2011-05-31

ජයග්‍රාහී විශ්‍රාම වැටුප් සටන ප්‍රජාතන්ත්‍රවාදය සඳහා හා මානව හිමිකම් සඳහා අරගලයේ පූර්වාදර්ශයකි

(2011 මැයි 31, W3Lankaආණ්ඩුවට යෝජිත පෞද්ගලික අංශයේ සේවක විශ්‍රාම වැටුප් අරමුදල හකුලා ගැනීමට සිදු විය. එය ආණ්ඩුවට අන්ත පරාජයකි. කම්කරු පංතියට විශිෂ්ට ජයකි.


විශේෂයෙන් ම නිදහස් වෙළඳ කලාපයේ කම්කරු කාන්තාවන්ගේ නායකත්වයෙන් දියත් කරන ලද අරගලයට මුහුණ දෙන්නට රජයට බැරි විය. කර්මාන්ත සාමය හෙවත් ආයෝජකයන්ට නිදහසේ සිය සූරා කෑමේ ක්‍රියාවලිය කරගෙන යන්නට අවශ්‍ය සාමය තහවුරු කර දීම සඳහා ආණ්ඩුව අද දිනයේ කටුනායක නිදහස් වෙළඳ කලාපය වසා දමා ඇත.


නිදහස් වෙළඳ කලාප කම්කරුවන්ගේ පහර දීම්වලින් නියෝජ්‍ය පොලිස්පතිවරයකු ඇතුළු පොලිසියේ 15ක් තුවාල ලද බව බොහෝ ප්‍රධාන ධාරාවේ මාධ්‍ය වාර්තා කළ මුත් කම්කරුවන් 200කට වඩා තුවාල ලැබ රෝහල් ගත කළ බව එම මාධ්‍යවලට නො පෙනිණි.


නිදහස් වෙළඳ කලාප සේවකයන් යෝජිත විශ්‍රාම වැටුප් ක්‍රමයෙන් නිදහස් කිරීමට රජය ඊයේ උදේ ම තීරණය කළේ ය. රජයේ තවත් නිවේදනයක කියැවුණේ විශ්‍රාම වැටුප් ලැබීම සඳහා සුදුසුකම් ලැබීමට අවශ්‍ය මාස 120 සේවය සම්පූර්ණ කර නැති අයට සිය ඉතිරි කිරීම් පොලියත් සමග ආපසු ලබා ගත හැකි බවයි. එහෙත්, මුල් පන‍තේ තිබුණේ එවැනි අය මෙම විශ්‍රාම වැටුප් අරමුදලට ගෙවන මුදලින් 60%ක් පමණක් ආපසු ගෙවන බවයි. පොලියක් ගැන ද සඳහනක් තිබුණු බවක් අපි නො දනිමු. එසේ ම, ඒ ආපසු දීම සිදු වන්න නියමිත වූයේ ද සේවකයා වයස අවුරුදු 60 සම්පූර්ණ කළ පසු ය.


වෙළඳ කලාප සේවකයන් අරගලය සඳහා බලමුළුගැන්වීම පසුපස ජනතා විමුක්ති පෙරමුණේ අන්තර් සමාගම් සේවක සංගමය ඇතුළු වෘත්තීය සමිති තිබුණු බව වාර්තා වේ.


කම්කරු නායකයන් යයි තමන් තමන්ව ම හඳුන්වා ගන්නා (වෙන කිසිවෙක් එසේ ඔවුන් හඳුන්වන්නේ නැත.) වාසුදේව නානායක්කාර, ඩිව් ගුණසේකර, තිස්ස විතාරණ වැනි සමසමාජ, කොමියුනිස්ට ආදී පක්ෂවල ආණ්ඩු ගැති නායකයන්ට අනුව මෙම විශ්‍රාම වැටුප් යෝජනාව ආණ්ඩුවේ වෙනත් ඕනෑම හත් වලාමක් සේ ම මාර හොඳ එකකි.


එහෙත්, මෙම විශ්‍රාම වැටුප් යෝජනාව අත්හිටුවීමේ තීරණය රජය ගන්නා තැන වන්නේ පාලක ශ්‍රී ලංකා නිදහස් පක්ෂයේ මධ්‍යම කාරක සභාවයි. වාසුලා, ඩිව්ලා, විතාරණලා තව ම එම තීරණය ගෙන නැත. මෙම මධ්‍යම කාරක සභා රැස්වීම නැගෙනහිර යුරෝපයේ පැවති සමාජවාදී ඒකාධිපති ජාතික රාජ්‍යයන්ගේ කොමියුනිස්ට් පක්ෂ මධ්‍යම කාරක සභා රැස්වීමක් සිහිපත් කරන්නකි. ඒවායේ ද රජයේ තීන්දු ගැනුනේ පක්ෂ මධ්‍යම කාරක සභාවේදී ය. (එසේ ම, එම රටවලදී ද ව්‍යවසාය සම්බන්ධ තීන්දු ගෙන ඇත්තේ ලංකාවේ පාලක පවුල හා සමාන කල්ලි ගැසීම් තුළයි.)


කොතැනදී හෝ ආණ්ඩුව ගත් තීරණය ඇත්තෙන් ම එහි බෙල්ල බේරා දුන් එකකි. රටේ උද්ඝෝෂණ රැල්ලක් ඇති වීම යුද අපරාධ හා මානව හිමිකම් උල්ලංඝන චෝදනා ලැබ සිටින ආණ්ඩුවට මේ මොහොතේ ඉතා අහිතකර ය. මන්ද, ලෝකය බලා සිටිද්දී ඒවා තලා දමන්න ගියහොත් ආණ්ඩුව තවත් අමාරුවේ වැටෙන හෙයිනි.


එහෙත්, වැඩ කරන ජනතා විරෝධය මැද්දේ සේවකයන්ගේ ඉපැයීම් සූරා කා සිය ව්‍යවසාය කටයුතු සඳහා අරමුදලක් තනා ගැනීමේ අරමුණින්, සේවක විරෝධය මෙල්ල කර ගත හැකි වනු ඇතැයි අධි විශ්වාසයෙන් ආණ්ඩුව ගෙන ආ මෙම ඊනියා විශ්‍රාම වැටුප් යෝජනාව පරාජය කරන්නට වැඩ කරන ජනතාව සමත් වීම ආණ්ඩුවට ලෙහෙසි පහසු පරාජයක් නො වනු ඇත.


ආණ්ඩුව ප්‍රජාතන්ත්‍රවාදීව මුලින් ම කළ යුතුව තිබුණු, විශ්‍රාම වැටුප පිළිබඳ කම්කරු පංතියේ හා ජනතාවගේ අදහස් විමසීම කරන්නට යන්නේ දැන් ය. ඒ කියන්නේ ප්‍රජාතන්ත්‍රවාදය මෙම ක්‍රමය තුළ තිබෙන එකක් නො ව, සටන් කර දිනා ගත යුතු එකක් බවයි. එක්ව සටන් කළොත් ප්‍රජාතන්ත්‍රවාදය දිනා ගන්නට බැරි නැති බව ද මෙම සටන ජනතාවට පෙන්වා දී ඇත.


බිය දුරු කරගෙන අයිතිවාසිකම් වෙනුවෙන් සටන් කරන්නට හා සමගි වන්නට අවශ්‍ය පූර්වාදර්ශය විශ්‍රාම වැටුප් සටන විසින් සපයා තිබේ.

මේ ලිපියට ඔබ කැමති නම් වෙන අයත් එක්කත් බෙදා ගන්න

Sri Lanka government defeated by private sector employees

(May 31, 2011, Lanka Polity) Sri Lanka's ruling Sri Lanka Freedom Party (SLFP) Central Committee that met under the patronage of party leader President Mahinda Rajapaksa yesterday evening unanimously decided to hold the proposed private sector pension scheme temporarily.

The decision drew a close resemblance with the socialist dictatorships of the former Eastern Block in which the central Committee of the Communist Party was the actual governing council of Sri Lanka.

The Central Committee decided to reconsider the bill and to hold it until a new bill that they say suits the needs of the private sector employees is drafted.

Read More in Lanka Polity

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-30

රණවිරු රියල් ස්ටාර් කවුරු ද?

(උපුටා ගැනීම දිනමිණෙනි.) ලොව ඉහළ ම ආකර්ෂණය දිනාගත් හා වැඩි ම ත්‍යාග ප්‍රමාණයක් ලබා දුන් ප්‍රථම හා විශාල ම “මිලිටරි – රියලිටි” මහා සංගීත ප්‍රසංගය ඊයේ රාත්‍රියේ කොළඹ දී පැවැත්විණි. රුපියල් කෝටි තුනකට වැඩි වටිනාකමකින් යුතු ත්‍යාග ජයග්‍රාහකයන් වෙත පිරිනැමුණු මේ තරගය සඳහා එස්. එම්. එස්. පණිවුඩ ලක්ෂ ගණනක්ද ලැබී තිබිණි.


වැඩි ම කෙටි පණිවුඩ ලැබු සංදර්ශනය හා තරගය ලෙස ද “මිලිටරි රියලිටි” ප්‍රසංගය ඉතිහාස පොතට එක් ව තිබේ. ලෝකයේ රටවල් සිය ගණනක් ඊයේ (29) අන්තර් ජාලය හරහා මෙම රණවිරු රියල් ස්ටාර් නැරඹූහ. ඊයේ අවසන් තරගයට පෙර පැවැති තරගවලදී තරගකාරී රණවිරුවන් කේටියක පමණ කෙටි පණිවුඩ ලබාගෙන තිබුණි. ලෝකයේ මෙවැනි විශාල කෙටි පණිවුඩ ප්‍රමාණයක් ලබාගත් ප්‍රථම වැඩසටහන ලෙස රණවිරු රියල් ස්ටාර් වාර්තාගත වන බව ජාතික ආරක්ෂාව පිළිබඳ මාධ්‍ය මධ්‍යස්ථානයේ අධ්‍යක්ෂ ජෙනරාල් ලක්ෂ්මන් හුළුගල්ල මහතා කීය.


සෑම තරගකරුවකුටම කෙටි පණිවුඩ ලක්ෂ තුනකට වඩා ලැබී තිබුණි.


ජනාධිපති මහින්ද රාජපක්ෂ මහතා සහ ශිරන්ති රාජපක්ෂ ආර්යාව, ආරක්ෂක ලේකම් ගෝඨාභය රාජපක්ෂ මහතා සහ එම මැතිනිය, මැති ඇමැතිවරු, ත්‍රිවිධ හමුදාපතිවරු සහ සෙසු ආරක්ෂක නිලධාරීන්ද රණවිරුවන්ගේ ඥාතීන් ඇතුළු තුන්දාස් පන්සියයක පමණ පිරිසක් එම අවස්ථාව නැරඹීමට එක්ව සිටියහ.ආරක්ෂක ලේකම් ගෝඨාභය රාජපක්ෂ මහතාගේ සංකල්පයක් මත රණවිරු රියල් ස්ටාර් වැඩසටහන ආරම්භ විය.


ත්‍රස්තවාදය පරාජය කර ගිනි අවියට විරාමයක් තැබූ රණවිරුවන්ට ඔවුන්ගේ සෙසු හැකියාවන් උරගා බැලීමට අවස්ථාවක් ලබාදීමේ විවිධ වැඩසටහන් ආරම්භ විය.එහි ප්‍රථම වැඩසටහන මෙම රණවිරු රියල් ස්ටාර් වැඩසටහනයි. එය ආරම්භයේදී උතුරු නැගෙනහිර හමුදා කඳවුරු ඇතුළු ත්‍රිවිධ හමුදාවට අයත් දිවයිනේ සියලුම කඳවුරුවලින් රණවිරුවන් විසි දෙදහසක් පමණ සහභාගී වූහ.


අවසන් තරගයේදී ජයග්‍රහණය කරන මෙන්ම මෙම තරගයට සහභාගි වූ රණවිරුවන්ට ඉදිරියේදී විදේශ රටවලින් සංගීත සංදර්ශනවලට ආරාධනා ලැබුණහොත් ආරක්ෂක අමාත්‍යාංශයේ අවසරය මත ඊට සහභාගී වීමට අවස්ථාව සැලසෙන බවද ලක්ෂ්මන් හුළුගල්ල මහතා කීය.


