2011-11-30

ජවිපෙ වාමාංශය මේ එන්නේ කොටුවෙන් පිටට ද?

එදා ඔබ වැළඳ ගත් සහෝදරයෝ අද ඔබේ සැක කරති. ඔබ පාදස්තල මත නංවා පිළිම ලෙස පිදුවෝ අද ඔබේ සිරුරු පරීක්ෂා කරන්නට අවශ්‍ය බව කියති.


ඔබේ දහදිය මහන්සියෙන් ඉදි කළ ඔබේ පක්ෂයේ මූලස්ථානය අද ඔබට තහනම් කලාපයකි.


අද ඔබ ද ද්‍රෝහීහු පිරිසකි. ලෝකයේ බහුතරය ඔබ වැනි ද්‍රෝහියෝ ය.


ඉතින් ඔබත් ලෝකය සමන්විත වී ඇත්තේ සහෝදරයන්ගෙන් හා ද්‍රෝහීන්ගෙන් පමණකැයි සිතා සිටි සමය නිමා වී ද?

ඔබ ම තනා ගත් සිරගෙදරකින් පිටතට තබන ඔබේ පා යථාර්ථයේ මහ පොළව පාගන්නට සමත් වේ ද? 

රතු කොඩිවල, දෑකැති මිටිවල, මාක්ස් එංගල්ස් ලෙනින් රූපවල සෙවණේ සිදු වන නොමිනිස්කම් හඳුනා ගැනීමට ඔබ සමත් වේ ද? 

ජවිපෙ නිල අයිතිය වෙනුවෙන් දැඩිව සටන් නො කරන්නට ඔබ තීරණය කර ඇති බව අපේ නිරීක්ෂණයයි.

එහෙත්, ඔබ කරන්නට යන්නේ කුමක්ද යන්න අපට තවමත් පැහැදිලි නැත. 

සරණ අසරණ කළ වතුර බෝතල් වලිය

ජනාධිපති හෙවත් මුදල් ඇමති අයවැය කතාව ඉදිරිපත් කරද්දී ඔහුට වැඩ පෙන්නමින් විපක්ෂයේ මන්ත්‍රීන්ට පහර දුන් පිරිස් අතරින් ජනාධිපති ළඟට වතුර බෝතලයක් විසි කළ අසරණ සරණ ගුණවර්ධනට පමණක් තෝරා දඬුවම් දී තිබේ.


ඔහුට සතියක් පාර්ලිමේන්තු තහනම් ය. සමහර විට පඩි කැපෙනවා ද විය හැකි ය.


මේ අසරණ සරණ ගුණවර්ධන වතුර බෝතලෙන් ගසා ඇත්තේ විපක්ෂ නායකවරයාට ය. එසේ ගසා ඇත්තේ ලොක්කාගේ කණ ළඟින් යන්නට ය. මූඩිය ගැලවුණු නිසා ලොක්කාගේ සරම ද තෙමමින් වතුර බෝතලය විපක්ෂ නායකවරයාගේ කකුල මුල වැටී ඇත.


අසරණ සරණට කෙළ වී ඇත්තේ ඔහු විසි කළ වතුර බෝතලය ගිය කණ ළඟ ඔටුන්නක් ඇති බව අමක වීම නිසා ය. වලි ඔහොම තමා ය.


රට පාලනය කරනවා ය නැති ය කියා නැත. ජන රාශිවල පවතින්නේ එයට ම ආවේණික හැසිරීම් ය.


වතුර බෝතලය කණ ළඟින් ගිය පසු කලබල වූ මේ අයුතු ජන රාශියේ නායකයා 'කවුද ගැලරියේ ඉඳන් වතුර බෝතල් ගහනවා. පොලිස්කාරයන්ට හොයා බලන්න කියන්න" කියා ද පවසා ඇත.  අනේ පව් වීරෝදාර පොලිස් විරුවෝ!


කෙසේ වුවත් අසරණ සරණ එදා වලියේ වීඩියෝ දර්ශනවල සිටි ප්‍රධාන පෙළේ වලිකාරයෙක් නො වේ. සයිඩ් එකෙන් සිට රියල් එක ගලෙන් කුරුල්ලන් දෙන්නෙක් මරන්නට තැත් කළ පොරකි. 


මහ වලිකාරයෝ පැත්තක ය. මේ කනිෂ්ඨ විද්‍යාලයේ ප්‍රින්සිපල් කර ඇත්තේ පන්තියේ පස්ස පේළියේ සිටි සාමාන්‍ය නරක ළමයකු අල්ලා ඌට තඩි බෑමයි.


මේ වනාහි විනය විරෝධී හැසිරීමකට දුන් දඬුවමක් නොව වෙන මොකක්දෝ එකකට දුන් එකකි. සමහර විට අසරණ සරණගේ වෙන පක්ෂපාතිත්වයන් සලකා දුන් දඬුවමක් වන්නට ද පුළුවන.


කථානායකතුමා තමා පිළිබඳව මෙම තීරණය ගනු ලැබූ මොහොතේ තමා උත්සවයකට සහභාගි වී සිටි අතර එහිදී නැඟුණු චෝදනා තමා ප්‍රතික්‌ෂේප කරන බව අසරණ සරණ පවසයි.


"එදා ඔය කලබලය සිදුවූ මොහොතේ මා සිටියේ පාර්ලිමේන්තුවේ උඩු මහලෙයි. ඔය කලබලය ටී.වී. වලින් පත්තරවලින් ප්‍රදර්ශනය කළා. ඔය එක ඡායාරූපයකවත් පෙනෙන්නට මා හිටියේ නැහැ. ටී.වී. දර්ශනවලින් මගේ රූපේ තිබුණේ නැහැ. ඒත් හුඟ දෙනකුට පෙනිලා තියෙන්නේ මා විතරයි. මා දන්නා තරමින් මම නම් වැරැද්දක්‌ කරලා නැහැ." අසරණ සරණ දිවයින පුවත්පතට කියා ඇත.


මේවා අහලා පණ පලයං පෙරේදා ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-29

ලංකාවේ ශ්‍රේෂ්ඨාධිකරණයත් අහන නඩුවල හැටි!

ගණිකා නිවාස ආඥා පනතේ 2 (අ) වගන්තිය යටතේ දඬුවම් පැමිණවිය හැකි වැරදි වන්නේ ගණිකා නිවාසයක් පවත්වාගෙන යාම, කළමනාකරණය කිරීම හා ඊට සහාය වීම මිස පුරුෂයින් සන්තර්පණය කිරීමේ කාර්යය සඳහා ගණිකා මඩමක සේවය කිරීම නො වන බැවින් ජිනා මැඩම්ගේ කොල්ලුපිටිය ලිංගික සේවා මධ්‍යස්ථානයේ සේවය කළ ලිංගික ශ්‍රමිකයන් නිදහස් කිරීමට කොටුව මහේස්ත්‍රාත් ලංකා ජයරත්න මෙනෙවිය නියෝග කර ඇත.


මෙය ඉතා සාධාරණ නඩු තීන්දුවකි. මක් නිසා ද යත්, මෙම ලිංගික ශ්‍රමික කාන්තාවන්ගෙන් සේවා ලබා ගත් පිරිමින්ට නඩු පැවරීමක් ද සිදු වී නැති බැවිනි.


ලංකාවේ පිරිමින් වෙනුවෙන් විශාල සේවයක් කළ ජිනා මැඩම්ගේ ලිංගික සේවා මධ්‍යස්ථානය නම් ලංකාවේ නීතියට පටහැණි ය. ඒ නිසා ඇය ගැන නම් දුක ය.


වගකීමක් ඇති, ශ්‍රී ලංකා රජයේ ලියාපදිංචි වෙබ් අඩවියක් වන දිනමිණ පුවත්පත මෙන්න මෙතැන කියන ආකාරයට ඇයට නඩු දමා ඇත්තේ ශ්‍රේෂ්ඨාධිකරණයේ ය. වගකීමක් ඇති පුවත්පතක් නිසා එය ශ්‍රේෂ්ඨාධිකරණයට අපහාස කිරීමක් හෝ බොරුවක් හෝ වෙන්නට නම් බැරි ය. 


අනේ අම්මප, ලංකාවේ ශ්‍රේෂ්ඨාධිකරණයත් අහන නඩුවල හැටි!

මේ ලිපියට ඔබ කැමති නම් වෙන අයත් එක්කත් බෙදා ගන්න

දෙමළ ජාතික සන්ධානයේ හිටපු මන්ත්‍රී පුතා ජනාධිපති, ආරක්ෂක ලේකම් හා සරත් ෆොන්සේකා මරන්න හැදුවා ය කියා නඩු

කොටි සංවිධානයට එරෙහි යුද්ධයේ අවසන් අදියරේදී එල්.ටී.ටී.ඊ. පාලන ප්‍රදේශයේ රැඳී සිට කොටින්ගේ පරාජයත් සමග අවතැන් වූ ජනයා සමග රජයේ පාලන ප්‍රදේශයට පැමිණීමෙන් පසුව අත්අඩංගුවට ගෙන පුරා මාස අටක පමණ කාලයක් කොළඹ අත්අඩංගුවේ තබාගෙන සිටි දෙමළ ජාතික සන්ධානයේ වන්නි දිස්ත්‍රික් පාර්ලිමේන්තු මන්ත්‍රී සතාසිවම් කනගරත්නම් රජය 2010 ජනවාරි මස විසින් නිදහස් කර තිබේ.


ඔහුට විරුද්ධව කිසිදු චෝදනාවක් නඟා නො තිබිණි.


කනගරත්නම් මන්ත්‍රීවරයා යුද්ධයේ අවසන් අදියරේදී යුද මුක්ත කලාපයේ සිදු වූ සිදුවීම් පිළිබඳ ප්‍රබල සාක්ෂියකරුවකු වීම ඔහු මෙසේ රඳවා තබා ගැනීමට හේතු විය.


සතාසිවම් කනගරත්නම් නිදහස් කළේ ජනාධිපති මහින්ද රාජපක්ෂට සහාය දීමේ කොන්දේසියක් පිට බව දෙමළ ජාතික සන්ධානය පැවසී ය.


මෙම මන්ත්‍රීවරයාගේ පුත්‍රයා ද කොටි සංවිධානය විසින් කොළඹට එල්ල කරන ලද ගුවන් ප්‍රහාරවලට උදව් කළේ ය යන චෝදනාව මත රඳවා තබාගෙන සිටින අතර ඔහු නිදහස් කර ගැනීම සඳහා උදව් කරන බවට ද ආණ්ඩුව එහුට පොරොන්දු වී තිබුණු බව ඒ දිනවල වාර්තා විය.


එසේම යුද්ධයේ අවසන් දිනවලදී ඔහු දුටු කිසිවක් ප්‍රකාශ නො කරන ලෙස ද ඔහුට උපදෙස් දී ඇති බව දැනගන්නට තිබිණි.


කනගරත්නම් මන්ත්‍රීවරයාට වවුනියාවේ මන්නාරම් පාරේ අලුතින් ඉදි කරන ලද රජයේ සංචාරක බංගලාවක් ද, රජයේ වාහනයක් සහ පොලිස් ආරක්ෂාව ද සපයා තිබිණි.


සතාසිවම් කනගරත්නම් 2000 වසරේ පැවති මහ මැතිවරණයේදී පාලක එක්සත් ජනතා නිදහස් සන්ධානයේ අපේක්ෂකයකු ලෙස වන්නි දිස්ත්‍රික්කයට තරග කර පරාජය විය.


සතාසිවම් කනගරත්නම් පිළිබඳ ඉන් පසු අසන්නට නො ලැබිණි.


