හූ කියන්නට උත්සාහ කිරීම තේරුමක් නැත. වෙළඳපොල බිහි වුණේ ධනවාදයට බොහෝ කලකට පෙර අතිර්ක්තයක් නිෂ්පාදනය කරන්නට හැකි මට්ටමට මිනිසා නිෂ්පාදන බලවේග දියුණු කර ගත් දා සිටයි. ධනවාදයේ ගැටලුව සියල්ල ලාභයට ඌනනය කිරීම මිස වෙළඳපොළ නො වේ.


අඳුරට සාප නො කරමින් සිට එක පහනක් හෝ දල්වන්නට උත්සාහ කරන්නැයි කී මාටින් ලූතර් කිංට තුති.


කමක් නැහැ. අපි උත්සාහ කරමු.

මේ ලිපියට ඔබ කැමති නම් වෙන අයත් එක්කත් බෙදා ගන්න