(මෙම ලේඛකයා රූපවාහිනිය නරඹන්නේ කලාතුරකින් නිසා මෙවැනි දැවැන්ත වැඩසටහනක් ඊයේ ලංකාවේ පැවති බව දැන ගන්නට නො ලැබිණි. මෙම තරගයේ ප්‍රතිඵල සොයා ගැනීමට අන්තරජාලය හරහා දැරූ උත්සාහය අසාර්ථක විය. ‍රජයේ වෙබ් අඩවියක හෝ මෙම තරගයේ ප්‍රතිඵල අද උදෑසන අට වන විටත් දක්නට නො ලැබිණි. බොහෝ රාජ්‍ය මාධ්‍යවලට මෙම ඓතිහාසික ප්‍රසංගය පුවතක් හෝ වී නො තිබිණි. ප්‍රතිඵල දන්නා අය මෙහි සටහන් කරන්න.)

මේ ලිපියට ඔබ කැමති නම් වෙන අයත් එක්කත් බෙදා ගන්න

විදුලි බල මණ්ඩලයේ මාෆියා කල්ලියට එරෙහිව චණ්ඩියෙක් සටනක

(2011 මැයි 30, W3Lankaදැන් ලංකාව චණ්ඩින්ට ම ගිය රටකි.


හැම තැන ම ඉන්නේ චණ්ඩි ය.


රජයේ දේශපාලනඥයන් පමණක් නො ව, නිලධාරීන් පවා චණ්ඩි ය.


මේ තවත් චණ්ඩියෙකුගේ චණ්ඩි කතාවකි.ඔහුගේ නම විද්‍යා අමරපාල ය.


"විදුලි ඉංජිනේරු සංගමය පවසා තිබෙනවා පෙර සභාපති එම තනතුරින් නෙරපා දැම්මා සේ වත්මන් සභාපති වන මාවත් අදාළ තනතුරින් නෙරපා හරිනවා කියලා. නමුත් මට කිව හැක්‌කේ ඔවුන් කරන අවසාන සටන මෙය බවයි."


රාජ්‍ය ආයතනයක සභාපතිවරයකු වන මෙම පුද්ගලයා ‍මෙම ප්‍රකාශය කරන්නේ ප්‍රසිද්ධ මාධ්‍ය සාකච්ඡාවකදී ය. ඔහුට අනුව, එක්කෝ මේ සටනින් පසු ලංකා විදුලිබල මණ්‌ඩල විදුලි ඉංජිනේරු සංගමය හෝ එහෙම නැතිනම් විදුලිබල මණ්ඩලයේ ඉංජිනේරුවන් හෝ ඉවර විය යුතු ය.


විද්‍යා අමරපාල පවසන පරිදි ලංකා විදුලිබල මණ්‌ඩල විදුලි ඉංජිනේරු සංගමය මහජනතාව නොමග යවන මාෆියා කල්ලියකි. ලංකාවේ තරම් මාෆියා කල්ලි ඉතාලියේ ද නැත.


මාෆියා කල්ලිවල ඉන්නේ ද චණ්ඩි ය. ඒ නිසා ඒ සමග සටන් කරන්නට ද අවශ්‍ය වන්නේ චණ්ඩි ය. 


දැන් විදුලි බල මණ්ඩලය පිස්සු හැදෙන තරම් කාර්යක්ෂම ය. මේ මාසයේ බිල නො ගෙව්වොත් ලබන මාසයේ එන්නේ රතු බිලකි. රුපියල් පන්සීයේ හිඟය පවා දවස් තුනෙන් නො බේරුවෝත් ලයිට් කපන බව කියමින් රතු බිල් එයි. රතු බිල් හදන්නත් සෑහෙන වියදමක් කරනවා ඇත.


ඒ වුණාට නිතර නිතර විදුලිය විසන්ධි වන එක නම් තාමත් එහෙම ම ය. හදන්න පරක්කුවත් එහෙම ම ය. 


ඉංජිනේරු මාෆියා කල්ලි හා සභාපති චණ්ඩි පොර කති. පාරිභෝගික අපි තැලෙමු.  

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-29

ලැජ්ජයි, ඇමතිවරුනි, ලැජ්ජයි.

(2011 මැයි 29,, W3Lanka) කටුනායක වෙළඳ කලාපයේ එක් ආයතනයකින් සේවකයින්  පහ බැඟින් කටුනායක වෙළඳ කලාපයේ ආයතන 90ක සේවකයින් කැඳවා ඊයේ පවත්වන ලද පෞද්ග/ලික අංශයේ විශ්‍රාම වැටුප් යෝජනා කෙටුම්පත පිළිබඳ රැස්වීමේදී කම්කරුවෝ අභීත ලෙස දේශපාලකයන් ප්‍රශ්න කර, ඔවුන් කිච වී පල්ලම් බසින තතත්වයට පත් කළහ.


ජනාධිපති නියමයෙන් සංවිධානය කරන ලද බව කියන මෙම රැස්වීමට කම්කරු ඇමති ගාමිනී ලොකුගේ, ගම්පහ දිස්ත්‍රික් පාර්ලිමේන්තු මන්ත්‍රී සුදර්ශණී ප්‍රනාන්දුපුල්ලේ මහත්මිය, පාර්ලිමේන්තු මන්ත්‍රී සරත් කුමාර ගුණරත්න, පාර්ලිමේන්තු මන්ත්‍රී ලසන්ත අලගියවන්න, බස්නාහිර පළාත් මහ ඇමති ප්‍රසන්න රණතුංග, පළාත් සභා මන්ත්‍රී නිමල් ලංසා, ලලිත් වණිගරත්න, ආනන්ද හරිස්චන්ද්‍ර ප්‍රමුඛ ගම්පහ දිස්ත්‍රික්කයේ ශ්‍රී ලංකා නිදහස් පක්ෂ කෙරුමන් පිරිසක් සහ කම්කරු අමාත්‍යංශයේ නිලධාරීහු පිරිසක් සහභාගී වී සිටි බව මාධ්‍ය වාර්තා කරයි.


නිදහස් වෙළඳ කලාප කම්කරුවන් පානුයි, පරිප්පුයි කා ඉතිරි කරන මුදල පවා ‍සූරාකන්නට හදනවා නේදැයි අභීත කම්කරු සහෝදරියන් ඇමතිවරුන්ගෙන් අසන්නේ සදය උපහාසයෙනි. ඇමතිලාට, දේශපාලකයින්ට, නිලධාරීන්ට උත්තර නැත.


සේවකයන්ගේ වැටුප් වැඩි කරන ලෙස හාම්පුතුන්ට අණ කරන්නට බැරි රජයට සේවකයන්ගේ වැටුප් හා වෙනත් හිමිකම් කපා එවන්නට හාම්පුතුන්ට අණ කරන්නට ඇති අයිතිය කුමක්දැයි කම්කරුවෝ ප්‍රශ්න කළහ.


ලැජ්ජයි, ඇමතිවරුනි, ලැජ්ජයි.


කම්කරුවන් සැබැවින් අවදි වූ කල ඇමතිවරුන්ට ගෙදර යන්නට වන්නේ රෙදි නැතිව ය. 




මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-28

ලංකාදීපෙන් දුන් විශේෂ බැංකු නිවාඩුව

(2011 මැයි 28, W3Lanka) ආණ්ඩුවට උත්සව පවත්වන්නට තිබෙනවා නම් ලවක් දෙවක් නැත.


රටේ සියල්ල සිදු වන්නේ ආණ්ඩුවේ උත්සව කැලැන්ඩරය අනුවයි.


ගිය සතියේ 2600 වන ශ්‍රී සම්බුද්ධත්ව ජයන්තියයි. ඊයේ ජාතික විජයග්‍රහණයේ සමරුවයි. හෙට තවත් මොකක් හෝ සොයා ගනු ඇත.


කොළඹ අගනගරයේ පාසල් හා රජයේ කාර්යාලවලට ඊයේ නිවාඩු දුන්නේ උත්සවයට සහභාගි වන දේශපාලකයන්ට හා නිලධාරීන්ට ට්‍රැෆික් නැතිව පාරේ යන්නටයි. සිසුන්ට අධයාපන දිනයක් ද, රටේ ප්‍රධාන පෙළේ කාර්යාල රැසකට වැඩ කරන දිනයක් ද අහිමි විය.


මේ අතර ලංකාදීප පුවත්පත සිය මුල් පිටුවේ පුවතක් පළ කරමින් කොළඹ නගරයේ බැංකු ද නිවාඩු බව කීවේ ය. කොළඹ යනු මේ රටේ ආර්ථිකයේ හදවතයි.


අද ලංකාදීප පුවත්පත එම පුවත වැරදි බව පිළිගෙන ඇත. එහෙත්, එම පුවතේ මූලාශ්‍රය රාජ්‍ය පරිපාලන අමාත්‍යංශය බව පුවත්පත කියයි.


ආණ්ඩුව ආසියාවේ ආශ්චර්යය හදන්නට යන්නේ ‍එසේ ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

විදුහල්පතීන්ට හමුදා පුහුණුව දීම හෙවත් පය බරවායට පිටි කය බෙහෙත් බැඳීම

Making principal the biggest bully of school
(2011 මැයි 28, W3Lankaඅධ්‍යාපන අමාත්‍යංශයේ ලේකම්වරයා විසින් පසුගිය දිනෙක ඉසිපතන විද්‍යාලයේ පැවති උත්සවයකදී කරන ලද කතාවකින් හෙළිදරව් වූ කරුණක් වූයේ රජයේ පාසල්වල විදුහල්පතිවරුන් 1000කට ද හමුදා මෙහෙයවීමෙන් නායකත්ව පුහුණුව සැපයීමට සැලසුම් කර ඇති බවයි.


අධ්‍යාපන ලේකම්වරයාට අනුව විදුහල්පතිවරුන්ට මෙම පුහුණුව අවශ්‍ය වන්නේ තාප්පයකින් පැන ළමයකු අල්ලා ගන්නට පුළුවන් වන්නට හා ළමයින්ට බය නැති වන්නට ආදියටයි.


අහෝ දුකකි! මේ රටේ අධ්‍යාපන බලධාරීන් විදුහල්පතිගේ භූමිකාව හඳුනාගෙන ඇත්තේ එසේ ය: ඔවුන්ට අනුව, විදුහල්පති චණ්ඩියකු විය යුතු ය. මේ රටේ පිළිගැනුම අනුව නායකයා යනු චණ්ඩියෙක් ද?


අධ්‍යාපන කළමනාකරණයේදී විදුහල්පති විසින් කළ යුතුව තිබෙන කාර්යභාරය අතිශය වැදගත් ය. විදුහල්පති හොඳ අධ්‍යාපනවේදියකු වීම මෙහිදී අත්‍යවශ්‍ය දෙයකි. ලංකාවේ විදුහල්පතිවරුන්ගේ ගැටලුව එසේ නො වීමයි. ඉගෙනුම් ඉගැන්වීම් ක්‍රියාවලියේදී ගුරුවරුන්ට නායකත්වය දීමට විදුහල්පතිවරයා දක්ෂ නො වීමයි. විදුහල්පති සේවයේ ඇති මෙම ගැටලුව විසඳීම සඳහා වැඩපිළිවෙලක් නො යොදා විදුහල්පතිවරුන්ට හමුදා පුහුණුවක් දීමෙන් ප්‍රශ්න විසඳන්නට යාම පය බරවායට පිටි කය බෙහෙත් බැඳීමකි.


පාසල් සිසුන්ගේ විනය පිළිබඳව ද, එතැනින් ඔබ්බට සමස්ත සමාජයේ ම හැදියාව පිළිබඳව ද ඇති ගැටලුව අධ්‍යාපන ක්‍රමයේ අර්බුදයකි. රජය මේ රටේ අධ්‍යාපනය සමග කරන ක්‍රීඩාවන්ගෙන් අවසානයේදී සිදු වන්නේ තත්වය තව තවත් ඔඩු දිවීමයි.