මෙන්න ඔහුගේ පුත්‍රයා පිළිබඳ අලුත් ම පුවත: (උපුටා ගැනීම දිනමිණෙනි)


ජනාධිපති මහින්ද රාජපක්‍ෂ, ආරක්‍ෂක ලේකම් ගෝඨාභය රාජපක්‍ෂ සහ හිටපු උසස් හමුදා නිලධාරියකු වෙත මරාගෙන මැරෙන ප්‍රහාර එල්ල කැර ඔවුන් ඝාතනය කිරීම සඳහා කුමන්ත්‍රණය කරන ලදැයි හිටපු ද්‍රවිඩ පාර්ලිමේන්තු මන්ත්‍රීවරයකුගේ පුත්‍රයකුට හා තවත් පුද්ගලයකුට එරෙහිව නීතිපතිවරයා විසින් කොළඹ මහාධිකරණය හමුවේ ඊයේ (28) නඩු පවරන ලදී.

මෙසේ නඩු පවරනු ලැබුවේ හිටපු පාර්ලිමේන්තු මන්ත්‍රීවරයකු වූ සතාසිවම් කනගරත්නම් මහතාගේ පුත්‍රයා වන කනගරත්නම් ආදිත්‍යන් හෙවත් ගිරිදරන් හෙවත් රහ්වින් හෙවත් කන්නන් (32) සහ කන්දවම් නේගුල්හාන් හෙවත් ඉම්බන් හෙවත් යෝගලරත්න දයාබරන් හෙවත් සෙල්ලා නමැත්තන්ටයි.
2009 ජනවාරි පළමුවැනිදාත්, නොවැම්බර් මස පළමුවැනිදාත් අතර කාලයේ කොළඹ දී ජනාධිපති මහින්ද රාජපක්‍ෂ, ආරක්‍ෂක ලේකම් ගෝඨාභය රාජපක්‍ෂ හා හිටපු යුද හමුදාපති සරත් ෆොන්සේකා යන මහත්වරුන් ඝාතනය කිරීම සඳහා කුමන්ත්‍රණය කරන ලදැයි විත්තිකරුවන් දෙදෙනාට එරෙහිව නීතිපතිවරයා විසින් නඩු පවරා ඇත.

ත්‍රස්තවාදය වැළැක්වීමේ පනත යටතේ මේ නඩුව පවරා ඇති අතර විත්තිකරුවනට එරෙහිව ලේඛන තුනක් ද සාක්කිකරුවන් 13 ක් ද, ඉදිරිපත් කිරීමට බලාපොරොත්තු වන බව නීතිපතිවරයා විසින් අධිකරණයට දන්වා ඇත.

මෙහි විත්තිකරුවන් දෙදෙනාට එරෙහිව සාක්කිකරුවන් අතර ගේගුල්හාන් නමැති විත්තිකරු විසින් කළ ප්‍රකාශය සටහන් කළ ගල්කිස්ස අතිරේක මහේස්ත්‍රාත් රුචිර වැලිවත්ත, අධිකරණ භාෂා පරිවර්තක කිංස්ලි යන මහත්වරු ද වෙති.
කියවන්න  Heroes Day assault on Tamil political prisoners and reconciliation

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-28

ජවිපෙ මධ්‍යම කාරක සභාව හෙට - බහුතර බලය සෝමවංශ පිලට

ජවිපෙ මහ ලේකම් ටිල්වින් සිල්වා පක්ෂ මධ්‍යම කාරක සභාව කැඳවා එහි සාමාජිකයන්ට ලියුම් යවා තිබේ. 


එම මධ්‍යම කාරක සභා රැස්වීම හෙට පැවැත්වීමට නියමිත ය. 


ජවිපෙ නායකත්වයේ මෙම තීරණය ප්‍රේමකුමාර ගුනරත්නම් පාර්ශ්වය අන්දමන්ද කර ඇති බව වාර්තා වේ. හෙට මධ්‍යම කාරක සභා රැස්වීම පිළිබඳ ඔවුන් තවමත් තීරණ්‍යකට එළැඹ නැත. 


මේ වන විට ජවිපෙ මධ්‍යම කාරක සභාවේ සංයුතිය මෙසේ ය. 


සාමාජික ගණන 23යි. අපගේ නිරීක්ෂණ අනුව, ඒ අතරින් බහුතරයකගේ සහයෝගය හිමි වන්නේ සෝමවංශ අමරසිංහ පාර්ශ්වයටයි. 


සෝමවංශ අමරසිංහ පාර්ශ්වය: 
  1. ටිල්වින් සිල්වා
  2. සෝමවංශ අමරසිංහ
  3. අනුර කුමාර දිසානායක
  4. විජිත හේරත්
  5. නිහාල් ගලප්පත්ති
  6. සුනිල් හඳුන්නෙත්ති
  7. කේ.ඩී. ලාල් කාන්ත
  8. බිමල් රත්නායක
  9. ලක්ෂ්මන් නිපුනආරච්ච්
  10. සමන්ත විද්‍යාරත්න
  11. නලින්ද ජයතිස්ස
  12. මහින්ද ජයසිංහ



ප්‍රේමකුමාර් ගුනරත්නම් පාර්ශ්වය:

  1. ජී. කුලරත්න
  2. පුබුදු ජයගොඩ
  3. දිමුතු ආටිගල
  4. අජිත් කුමාර
  5. එස්.කේ. සුබසිංහ
  6. රාමලිංගම් චන්ද්‍රසේකරන්
  7. දිමුතු අබේකෝන්
  8. වරුණ රාජපක්ෂ
  9. දුමින්ද නාගමුව
  10. චමීර කොස්වත්ත
  11. ජිනදාස කිතුලෙගොඩ *
* ජිනදාස කිතුලෙගොඩගේ පක්ෂපාතිත්වය පිළිබඳ මෙම සටහන තබන අවස්ථාවේදී තහවුරු කර ගත නො හැකි විය.


ජවිපෙ නිල නො වන දේශපාලන මණ්ඩලය ද නියෝජනය කරමින් සත්‍ය පක්ෂ මධ්‍යම කාරක සභාවේ සිටි ඔපාත, ප්‍රේමකුමාර ගුනරත්නම් වැනි අප්‍රකට නායකයන් මෙම මධ්‍යම කාරක සභා රැස්වීම සඳහා කැඳවා නැත. ඔවුන් වැඩි දෙනෙක් ප්‍රේමකුමාර් ගුනරත්නම් පාර්ශ්වයේ අයයි.


මෙම මධ්‍යම කාරක සභා රැස්වීම අතිශය නිල ස්වභාවයකින් පැවැත්වීමට පක්ෂ නායකත්වය කටයුතු කරන බව පැහැදිලි ය. ඔවුන් ඒ සඳහා සහභාගි වන්නේ කළ යුතු දේ පිළිබඳ පැහැදිලි පූර්ව සැලසුමකින් යුතුව ය. 


ජවිපෙ ප්‍රේමකුමාර පාර්ශ්වය මෙහිදී මුහුණ දෙන ප්‍රශ්නය වන්නේ පක්ෂයට අදාළ නීතිය හමුවේ ඔවුන් දුර්වල හා අපරිණත තත්වයක් ප්‍රදර්ශනය කිරීමයි. ජවිපෙ නායකයන් තරමට ම ඔවුන් ධනේශ්වර නීතිය ඔස්සේ කටයුතු කිරීමට සමත් වුවහොත් හෙවත් නීතියේ හිදැසකින් රිංගා යාමට සමත් වුවහොත් ජවිපෙ අයිතිය ද ලංකා පුවත්පතේ අයිතිය වැනි දිග නඩුවක් බවට පත් කර ගැනීමට පුළුවන. එහෙත්, එයින් දෙපාර්ශ්වයෙන් කිසිදු පාර්ශ්වයකට සෙතක් අත් නො වන අතර, ජවිපෙ දේශපාලනයේ දිග්ගැසුණු අර්බුදයක් ඇති කරනු ඇත. 


මෙම මධ්‍යම කාරක සභා රැස්වීම පූර්ව නිශ්චිත න්‍යාය පත්‍රයකට අනුව කඩිනමින් අවසන් කර ගැනීමට ජවිපෙ සෝමවංශ අමරසිංහ පාර්ශ්වය උත්සාහ කරනු ඇත. 


කැරලිකාරයින් යයි නම් කරනු ලබන මධ්‍යම කාරක සභිකයන් පිරිස පක්ෂයෙන් නෙරපා හැරීමේ යෝජනාවක් ජනවාරියේදී සැලසුම් කර තිබෙන පක්ෂ සම්මේලනය වෙත ගෙන ඒමට අවශ්‍ය පදනම ඔවුන් මෙහිදී සකසා ගනු ඇත. ඒ අනුව ඔවුන්ට අලුත් මධ්‍යම කාරක සභාවක් පත් කර ගනිමින් පක්ෂයේ නීත්‍යානුකූලව, පූර්ණ ලෙස හිමි කර ගැනීමේ අවස්ථාව හිමි වනු ඇත. 


මෙහි ඇත්තේ ධනේශ්වර නීතිය අනුව පක්ෂය හික්මවීමේ වැඩසටහනකි. ජවිපෙ ක්‍රම විරෝධී දේශපාලනය මුළුමනින් ම ධනේශ්වර නීතිය අනුව යළි හැඩගස්වා ගැනීමක් මේ ඔස්සේ සිදු වේ. 


ජවිපෙ මෙම තත්වයට මුහුණ දුන්නේ දීර්ඝ කාලයක් තිස්සේ ජවිපෙ අභ්‍යන්තරයේ මධ්‍යගත ප්‍රජාතන්ත්‍රවාදය අතහැර දමා අඥාදායක පාලයක් ඇතුළේ පවත්වාගෙන යාමේ ප්‍රතිඵලයක් ලෙසයි. 


කෙසේ වෙතත්, මෙම සිද්ධි විසින් ලංකාවේ රැඩිකල් වාම දේශපාලනයේ සංවිධාන ගැටලු හා මධ්‍යගත ප්‍රජාතන්ත්‍රවාදය දෙස නව දෘෂ්ටිකෝණයකින් බැලීමේ අවස්ථාව උදා කර දී ඇත. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-27

අධිවේගී මාර්ගයෙන් ජන ජීවිතයට කාන්දු වන්නේ ණය බර හා පොලියත්, දූෂණයේ ඕජසුත් පමණි

දක්ෂිණ අධිවේගී මාර්ගය අද විවෘත වේ.


එක්සත් ජාතික පක්ෂ ලෝක බැංකුව සමග එක්ව 'යළි පුබුදමු ශ්‍රී ලංකා' වැඩසටහන යටතේ යෝජනා කරන ලද මෙම ගාස්තු අය කරන අධිවේගී මාර්ගය සඳහා මුදල් යෙදවීම පිණිස විදේශ ආයෝජකයන් සොයා ගැනීම මුල් ඉලක්කය විය.


එහෙත්, එය සාර්ථක වූයේ නැත. අධිවේගී මාර්ගය හදන්න අවසානයේදී සිදු වූයේ රජයට ම ය. මෙම දැවැන්ත  ව්‍යපෘතිය ආරම්භ කිරීමේ හා ඒ සඳහා විශාල වශයෙන් මුදල් ණයට ගනිමින් එය අවසන් කිරීමේ ධෛර්යය තිබුණේ ජනාධිපති මහින්ද රාජපක්ෂට ය.


මේ පාර හැදීම තුළ දැවැන්ත වංචා රැසක් සිදු වූ බව පාර ආසන්නයේ ජීවත් වන බල්ලෝ පවා දනිති. ඔප්පු වී නැත. ඔප්පු වන්නට පරීක්ෂණ පැවැත්විය යුතු ය. පරීක්ෂණ පැවැත්විය යුත්තේ මහජනයා නොව ඒ සඳහා මහජන මුදලින් පවත්වාගෙන යනු ලබන ආයතන විසිනි.


කොට්ටාව මාකුඹුරේ සිට ගාල්ල පින්නදූව දක්වා දක්ෂිණ ලංකා අධිවේගී මාර්ගය ඉදිකිරීමට රජය වැය කර ඇති මුදල රුපියල් බිලියන 77කි. ඉඩම් අත්පත් කර ගැනීම සඳහා වැය කළ මුදල වන රුපියල් බිලියන 4.7 ක් ක් ද මෙයට ඇතුළත් ය.