යුද්ධය අවසන් වීමෙන් පසු හමුදාවට වැඩක් නැති වීම බරපතල ප්‍රශ්නයකි. හමුදාවේ අපතේ යන ශ්‍රමය රට මිලිටරිකරණය කරන්නට යොදා ගැනීමට ආණ්ඩුව දරන උත්සාහය අරුත් සුන් එකකි.


රට මිලිටරිකරණය කරන්නට නම් ආණ්ඩුව අලුත් සතුරකු සොයාගෙන අලුත් යුද්ධයක් ආරම්භ කළ යුතුව තිබේ. දැන් කළ යුතුව තිබෙන්නේ මිලිටරිකරණය වී ඇති සමාජය මිලිටරිහරණය කිරීමයි.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-25

පෞද්ගලික අංශයේ විශ්‍රාම වැටුප හෙවත් Rob both Peter and Paul to pay Namal

(2011 මැයි 25, W3Lankaලංකාවේ ආණ්ඩුව නම් මාර ම ආණ්ඩුවකි.


පෞද්ගලික අංශයේ සේවකයෝ ලක්ෂ ගණනින් වීදි බැස දෙන්න යන විශ්‍රාම වැටුප එපා කියති. එහෙත්, ආණ්ඩුව එපා එපා කියද්දී බත් බෙදන පරණ පන්නයේ මගුල් ගෙවල්වල බත් බෙදූ බේබදු අයියලා සේ බලෙන් ම විශ්‍රාම වැටුප් දෙන්න හදයි.


දෙන්න යන විශ්‍රාම වැටුප හරියට ඌරාගේ මාළු ඌරාගේ ම ඇ‍ඟේ තබා කපනවා වැනි වැඩකි. ආණ්ඩු බදු අය කර සුබසාධනය සැලසීම ගැන ප්‍රසිද්ධ ඉංග්‍රීසි කියමනක් වන Rob Peter to pay Paul හෙවත් පීතරගෙන් සොරකම් කර පෝල්ට ගෙවීම යන්න පවා මෙම විශ්‍රාම වැටුපට නො ගැලපේ.


මෙයට ගැලපෙන්නේ Rob both Peter and Paul to pay Namal වැනි කියමනකි.


මේ ඊයේ දිවයින පත්තරයට කම්කරු සබඳතා හා ඵලදායිතා සංවර්ධන ඇමති ගාමිණී ලොකුගේ මෙම විශ්‍රාම වැටුප ගැන කළ විස්තරයකින් උපුටා ගත් කොටස් කීපයකි.


ප්‍රශ්නය - මෙම යෝජිත විශ්‍රාම වැටුප් අරමුදල ශක්‌තිමත් කර ගැනීම සඳහා මුදල් සපයන මාර්ග මොනවාද?


පිළිතුර - සේවක මහත්වරු දැනට අර්ථසාධක අරමුදලට ගෙවන මුදලට අමතරව තවත් 2% ක්‌ වැටුපෙන් කපාගන්නවා. ඊට අමතරව හාම්පුතුන් තවත් 2% ක්‌ ලබාදිය යුතුයි. අර්ථසාධක අරමුදලේ අක්‍රීය ගිණුම්වල මුදල් සියල්ල ලබාගන්නවා. ඊට අමතරව සේවක භාරකාර අරමුදලේ ලාභාංශවලින් 10% ක්‌ ද පාරිතෝෂිතයෙන් 10% ක්‌ ද, අර්ථසාධක අරමුදලේ ප්‍රතිලාභ ගන්නා දිනයේදී ඒ මුදල්වලින් 2% ක්‌ ද රජය රුපියල් බිලියනයක්‌ද වශයෙන් යෝජිත විශ්‍රාම වැටුප් අරමුදලට යොදවනවා.


ආණ්ඩුව දෙන බිලියනය යනු පෞද්ගලික අංශයේ ලක්ෂ පනහක් පමණ වන සේවකයන් වෙනුවෙන් එක් අයකුට විශ්‍රාම වැටුප් ගෙවීම සඳහා රු. 200 බැගින් දීමකි. අනෙක් සියල්ල සේවකයාගෙන් කපා ගන්නා සල්ලි ය. 


ප්‍රශ්නය - ඔබ මේ ආකාරයට ප්‍රකාශ කළත් අර්ථසාධකයේ සහ භාරකාර අරමුදලේ මුදල් යෝජිත විශ්‍රාම වැටුප් අරමුදලට මතු දිනයකදී නොගන්නා බවට දෙන සහතිකය කුමක්‌ද?


පිළිතුර - අමුතුවෙන් සහතිකයක්‌ අවශ්‍ය නැහැ. රජය සහ භාණ්‌ඩාගාරය කෙරෙහි ජනතාවට විශ්වාසයක්‌ තිබෙනවා.


අප දන්නා තරමින් එහෙම විශ්වාසයක් ඇති අය ඉන්නේ අංගොඩ පමණි. 


ප්‍රශ්නය - යම් හෙයකින් වසර 5-6 න් සේවයෙන් ඉවත් වුවහොත් ඔහුට හෝ ඇයට දායක වූ මුදල් ආපසු ලබාගැනීමේ හැකියාවක්‌ නැහැ නේද?


පිළිතුර - ඔව් බොහෝ දුරට මේ ප්‍රශ්නය ඇඟලුම් ක්‍ෂේත්‍රයේ සේවක සේවිකාවන්ට තදින් බලපානවා. ඒ ක්‍ෂේත්‍රයේ සේවකයන් බොහෝ විට වසර 5-6 අස්‌වෙලා යනවා. ඒ නිසා එලෙස ඉවත්වන සේවකයන්ගේ මුදලෙන් 60% ක්‌ ඔවුන්ට ආපසු ලබාදීමට අප තීරණය කළා. එම සංශෝධනයත් පනතට එක්‌කිරීම අපේ අරමුණයි.


එතකොට ඉතිරි 40% ආණ්ඩුවට. අනෙක මේ දෙනවා යයි කියන 60% ලැබෙන්නේත් හැට පිරුණාම ද?


වසර දහයක්‌ දායකත්වය සැපයීමෙන් පසු විශ්‍රාම වැටුප් ලැබීමට හිමිකම් ලැබුවත් වසර හැට (60) සම්පූර්ණ වීමෙන් පසුවයි ඔහුට හෝ ඇයට විශ්‍රාම වැටුප ලබාගත හැකිවන්නේ.


රජය කියන අන්දමින් පෞද්ගලික අංශයේ සේවකයන්ගේ විශ්‍රාම ලබන වයස අවුරුදු 60 විය යුතුයි. 


ප්‍රශ්නය - නමුත් යෝජිත විශ්‍රාම වැටුප් පනතේ එහෙම දෙයක්‌ සඳහන් කර නැහැ. දැනට පවතින තත්ත්වය දෙස බලනවිට පෞද්ගලික අංශයේ සේවය කරන කාන්තාවක්‌ වයස 50 දී විශ්‍රාම යනවා. පිරිමියෙක්‌ 55 දී විශ්‍රාම යනවා. ඔබ ඔය කියන පරිදි වයස අවුරුදු 60 සම්පූර්ණ වනතෙක්‌ සේවය කරන්න නම් හාම්පුතා කැමැති විය යුතුයි. ඒ සම්බන්ධව පවතින රෙගුලාසි සංශෝධනය විය යුතුයි. ඒ අනුව විශ්‍රාම වැටුප් පනතත් සංශෝධනය කළ යුතුයි. එයට රජය සූදානම්ද?


පිළිතුර - ඔව් පැහැදිලිවම පෞද්ගලික අංශයේ හාම්පුතුන් වෙත රජය ඉදිරියේදී යෝජනා කරනවා සේවකයන්ට වයස අවුරුදු 60 සම්පූර්ණ වනතෙක්‌ සේවය කිරීමට ඔවුන්ට අවස්‌ථාව දෙන ලෙස.


ඇයි යෝජනා කරන්නේ? කරන්නකො අණ පුළුවන් නම්!


ප්‍රශ්නය - ඔව්, ඔය කියන පරිදි වැඩ කරන ජනතාවගේ යහපත සඳහාම මෙම විශ්‍රාම වැටුප් ක්‍රමය ඉදිරිපත් කරනවා නම් එය රටේ සෙසු පාර්ශ්වයන් අතර සාකච්ඡාවට බඳුන් නොකළේ ඇයි?


පිළිතුර - පනතක්‌ ගැන කතා නොකළත් රටේ විවිධ පාර්ශ්වයන්ගේ අදහස්‌ විශ්‍රාම වැටුප් ක්‍රමයට ලබාගත්තා. 1983 සිට මේ සඳහා විවිධ යෝජනා සහ අදහස්‌ ඉදිරිපත්ව තිබෙනවා.


කවුරුද මේ අදහස් දැක්වූයේ? කුමන ක්‍රමවේදයක් ඔස්සේ ද අදහස් ලබා ගත්තේ? එහි විනිවිදභාවය කොහොම ද? කරුණා කර හෙළි කරන්න. අප දන්නා අන්දමින් නම් මෙවැනි ප්‍රශ්නයක් සම්බන්ධයෙන් අදහස් ලබා ගන්නා ක්‍රමවේදය තමයි මහජන අදහස් කැඳවීමක් කිරීම නැතිනම් public consultation. 


ප්‍රශ්නය - යෝජිත විශ්‍රාම වැටුප් පනත සංශෝධනය කරන බව ජනාධිපතිතුමා ප්‍රකාශ කළා. එලෙස සංශෝධනය කරන ලද්දේ මොනවගේ කරුණුද?


පිළිතුර - පාර්ලිමේන්තුවට ඉදිරිපත් කරන ලද විශ්‍රාම වැටුප් පනතට අනුව විශ්‍රාම වැටුප්ලාභියා හදිසියේ මියගියොත් වයස අවුරුදු 18 ට වැඩි දරුවකුට එය හිමිවෙනවා. නව සංශෝධනයත් සමඟ දැන් එය බිරිඳටත් ලබාගත හැකියි. ජීවිතාන්තය දක්‌වා විශ්‍රාම වැටුප ලබාගත හැකියි. විශ්‍රාම වැටුප අඛණ්‌ඩව සාමාජිකයන්ට ගෙවන බවට රජය වගකීම භාරගෙන තිබෙනවා. මහ බැංකුව විසින් විශ්‍රාම වැටුප් අරමුදලට යොදවන බිලියනයක මුදල ආයෝජනය සඳහා යෙදවීම ඇතුළු සංශෝධන කිහිපයක්‌ විශ්‍රාම වැටුප් පනතට ඉදිරිපත් කිරීමට බලාපොරොත්තු වෙනවා.


"මහ බැංකුව විසින් විශ්‍රාම වැටුප් අරමුදලට යොදවන බිලියනයක මුදල ආයෝජනය සඳහා යෙදවීම!" බලෙන් දෙන්න යන මේ විශ්‍රාම වැටුපේ රහස තියෙන්නේ මෙතන.


ලංකාවේ පීඩිතයන් පෙළන දැවැන්ත ම හා කෲරත ම සූරා කන්නා වන රජය නම් රජ පවුලේ සමාගම මේ විශ්‍රාම වැටුප් අරමුදල පිහිටුවන්නේ අන් කිසිවක් සඳහා නො ව, සිය උන්මත්තක ව්‍යාපෘතිවල ආයෝජනය කර පෞද්ගලිකව ලාභ ලබමින් මහජනතාව පිට පාඩු පටවන ව්‍යාපාර සඳහා ප්‍රාග්ධනය සොයා ගන්නට ය. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-24

පොළොන්නරුවේ බර උසුලන බබා හා ක්‍රීඩා අමාත්‍යංශයේ බබාලා

බොක්සිං ශූර මංජු වන්නිආරච්චිටත්, ඔහු බදා ගත් දේශපාලකයින්ටත් තහනම් උත්තේජක නිසා අහිමි වූ සරාගී පදක්කම
(2011 මැයි 23, W3Lankaබර ඉසිලීමේ ශූර පොළොන්නරුවේ චින්තන ගීතාල් විදානගමගේ (විදානගේ ලෙස ද සඳහන් වේ) මුල් කාලයේ ජවිපෙට සමීපව කටයුතු කළ ක්‍රීඩකයෙකි. ඔහු ඒ කාලයේ ඒ බව ප්‍රසිද්ධියේ ම කීවේ ය. එය ඔහු තුළ අප දුටු විශේෂත්වයකි.


මුදල් හඹා යන වත්මන් තරගකාරී ක්‍රීඩා ක්ෂේත්‍රයේ නරක ප්‍රවණතාවලින් මිදෙන්නට අවශ්‍ය ජීවිත ඥානය චින්තනට දෙන්නට ඔහු පසුබිමින් තිබුණු දේශපාලනයට ද හැකියාවක් තිබී නැති බව පෙනේ. එක අතකට ජවිපෙ දේශපාලන මණ්ඩලයේ සිටි විමල් වීරවංශට හෝ නන්දන ගුණතිලකට නැති ජීවිත ඥානයක් මේ තරුණයාට කොහෙන් ලැබෙන්න ද?


පසුගියදා දකුණු ආසියානු ක්‍රීඩා උළෙලේ දී කිලෝ ග්‍රෑම් 69 බර පන්තිය යටතේ තරග වැදුණු චින්තන ගීතාල් විදානගමගේ කිලෝග්‍රෑම් 162 ක බරක් ‍ඔසවා රන් පදක්කම හිමි කර ගත්තේය.


ඊට පෙර, 2006දී මෙල්බෝන්හි පැවති පොදු රාජ්‍ය මණ්ඩලීය ක්‍රීඩා උළෙලේදී බර ඉසිලීමේ ඉසව්ව නියෝජනය කළ චින්තන ගීතාල් විදානගේ කිලෝ ග්‍රෑම් 62 ක බර පන්තියෙන් රන් පදක්කම දිනා ගැනීමට සමත්විය.


මහනුවර බෝගම්බර ක්‍රීඩාංගණයේදී 2010 නොවැම්බර් මුල පැවති 36වනි ජාතික ක්‍රීඩා උළෙලේදී අතිශූර ක්‍රීඩකයා ලෙස සම්මාන ලද උතුරු මැද පළාතේ චින්තන ගීතාල් විදානගේට රුපියල් තිස්‌ලක්‍ෂයක්‌ වටිනා නවීන ෆියට්‌ මෝටර් රථයක්‌ කථානායක චමල් රාජපක්‌ෂ මහතා අතින් හිමි විය.


පොළොන්නරුවේදී පුයර වෙනුවට සිමෙන්ති දෑතේ තවරා ගනිමින් බර ඉසිලූ චින්තන බබා වෙන්නට පටන් ගන්නේ සල්ලි ලැබෙනකොට බව පෙනේ. ආසියානු බර ඉසිලීමේ සූරතාවලියේ දී තහනම් උත්තේජන භාවිතාකර තරග වැදුනේ යැයි දැන් ඔහුට චෝදනා එල්ල වී තිබේ.


මේ දිනමිණ පුවත්පත සිද්ධිය පිළිබඳ වාර්තා කරන අන්දමයි: "ආසියානු බර ඉසිලීමේ සූරතාවලියේ දී තහනම් උත්තේජන ගත්බවට නැගී ඇති චෝදනාව ජාතික තහනම් උත්තේජන කමිටුවට ලැබීමෙන් අනතුරුව ඊයේ මූලික පරීක්ෂණයක් ආරම්භ කිරීමට ක්‍රීඩා වෛද්‍ය ඒකකයේ ප්‍රධානී විශේෂඥ වෛද්‍ය ගීතාංජන මෙන්ඩිස් මහතා පියවර ගෙන ඇත.


මේ පරීක්ෂණයට ක්‍රීඩකයා කැඳවා චෝදනාව භාරදී කරුණු විමසා ඇති අතර එහිදී පවසා ඇත්තේ ආසියානු බර ඉසිලීමේ සූරතාවලියට යෑමට පෙර පෞද්ගලික වෛද්‍යවරයෙකු ගෙන් අතිරේක පෝෂණ ඖෂධ ලබාගත් බවය. එහෙත් එහි තහනම් උත්තේජන ඖෂධ සංඝටක අඩංගු බව දැන නොසිටිබව චින්තන ගීතාල් විදානගේ ජාතික තහනම් උත්තේජන කමිටුවට ප්‍රකාශ කර ඇත."


මේ ක්‍රීඩා අමාත්‍යංශයේ බබා පාට් ය: "මේ පිළිබඳ ක්‍රීඩා වෛද්‍ය ඒකකයේ හා ජාතික තහනම් උත්තේජන කමිටු ප්‍රධානී විශේෂඥ වෛද්‍ය ගීතාංජන මෙන්ඩිස් මහතාගෙන් කළ විමසුමකදී සඳහන් කළේ ක්‍රීඩක ක්‍රීඩිකාවන් පෞද්ගලික වෛද්‍යවරුන් හමුවී ඖෂධ ගැනීමෙන් මෙවැනි භයානක ප්‍රතිඵල අත්වන බවය.


ජාතික හා ජාත්‍යන්තර තලයේ සියලුම ක්‍රීඩක ක්‍රීඩිකාවන්ට නොමිලේ ඖෂධ හා ප්‍රතිකාර ලබාදීමට ක්‍රීඩා අමාත්‍යාංශයෙන් ක්‍රීඩා වෛද්‍ය ඒකකයක් පවත්වාගෙන යද්දී පෞද්ගලික වෛද්‍යවරුන් හමුවීම පුදුම සහගත බව ඒ මහතා පැවැසීය."


ලංකාව අති විශාල මුදලක් වැය කරමින් 2018 පොදු රාජ්‍ය මණ්ඩල ක්‍රීඩා උළෙල ලංකාවේ පැවැත්වීමට සැලසුම් කරමින් ඉන්නේ මෙවැනි වාතාවරණයක් තුළයි.


උත්තේජකවලින් ක්‍රීඩා පිටි හැදිය හැකි ය. උළෙල පැවැත්විය හැකි ය. එහෙත්, ක්‍රීඩකයන් තැනිය නො හැකි ය.


ලංකාවේ ක්‍රීඩාවේ නො දියුණු තත්වය සමාජ ප්‍රශ්නයකි. එය ගැඹුරු සමාජ සංවාදයක නිමිත්ත විය යුතු ය.


ක්‍රීඩාශීලී සමාජයක් තැනීම සමාජ පුළුල් ප්‍රතිසංස්කරණයක කොටසකි.


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-23

ජෝක්ලන්තයේ රාජ්‍ය නවක වධ වැඩසටහන අද ඇරඹේ

ජෝක්ලන්තයේ සරසවි සිසුන්ගේ මිලිටරි පුහුණුව හෙවත් රාජ්‍ය නවක වධ වැඩසටහන අද ඇරඹේ. කලින් සැලසුම් කළ පරිදි සිසුන් කොටසක් ජෝක්ලන්ත රජ මැදුරට ගෙන්වා වාත කර රජතුමා නවක වධය නිල වශයෙන් ආරම්භ කිරීමට නියමිත ය. 


ජෝක්ලන්ත සරසවි සිසුන් ඩබල් එකේ (double speed) යන්න, එන්න, කන්න, බොන්න, සෝටා (shorts) ඇඳගෙන ඩිප් ගහන්න, බැරි වුණොත් ඉසි පෝසන් (Easy position) ඉන්න, පැටික් (fatigue) කරන්න, හයියෙන් කතා කරන්න, වම දකුණ ගහන්න, කැටගරි (category) නො වී ඉන්න අද සිට ඉගෙන ගනිති. 


මින් මතු ජෝක්ලන්තයේ සරසවි විවෘත වනු ඇත්තේ නායකයන්ට පමණි. ජෝක්ලන්ත උගතුන්ට මොළය ටිකක් හෝ තිබීමේ ප්‍රශ්නය විසඳීම සඳහා මෙම පියවර ගෙන ඇති බව වාර්තා වේ. 







මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-22

ආසි හංගාගෙන ගුණදාස අමරසේකර නම් පො‍රවෙන් වාසි ගන්නට හදන ආණ්ඩුවේ ඕමි කෙළිය

(2011 මැයි 22, W3Lankaරටේ ප්‍රශ්න රට ඇතුළේ විසඳා නො ගෙන කල් මැරීමේ හා දීර්ඝ කාලීන ඉතිහාසයක් ඇති ප්‍රජාතන්ත්‍රවාදී රාමුව සමග සෙල්ලම් කිරීමේ ප්‍රතිඵලයක් ලෙස දැන් බටහිර බලවතුන්ගේ හා ඉන්දීය උවමනාව මත කටයුතු කරන්නට සිදු වී තිබෙන ලංකාවේ ආණ්ඩුව ආසියා තියාගෙන පොරොවෙන් වාසි ගන්න උත්සාහ කරන සෙල්ලමක් පටන් ගැනීමට ‍සැරසෙන බව වාර්තා වේ.


ආසියා විමල් වීරවංශ යැංකි අධිරාජ්‍යයේ මහ බලකොටුව වන නිව්යෝක් නුවරට ඔත්තු බැලීමේ අභීත මෙහෙයුමක් (reconnaissance mission) ගොස් ඇත.


ආසියා හංගාගෙන ගහන්න හදන පොරව වයෝවෘද්ධ ගුණදාස අමරසේකරයි. ඔහු පිටිපස්සෙන් බූරුවාගේ සිට හතේ කොළේ දක්වා සෙසු තුරුම්පු පෙළට සිට ගනු ඇත.


ඉන්දීය බලපෑම් හා දෙමළ ජාතික සන්ධානය සමග කරන සාකච්ඡාවලට එරෙහිව උද්ඝෝෂණයක් මැයි 30දා කොළඹදී කරන්න දේශ හිතෛශී ජාතික ව්‍යාපාරය සූදානම් වෙමින් සිටියි. 


ගුණදාස අමරසේකරගේ ගනඳුරෙන් එළිය දකින්නට ජනතා විමුක්ති පෙරමුණ උත්සාහ නො කරනු ඇතැයි අපි බලාපොරොත්තු වෙමු.


විරෝධය ඉන්දියාවටයි. ඉන්දියාව ලංකාව එහි ග්‍රහනයට ගන්නවාලු. දෙමළ ජාතික සන්ධානය සමග සාකච්ඡා කරන්න බල කරනවාලු. බලය බෙදන්න කියනවාලු.


ඉකින් 23දා ආණ්ඩුව දෙමළ ජාතික සන්ධානය සමග බලය බෙදන හැටි කතා කරන්න නියමිතයි. දැන් මේ සාකච්ඡාවල කාල රාමුව තීරණය කරන්නේ ආණ්ඩුවේ සර්ව බලධාරී දෙවියන් වහන්සේලා නොවෙයි. කොටින්ගේ බළල් අණ්ඩක් ය කියූ දෙමළ ජාතික සන්ධානයයි.


මොන තත්වයක් යටතේ හෝ දෙමළ ජාතික සන්ධානය සාකච්ඡා මේසයේ රඳවා ගත යුතුයි. උන් නැගිටලා ගියොත් සෙත්තපොච්චි තමයි. උතුරින් ජයලලිතා ය. බටහිරින් ඇමරිකාව හා යුරෝපය ය. නැගෙනහිරින් ඉන්න චීනය ද අනෙක් පැතිවලින් ඉන්න අයට එරෙහිව යන්නේ නැත. දකුණින් ඉතින් ගොළු මුහුද ය.


තකහනියක් කොටි සේර ම මරා යුද්ධය ඉවර කර ගත් රග තේරෙන්නේ දැන් ය. අද ලංකාදීප පුවත්පතේ කතුවැකි පිටුවේ ලිපියක මාතෘකාව 'ප්‍රභාකරන්ගෙන් බේරා ගත් දේ සම්බන්ධන්ට දීම' ය.