මෙම මාර්ගය නිසා ඉවත් කරන ලද මිනිසුන් සිය ජීවිත නැවත ගොඩනඟා ගැනීම සඳහා වැය කළ මුදල පිළිබඳ තක්සේරුවක් මෙයට ඇතුළත් වන්නේ නැත.


කොට්ටාව මාකුඹුරේ සිට ගාල්ල පින්නදූව දක්වා දක්ෂිණ ලංකා අධිවේගී මාර්ගයේ දුර කිලෝමීරට් 96කි. ඒ අනුව එක් කිලෝමීටරයක් හදන්නට ගිය වියදම රුපියල් මිලියන 800කට අධික වේ. ඒ අනුව එක් මීටරයක් හදන්නට ගිය වියදම රුපියල් අටලක්ෂයකි. එක් සෙන්ටිමීටරයකට රු. 8000කි.


මේ වෙනුවෙන් ලංකාව ආසියානු සංවර්ධන බැංකුවෙන්, ජපන් ජාත්‍යන්තර සහයෝගිතා නියෝජිතායනයෙන් (JICA) ලබාගෙන ඇති ණය ප්‍රමාණය ඩොලර් මිලියන 500කට ආසන්නය. එනම් රුපියල් බිලියන 55කට අධික මුදලකි.


ඍජුව ම පාර හදන්නට ය කියා ගත් විදේශ ණය පමණක් ලංකාවේ ජනගහණය කෝටි දෙකක් ය කියා ගණන් හදා බැලුවොත් මේ රටේ ලොකු කුඩා සෑම පුරවැසියකු ම මේ පාර වෙනුවෙන් රු. 2750 බැගින් ලෝකයට ණය වී හමාර ය.


ඒ ණය ගෙවන අපි මේ පාරේ යන්නේ ද තවත් මුදල් ගෙවා ය. 


දැන් මෙපමණ ණය වී හැදූ පාරේ හයියෙන් ගිය විට රට සංවර්ධනය වන්නේ කෙසේ ද යන්න ආණ්ඩුව අපට කියා දිය යුතු ය. 


රටේ මෙවැනි අධිවේගී මාර්ග හැදෙනවාට අප විරුද්ධ නැත. නමුත් මෙහි ඇති මූලික ගැටලුව වන්නේ මෙයින් ජන ජීවිතයේ සිදු වන සංවර්ධනය අත්පත් කර ගැනීම සඳහා ජනතාව ගෙවා ඇති මිළ උවමනාවට වැඩි වීමයි.


අනෙක් පැත්තෙන් එක්සත් ජාතික පක්ෂය රටට අධිවේගී මාර්ග පද්ධතියක් යෝජනා කළේ මූලික වශයෙන් විදේශ ආයෝජකයන් ගෙන්වා ගැනීමටයි. මේ ආණ්ඩුව පෞද්ගලික අංශයේ දේපල පවා රජයට පවරා ගනිමින් සිටින තත්වයක් තුළ කොටස් වෙළඳපල පවා අර්බුදයට පත් වී තිබේ. 


සංචාරකයන් ලංකාවට එන්නේ අධිවේගී මාර්ග ඕනෑතරම් ඇති රටවල සිට ය. අධිවේගී මාර්ග පෙන්වා ප්‍රවර්ධනය කළ හැකි සංචාරක කර්මාන්ත ක්ෂේත්‍රයේ ලංකාවට තරග කළ නො හැකි ය. 


එජාපය කීවේ මෙම මාර්ගය හරහා එන ආයෝජන හා ඇරඹෙන ව්‍යාපාර හේතුවෙන් සිදු වන සංවර්ධනය පහළට කාන්දු වී ජන ජීවිතය ඉහළ යන බවයි. 


දැන් මේ අධිවේගී මාර්ගයෙන් ජන ජීවිතයට කාන්දු වන්නේ ණය බර හා පොලියත්, දූෂණයේ ඕජසුත් පමණි. 


අප කියන්නේ කිලෝමීටර් 96ක පාරක් හදන්නට වැය කළ මුදලින් ලංකාවේ මහාමාර්ග, දුම්රිය මාර්ග පද්ධතියක් ම සංවර්ධනය කරන්නට තිබුණු බව ය. 


අධිවේගයෙන් ‍ ගොස් කරන්නට තරම් කැකිරි ගෙඩියක් මේ රටේ මිනිස්සු වැඩි දෙනෙකුට නැත. 


අපට අවශ්‍ය පුහු අධිවේගයක් නොව, චිරස්ථායී සංවර්ධනයකි. 


පසුගිය දිනවල අධිවේගී මාර්ගය මහජනයාට විවෘත කළ අවස්ථාවේ ඔවුහු එහි ගොස් කා, බී, නටා, බෝතල් පාරේ ගසා කුඩු කර, බොග දමා පැමිණිය හ. ඒ අධිවේගී මාර්ග ආතල් එක කදිමට සංකේතවත් කිරීමකි. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-26

මාස්ටර් හා දීප්ත(ි කුමාර ගුනරත්න) මරා සත්‍යාපෝල් නම් පරමාදර්ශය උපදින ලලිත සමය

2011 රාජ්‍ය සාහිත්‍ය සම්මාන උළෙලේ 2010 වසරේ හොඳ ම සිංහල නවකතාව ලෙස සුනේත්‍රා රාජකරුණානායකගේ 'කවි කඳුර' හා ජයතිලක කම්මැල්වීරගේ 'චුම්බන කන්ද' නවකතා සම්මානයෙන් පිදුම් ලැබිණි. මෙම කෘති දෙක අතරින් 'චුම්බන කන්ද' ලේඛකයා විසින් කියවන ලදී. මෙවැනි කෘතිවලට සම්මාන ලැබීම ලංකාවේ සුලබ තත්වයකි. ආධුනික මට්ටමේ නවකතාවක් වන 'ස්වයංජාත' එක් වසරක ලංකාවේ සම්මාන පිට සම්මාන ලැබුවේ ය. එබැවින් මෙවැනි කෘති පිළිබඳ ලියනවාට වඩා ඒවා සම්මානයට පාත්‍ර වන ආකාරය පිළිබඳ විශ්ලේෂණය කිරීම රසවත් ය. පසු අවස්ථාවක ඒ පිළිබඳ ලියමි.


එරික් ඉලයප්ආරච්චිගේ ලලිත සමය ගොඩගේ සාහිත්‍ය උළෙලේදී සම්මානයට පාත්‍ර කරන ලද නවකතාවකි. ලේඛකයා විසින් ලියන ලද 'ශාස්තෲ' නවකතාව ද ඔහු එම නවකතා තරගය සඳහා ඉදිරිපත් කළේ ය. එය අඩු තරමේ අවසාන සලකා බැලීම සඳහා තෝරා ගත් කෘති අතර හෝ නො තිබිණි. ලේඛකයා මහත් උනන්දුවෙන් 'ලලිත සමය' කියැවූයේ ඔහුගේ ම ලේඛන කලාවේ අසාර්ථකත්වය හඳුනා ගැනීමේ මානයක් සොයමින් ය.


එවැනි මානයක් හඳුනා ගැනීමට තරම් විශිෂ්ට ලක්ෂණ එරික් ඉලයප්ආරච්චිගේ 'ලලිත සමය' නවකතාවේ නො තිබිණි.


එය ඔහුගේ තුන් ඈඳුතු නවකතා වන බගන්දරා, විතණ්ඩ සමය හා ආදරයේ සිමෙන්ති වැනි නවකතා සමග එක පෙළට තැබිය හැකි නවකතාවක් නොවේ. එහි බොහෝ චරිත පැතලි ය. වැඩිපුර ම විවරණය වන සමදරාගේ චරිතය පවා අබ්බගාත ය. නිදසුනක් ලෙස මනෝ විශ්ලේශනය කෙරෙහි මහත් අවධානයක් යොමු කරන එරික් ඉලයප්ආරච්චිට සමදරාගේ චරිතය ගොඩනඟීමේදී අතුරුදහන් වී මළගිය ප්‍රාණකරුවකු බවට පත් වන  ඇගේ පියා හා ඇය අතර ඇති සම්බන්ධයේ කිසිදු ගැඹුරක් ස්පර්ශ වන්නේ නැත.


අප මෙහි උත්සාහ කරන්නේ එහි වස්තු විෂය විසින් මතු කරන කරුණු අරභයා යම් සංවාදයක් මතු කර ගැනීමටයි. මන්ද, කලා කෘතියක් සම්බන්ධයෙන් මේ රටේ සිදු නො වන ම හා සිදු විය යුතු ම දෙය එය වන බැවිනි.  එරික් ඉලයප්පාරච්චි සිළුමිණ පත්තරය සමග කරන මාකට් සම්මුඛ සාකච්ඡාවකදී මෙසේ කියයි. 



’ලලිත සමය’ හරහා ඔබ සමාජයට ගෙන එන්නට උත්සාහ කළ පණිවුඩය කුමක්ද?

මේ කෘතියෙන් නියෝජනය වෙන්නේ අපි මේ ගෙවන ඓතිහාසික යුගයයි. සිංහල ජන මනස විපරිත වීම, තමයි මෙහි මූලිකම තේමාව වෙන්නේ. පසුගිය දශක කිහිපයේ අපි පහළ මට්ටමකට වැටුණා. විනෝදාත්මක කර්මාන්තවල බොහෝ දේ සිදුවෙන්න පටන් ගත්තා. ලෝකයේ වෙනත් රටවල ලබාගන්නා කලාත්මක ජයග්‍රහණ පවා අන්ධව වැලඳගන්නට හුරුවුණා. පුරාතන සාහිත්‍යය, නූතන සාහිත්‍යය ගත්තත් රසවාදී උසස් මට්ටමක සිටි අප පොල්කුඩු කන තත්ත්වයට වැටුණා. මීවදවල සිට පොල්කුඩු රැලි දක්වා වෙච්ච සංක්‍රමණය විශ්ලේෂණාත්මකව නවකතාව තුළ තිබෙනවා.



ලලිත සමය ඊට වඩා ගැඹුරු සාහිත්‍යමය පරිකල්පනයකැයි අපි පළමුකොට ම උපකල්පනය කරන්නෙමු. ලලිත සමය යනු එරික් ඉලයප්ආරච්චිගේ සංගීතය හා කලාව ගැන කියවීම්, විශ්ලේෂණ, පරමාදර්ශ හා පරිකල්පන ඔස්සේ ගොඩනඟන ලද කතාවකි. එහි විවිධ චරිත නම් ඔහු ම ය.


දීප්ත එරික්ගේ රැඩිකල් මුහුණයි. සත්‍යාපෝල් එහි යථාර්ථවාදී මානුෂවාදියායි. මාස්ටර් නම් මහා සංගීත පෞරුෂය වනාහි ඔහුගේ පරමාදර්ශයයි.


මාස්ටර් යනු අස්පර්ශ චරිතයකි. එසේ ම සංගීතය හෝ වඩා පුළුල්ව ගතහොත් කලාව පිළිබඳ එරික්ගේ පරමාදර්ශය ද අස්පර්ශ එකකි. කොටින් ම කිවහොත් ඒ කුමක්දැයි ඔහු ම නො දනී. එහෙයින් ඔහු සිය දැක්ම, පරමාදර්ශය සංවාද තලයකට ගෙන ඒම සඳහා මාස්ටර්වාදී අන්තවාදියකු නිර්මානය කරයි. ඒ දීප්ත ය. 


ධනවත් මානුෂවාදී අර්ථපතියකු වන සත්‍යාපෝල් පරමාදර්ශ හා ඒවා සාධනය කිරීම සඳහා අරගලය මහපොළවට ගෙන එන යථාර්ථවාදියාගේ භූමිකාව නිරූපණය කරයි.