අන්තිමට දැන් ඇති වී තිබෙන තත්වය වන්නේ ඊලමත් දී යුද අපරාධවලට හිරේත් යන තත්වයක් උදා වීමයි. එතකොට සිංහලයන්ට ඉතිරි වන්නේ හිර ගෙවල්වල විසිට් යාම පමණක් ද?


ආණ්ඩුවට ගැලවිජ්ජාව ඇත්තේ ආසියා තියාගෙන පොරවෙන් වාසි ගන්නට උත්සාහ ගැනීම තුළ නො වේ. නහය ළගට ම වතුර ගැලූ සඳ උත්සාහ කළ යුත්තේ මෙවැනි වල් වාසි නො වේ.


මේ ඊනියා උද්ඝෝෂණ නියපොත්තෙන් කඩා සිය බලය පාවිච්චි කර, බලය බෙදා ගැනීම ඔස්සේ ජාතීන්ගේ ප්‍රශ්නයට විසඳුම් දී, ජාතික සංහිඳියාව ඔස්සේ තිරසාර සාමයක් සඳහා වැඩ කරන්නට බැරි නම් රාජපක්ෂ පාලනය මෙතෙක් කල් ගොඩ නඟා ගත් ඒකාධිපතිකමෙන් වැඩක් නැත. අමරසේකරලා මේ උද්ඝෝෂණ මෙහෙයවන්නේ ආණ්ඩුව කියන නිසා නම් අපේ කතා අදාළ නැත.


රනිල්ට 2002දී සටන් විරාම ගිවිසුම අත්සන් කරන්නට තිබූ පිටකොන්ද මහින්දට නැතිනම්, ඔහු ප්‍රවර්ධනය කළ පිරිමිකමින් වැඩක් නැත.


එසේ නොමැති වුවහොත් ඔවුන් සෙල්ලම් කරනු ඇත්තේ රාජපක්ෂ පවුල හිරේ යන විට ලංකාවේ මහ පුටුවල විරාජමාන වීමට කුමන්ත්‍රණ කරන වෙනත් කැණහිලුන්ගේ අතට ය. රාජපක්ෂලා අඩු ගණ‍නේ කොටින් පැරදවූ හ. පක්ෂ ලෙස පෙනී සිටින සැබැවින් රාජපක්ෂලාගේ සතුරන් වන අප මෙහි නම් සඳහන් නො කරන බලවේග කළ මගුලක් නැත.


රාජපක්ෂවරු දෙමළ විරෝධී සිංහල ජාතිවාදය හදවතින් ම පිළි ගනිත් නම් කළ යුතුව තිබෙන්නේ උපරිම ප්‍රජාතන්ත්‍රවාදී වීමයි. බලය බෙදන්නට ජනවරමක් තමන්ට නැති නිසා එවැන්නක් සඳහා ජන වරමක් වෙනුවෙන් මහ මැතිවරණයක් පැවැත්වීමයි.


මතු වී තිබෙන තත්වය තුළ රට බෙදීම වැළැක්විය හැක්කේ බලය බෙදීමෙන් පමණි. ඒ යථාර්ථය අවබෝධ කර ගත් පක්ෂයකට බලය පැවරිය යුතු ය. නැතිනම්, සිංහලයන් සිය කෑල්ල වෙන් කර ගන්නා බව තීරණය කළ යුතු ය.


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-21

Sri Lanka foreign policy pendulum swings from India to China this time

(May 21, 2011,  Lanka Polity)As soon as the official visit to India ended without apparent success, Sri Lanka Minister of External Affairs Prof. G.L. Peiris will leave for an official tour in China on May 23.

The Foreign Minister's tour is on an invitation of his counterpart in China, Sri Lanka Ministry of External Affairs say.

Minister Peiris is to have bilateral talks with the Foreign Minister of China and other senior politicians and officials during his two day visit.

Read in Lanka Polity


නව පණ ලබන පුවත්පත් මණ්ඩලය හා පණ අදින පුවත්පත් පැමිණිලි කොමිෂම

(2011 මැයි 21, W3Lankaමේ ආණ්ඩුව තරම් නාස්තියට දූෂණයට එරෙහි වෙනත් ආණ්ඩුවක් ලංකා ඉතිහාසයේ තබා ලෝක ඉතිහාසයේවත් නැත.


පසුගියදා ආණ්ඩුව සොයා ගත් තවත් නාස්තියක් වන්නේ 2002 සිට අහෝසි කර ඇති පුවත්පත් මණ්ඩලය වෙනුවෙන් තවමත් නිලධාරීන්ට වැටුප් ගෙවන බව හා ‍කාර්යාලයක් ද නඩත්තු කරන බවයි.


මේ නාස්තිය නැවැත්වීම සඳහා ආණ්ඩුව දැන් පුවත්පත් මණ්ඩලය නැවත ක්‍රියාත්මක කිරීමට කටයුතු කරමින් සිටියි. ඒ 1973 අංක 5 දරණ පුවත්පත් මණ්ඩල පනත යළි ගෙන ඒම තුළිනි. මෙම පනත යටතේ පුවත්පත් කලාවේදීන්ට දඩ හෝ සිර දඬුවම් පැමිණවීමේ බලය පුවත්පත් මණ්ඩලයට ලැබේ.


කිසිදු අවස්ථාවක මාධ්‍යවේදීන්ට දඬුවම් ලබාදීමක් හෝ මාධ්‍යවේදීන් අධිකරණයකට ඉදිරිපත් කිරීමක් පුවත්පත් මණ්ඩලය සිදු කර නැතැයි පුවත්පත් මණ්ඩලයේ සභාපති නීතිඥ ඩබ්ලිව්. දයාරත්න ඊයේ පැවති පුවත්පත් සාකච්ඡාවකදී පැවසී ය.


මෙය සමාන වන්නේ මරණ දඬුවම පැමිණුව ද එය ක්‍රියාත්මක නො කරන තත්වයටයි.


මොන බයිලා කීවත් මේ අයියලාගේ කෙරුවාව ජනමාධ්‍යකරුවෝ පමණක් නො ව මුළු ලෝකය ම දනිති. දැනටත් මාධ්‍යකරුවන් සිය පෑන හසුරුවන්නේ එකී තත්වය පිළිබඳ මනා අවබෝධයකිනි. මේ වනාහි ඔවුන් බිය වැද්දීම සඳහා ගෙන එන තවත් යකෙක් බව කිව යුතු නැත.


ලෝකයේ වර්තමාන පිළිගැනීම වන්නේ මාධ්‍ය විනය සම්බන්ධ කරුණු වෙනුවෙන් වෘත්තීය ආයතන විසින් පවත්වාගෙන යන ලංකාවේ පුවත්පත් පැමිණිලි කොමිසම වැනි ආයතන වගකිව යුතු බවයි.


ලංකාවේ පුවත්පත් පැමිණිලි කොමිසම ගරා වැටීමට එක් හේතුවක් වූයේ රජයෙන් විශ්‍රාම වැටුප් දෙකක් වංචනික ලෙස ලබා ගෙන අසු වූ, අහංකාර, උඩඟු පුද්ගලයකු වූ සෑම් විජේසිංහ එහි සභාපති පදවිය දැරීමයි. ඔහුගේ කාලයේ මෙම සමථ මණ්ඩලය කැකිල්ලේ රජ්ජුරුවන්ගේ පන්නයේ පොල්කටු උසාවියක් වූ බව ලේඛකයා පවසන්නේ මෙම උසාවියේ නඩු කියා ලද අත්දැකීම් ඔස්සේ ය.


එවැනි පුද්ගලයන්ට මෙවැනි ආයතනවල තනතුරු දරන්නට දීමෙන් හා රාජ්‍ය නො වන සංවිධාන ව්‍යාපෘති පුවත්පත් පැමිණිලි කොමිසම සමග පටලැවීමට ඉඩ දීමෙන් මෙම ලිබරල් ආයතනය විනාශ වන්නට ඉඩ හැරීම සම්බන්ධයෙන් ජනමාධ්‍ය සංවිධාන හා සියලු ජනමාධ්‍යකරුවන් වගකිව යුතු ය.


එසේ ම, ලංකාවේ ප්‍රධාන ධාරාවේ මාධ්‍ය ආයතන පුවත්පත් පැමිණිලි කොමිසමට ගරු කළේ නැත. ඒ වෙනුවට පුවත්පත් පැමිණිලි කොමිසම ඒ මාධ්‍ය ආයතන හමුවේ වැඳ වැටෙන තත්වයක් නිර්මානය වී තිබිණි.


අවසානයේදී මේ සියල්ලෙන් වාසිය සැලසී ඇත්තේ නිදහස් අදහස් ප්‍රකාශනයට බිය පාලකයන්ට ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-20

What a time bomb Sri Lanka's Eastern Province Chief Minister Pillaiyan is sitting on!

(May 20, 2011, Lanka Polity) Sri Lanka government sources say that the Tamil People's Liberation Tigers (TMVP) party led by Eastern Province Chief Minister Sivanesathurai Chandrakanthan agreed to corporate with the government further as TMVP delegation met the President Mahinda Rajapaksa yesterday.

The TMVP leader and the Chief Minister raised the problems he and his party men were facing. A team of Army reportedly raided the house of the Chief Minister without a warrant, as TMVP accuses. It is reported that the President instructed the Inspector General of Police to take measures to conduct investigations in line with the law and to pay due respect to the privileges of the Eastern Province Chief Minister.

Then who ordered the raids, if the President is against them? Some media reported that the raid was conducted under the orders of the Defense Secretary Gotabhaya Rajapaksa.

The Police was also instructed by the President to speed up investigations regarding the arrested TMVP provincial councilor Pradeep Master. He was arrested last week in suspicion for the killing of a coordinating secretary of Deputy Minister Vinayagamurthi Muralitharan, a rival of the TMVP.

Read in Lanka Polity

මේ ලිපියට ඔබ කැමති නම් වෙන අයත් එක්කත් බෙදා ගන්න

ඉන්දියාවේ ලංකා ආණ්ඩුවේ කණෙන් අල්ලා හොල්ලා කී පසුවත් බැරි නම් ඉතින් බැරි දේ බෑ ම ය

(2011 මැයි 20, W3Lanka) විදේශ ඇමති මහාචාර්ය ජී.එල්. පීරිස් ඉන්දියාවට ගියේ නම් එහි නායකයන් හමු වී රජය දරුස්මාන් වාර්තාව නමින් හඳුන්වන එක්සත් ජාතීන්ගේ මහ ලේකම්ට උපදෙස් දීම සඳහා පත් කළ කමිටුව විසින් සකසන ලද වාර්තාවට එරෙහිව ඉන්දියාවෙන් ප්‍රකාශයක් ලබා ගන්නටයි.


දැන් මේ වාර්තාවට එරෙහිව ප්‍රකාශ නිකුත් කරන්නට රටවල් සොය සොයා ඇවිද්දත්, ඇත්තෙන් ම ආණ්ඩුව මෙම කමිටුව හමු වී කරුණු ඉදිරිපත් කර ඇත. එහෙත් බාගෙට ය. ව


විදේශ ඇමතිවරයා ඉන්දීය අගමැති ආචාර්ය මන් මෝහන් සිං, විදේශ කටයුතු ඇමැති එස්.එම්. ක්‍රිෂ්ණා, මුදල් ඇමති ප්‍රනාබ් මුඛර්ජි, ජාතික ආරක්ෂක උපදේශක ශිවෂංකර් මෙනන් හා විදේශ ලේකම් නිරූපමා රාඕ සමග සාකච්ඡා පවත්වා ඇත. ඒ අනුව, ඔහුගේ ගමන ඉහළ පෙළේ දූත ගමනක් බව පෙනේ. බොහෝ විට එය ලංකාවේ ආණ්ඩුවට ඉන්දියාවෙන් ලැබුණු ඉහළ ම අවස්ථාව වන්නට පුළුවන.