සත්‍යාපෝල් මහ මුහුද හා නැව් ආශ්‍රිත ව්‍යාපාර හිමි, යුරෝපය බලා යන නීති විරෝධී සංක්‍රමණිකයන් විෂයෙහි මානුෂවාදී‍ලෙස කටයුතු කරන, ඒ ඔස්සේ ශ්‍රමයේ නිදහස් සංචලනය වෙනුවෙන් සැබෑ විප්ලවීය දේශපාලනික අරගලයක් කරන සටන්කරුවෙකි. එසේ ම, ලිංගිකත්වය හා අදාල පුද්ගල නිදහස වෙනුවෙන් සටන් කරන්නෙකි. සියල්ලට ම වඩා ගාන්ධි කීවාක් මෙන්, තමන් බලාපොරොත්තු වන සමාජ වෙනස තමන් තුළ ජීවත් කරවන කෙනෙකි. (ලංකාවේ ගාන්ධිවාදීන් තුළ මෙය ගෑවිලාවත් නැති නිසා මාක්ස්වාදීන්ට හිරිකිතයකින් තොරව භාවිතා කිරීමට පුළුවන)


ඔහු ඇසුරේ සිටින ඩග්ලස් වැනි ප්‍රවීණ බුර්ෂුවා පංතික සංගීතකරුවෝ ද, දීප්ත වැනි රැඩිකල් සංස්කෘතික දේශපාලන සටන්කරුවෝ ද, සංගීතා වැනි අංකුර කලාකරුවෝ ද යන මේ කවුරුත් යුරෝපය සිය මාලිමාවේ උතුර ලෙස සලකා‍ ගමන් කරමින් සිට අවසානයේදී එකී උතුරට ම ජීවිතය සොයා යන්නෝ ය.


ලංකාවේ බහුතර ජනයා අයත් වන සමාජ පංතිය වෙමින් මේ වන විට දේශපාලන හා සංස්කෘතික බලය ද අත් පත් කරගෙන සිටින සිංහල ගැමි මධ්‍යම පංතියට අයත් සමදරා නම් ස්ත්‍රී ශරීරය හෙවත් කටහඬ ලලිත සමය කතාවේ කේන්ද්‍රීය චරිතයයි. සමදරා වනාහි මාස්ටර්ගේ, දීප්තගේ, ඩග්ලස්ගේ සංගීත සිහිනවල උපයෝගී භාණ්ඩයකි. පරමාදර්ශවාදී පිරිමි සංස්කෘතික දේශපාලන සිහින සැබෑ කර ගැනීමේ ලා හුදු උපයෝගී භාණ්ඩයක් පමණක් වී සිටින සමදරා 'මට කියලා නිදහසක් නැද්ද?' කියා අසන නිමේෂය ලලිත සමයේ කූටප්‍රාප්තියයි.


දීප්ත‍ගේ සංස්කෘතික දේශපාලන සිහිනය හා මාස්ටර් පරමාදර්ශය සුණුවිසුණු කර දමන  එකී ප්‍රකාශය සමග සත්‍යාපෝල්ගේ යථාර්ථවාදී දේශපාලන අරගලය හමුවේ ධනවාදයේ පරිවාරයේ සංස්කෘතික දේශපාලන අරගල මුළුමනින් ම නිස්සාර දේ බව ප්‍රකාශ කර දමයි. දීප්ත නම් සංස්කෘතික සටන්කරුවා අපට අවසානයේදී හමු වන්නේ සිහින රුසියාවේ සීතලේ මියැදෙන අසරණ නීති විරෝධී සංත්‍රමණික ශ්‍රමිකයකු ලෙස ය. ධනවාදයේ පරිවාරයේ රටවල පීඩිත පංතියේ අරගලය ඇත්තේ සංස්කෘතික තලයේ නොව ශ්‍රමයේ නිදහස් සංචලනය වෙනුවෙන් කරන දේශපාලන සටන තුළ බව එරික් ඉලයප්ආරච්චි අපට පවසයි. 


ධනවාදයේ පරිවාරයේ ජාතික රාජ්‍යවල දුබල හෝ නො පවතින බුර්ෂුවා පංතියක සෙවණ සොයමින් සිටින ඩග්ලස් ද අවසානයේදී ඕස්ට්‍රේලියාවේ පදිංචියට ගොස් ඇත. වෙනස ඔහු එහි ගොස් ඇත්තේ නීත්‍යනුකූලව වීම පමණි. එහෙත්, දීප්තගේත්, ඔහුගේත් අරමුණ එක ය. ලංකාවේ ජනප්‍රියවාදී සංගීත නවරැල්ලක නිර්මාතෘ වන රූකාන්ත ගුණතිලක ඇමරිකාවට ගොස් පල්ලියක ඕගන් ගහයි. නො කීවාට, සමහර විට ඔහු ෂෙඩ් එකක පෙට්‍රල් ගහන්න ද ඇත.


දීප්ත එරික්ගේ ලෝකයේ පරිකල්පිත දීප්ති කුමාර ගුනරත්න කෙනෙකි. ලංකාවේ රැඩිකල් සංස්කෘතික දේශපාලනයේ නියමුවකු වන දීප්ති කුමාර ගුනරත්නට අත් වූ ඉරණම ද දීප්තගේ ඉරනම ම ය. ඔහුගේ එක්ස් කණ්ඩායම දෙදරා දමන ස්ත්‍රීවාදී හා ප්‍රජාතන්ත්‍රවාදය පිළිබඳ කතිකාව දීප්ත ඉදිරියේ සමදරාගේ නැගිටීම වැනි එකකි. දීප්ති කුමාර ගුනරත්න එක්සත් ජාතික පක්ෂයේ ඉඳුල් කන්නට පටන් ගැනීම දීප්තගේ රුසියානු දිනපොතට සමාන ය. ඔහුගේ ඊනියා පෙරටුගාමී පක්ෂය ද දීප්තගේ පරිකල්පිත රුසියාව වැනි එකකි.


ඔහුගෙන් කැඩී ගිය ප්‍රජාතන්ත්‍රවාදී ස්ත්‍රීවාදී සමදරාලාට ද ධනවත් අර්ථපති සත්‍යාපෝල්ලා හමු වන්නේ නැත. ඔවුන්ට හමු වන්නේ සාක්කු හිස් වෙමින් ඇති එන්.ජී.ඕ. පමණි. ලංකාවේ පොළවේ සත්‍යාපෝල්ලා නැත. ගෝවෙන්, අරෙහෙන් මෙහෙන් කෑලි එක් කළ සත්‍යාපෝල් කෙනෙකු පරිකල්පනය කරන්නට එරික් ඉලයප්ආරච්චිට සිදු වන්නේ ඒ නිසා ය.


ලංකාවේ අර්ථපතියන් වන්නේ විප්ලවීය මහා කලාකරු හා විචාරක සුචරිත ගම්ලත්ට අනුග්‍රහ දක්වන ටයර් හවුස් වැන්නෝ ය. නැතිනම් උපුල් ශාන්ත සන්නස්ගල වැන්නෝ ය.


ලලිත සමයේ විචිත්‍රවත් ම චරිතය හා වීරයා සත්‍යාපෝල් ය. ඔහු ජාත්‍යන්තරවාදී සටන්කරුවෙකි.යථාර්ථවාදී දේශපාලනඥයෙකි. අව්‍යාජ මිනිසෙකි. අපේ පරමාදර්ශය විය යුත්තේ ඔහු ය. 


-අජිත් පැරකුම් ජයසිංහ


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-25

සරත් ෆොන්සේකාට ප්‍රතිකාර නොලැබෙන්නේ ඇයි? / Whu Sarath Fonseka is not treated.

සරත් ෆොන්සේකා ප්‍රතිකාර සඳහා නවලෝක රෝහලට ගෙන යන්නේ නැත. එය කළ හැකි ද යන්න නීතිපගෙන් විමසා ඇති බව බන්ධනාගාර කොමසාරිස් පවසා ඇත.


කලින් ඔහු නවලෝක රෝහලට ගෙන ගියේ රිමාන්ඩ් සිරකරුවකු ලෙස බව බන්ධනාගාර කොමසාරිස්වරයා දිවයින පුවත්පතට කියා ඇත. එය හතර බීරි කතාවකි. එතකොට සරත් ෆොන්සේකාට යුද්ධාධිකරණයෙන් දුන් සිර දඬුවම කුමක්ද? 


බන්ධනාගාර කොමසාරිස් කියන පරිදි සිරකරුවන් රැගෙන යා යුත්තේ රජයේ රෝහල් වෙත ය. 


දක්ෂ නිලධාරීන්ට ‍, විනිසුරන්ට පාලක පවුලේ උවමනාවන් ඉවෙන් මෙන් දැනේ. කළ යුතු දේ කුමක්දැයි නො කීවත් කරන්නට ඔවුහු දනිති. අවශ්‍ය දේ කළ විට ඒවාට ප්‍රතිලාභ ලැබෙන බවත් ඔවුහු දනිති. 


සරත් ෆොන්සේකා සම්බන්ධයෙන් පාලක පන්තියේ ආකල්පය තඩි ප්‍රියන්ත මීට ඉහතදී සිය ත්‍රස්තවාදී කොලමෙන් හෙළිදරව් කළේ ය. ඒ වනාහි කන්න, බොන්න දී මැරෙන තුරු වසා තැබීමයි. මන්ද, ෆොන්සේකා එළියට ඒම පාලක පවුලට අයහපත් වන බැවිනි. 


සරත් ෆොන්සේකාගේ මුල් සිර දඬුවම අවසන් වන්නට පෙරාතුව තවත් එකක් දුන් විට ඔහු එළියට නො එන බව තහවුරු වේ. ඒ දඬුවම භාගයක් පමණ ගෙවී යන විට තව එකක් දෙන්නට සැලසුම් මේ වන විට සකසා අවසන් ය. 


එහෙත්, සරත් ෆොන්සේකා තද මිනිහෙකි. සටන්කරුවෙකි. තවම ඔහු ඇද වැටී නැත. මානසිකව ඇද වැටී දනින් වැටී සමාව ඉල්ලනවා නම් පමණක් ඔහුට සමාවක් ලැබෙනු ඇත. 


පාලක පවුලේ අසහනයට හේතු වන අනෙක් කරුණ නම් ඔහු ශාරීරකිව ද ඇද නො වැටීමයි. 


දැන් ඉතින් ඔහු සම්බන්ධයෙන් පාලක පවුලට වඩා හොඳ ඔහු වලපල්ලට යන තැනට වැඩ සිද්ධ කිරීම බව නිලධාරීන්ට තේරෙයි. 

මේ ලිපියට ඔබ කැමති නම් වෙන අයත් එක්කත් බෙදා ගන්න

රජයට පවරා ගත් සමාගම් පාලනයට පත් කළ අනිසි බලධාරියෝ

රජය විසින් පෞද්ගලික අංශයෙන් යළි පවරා ගන්නා ලද ව්‍යාපාර පාලනය සඳහා නිසි බලධාරීන් පිරිසක් පත් කර තිබේ.


ඊට අමතරව, අදාළ සියලු අංශයන්හි සමස්ත අධීක්ෂණය සහතික කිරීමට පරිසර ඇමැති අනුර පි‍්‍රයදර්ශන යාපා මහතාගේ ප්‍රධානත්වයෙන් යුතු ඇමැති අනුකාරක කමිටුවක් හා ඊට සහය වනු සඳහා නිලධාරී අනුකමිටුවක් ද පත් කෙරේ.


ඇමති අනුකාරක කමිටුවේ ඉන්නේ බස්නාහිර පළාත් ප්‍රධාන ඇමති ධුරයෙන් පහ කරන ලද රෙජිනෝල්ඩ් කුරේ, එජාපයෙන් කරණම් ගැසූ ලක්ෂ්මන් සෙනෙවිරත්න, පැරණිකමේ තරමට ඇමතිකම මදි යයි අඬන ඩිලාන් පෙරේරා හා අසාර්ථක දේශපාලන පක්ෂයක් නියෝජනය කරන ගීතාංජන ගුණවර්ධන යන අයයි.