නැතිනම් මේ වෙලාවේ යා යුතුව ඇත්තේ ජී.එල්. පීරිස් නොව බැසිල් රාජපක්ෂ, ගෝඨාභය රාජපක්ෂ, ලලිත් වීරතුංග වැනි අයයි. මේ අය මින් පෙර ඉන්දියා ගොස් එකඟ වී ආ දේ නො කළ නිසා දැන් ඉන්දියාවට ආපසු පය ගහන්නට බැරි තත්වයක් තිබෙනවා විය හැකි ය. මී බෙටිත් බෙහෙතට ඕනෑ වනවා සේ ෆෙඩරල්වාදී මහාචාර්ය ජී.එල්. පීරිස්ගේ වටිනාකම ද මේ මොහොතේ ආණ්ඩුවේ නායකයන්ට දැනෙන්නට ඇත.


කෙසේ වෙතත්, විදේශ ඇමතිවරයා ගිහින් කතා කර එකඟ වී ආ දේ ගැන දිනමිණේ මැයි 18දා වාර්තා වූයේ මෙසේ ය: "එක්සත් ජාතීන්ගේ ආරක්ෂක මණ්ඩලයට අයත් සාමාජික රටවල සංඛ්‍යාව වැඩිවිය යුතු බවට ශ්‍රී ලංකා හා ඉන්දීය රජයන් එකඟත්වයට පැමිණ තිබේ.මීට අමතරව එම ආරක්ෂක මණ්ඩලයේ ස්ථිර සාමාජිකත්වය සහිත මුල් පෙළේ රටක් ලෙස ඉන්දියාව නම් කිරීම සඳහා පූර්ණ සහාය ලබා දෙන බව ශ්‍රී ලංකා රජය අවධාරණය කර ඇත."


ඇමතිවරයා තකහනියක් ඉන්දියා ගියේ ආරක්ෂක මණ්ඩලයේ ස්ථිර සාමාජිකත්වය පිළිබඳ ප්‍රශ්නයක් නිසා ද? නැත.


මේ සාකච්ඡා පිළිබඳ කෙටි රසවත් වාර්තා කිරීමක් නෙත් රේඩියෝ‍වේ වෙබ් අඩවියේ දුටිමි. ඒ මෙසේ ය: "ලක්රජයට මේ මොහොතේ උපකාර කිරීමට නම් ඔවුන් දේශීය වශයෙන් තමන්ට පැන නැගී ඇති ගැටලූ විසඳා ගත යුතු බව ඉන්දියාව පවසනවා. ඉන්දීය රජයේ විශේෂ ප‍්‍රකාශකයකු උපුටා දක්වන ද හින්දු පුවත්පත පවසන්නේ මේ පිළිබඳ පැහැදිළි පණිවිඩයක් පසුගියදා දෙරට රාජ්‍ය තාන්ති‍්‍රකයින් අතර සාකච්ඡාවේදී ලබාදුන් බවයි. ඉන්දීය රජය නිරන්තරයෙන් ලක්රජයේ මිතුරෙකු ලෙස කටයුතු කළා. එසේම ශී‍්‍ර ලංකාවේ පවත්නා ගැටලූ සම්බන්ධයෙන්ද තම රජය වඩාත් ඉහළ සැලකිල්ලක් දැක්වූ බවයි එම ප‍්‍රකාශකයා පෙන්වා දෙන්නේ. කෙසේ වෙතත් දේශපාලන විසඳුමක් කඩිනමින් ළ්‍ඟා කර ගැනීම වැනි කඩඉම්වලට ළඟාවීමට බලධාරීන් තවදුරටත් අපොහොසත් වී සිටිනවා. එහෙත් යුද්ධය අවසන් වී දෙවසරක් ගත වී ඇති මොහොතක එවැනි ගැටලූවලට සාර්ථකව ආමන්ත‍්‍රණය කිරීමට ලක්රජය සමත් වී තිබිය යුතු බවයි ඔහු වැඩිදුරටත් ප‍්‍රකාශ කළේ. දේශීය වශයෙන් ඇති වන ගැටලූ විසඳා ගැනිමකින් තොරව ජාත්‍යන්තරයේ නොයෙකුත් පාර්ශ්වයන් නගන පීඩනයන්ට මුහුණදීමටද සිය මිතුරාට නොහැකි බව එම ප‍්‍රකාශකයා වැඩිදුරටත් පෙන්වාදී තිබෙනවා."‍


ඇත්ත කතාව එයයි. මහාචාර්ය ජී.එල්. පීරිස් ඉන්දියාවෙන් අසාගෙන ඇවිත් සිය හාම්පුතුන්ට වාර්තා කරන තිත්ත කතාව ද එයයි.


මේ තිත්ත කතාව සැර බාල කර හෙවත් රාජපක්ෂ ආණ්ඩුවේ ගැත්තන්ට බොන්නට පුළුවන් ලෙස ෂැන්ඩි කර දිනමිණ ඉදිරිපත් කරන්නේ මෙසේ ය: "ශ්‍රී ලංකාවේ වත්මන් තත්ත්වය පිළිබඳව අවධානය යොමුකළ දෙරටේ නියෝජිතයන් මේ රටේ පැවැති ගැටුම්වලින් පසුව ජාතික ප්‍රතිසංධානයකට යොමු වීම සඳහා හොඳ අවස්ථාවක් නිර්මාණය වී තිබෙන බවටද පිළිගෙන තිබේ. මේ අතර ශ්‍රී ලංකා රජය ගෙන යන වැඩපිළිවෙළ ඉදිරියට ගෙන යමින් ශ්‍රී ලංකාවේ දෙමළ පක්ෂ සමඟ තවදුරටත් සාකච්ඡා කරමින් ඔවුන් සමඟ සුහදව කටයුතු කිරීමේ අවශ්‍යතාව පෙන්වා දී ඇත."


ජාතික ප්‍රතිසංධානයක් යනු රටේ ආණ්ඩු ක්‍රම ව්‍යවස්ථාවේ මූලික වෙනසකි.


අපි මහා ලොකු මහාචාර්යවරුන් නො වුණත්, ‍මේ සරළ ඇත්ත අපි 2008 මැයි 18දා ලංකාව කිරිබත් නාද්දී පවා අපි කීවෙමු. ඉන්දියාව එය මතක් කර දී ඇත්තේ ජී.එල්. පීරිස්ගේ කණෙන් ඇද හොල්ලා ය.


අවසානයේදී, මොනවා කතා කළත් දෙමළුන්ට මොකුත් නො දෙමු ය යන ජාතිවාදී ස්ථාවරයේ සිට ආණ්ඩුව දෙමළ ජාතික සන්ධානය සමග ආරම්භ කළ සාකච්ඡා වටය දැන් ආණ්ඩුවේ එක ම ගැලවිජ්ජාව වී තිබේ. ආණ්ඩුවේ නායකයන් ජාත්‍යන්තරව එන පීඩනයෙන් මිදිය යුත්තේ දෙමළ ජාතික සන්ධානය සමග බලය බෙදා ගැනීමකට එකඟ වීමෙනි.


මේ සාකච්ඡා පැවැත්වෙන්නේ 2002 සටන් විරාම ගිවිසුමෙන් පසු කොටි සංවිධානයත් සමග සාකච්ඡා පැවැත්වූ වාතාවරණයටත් වඩා යටත් මානස්කත්වයක සිටයි. කොටි සංවිධානය සාකච්ඡාවලදී දෙමළ ජනයාගේ එක ම නියෝජිතයන් ලෙස පිළි ගැනීම පිළිබද මහා කලබැගෑනියක් ඇති කළ අය අද ඔවුන් විසින් ම කොටි බළල් අණ්ඩක් ලෙස හඳුන්වනු ලබන දෙමළ ජාතික සන්ධානය දෙමළ ජනයාගේ එක ම නියෝජිතයා ලෙස පිළි ගෙන සාකච්ඡා කිරීම ගැන කියන්නේ කුමක් ද?


13වන ආණ්ඩු ක්‍රම ව්‍යවස්ථා සංශෝධනයෙන් පළාත් සභාවලට දුන් බලතල ආපසු ගැනීම ගැන කතා කළ අය ලබන 23දා දෙමළ ජාතික සන්ධානය සමග 13වන ආණ්ඩු ක්‍රම ව්‍යවස්ථා සංශෝධනය ඉක්මවා යන බලය බෙදීමේ රාමුවක් පිළිබඳ කරන සාකච්ඡා ගැන කියන්නේ කුමක් ද?


මහින්ද රාජපක්ෂ ආණ්ඩුවේ කොඳු නාරටිය වන්නේ දෙමළ අරගලය මර්දනය කිරීමට පක්ෂපාතී බලවේගයි. එවන් පදනමක් මත නැගී සිටින ආණ්ඩුවකට සාකච්ඡා මේ අන්දමින් ඉදිරියට ගෙන යාම බරපතල ගැටලුවක් වී ඇත. දැන් මේ සාකච්ඡා 'මග හිටියොත් තෝ නසී! ගෙදර ගියොත් අඹු නසී!" තත්වයට පැමිණ ඇත.


කුමන තත්වයක් තුළ හෝ දෙමළ ජාතික සන්ධානය සමග සාකච්ඡා පවත්වාගෙන යා යුතු ව ඇත. ඔවුන් සාකච්ඡාවලින් ඉවත් වුවහොත් යන්නේ බෙල්ල ය. සාකච්ඡාවල ඔවුන් රඳවා ගන්නට නම්, දැන් ඉතින් බලය බෙදා ගැනීම පිළිබඳ වහෙන් එරෝ නැතිව කෙළින් කතා කඝ යුතු ය. දෙන්න කැමති දේ කිව යුතු ය. කල් ගැනීම අවසන් වී තිබේ.


ප්‍රශ්නය ඇත්තේ දෙමළ ජාතික සන්ධානය සතුටු වන අන්දමේ බලය බෙදා ගැනීමක් කරන්නට ආණ්ඩුවට හැකියාවක් හා ජනවරමක් තිබේ ද යන්න තුළයි.


මෙහිදී එක්සත් ජනතා නිදහස් සන්ධානයෙන් නම් කිසි දිනෙක බලාපොරොත්තු වය නො හැකි අන්දමේ දුලබ රාජ්‍ය තාන්ත්‍රිකභාවයක් එක්සත් ජාතික පක්ෂය විසින් පෙන්වා තිබේ. ඒ වනාහි ආණ්ඩුව දෙමළ ජාතික සන්ධානය සමග ඇති කර ගන්නා එකගතාවන්ට එරෙහිව නො යන බවට එජාපය දෙමළ ජාතික සන්ධානයට ප්‍රතිඥාවක් දීමයි.


ජනතා විමුක්ති පෙරමුණ ද කඩය වසා ඇති, චම්පික රණවක බලවේගය දස සිල් සමාදන් වී සිටින මෙසමයේ හෝ ‍ලංකාවේ තිරසාර සාමයක් වෙනුවෙන් පියවර ගැනීමට මහින්ද රාජපක්ෂ ආණ්ඩුව අසමත් වන්නේ නම් ඉතින් බැරි දේ කවදාවත් ම බැරි ය.


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-19

Why military style leadership training for university students of Sri Lanka?

(May 19, 2011,  Lanka PolitySri Lanka President Mahinda Rajapaksa will inaugurate the so called 'leadership and positive attitude training course' of the new intake of university students on May 23.

The Ministry of Higher Education has made this course compulsory for the students. One who fails to follow this course without valid reason cannot enter into a university to follow a formal course. This condition appears to be a violation of human rights and definitely it will be raised in the courts, if enacted as per what is meant by the calling letter for this course.

The ceremonial inauguration will be held with the participation of the 10,000 students that are to be taken in for the training as the first group of the batch. All 20,000 students of the 2011 batch are to be trained under the programme.

They will be provided training at 28 training centers under the Defense Ministry. The duration of the training course is three weeks.

Read more in Lanka Polity


එස්.බී.ගේ සරසවි සිසු නායකත්ව පුහුණුව කුමකට ද?