නීතිඥ කාලිංග ඉන්ද්‍රතිස්ස ව්‍යාපාර රැසක් පාලනය සඳහා පත් කළ නිසි බලධාරියෙකි.


තමන් යටතේ පවතින රජයේ ආයතන හරහා 'විශිෂ්ට' මහජන සේවාවක් සපයන දිස්ත්‍රික් ලේකම්වරු පිරිසක් ද කොම්පැනි නිසි බලධාරියෝ ය.


මේ අය මේ ව්‍යාපාරවල සිටි ප්‍රධාන විධායක නිලධාරීන්ටත් ඉහළින් සිටින දැවැන්තයෝ ය. අසාර්ථක ව්‍යාපාර ගොඩගැනීම කෙසේ වෙතත් මේ අය හරහා පාලක පවුලේ අයට මේ ආයතනවලට පහසුවෙන් මැදිහත් වීමට නම් පුළුවන.


තවත් විස්තර මෙතැනින් කියවන්න.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-24

රජයේ සේවකයන්ට ඇත්තටම පඩි වැඩි කළා ද නැද්ද කියා විදුලි සේවකයන්ට හෝ කියන්න.

ලංකා විදුලිබල මණ්‌ඩල සේවකයන්ට වසර තුනකට වරක් සිදු කරන වැටුප් වැඩි වීමේදී 2012 ජනවාරි මාසයේ සිට ජාතික වැටුප් හා සේවක සංඛ්‍යා කොමිෂන් සභාව නිර්දේශ කර ඇත්තේ සියයට පහළොවක වැටුප් වැඩිවීමක්‌ පමණකැයි කියන වෘත්තීය සමිති 2012 අයවැය මගින් රාජ්‍ය සේවකයන්ට සියයට දහයක වැටුප් වැඩිවීමක්‌ ලබා දුන්නත් විදුලිබල මණ්‌ඩල සේවකයන්ට වසර තුනකටම සියයට පහළොවක වැටුප් වැඩිවීමක්‌ ලබාදීම අසාධාරණ බැවින් ඊට එරෙහිව දැඩි වෘත්තීය සමිති ක්‍රියාමාර්ග ගන්නා බව පවසති.


රජයේ සේවකයන්ට 10%ක වැටුප් වැඩි කළා යයි කීම බොරුවකි. ඇත්තෙන් ම ලබා දී ඇත්තේ මූලික වැටුපෙන් 10%ක දීමනාවක් පමණි. දීර්ඝ කාලයකින් රජයේ සේවකයන්ට වැටුප් වැඩි කර නැති අතර කළේ මෙවැනි දීමනා ලබා දීම පමණි. එහෙයින්, රජයේ සේවකයන්ගේ මූලික වැටුප අඩු ය. මූලික වැටුපෙන් 10%ක් කී විට එහි ඇති කජ්ජක් ද නැත.


එහෙත්, රජය මහා ලොකුවට කෑ ගසන්නේ රජයේ සේවකයන්ට මාර බක්කක් දුන්නා ය කියා ය. එහෙම දුන්නා නම්, විදුලි බල මණ්ඩල සේවකයන්ට කර ඇත්තේ ලොකු අසාධාරණයකි. ඒ නිසා ඔවුන් වසර තුනට 45%ක වැටුප් වැඩි වීමක් ඉල්ලීම සාධාරණ ය. එවිට අඩු ගණනේ වසර තුනට 30%ක වැටුප් වැඩි වීමක්වත් දීමට සිදු වනු ඇත. චම්පික රණවක ඇමතිතුමා පසුගිය කාලයේ ඉපැයූ ලාභවලින් මෙවැන්නක් ගෙවීම අපහසු නැත.


දැන් ආණ්ඩුවේ පච මෝල් කියන්නේ කුමක් ද? රජයේ සේවකයන්ට ඇත්තටම පඩි වැඩි කළා ද නැද්ද කියා විදුලි සේවකයන්ට හෝ කියන්න.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-23

ලංකාවේ දුම්රිය වීරයා විජය සමරසිංහ / Sri Lanka's railway hero Wijaya Samarasinghe

දෙමටගොඩ දුම්රිය ස්ථානය 
දුම්රිය අධ්‍යක්‍ෂ (සැලසුම්) විජය සමරසිංහ ගැන ඔබ දන්නවා ද?


සුද්දන්ගෙන් පසු ලංකාවේ දුම්රිය සේවයට වැඩි ම සේවයක් කළ තැනැත්තා ඔහු ය.


ඔහු ජනමාධ්‍ය සමග එක් වී මේ වන විට රට පුරා දුම්රිය මාර්ග විශාල ප්‍රමාණයක් ඉදි කරමින් සිටියි.


ඔබ නො දන්නවා වුණාට මේ වන විට මාතර සිට කතරගතමට ගිය දුම්රිය මාර්ගය මඩකලපුව දක්වා දික් වෙමින් තිබේ.


"මාතර සිට මඩකලපුව දක්‌වා නව දුම්රිය මාර්ගයක්‌ ළඟදීම ඉදිකිරීමට තීරණය කර ඇතැයි දුම්රිය අධ්‍යක්‍ෂ (සැලසුම්) විජය සමරසිංහ මහතා "දිවයින"ට පැවසීය. මෙම දුම්රිය මාර්ගය මාතර, බෙලිඅත්ත, හම්බන්තොට, මොනරාගල, අම්පාර, ඔලුවිල් හරහා මඩකලපුව දක්‌වා ඉදිකෙරෙන බවද විජය සමරසිංහ මහතා වැඩිදුරටත් පැවසීය. මේ සඳහා යන වියදම දැන් ඇස්‌තමේන්තු කරගෙන යන අතර ලබන වසරේ මුල් භාගයේදී මෙම දුම්රිය මාර්ගය ඉදිකිරීමේ කටයුතු ඇරැඹෙයි." (අද දිවයින)


තවත් දුම්රිය මාර්ග රැසක් ඔහුගේ අතේ රෝල් වෙමින් තිබේ. ඒවා නම්, "පානදුර හොරණ දක්වා ද, කුරුණෑගල හබරණ හරහා දඹුල්ල දක්වා ද, මැදවච්චිය සිට ත‍්‍රිකුණාමලය දක්වා ද, වැල්වාය සිට බිබිල හරහා බදුල්ල දක්වා ද, ත‍්‍රිකුණාමලය සිට මහව හරහා පුත්තලම දක්වා ද අලූතින් මාර්ග තැනීමට යෝජිත බවත් කැලණිවැලි මාර්ගය කොළඹ සිට හම්බන්තොට දක්වා දීර්ඝ කිරිමට ද යෝජිත බවත දුම්රිය සැළසුම් අධ්‍යක්ෂ විජය සමරසිංහ මහතා පැවැසීය." (නොවැම්බර් 11 ලංකාදීප)


මේ කොළඹ නගරයේ නව විදුලි දුම්රියට අමතරව ය. කොට්ටාව සිට හොරණ දක්වා දුම්රිය මාර්ගයක් හදන බව ද ඔහු කීවේ ය.


විජය සමරසිංහගේ හපන්කම් මෙම ගූගල් පිටුවෙන් බැලිය හැකි ය. 


මෙවන් නිලධාරීන් ලැබීම ජාතියේ පිනකි. ඉරකි. තිතකි.


රටක් සංවර්ධනය කිරීම සඳහා අවශ්‍ය වන්නේ මාධ්‍ය සමග කටයුතු කිරීමට සමත් නිලධාරීහු ය. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-22

රට පාලනය කරන අයුතු ජන රාශියේ අයවැය සංදර්ශනය / Budget show of the ruling mob of Sri Lanka

ඊයේ අයවැය ඉදිරිපත් කළ අවස්ථාවේ සිදු වූ සිදුවීම් වනාහි ලංකාවේ රජයේ දේශපාලනයේ ස්වරූපය කදිමට සංකේතාත්මකව නිරූපණය කරන්නකි. 


ඒ මෙසේ ය: 


අද වන විට මේ රට පාලනය කරන්නේ අයුතු ප්‍රචණ්ඩ ජන රාශියක් හෙවත් violent mob එකක් විසිනි. 


ඒ අනුව පාලනයේ මූලධර්ම වී ඇත්තේ මෙවැනි අයුතු ජන රාශියක සාමාන්‍ය තත්වය වන අරාජිකත්වයයි. 


මේ රටේ ආණ්ඩුවත්, පසුගිය කාලයේ ග්‍රීස් යකුන් අල්ලා පොලු ගැසූ ජන රාශීනුත් සමාන ය. 


වෙනස ඇත්තේ එවැනි ජන රාශිවල සාමාජිකයන් පසුව නැවත තනි තනි පුද්ගලයන් බවට පත් වූ විට ඔවුන් නීතිය ඉදිරියේ නිරාවරණය වීම, ලජ්ජාවට හා පසුතැවිල්ලට පත් වීමයි. 


පාලක ජන රාශියට ලජ්ජාවක් හෝ පසුතැවිල්ලක් නැත. රොෂාන් රණසිංහ වැනි තරුණයකුට ඔහුගේ පියා වන් ජෝන් අමරතුංග වැනි මහළු මිනිසකුට අතින්, පයින් පහර දී වීරයකු සේ ආඩම්බරෙන් හැසිරිය හැකි ය. 



ඊයේ පාර්ලිමේන්තුවේ තිබුණේ මෙවැනි වැඩකාරයන් බොස්ට වැඩ පෙන්නන සංදර්ශනයකි. උඩතලවින්න සමූහ මිනීමැරුම් නඩුවේ විත්තිකරුවකු බවට පත් වී සිට ලංකාවේ අධිකරණයෙන් නිදහස ලැබූ ලොහාන්රත්වත්ත ද ඊයේ වැඩ පෙන්නීමට සමත් විය. (කියවන්න උඩතලවින්නේ නීතිය හා හතරෙ කොලනියේ කැළෑ නීතිය)


අධ්‍යාපන නියෝජ්‍ය ඇමති විජිතමුනි සොයිසා විපක්ෂයට පහර දු‍න්නේ පොතකිනි


අඩුවකට තිබුණේ දුමින්ද සිල්වා නො සිටි එක පමණි.  


මේ මන්තිරියන් හා ඔවුන් වටා එක් රොක් වී සිටින පාතාල මැරවරයන් අතර වෙනසක් නැති බව ඊයේ සංදර්ශනයෙන් පෙන්නුම් කෙරිණි. 


එපමණක් නොව, එකී අයුතු ජන රාශියේ නායකයා වන ජනාධිපති ඒ ප්‍රචණ්ඩ මන්ත්‍රීන්ට 'නියමයි මල්ලි' යි කියන තත්වයක් ද ඇත. ඔහු අයවැය කතාව කියවද්දී සභාව එහෙම පිටින් ම කුලප්පු වූ හරක් ගාලක් වුණා කියා ඔහුට ප්‍රශ්නයක් ද නැත. 


ආණ්ඩු පක්ෂයේ මන්ත්‍රීවරු ජනාධිපතිවරයා ඉදිරියේ වැටී මූඩි ගැලවී කාපට් තෙමා දමන්නට වීසි කළ වතුර බෝතලයේ සිට මේ ජවනිකාව හා සම්බන්ධ සෑම තත්පරයක් පාසාම වැය වුණේ මහජන මුදල් ය. 


'ඉතින් අපට මොකෝ?' යි මහජනතාව අසති. රටේ ඉන්න අංක එකේ පල් මෝඩයන්, තක්කඩින් හා දුෂ්ටයන් එහි යවන්නේ මේ රටේ මහජනතාවයි. 


Read: Budget show of the ruling mob of Sri Lanka

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-21

රනිල්ට අලුත් චෝදනා ගෙන ඒම හා සමලිංගිකත්වය

විපක්ෂ නායක රනිල් වික්‍රමසිංහ මහත් අවාසනාවන්ත තත්වයකට පත් වෙමින් සිටියි. 