(2011 මැයි 19, W3Lanka) 2011 වසරේ අලුතෙන් සරසවියට ඇතුල් වන සිසුන්ගේ ඉසෙඩ් ස්කෝර් ලකුණු නිකුත් වන්නටත් පෙර 20,000ක් වූ කණ්ඩායමෙන් 10,000ක් 23දා සිට නායකත්ව පුහුණු හා ධනාත්මක ආකල්ප වර්ධන පාඨමාලාවකට හමුදා කඳවුරු 28කට කැඳවා තිබේ. 


මෙම ‍ඓතිහාසික පුහුණුව ආරම්භ වන්නේ ජනාධිපතිතුමාගේ මූලිකත්වයෙන් ජනාධිපති මන්දිරයෙනි. එයට සහභාගි වීම අනිවාර්ය වේ. වලංගු හේතුවක් නොමැතිව සහභාගි නො වන්නන්ට සරසවි දොර වැසේ. ඒ නිසා එයට අකැමැති විය නො හැකි ය. කැඳවුම් ලිපියට අනුව, මෙම පාඨමාලාවට සහභාගි වූවා කියා සරසවිවලට අනිවාර්යයෙන් ම බඳවා ගන්නේ ද නැත. 


උසස් අධ්‍යාපන ඇමතිවරයා වරින් වර කියා ඇති පරිදි මෙය නවක වධය වැළැක්වීමේ පියවරකි. ලංකාවේ සරසවිවල ඇති ලොකු ම ප්‍රශ්නය නවක වධය ද? 


මේ කරන්නේ ඇතැම් විට නවක වධය ආණ්ඩුවේ තනි බුක්තියට පවරා ගැනීමක්දැයි සැක සිතේ. ආණ්ඩුව සිතන්නේ ජවිපෙ නවක වධය හරහා සිසුන්ගේ මොළ සෝදා අන්තරේට බඳවා ගන්නවා කියා ද? ඒ නිසා දැන් ඔවුහු ඒ වැඩේට තමන් ම බැස ඇතිවා වන්නට ද පුළුවන. 


යුද්ධයෙන් පසු හමුදාවටත් ඒ තරම් වැඩක් නැත. රණවිරු රියල් ස්ටාර් වැඩසටහනට ද ප්‍රේක්ෂක ප්‍රතිචාරය අඩු ය. එබැවින් යම් ගෞරවනීය තත්වයක් ඔවුන්ට හිමි වන මෙවැනි පුහුණු කිරීම් ආදිය ආණ්ඩුව අත්හදා බලනවා විය හැකි ය. පසුගිය කාලයේ හමුදා විසින් උරා ගන්නා ලද ඉහළ කුසලතාවන්ගෙන් යුත් ශ්‍රම බලකාය පශ්චාත් යුද කාලයේ ආණ්ඩුවට බරක් වී ඇති බව පෙනේ. වාමාංශිකයන් මෙම පුහුණුව ආණ්ඩුවේ සමාජය මිලිටරිකරණයේ පියවරක් ලෙස හැඳින්වුව ද, එය සැබැවින් ම හමුදා මිලිටරිහරණයේ පියවරක් ද විය හැකි ය. 


ප්‍රබල සතුරකුට එරෙහි යුද්ධයක් නොමැතිව සමාජයක් මිලිටරිකරණය කළ නො හැකි ය. 


මෙම පුහුණුව අනිවාර්ය කිරීම මානව හිමිකම් නඩු නිමිත්තක් වන්නට ඉඩ ඇත. 


උසස් අධ්‍යාපන ඇමති එස්. බී. දිසානායක පසුගිය කාලයේ මහ ඉහළින් ම ප්‍රවර්ධනය කරමින් සිටි දෙයක් වන්නේ පෞද්ගලික විශ්ව විද්‍යාල පිහිටුවීමයි. මෙවැනි හමුදා පන්නයේ නායකත්ව  පුහුණු ඒවාට ඇතුල් වීම සදහා අනිවාර්ය නැත. හමුදා පුහුණුවට අකැමැති අයට එසේ නම් පෞද්ගලික විශ්ව විද්‍යාලවලට ඇතුල් වීමට පුළුවන. 


නායකත්ව පුහුණුව ඒවායේ අනිවාර්ය නො වන්නේ ඒවායින් නායකයන් බිහි නො කරන නිසා ද? නායකයන් යනු නායකත්වයේ එල්ලී සිටීමට පක්ෂ මාරු කරන, වරක් අධිකරණයට අපහාස කර සිරගත වී පසුව ජනාධිපති සමාව මත නිදහස ලැබූ ඇමති එස්. බී. දිසානායක වැනි අය ද? එවැනි නායකයන් සරසවිවලින් බිහි වූයේ එදා හමුදාව විසින් දුන් නායකත්ව පුහුණුවක් නො තිබූ නිසා ද?


නායකත්ව පුහුණුවක් අත්‍යවශ්‍ය නම් එය හමුදා කදවුරුවලින් දෙන්නේ සරසවි ඇදුරන්ට එය බැරි නිසා ද? ඔවුන්ගේ වැටුප් වැඩි වීම ලබා නො දෙන්නේ ද ඇතැම් විට ඔවුන්ට නායකත්ව පුහුණුවක්වත් කර ගන්නට බැරි නිසා වන්නට විය හැකි ය. 


වැටුප් ඉල්ලීමට නායකත්වය දෙන සරසවි ඇදුරන් තමන්ට කරන මේ අවමානය ගැන නිහඬ ඇයි? 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-18

ආගම යනු උත්සව පවත්වන්නන්ට නිමිති සපයන දෙයකි

(2011 මැයි 18, W3Lanka) ලේඛකයා ඊයේ හැන්දෑවේ පාරේ යමින් සිටියදී තරුණ පිරිසක් තර්ජනාත්මක අන්දමින් කොඩි වනා ඔහු ගමන් කළ වාහනය නතර කළේ ය. දුම් දමන යම් බීමක් ප්ලාස්ටික් කෝප්පවලින් බෙදා දෙමින් තිබිණි. ලේඛකයාට තිබහක් ද තිබිණි.


කලින් වාහනය නො නැවැත්වීම නිසා කොඩි වනන තරුණයෙක් කුපිත වී සිටියේ ය. "ඒ හු--- මේව බොන්නෙ නැහැ බං, මළ පනිනවා කැ--" ඔහු කීවේ ය.


ලේඛකයා වාහනය නවත්වන්නත් පෙර ම ඔහුගේ මුහුණ අසල කෝප්ප රැඳුණු තසිමක් දිගු විය. "ආ, මාමා බොන්න. අංකල් බොන්න."


"අන්න ඌ නම් බොනවා පාර මැද්දෙම වාහනය නවත්තගෙන." කෝප්පය දුන් තරුණයා අනෙකෙකුට කීවේ ඔලොක්කුවට ය.


ඔවුන් බෙදමින් සිටියේ ඉරමුසු වැනි තැම්බුමක් හා සීනිවලින් හැදූ බාල වර්ගයේ හකුරු වර්ගයකි.


තිබහට බොන්නට නරක නැති දෙයක් වුවත්, දන් දුන් උන්ගේ කුණු හැසිරීම නිසා ලේඛකයා එම බීම බිව්වේ නැත. මිනිසකුට කෑමක්, බීමක් දී නිගා කිරීම බෞද්ධකමට පමණක් නො ව, මිනිස්කමට ද නො හොබී.


දේශීය පාන දන්සැල් දෙනවා කියන්නේ මාර ලේසි හා හරි දේශප්‍රේමී, නව රැල්ලේ වැඩකි. පිදුරු ටිකක් සොයාගෙන තම්බා එක් වරක් පමණක් පාවිච්චි කිරීමට තිබෙන ප්ලාස්ටික් කෝප්ප නො සෝදා එයට බීම පුරව පුරවා දන්සැල් දෙති. දන්සැලේ වැදගත් ම දෙය බෆල් සෙට් එකයි. ඔවුන් අතැති බෞද්ධ කොඩිය අනෙකාට බාධා කිරීම සඳහා යොදා ගන්නා ආක්‍රමණශීලී, ප්‍රචණ්ඩ උපකරණයකි.


2600වන ශ්‍රී සම්බුද්ධත්ව ජයන්තිය නමින් හඳුන්වනු ලබන, බොහෝ දෙනෙක් බුද්ධ වර්ෂ 2600 යයි වරදවා වටහා ගෙන සිටින, බුදුන් බුද්ධත්වය ලැබ 2600 වසරක් පිරීම නිමිත්තෙන් ඊයේ පන්සල් බෞද්ධයන්ගෙන් පිරී ඉතිරී ගියේ ය. සවස් වන විට ලොරිවල, වෑන්වල, අත් ට්‍රැක්ටර්වල නැගී වීදි සරන ජනයාගෙන් නගර උතුරා ගියේ ය. ඇතැමෙක් කොළ අතු එල්ලාගෙන නාගසලං ගසමින් ද, විකාර ඇඳුම් ඇඳගෙන ද බිග් මැච් දිනවල කොල්ලන් සතුටු වන්නා සේ ද වීදි සැරූ හ. හොර පොට්වල හැලි අරක්කු යහමින් විකිණිනි.


බලන්නට ඇති ඕනෑ ම ලයිට් එල්ලූ විගඩමක් ළඟ මිනිස්සු පොදි කෑ හ. පොකට් ගසන්නන්ට ඊයේ සරු දිනයක් විය.


මේ සටහන තබන අතරතුර හාල් ඉවර නිසා හන්දියේ කඩයට හාල් ගෙන එන්නට ගිය ලේඛකයාට කඩේ මුදලාලි කීවේ මිනිසුන් මෙතරම් පිං කරන්නේ 2012 ලෝක විනාශය සිදු වන නිසා බව ය.


ලේඛකයාට සිතෙන අන්දමින් නම්, දැන් අලුතෙන් ම පැතිරෙන ආගමික මතයක් අනුව, බුදුන් උපන් රට යයි ද කියන, ලෝකෙන් උතුම් රටේ ය, වෙනත් මිථ්‍යා දෘෂ්ටික රටවල ය කියා වෙනසක් නැත. මිනිස්සු එක් රැස් වන්නට, උත්සව පවත්වන්නට, ප්‍රීති වන්නට, නටන්නට, ගයන්නට, වයන්නට කැමති ය. නූතන ලෝකයේ ආගම් ඒ වෙනුවෙන් නිමිති සපයයි. ලෝකය එක ම යායකි.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-05-15

ජයලලිතා නම් අවාසනාවේ සාධකය | Jayalalitha the factor of misfortune

(2011 මැයි 15, W3Lankaප්‍රභාකරන්ට වරදින විට සියල්ල වැරදුණේ ය. 2009 මැයි මස ප්‍රතිඵල නිකුත් වූ ඉන්දීය මහ මැතිවරණයෙන් කොංග්‍රසය ජය ගැනීම ද ජයලලිතා ජයරාම්ගේ අන්නා ද්‍රවිඩ මුන්නේත්‍ර කලහම් පක්ෂයේ නායකත්වයෙන් යුක් සන්ධානය තමිල්නාඩුවේ පරාජය වීම ද ප්‍රභාකරන්ට අවාසිදායක ලෙස බල පෑවේ ය.


ලංකාවේ යුද්ධයට එරෙහිව තමිල්නාඩුවේ ජනතාව තීරණාත්මක ලෙස පුබුදුවා ගැනීමට කොටි සංවිධානය අසමත් විය. මහ ඇමති කරුණානිධි සහ ඉන්දීය මධ්‍යම ආණ්ඩුව ලංකාවේ දෙමළජනයාගේ ප්‍රශ්නයට සාකච්ඡාමය විසඳුමක් ලංකාවේ රජයෙන් ලබා දීමට කටයුතු කරන බවට තමිල්නාඩුවේ දෙමළ ජනයාට පොරොන්දු වූයේ ය.


කොටි සංවිධානය සමූලඝාතනය කිරීම පිණිස අවසානයේදී ඉන්දීය මධ්‍යම ආණ්ඩුවේත්, තමිල්නාඩු රජයේත් පූර්ණ අනුග්‍රහය ලැබිණි.