ජාත්‍යන්තර වශයෙන් කෙතරම් කීර්තිමත් තත්වයකට පත් වුව ද, රට තුළ ඔහු පත් වී ඇති ඛෙදජනක තත්වය හමුවේ ඔහුගෙන් ඔහුගේ පංතියට අවශ්‍ය සේවය ඉටු කර ගැනීමට නො හැකි තත්වයක් මතු වී ඇත. 


ඔහුට එල්ල කරනු ලබන අලුත් ම චෝදනා වන්නේ සමලිංගික චෝදනා ය. ඔහුට එරෙහිව එල්ල කර ඇති චෝදනා මාලාවේ 16වන චෝදනාව වන්නේ පක්ෂ නායකයා මාතර දිස්ත්‍රික් මන්ත්‍රී බුද්ධික පතිරණට ලිංගික යෝජනාවක් ඉදිරිපත් කර ඔහු එයට අකැමැති වූ පසු බුද්ධිකගෙන් පළි ගැනීමේ ක්‍රියාමාර්ග ගත් බවයි. 


මේ ඉලංදාරියා හිටි හැටියේ එජාපයේ නායකයන් වූයේ කෙසේ ද යන්න ද සොයා බැලීම වටී. ඒ කාලයේ ඔහු අපයෝජනයට ලක් වුණා නම්, එය ද වැරදි විය යුතු ය. 


පක්ෂ නායකයාගේ ක්‍රියාකලාපය හේතුවෙන් මව්පියන් තරුණයන් පක්ෂ කටයුතු සඳහා එවීමට අකැමැති බව ද චෝදනා පත්‍රයේ සඳහන් වන බව ලක්බිම නිව්ස් පුවත්පත වාර්තා කරයි. 


අපි ප්‍රතිපත්තියක් ලෙස සමලිංගිකත්වය හෝ විෂම ලිංගිකත්වය යන දෙකින් එකක් වඩා හොඳ යයි හුවා දක්වන්නේ නැත. ඒ වනාහි පුද්ගල නිදහස හා බැඳුණු තත්වයකි. මේ දෙක ම මිනිස් සමාජයේත්, වෙනත් සත්වයන් අතරත් සුළුතර පිරිසකගේ රුචියක් ලෙස තිබී ඇත.


එහෙත් රටේ පවතින නීතිය අනුව සමලිංගිකත්වය නීති විරෝධී ය. එහෙයින්, විරුද්ධ ලිංගිකයකුට ලිංගික බලපෑම් කිරීම හා සමාන ලිංගිකයකුට ලිංගික බලපෑම් කිරීම දෙස සමාජය බලන්නේ දෙවිධියකට ය. 


සමලිංගිකත්වය තුළ බහුලව දැකිය හැකි ලක්ෂණයක් වන්නේ දීර්ඝකාලීන සම්බන්ධතා වෙනුවට කෙටිකාලීන සබඳතා හා එක සහකරුවකු සේවනය කිරීම වෙනුවට බහු සහකාර සේවනයයි. 


එසේ වන්නට ඇත්තේ පිළිගත් ලිංගික සබඳතා වන විෂම ලිංගික ඇසුර 'ශික්ෂණය' කිරීම සඳහා ගොඩනැඟුණු පවුල්, සමාජ හා සංස්කෘතික ආදී බලපෑම් අසම්මත යයි සැලකුණ සමලිංගිකත්වය තුළ ගොඩ නොනැඟීම වන්නට පුළුවන. 


විෂම ලිංගිකයන් වුව ඉහත කී ශික්ෂණයන් නොමැති නම්, බහු සහකරුවන් සේවනයට නිතැතින් පෙළඹෙනු ඇත. තෘප්ත නො වුණ මේ ලිංගික ආශා විෂම ලිංගිකයන්ගේ ජීවිතයට බලපාන බව පැහැදිලි ය. 


ලිංගික තෘප්තිය හා සමලිංගිකත්වය අතර සම්බන්ධය සම්මත මිනුම් දඬුවලින් විග්‍රහ කිරීම දුෂ්කර ය. 


සමලිංගික රුචිකත්වයන් ද සම්මත මිනුම් දඬුවලින් තේරුම් ගැනීම දුෂ්කර ය. මර්වින් සිල්වා කියන පරිදි ඔහු එක්සත් ජාතික පක්ෂයෙන් ඉවත් වුණේ ඔහුට ඇති වූ ලිංගික බලපෑම් නිසා ය. අදාළ හඬ පටයට සබඳතා පුරුක මෙතැන ඇත.


රනිල් තමන් ළඟටත් ආවා ය කීමෙන් මර්වින්ලා, බුද්ධිකලා උත්සාහ කරන්නේ තමනුත් මාර පොරවල් ය කියා කීමට ය. 

ඔය කතාවල ඇත්ත නැත්ත  බලා ගන්නට පුළුවන් රනිල් මේ රටේ රාජ්‍ය නායකයා වුණොත් එහෙම බටර් එහෙම අරගෙන නිල මන්දිරය පැත්තේ කැරකෙන කට්ටිය අතර මේ අය ඉන්නවා ද නැද්ද යන්න පරීක්ෂා කළ විට ය. 



කෙසේ වෙතත්, රනිල්ගේ රුචිකත්වය ගැන නම් අපටත් දුක ය. 


සමලිංගිකයන් සම්බන්ධයෙන් මේ රටේ පිරිමින්ගේ සාමාන්‍ය අත්දැකීම වන්නේ එවැන්නන් නිතර තමන් ළඟට එන බව හා ගැහැනුන් සමග පමණක් ලිංගික සබඳතා පවත්වන 'මාර හොඳ පොරක් වන' තමන් පැන දුවන බව ය. 


කෙසේ වෙතත්, මේ චෝදනාව රනිල්ගේ දේශපාලන අනාගතයට බරපතල අභියෝගයක් වන බව අපේ අදහසයි. ඔහුගේ විරුද්ධවාදීන් මේ චෝදනාව ගෙන එන්නේ අවසන් තුරුම්පුව ලෙසයි. මන්ද, මේ වනාහි උඩ බලාගෙන කෙළ ගැසීමක් වන හෙයිනි. 


මෙම චෝදනාව ඔස්සේ එජාපය බෙදෙන්නේ අපූරු ආකාරයකට ය. එනම්, රනිල් සමග ඒ වැඩේ කළ අය හා නො කළ අය ලෙස ය. 


අනෙක් පැත්තෙන්, නගර හා ගම්වල ජීවත් වන ලාංකික ගැමියන් අතර රනිල්ගේ ප්‍රතිරූපය මෙම චෝදනාව විසින් තටු ලබා දෙන කට කතා විසින් සුන්නද්දූලි කර දමනු නිසැක ය. 


මේ සියල්ලේ වාසිය රාජපක්ෂ පවුලට ය. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-20

නැගෙනහිර ටිමෝර නිදහස් සටන්කාමීන්ගේ මිළ

නැගෙනහිර ටිමෝරය යනු පෘතුගීසි යටත් විජිතයකි. 1975දී පෘතුගාලය එය නිදහස් කිරීමත් සමග ම ඉන්දුනීසියාව එරට ආක්‍රමණය කළේ ය. දශකයක පමණ දැවැන්ත අරගලයකින් පසු 2002දී එක්සත් ජාතීන්ගේ මැදිහත් වීමෙන් නැගෙනහිර ටිමෝරයට ස්වයං නිර්ණ හිමිකම ලැබිණි. 


නිදහස් නැගෙනහිර ටිමෝරයේ රජය දැන් පැරණි ජාතිකවාදී නිදහස් අරගලකරුවන්ට මුදලින් වන්දි ගෙවීමේ වැඩපිළිවෙලක් ආරම්භ කර තිබේ. ජාත්‍යන්තර අර්බුද කණ්ඩායමේ වාර්තාවක එහි ඇති ගැටලු වෙත අවධානය යොමු කර ඇත. 


මෙවැනි අරගලයක සැබෑ සටන්කරුවන් හා ව්‍යාජ වන්දි ඉල්ලන්නන් අර වෙනස හඳුනා ගැනීම අතිශය දුෂ්කර ය. 


සමාජවාදී විප්ලව කළ බව කියූ රටවල මෙවැනි ප්‍රශ්න පැන නැඟුණ බවක් වාර්තා වී නැත. මන්ද, නිර්ධන පංති ආඥාදායකත්වයන් ලෙස නම් කරන ලද එකී රටවල ඒකාධිපති පාලනයන් වීරයන්ට මුදලින් වන්දි ගෙවීමක් පිළිබඳ සිතුවේවත් නැති හෙයිනි. 


ජාතික විමුක්ති අරගලයකින් පසු පිහිටුවනු ලැබූ නව ලිබරල් ධනවාදී පාලනයක් තුළ වීරයන්ගේ වටිනාකම වුව මිළ කෙරෙන්නේ මුදලිනි. 


අදාළ වාර්තාව ගැන විස්තරය මෙතැනින් කියවන්න.

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-19

රුවන්දි සිල්වාගේ තාත්තා ඇතුළු වාමාංශිකයන් අතින් මිය ගිය වාමාංශිකයන් ගැන..........................

රුවන්දි සිල්වා සොයුරිය විසින් ලියා එවන ලද පහත පළ කරනු ලබන ලිපිය කියවන්නට ලැබුණේ මඳක් ප්‍රමාද වී ය.


1989 සමයේදී ජවිපෙ සෙසු වාමාංශිකයන් දෙස බැලුවේ තදබල වෛරී හැඟීමකිනි. ජවිපෙ කැරැල්ල පිළිබඳ සෙසු වාමාංශික කණ්ඩායම්වලින් මතු වූ විවේචන ‍ඉවසන්නට සූදානමක් එදා ජවිපෙට නො තිබිණි.


පැරණි වමේ සුළු පිරිසක් ආණ්ඩුව හා ආරක්ෂක හමුදා සමග එක්ව පිහිටුවා ගත් ප්‍රතිවිප්ලලවාදී අතුරු හමුදා කණ්ඩායම් හේතුවෙන් පැරණි වමේ සියල්ලන් ම එක ම සතුරු කුලකයක ලා ගිනීමට ජවිපෙ නායකත්වයට අවස්ථාව ලැබිණි.


එදා ද්‍රෝහී ප්‍රා කඳවුරක් ලෙස සලකා ජවිපෙ විසින් විනාශ කරන ලද රුවන්දි සොයුරියගේ ලිපියේ සඳහන් වන ගොවිපල පිළිබඳ සැබෑ තතු දත් සහෝදරයින් ඇසුරු කිරීමේ අවස්ථාව පසු කලෙක ලේඛකයාට ලැබිණි. ඒ වන විට ලේඛකයා ද සිටියේ මහ ජාතියේ වාර්ගික ස්වෝත්තමවාදය පිටුදකින දේශපාලන ස්ථාවරයක ය.


ඒ වනාහි A free society is one where it is safe to be unpopular හෙවත් නිදහස් සමාජයක් යනු ජනප්‍රිය නො වන ස්ථාවරයන් ගැනීමෙන් අනාරක්ෂිත තත්වයට පත් වීමට සිදු නො වන සමාජයක් ය යන අප වෙබ් අඩවියේ මේ දිනවල උද්ධෘත පාඨය ලෙස දක්වා තිබෙන ප්‍රකාශයේ අරුත ලේඛකයාට ‍හොඳින් වැටහෙමින් තිබුණු අවධියකි.   


ප්‍රා කඳවුරක් ලෙස වරදවා වටහා ගන්නා ලද අවතැන් වාමාංශිකයන්ගේ ගොවිපළේ ජීවත් වූ කුඩා දැරියක වූ රුවන්දි සිල්වා පසුකලෙක මුණගැසෙන විට ඇගේ ආදරණීය පියා වැනි වාමාංශික සහෝදරයින් මරා දැමීමේ වරදකාරිත්වය කලකට ඉහත ජවිපෙ ක්‍රියාකාරිකයන් වූ ලේඛකයා ඇතුළු පිරිස් ලජ්ජාවට පත් කළේ ය. 


අද ඇගේ ලිපිය කියවන විට ලේඛකයාට මතක් වන්නේ ඔහුගේ දියණියෝ ය. අනාරක්ෂිත සමාජයක ජීවත් වන ජනප්‍රිය නො වන මාධ්‍යකරුවකු වන ඔහු වෙනුවෙන් මෙවැනි ලිපියක් ලියන්නට ඔහුගේ දියණියන්ට ද සිදු වේ යයි ලේඛකයා ඇත්තට ම බියෙන් සන්ත්‍රාසයට පත් වෙයි. 


 සමාජවාදී විප්ලවය වෙනුවෙන් පරිත්‍යාග කිරීම් කළ මිනිසුන් අතින් තවත් එවැනි ම මිනිසුන් කී දෙනෙකුගේ ලේ සෙලවෙන්නට ඇද්ද? 


මනුස්සකම විප්ලවයට වඩා වැදගත් ය. විප්ලවය නම් සංකල්පය විප්ලවීය ලෙස උඩු යටිකුරු කළ හැක්කේ යළි මනුස්සකමට මුල් තැන දීමෙනි. 


රුවන්දි සිල්වා සොයුරිය ලියූ සම්පූර්ණ ලිපිය මෙතැනින් කියවන්න. පහත පළ වන්නේ එයින් උපුටා ගත් කොටසකි. 


It was the 8th of November, 1988. Both I and my sister were at the school boarding house, after spending our weekend with my father as we used to do frequently. It never occurred to us that our lives were about take the most terrible blow soon after that fateful weekend. Before leaving the house hoping to go back to the school, we never dreamed that it would be our final farewell to the man who taught us everything about life and love. 

 On that fateful night, my father was brutally murdered along with four other friends. An armed gang of the JVP, surrounded our house before dragging everyone out to be shot in cold blood. Their bodies were brutally mutilated and the house we grew up was burnt to the ground. 

 We never heard him crying in pain. We never saw him in a pool of blood. We never even saw his mutilated body lying in a coffin. Therefore I still remember him as he always wanted us to remember him: A father with a heart filled with love for us and with unending passion for justice - As a human being made out of love and courage.

Nothing less - nothing more!


Read the full article


මේ ලිපියට ඔබ කැමති නම් වෙන අයත් එක්කත් බෙදා ගන්න

සුදු කොඩි නඩුවේ අවසන් අවාසිය රාජපක්ෂලාට ය / Final disadvantage of white flag case is to Rajapaksas

රට තුළදී ආණ්ඩුවට එරෙහිව යුද අපරාධ චෝදනා එල්ල කිරීමට තරම් දිරිමත් වන අය මුහුණ දෙන අනතුර සුදු කොඩි නඩු තීන්දුවෙන් පෙන්නුම් කෙරෙන බව කොළඹ BBC වාර්තාකරු පවසා ඇත. 


යුද අපරාධ චෝදනා වනාහි ආණ්ඩුවේ නායකයන්ට ජාත්‍යන්තර වශයෙන් නිරතුරුව ම පවතින භයානක තර්ජනයකි. 


සුදු කොඩි රැගෙන යටත් වීමට පැමිණෙන කොටි නායකයන්ට වෙඩි තබා මරා දමන්නැයි ආරක්ෂක ලේකම් ගෝඨාභය රාජපක්ෂ එවකට බ්‍රිගේඩියර් ශවේන්ද්‍ර සිල්වාට උපදෙස් දුන් බව තමන්ට පුවත්පත් කලාවේදියකුගෙන් දැගනගන්නට ලැබුණු බව හිටපු හමුදාපකි සරත් ෆොන්සේකා සන්ඩේ ලීඩර් මාධ්‍යකාරිනී ෆ්‍රෙඩ්රිකා ජෑන්ස්ට ප්‍රකාශ කර ඇති බව දැන් ලංකාවේ අධිකරණය පිළිගෙන ඇත. 


එම ප්‍රකාශය සත්‍ය ප්‍රකාශයක් ද නැද්ද යන්න මෙම නඩු විභාගයේදී සලකා බැලුණේ නැත. 


මෙම නඩු තීන්දුව ලංකාවේ පාලකයන්ට එරෙහිව යුද අපරාධ චෝදනා  නඟන්නන්ට වැදගත් සාධකයක් විය හැකි ය. 


අදාළ වකවානුවේ හමුදාපති වැනි වගකිව යුතු තනතුරක් හෙබවූවකු එවැනි ප්‍රකාශයක් කළ බව නීතිය ඉදිරියේ ඔප්පු වී ඇති පරිසරයකදී එම ප්‍රකාශයේ සත්‍යාසත්‍යභාවය විමසීමේ පරීක්ෂණයක් සඳහා පැහැදිලි යුක්තියුක්තභාවයක් ඇති වේ. 


වෙනත් වචනවලින් කියනවා නම්, ලංකාවේ යුද අපරාධ පිළිබඳ පරීක්ෂණයක් ඉල්ලා සිටින පිරිස්වලට මෙම නඩු තීන්දුව ශක්තියක් සපයන බව අපේ අදහසයි. 


එසේම, ආණ්ඩුවේ උගත් පාඩම් කොමිසම ඉදිරියේ සාක්කි විමසීම සිදු වූයේ සාක්කි දෙන්නන් සඳහා ආරක්ෂිතභාවය පිළිබඳ විශ්වාසයක් නො තිබුණු පරිසරයක බව හා එයින් නිසි සාක්කි විභාගයක් සිදු නො වූ බවට ඇති තර්කයට ද මෙම නඩු තීන්දුවෙන් තටු ලැබේ.


සරත් ෆොන්සේකා නඩු තීන්දුවෙන් පසු අධිකරණයේදී මෙසේ පවසයි. "සුදු කොඩි නඩුවේදී මාධ්‍යවේදියකුගෙන් මට ආරංචි වුනා යැයි කියා පමණයි මා කියා ඇත්තේ. එවැන්නක් සිදුවුනාද නැත්ද යන්න සොයා බැලීම අධිකරණයේ වගකීමයි."


අවසානයේ සරත් ෆොන්සේකා ද තමන් එම ප්‍රකාශය කළ බව පිළිගෙන ඇති අතර එම ප්‍රකාශය පිළිබඳ පරීක්ෂණයක සාක්ෂිකරුවකු වීමේ සූදානමක් ද ප්‍රකාශ කර තිබේ. 


"යුද අපරාධ සිදු වූ ක‍්‍රිෂාන්ති කුමාරස්වාමි, බිඳුනුවැව, ඇඹිලිපිටිය සිසු ඝාතනය වැනි සිදුවීම් වලදී හමුදා නිලධාරීන්ට එරෙහිව ක‍්‍රියා කළා. ඒ ගැන ජනතාව කතා කළා. එසේ කතා කළ පුද්ගලයන්ට එරෙහිව මෙසේ නඩු දාලා නෑ. මින්පසුව එවැනි සිදුවීමක් ගැන කතාකරන ජනතාවට පවා නඩු දමා සිරගත කළ හැකියි," යි හේ පවසයි. 


අපගේ නිරීක්ෂණය වන්නේ මෙම නඩු තීන්දුව හේතු කරගෙන ලංකාවේ පාලකයන් තවත් අවුලකට ඇදී යන බවයි. 


යුද්ධයෙන් පසු දෙමළ සමාජය සමග සංහිඳියාව ඇති කර ගන්නට පියවර ගන්නවා වෙනුවට සිංහල ප්‍රතිවාදීන් සමග ද ගැඹුරු ගැටුමක් ඇතිකර ගැනීමෙන් රාජපක්ෂ පාලනය සිදු කර ගන්නේ තමන්ට ම නරකක් බව උපේක්ෂාවෙන් යුතුව පවසමු. 


සරත් ෆොන්සේකා සමග දේශපාලන වේදිකාවේදී අභිමුඛ වන්නට ආත්ම ශක්තියක් ඇති කර ගත්තා නම් සමහරවිට මීට වඩා හොඳ වන්නට ඉඩ තිබිණි.


මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-18

ජවිපෙ ගිරා පෝතකයකු සමග පැයක් / An hour with a JVP parrot

ඊයේ කැස්බෑවේ සිදු වූ ජවිපෙ ගුටි ගැසීම ජවිපෙ කණ්ඩායම් දෙක අතර අර්බුදය නව මානයක් කරා යාමකි. දෙපාර්ශ්වය එකිනෙකාගේ ශක්තිය පෙන්වීමේ තරගයක නියැලීමෙන් අනතුරුව දැන් ගැටුම ප්‍රචණ්ඩ අවධියකට එළඹෙමින් තිබේ. 


මේ එකිනෙකාගේ ලේ සොලවන්නේ කලක් එකට සිටිමින් අන් අයට එරෙහිව නැඟී සිටි පිරිසකි. ඉතිහාසය පුරා ම වාමාංශික හා විප්ලවවාදී යයි කියන පක්ෂ, කණ්ඩායම්වල ගැටුම් සිදු වී ඇත්තේ මේ අන්දමිනි. 


ලේඛකයාට ඊයේ දවසේ ජවිපෙ සෝමවංශ අමරසිංහ කණ්ඩායමේ තරුණ වෘත්තීය සමිති ක්‍රියාධරයකු හමු විය. ලේඛකයා ඔහු සමග සංවාදයක් ඇති කර ගන්නට උත්සාහ කළේ ය. ලේඛකයා ඔහුට පැහැදිලි කරන්නට උත්සාහ කළ දෙය වන්නේ දේවල් පිළිබඳ නිගමන මත පිහිටීම වෙනුවට ඒවා සංවාද ලෙස විවෘත අවසානයන් සහිතව පවත්වාගෙන යාමේ වැදගත්කමයි. 


එහෙත්, ඔහුගේ ප්‍රධාන තර්කය වූයේ සත්‍යයන් ඇත්තේ එකක් පමණක් බවයි. විරුද්ධ මත කිසිවකට සවන් දීමේ උවමනාවක් ඔහුට නො වූ අතර, ඔහු දිගින් දිගට ම කතා කළේ ය. ලේඛකයාට කරන්නට සිදු වූයේ ඔහුට සවන් දීම හා ඔහුගේ ශරීර භාෂාව නිරීක්ෂණය කිරීම පමණි. මෙම තරුණයා ලේඛකයාට පක්ෂ ඉතිහාසය පිළිබඳ විස්තරයක් කළේ 1971 කැරැල්ල රෝහණ සහෝදරයාගේ කැමැත්තෙන් තොරව සිදු වූ දෙයක් බව අවධාරණය කරන්නට ඔහු වැඩි කාලයක් ගනිමිනි. ලේඛකයාට එකී කාරණා අලුත් ම ඒවා වන්නට ඇතැයි ඔහු සිතන බවක් ඔහුගේ විශ්වාසවන්ත කතා විලාසය තුළ තිබිණි.  


වර්තමාන අර්බුදය ගැන කියද්දී ඔහු කියුවේ මෙය සිදු වූයේ පක්ෂයේ කණ්ඩායමක විනය විරෝධී ක්‍රියාවල ප්‍රතිඵලයක් ලෙස බවයි. පක්ෂයේ සිටි රංජිතම් ගුනරත්නම් නමැති මිය ගිය නායකයාගේ 'අයියා' වන කුමාර් ගුනරත්නම් නමැත්තකු එහි නායකයා බව ඔහු කීවේ ය. එම පිරිස ප්‍රභාකරන්ගේ මවගේ අවමංගල්‍යයට සහභාගි විය යුතු බවට යෝජනාවක් ගෙන ආ බව හා දේශපාලන මණ්ඩලයේදී එය පරාජය වූ බව ඔහු කීවේ ය. ඔහුට අනුව ගැටුම ආරම්භ වූයේ ඒ සමගයි.