කොටි නායක ප්‍රභාකරන් ඝාතනය කර තව දින කීපයකින් දෙවසරක් පිරෙයි. ලංකාවේ දෙමළ ප්‍රශ්නයට තවමත් ස්ථිර විසඳුමක් දී නැත. තමිල්නාඩු ප්‍රාන්ත මහ මැතිවරණයෙන් ලංකාවට විරුද්ධ නායිකාවක වන ජයලලිතා ජයරාම් ජයගෙන ඇත.


ජයලලිතා ලංකාවේ නායකයන් යුද අපරාධ අධිකරණ වෙත ගෙන යා යුතු බව ප්‍රසිද්ධියේ පවසන්නියකි. එපමණක් නොව, ඉන්දියාව විසින් 1970 දශකයේදී ලංකාවට පවරා දෙන ලද කච්චතිවු දූපත ආපසු පවරා ගත යුතු ය යන ප්‍රතිපත්තියේ ද සිටින්නියකි. ඇගේ ජය ගැනීම පිටුපස ලංකාව සම්බන්ධයෙන් ඇගේ මෙම දැඩි ස්ථාවරයන් ද ඇති නිසා තමිල්නාඩු ආණ්ඩුව ඉදිරියේදී ලංකාව සම්බන්ධයෙන් දැඩි ප්‍රතිපත්තියකින් කටයුතු කරන බව නිසැක ය. එසේ ම, මන්මෝහන් සිංගේ නායකත්වයෙන් යුත් ඉන්දීය කොංග්‍රස් ආණ්ඩුව ද ජනප්‍රියත්වයෙන් පිරිහෙමින් ඇති වකවානුවකයි ජයලලිතාගේ ජයග්‍රහණය වාර්තා වන්නේ. පසුගිය මහ මැතිවරණයේදී ඇය සන්ධානගත වු සිටියේ හින්දු ආගමික පදනමකින් ලංකාවේ දෙමළ ජනයාට සහයෝගය දෙන භාරතීය ජනතා පක්ෂය සමගයි.


2009දී තමිල්නාඩුවේ හා ඉන්දියාවේ සිදු වූ දේ ප්‍රභාකරන්ගේ අවාසියට සිටියේ යම් සේ ද අද වන විට එහි සිදු වන දේ මහින්ද රාජපක්ෂගේ අවාසියට සිට ඇත.


මහින්ද රාජපක්ෂ ආණ්ඩුවට එරෙහිව නැ‍ඟෙමින් තිබෙන යුද අපරාධ චෝදනාවන්ගෙන් ගැලවීම පිණිස එකම මාර්ගය ඇත්තේ දෙමළ ජනයා සමග සංහිඳියාව සඳහා ගන්නා පියවර තුළ ය. එනම්, ලංකාවේ තිරසාර සාමයක් ඇති කිරීමට සමත් වන්නේ නම් පමණි. තිරසාර සාමයක් ඇති කිරීම යනු දකුණේ කලබල ඇති කර ගැනීම ද නො වේ.


උතුරේ හා නැගෙනහිර තත්වය සාමකාමී යයි කියන්නේ රජයේ මාධ්‍යයි. එහෙත්, පසුගිය දින කීපයේ අමුතු සිදුවීම් දෙකක් මඩකලපුවේ සිදු විය. නාඳුනන තුවක්කුකරුවෝ කරුණාගේ සම්බන්ධීකරණ ලේකම්වරයකු වූ හිටපු පැරා මිලිටරි ඔත්තුකරුවකු හා පිල්ලෛයන්ගේ ආධාරකරුවකු වෙඩි තබා මරා දැමූ හ. 


ලංකාවේ රජය මෙතෙක් කල් සංහිඳියාව යයි කියුවේ දෙමළ ජනයා බියපත් කර කට ඇරීමට නො දී පවත්වා ගැනීමේ දක්ෂතාවටයි. ඇත්තෙන් ම, එහිදී ලංකාවේ ආණ්ඩුව අති දක්ෂ විය. යුද්ධයේ අවසාන කාලයේ රජය විසින් ප්‍රකාශයට පත් කරන ලද යුද මුක්ත කලාපයේ සිටි දෙමළ ජාතික සන්ධාන මන්ත්‍රීවරයා සහ රෝහල්වල සිටි වෛද්‍යවරු ආදීන් ලවා යම් යම් ප්‍රකාශ පවා නිකුත් කරවා ගන්නට ආණ්ඩුව සමත් වී තිබේ. එහෙත්, ඔවුන් රහසින් කුමන විස්තර දරුස්මාන් කමිටුව වෙත ලබා දුන්නා ද යන්න අපි නො දනිමු.


නිරායුධ කර, බිම දාගෙන පහර දී, නැගිටපියව් කියා, තුවක්කුවලින් වට කරගෙන, "දැන් තොපට හොඳයි නේ ද?" කියා ඇසූ කල යමෙකු "හරි ෂෝක්!" යයි කියන ප්‍රකාශය දැන් ඉතින් සාමාන්‍ය තත්වය හා සංහිඳියාව ඇති වී තිබේ යයි පෙන්නීමට උපයෝගී කර ගැනීම අසාර්ථක ය.


සිහල ජාතිවාදී අන්තවාදීන්ගේ බලපෑමට යට වී තිබෙන ආණ්ඩුව මෑතක් වන තුරු ම සිටියේ සුළුතර ජාතීන්ට කිසිදු බලයක් නො දෙන ස්ථාවරයකයි. ‍දෙමළ ප්‍රශ්නයට විසඳුම් දෙන්නැයි ජාත්‍යන්තර පීඩනය වැඩි වන විට දෙමළ ජාතික සන්ධානය සමග නිකමට වගේ සාකච්ඡා ආරම්භ කරන ලද මුත්, දැන් දෙමළ ජාතික සන්ධානය ඉන්නේ සාකච්ඡා ආරම්භ කරද්දී සිටි බියගුළු තත්වයේ නො වේ. 


වැඩිය කට ගහලා ගෙදර යන්න නො ලැබේ ය යන බිය දැන් දෙමළ ජාතික සන්ධානයට නැත. උපරිම බලය බෙදීමක් ඉල්ලන්නැයි දෙමළ ජාතික සන්ධානයට කියා ඇත්තේ ඉන්දීය මධ්‍යම රජයයි. ආණ්ඩුව දිවි හිමියෙන් නො දෙන බව සපථ කර සිටි පළාත් සභා සඳහා වූ පොලිස් හා ඉඩම් බලතල ද ඉල්ලන්නැයි ඉන්දීය රජය දෙමළ ජාතික සන්ධානයට කියා ඇති බව ද එතැනින් නො නැවතී දරුස්මාන් වාර්තාවෙන් මතු වූ තත්වය හමුවේ ලංකාවට ඉන්දීය සහයෝගය දෙන්නට එය කොන්දේසියක් බවට පත් කරන්න ද සැරසෙන බව අද Sunday Times මුල් පුවත හෙළි කරයි. 


දරුස්මාන් වාර්තාව නිකුත් වූ හැටියේ දෙමළ ජාතික සන්ධානය එය අගය කළේ ය. හිටපු අගමැති රත්නසිරි වික්‍රමනායක එයට විරෝධය පා දෙමළ ජාතික සන්ධානයක් සමග සාකච්ඡා කරන රජයේ කමිටුවෙන් ඉල්ලා අස් වූයේ ය. කොයි තරම් චණ්ඩි වුණත්, දෙමළ ජාතික සන්ධානයට එරෙහිව කටක් අරින්නටවත් ආණ්ඩුවේ සිටින වෙන කිසිවෙක් අසමත් ය.


ආණඩුව මහ ලොකුවට ගෙන ආ සෙනෙට් සභා යෝජනාව දෙමළ ජාතික සන්ධානය පයිසෙකට හෝ ගණන් ගෙන නැත. එය පිළිබඳ සලකා බැලීමට පෙර 13වන ආණ්ඩු ක්‍රම ව්‍යවස්ථා සංශෝධනය පූර්ණව ක්‍රියාත්මක කළ යුතු බව සුරේෂ් ප්‍රේමචන්ද්‍රන් අද Sunday Times පුවත්පතට කියා ඇත. 


දෙමළ ජාතික සන්ධානයට බැන්න රත්නසිරි හොරණ ය. රාජ්‍ය නො වන සංවිධාන සමග ඉතා ළග සම්බන්ධකම් තිබුණු ඉතිහාසයක් ඇති, බටහිර ආධාර ලබන ලිබරල් පක්ෂයේ නායක රජීව විජේසිංහ රත්නසිරි වෙනුවට කමිටුවට පත් වී සාකච්ඡා හෝ ගා සිදු වෙයි. මොනවා කතා කළත් කිසිවක් දෙන්නේ නැති ය යන ආණ්ඩුවේ රහසිගත ප්‍රතිපත්තියට කුමක් වේ ද යන්න අපි නො දනිමු. එහෙත් එකක් පැහැදිලි ය. මේ සාකච්ඡා සිදු වන්නේ ආණ්ඩුවට ඕනෑ හැටියට අර මාක්ස්වාදී තිස්ස විතාරණගේ සර්ව පාක්ෂික නියෝජිත කමිටුව කකා බිබී නඩලං නැටූ අන්දමට නො වේ. සාකච්ඡා න්‍යාය පත්‍රය තීරණය කරන්නේ ආණ්ඩුව නො ව දෙමළ ජාතික සන්ධානයයි. සාකච්ඡා වන්නේ එදා එපා කී ෆෙඩරල් ක්‍රමයේ විසඳුමක් ගැනයි. ඒ පිළිබඳව තොරතුරු දෙපාර්ශවය ම හෙළි කරන්නේ නැත. හැංගි හැංගි වෙස් බැන්දාට නටන විට සියල්ල එළියට එනු ඇත. ආණ්ඩුව ඉන්නේ 'ෆෙඩරල් උගුලක ය'. උගුල අටවා ඇති දෙමළ ජාතික සන්ධානය හයිය ගන්නේ ඉන්දියාවෙන් හා බටහිරිනි. ලංකාවේ ආණ්ඩුව ඉතින් බටහිර විරෝධී ජාතික චින්තනය මත පදනම් වුණ එකක් නේ.


ප්‍රභාකරන් මරා කිරිබත් කමින් කළ ජය පැන් බීමෙන් දෙවසරකට පසු, සිංහල ජාතිවාදීන් ලංකාව ඔවුන්ගේ ම වචනවලින් 'දෙකඩ වෙන්නට ඔන්න මෙන්න තත්වයකට'‍ හෙවත් ෆෙඩරල් ව්‍යවස්ථාවක් යෝජනා කරන තත්වයට හෝ 'රට බෙදීමේ මුල් පියවර වන' බලය බෙදීමේ තත්වයට හෝ ඇද දමා තිබේ. ඒ බව රටේ ජනතාවගෙන් වසං කිරීමට ද ඔවුහු සමත් වී තිබේ. එහෙත්, ඒ කොතරම් කලකට ද යන්න අපි නො දනිමු.


සිංහල ජාතිවාදී බලවේග මේ ආණ්ඩුව පත් කර ගත්තේ දෙමළ ජනතාවට බලය බෙදන්නට නො වේ. එහෙත්, ඔවුන් නිසා රාජපක්ෂ ආණ්ඩුව 'සාකච්ඡා උගුලක' සිර වී ඇත. ආණ්ඩුව නහයට උඩින් වතුර ගලන එක වළක්වා ගන්නට ඇගිලි තුඩින් ඉස්සී සිටියදී සිංහල ජාතිකවාදීහු දස සිල් සමාදං වී 'අපට මොකද අපි දස සිල් උපාසක' යි කියති.


කවුරු කවුරුත් අත සෝදා ගනිමින් සිටිති. තමන්ගේ පිඟානට සියල්ල බෙදා ගත් අයට දැන් විකාල භෝජන කන්නට සිදු වී තිබේ.


මේ ලිපියට ඔබ කැමති නම් වෙන අයත් එක්කත් බෙදා ගන්න