එසේ ම, මොවුහු පක්ෂ මතයට විරුද්ධ අදහස් අවුරෝරා සඟරාවේ පළ කළ බව ද කීවේ ය. ඔවුන් ජාතික ප්‍රශ්නය කියා ලියූ බව ද, ලංකාවේ ඇත්තේ ජාතික ප්‍රශ්නයක් නොව ජාතිවාදයක් හා රට බෙදීමේ වැඩපිළිවෙලක් බව ද ඔහු කීවේ ය


අසන්නා තුළ ඇති සිංහල ජාතිවාදී මූලයන් ස්පර්ශ කිරීම කරන ගමන් ම තමන් ජාතිවාදී පක්ෂයක් නො වන බව ද, 'ජාතික ප්‍රශ්නයට' විසඳුම ඇත්තේ සමාජවාදය තුළ බව ද ඔහු කීවේ ය. . 


ඔහුගේ කතා විලාසය අධික ලෙස උද්වේගකර විය. ලේඛකයාට ඔහුගේ තුරුණු විය සිහිපත් විය. 


සිංහල බස පමණක් දත්, සාමාන්‍ය උගතුන් වන, වැඩිය පොත පත නො කියවන, කියවීමේදී පක්ෂය විසින් නිර්දේශ කර ඇති ලේඛන පමණක් තෝරා ගන්නා මේ තරුණයෝ පක්ෂ පංති, කඳවුරු ආදියට සහභාගි වී තමන් පක්ෂයේ සාමාජිකයින් හැර ලෝකයේ අන් කිසිවකු විසින් අත් පත් කරගෙන නැති අවබෝධයකින් යුක්ත පිරිසකැයි තමන් ගැන අධි විශ්වාසයක් හා මානයක් ඇති කර ගනිති. ඉන් පසු ඔවුන් කියවන්නේත්, සවන් දෙන්නේත් පක්ෂය හරහා ගලා එන දැනුමට පමණි. 


පක්ෂය ඔවුන්ට ආගමක් වන්නේ එසේ ය. මේ ආගමික විශ්වාසය මත පදනම්ව ඔවුහු ලොව අන් සියලු දෙනා මිත්‍යා දෘෂ්ටිකයන් සේ සලකති. මේ පක්ෂවල නායකයෝ මීට වඩා බුද්ධිමත්තු ය. එහෙත්, ඔවුන්ගේ ගැටලුව වන්නේ ඔවුන් සාමාජිකයන් අතර මෙම මුග්ධත්වය නඩත්තු කිරීමයි. 


විශ්වාසවන්ත අනුගාමිකයන් පිරිසක් බිහි කර ගැනීම සඳහා මෙම මුග්ධත්වය නඩත්තු කිරීම හැර අලුත් ක්‍රමයක් ගැන අදහසක් ඔවුන්ට නැත. එහෙයින්, දැන දැන ම මේ ආගමික අන්තවාදීනට ශාස්තෲ භූමිකාව රඟපාති. 


මේවායින් බිහි වන්නේ හිට්ලර්ගේ නාසි පක්ෂයට ව්‍යූහාත්මක වශයෙන් වෙනස් නැති පක්ෂ ය. 


එහෙත්, වාමාංශික හෘදය සාක්ෂිය අවධි වීම නිසා කලින් කලට මේවායින් පිරිස් හෝ තනි තනි පුද්ගලයෝ ගැලවී යති. තමන් මෙතෙක් ජීවත් වූ උප සංස්කෘතික අවකාශයෙන් මිදී යථාර්ථවාදී ලෝකයට නිරාවරණය වීමත් සමග ඔවුහු එයට හැඩගැසීමට තමන්ට අභිමුඛ වූ නව යථාර්ථයන් තේරුම් ගැනීමට උත්සාහයක් දරති. 


එහිදී බොහෝ අය දැඩි ලෙස අනාරක්ෂිත තත්වයට පත් වෙති. එවිට, ඔවුහු නව ශාස්තෲන් සොයා ගනිමින් ප්‍රමාණයෙන් කුඩා වූ අලුත් උපසංස්කෘතික අවකාශයන් නිර්මානය කර ගනිමින් ඒවා තුළ ආරක්ෂාව සොයති. රෝහිත භාෂණ අබේවර්ධනගේ නායකත්‍වයෙන් ජවිපෙන් වෙන් වූ හිරු කණ්ඩායම මේ සඳහා‍ නිදසුනකි. 


එසේ නොමැති නම්, විමල් වීරවංශ සේ විප්ලවවාදියා මරා දමා, සාමාන්‍ය මිනිසත්භාවයේ පොදු දුර්ගුණ අලුතෙන් ම හමු වූ මහාර්ඝ වස්තූන් සේ අභිරුචියෙන් වැළඳගෙන ගිජු ලෙස අනුභව කිරීම අරඹති. 


එහෙමත් නොමැති නම්, එක්ස් කණ්ඩායම හෝ වෙනත් පැරණි වාම විප්ලවවාදීන් සේ බොහිමියානුවාදයක ප්‍රවර්ධකයෝ බවට පත් වෙති. 


ජවිපෙ කුමාර් පාර්ශ්වය අලුත් වීමට කැමැත්තක්, උනන්දුවක් පෙන්වා තිබේ. එහෙත් අලුත් බෝතලේ පරණ වයින් නො වී, සැබැවින් ම අලුත් වීම විශාල අභියෝගයකි. 


තමන් සමග සිටින පිරිස අර අප ඉහත කී තරුණයා වැනි නායකයන් කී දේ ඔවුන්ගේ කථන විලාසයන් ද සමග අමු අමුවේ කොපි කරමින්, තැන, නොතැන නො බලා දෙසා බාන ගිරා පෝතකයින් වෙනුවට සංවාදශීලී විවෘත දේශපාලන ක්‍රියාධරයකු නිර්මානය කිරීම අභියෝගයකි. හේතුව, එවැනි ගිරා පෝතකයින්ට දිනා ගත හැකි වන්නේ සමාජයේ සිටින මුග්ධ ම හා අදක්ෂ ම පිරිස පමණක් වන හෙයිනි. 

මේ ලිපියට ඔබ කැමති නම් වෙන අයත් එක්කත් බෙදා ගන්න

2011-11-17

මාලදිවයිනේ පිහිටවූ ගුටි කන සිංහයා ලංකාවේ ජාතික සංකේතයක් ද? / Maldive lion and Sri Lanka's national symbol

ලංකාවේ පාලකයන් සාක් සමුළුව නිමිත්තෙන් මාලදිවයිනට ගෙන ගොස් පිහිටවූ සිංහ රූපයක් මේ දිනවලි කළු තෙලින් නෑවෙමින් එ‍රට මහජනයාගෙන් කොටසකගේ වෛරයට ලක් වෙමින් තිබේ. 


පකිස්තානයෙන් ගෙනැවිත් සවි කරන ලද පිළිමයක් මේ වන විට ගිනි තබා තිබේ.


මාලදිවයිනේ හිටපු ඒකාධිපති මම්මූන් අබ්දූල් ගයුම්ගේ පක්ෂය ඇතුළ මුස්ලිම් අන්තවාදී පක්ෂ පෙන්වා දෙන්නේ මෙම පිළිම මාලදිවයිනට ගෙන ඒම හා එහි පිහිටුවීම නීති විරෝධී බවයි. මාලදිවයින පිළිම වන්දනාව පිටු දකින මුස්ලිම් රටකි. 


එහෙත්, ලංකාවේ මිනිස්සු පවා සිංහ පිළිම වන්දනා නො කරති. එය සිංහල ජාතියේ සංකේතයකි. 


ලංකාවේ ස්වාභාවිත පරිසරයේ සිංහයන් ජීවත් වන්නේ නැත. ජීව විද්‍යාත්මකව ගත්තොත් සිංහයා ද තවත් එක් තිරිසන් තතෙකු පමණක් වන මුත්, ලංකාවේ සහ ලොව තවත් බොහෝ රටවල ජන සාහිත්‍යයේ සිංහයාට අධිපති භූමිකාවක් හිමි වී ඇත.


සිංගප්පූරුවේ ද සිංහයා සංකේතයකි. එහි ද සිංහයෝ ජීවත් නො වෙති.
සිංහල ජාතියේ උපත සම්බන්ධ මිථ්‍යා කතාව සමග ද සිංහයකු සම්බන්ධ නිසා සිංහලයෝ සිංහයා සිය සංකේතය කර ගත් හ. 


සිංහයා සිංහලයන්ගේ සංකේතයක් මිස ‍ලාංකිකයන්ගේ සංකේතයක් නො වේ. 


නිදහසත් සමග ඉංග්‍රීසි යටත් විජිතවාදීන්ගේ අනුග්‍රහයෙන් නූතන ලංකාව පිහිටුවන විට සිංහලයා එහි අධිපති ජාතිය බවට පත් වීම දෙමළ කතා කරන ජනයා විසින් සුහද අයුරින් භාර ගනු ලැබුවේ නැත. මේ ඝර්ෂණය පවතිද්දී, නිදහසින් වසර කීපයකට පසු සිට ම සිංහල නායකයෝ දේශපාලන බලය පාවිච්චි කරමින් සුළුතරය බවට පත් වූ දෙමළ කතා තරක ජනයා පෙළන ක්‍රියාමාර්ගවලට එළඹුන හ. ඉන්දීය සම්භවයක් සහිත දෙමළ ජනයාගේ පුරවැසිභාවය අහිමි කිරීම එවැනි මුල් ම පියවර වූ අතර 1956දී සිංහල පමණක් රාජ්‍ය භාෂාව බවට පත් කරන ලදී. 


සිංහලයන්ගේ මෙම ආධිපත්‍යවාදී ආකල්පය හේතුවෙන් ඒ වන විට ජාතික කොඩියට ද නැග සිටි සිංහයා දෙමළ ජනයා විසින් ආක්‍රමණික සංකේතයක් ලෙස සලකන්නට පටන් ගන්නා ලදී. 


දෙමළ ජාතිකවාදීහු සිංහයාට එදිරිව කොටියා නම් සංකේතය නිර්මානය කළ හ. කොටියා ද ලංකාවේ ස්වභාවික පරිසරයේ ජීවත් වන්නේ නැත. කොටියා රෞද්‍ර ය. 


ඉන් පසු සිදු වූ සිංහ කොටි ගැටුමේ කතාව කවුරුත් දනිති. එය අවසන් යයි ඇතැමෙක් සිතුව ද, එසේ වී නැත. අවසන් වී ඇත්තේ භෞතික යුද්ධයක් පමණි. 


සිංහයා, කොටියා යන සංකේත දෙකින් එකක්වත් කවදාවත් ලංකාවේ සැබෑ ජාතික සංකේත වන්නේ නැත. මක් නිසා ද යත් ලාංකික ජාතියක් ගොඩනැඟීමේ කාර්යයට මේ සංකේත හරහට සිටින බැවිනි. එහෙත්, සිංහලයන්ට සිය ජාතියේ සංකේතය ලෙස සිංහයා භාවිතා කිරීමට පූර්ණ අයිතියක් ඇත. දෙමළ ජාතියේ සංකේත තීරණය කළ යුත්තේ දෙමළ ජාතය විසින් විනා සිංහලයන් විසින් නො වන බව අමුතුවෙන් කිව යුතු නැත. එහෙත්, ලාංකික ජාතියේ සංකේත තීරණය කිරීමේදී පොදු එකඟතාවක් අවශ්‍ය ය.


සිංහලකම, දෙමළකම රැක ගනිමින් ලාංකිකයන් වීමට නම්, සිංහල, දෙමළ දෙජාතියට ම කැප කිරීම් කිරීමට සිදු වේ. ලාංකික ජාතියේ සංකේතය ලෙස සිංහයා ප්‍රවර්ධනය කරන්නට යාම සිංහලයා විසින් අත්හළ යුතුව තිබේ. මේ දෙජාතිය ම එක් වී කතිකා කර වෙනත් ජාතික සංකේතයක් නිර්මානය කර ගත යුතුව තිබේ. 


එසේ නො කර, අපේ සිංහයා ඔබේ ද සංකේතය ලෙස පිළි ගත යුතු යයි දෙමළ ජාතියෙන් ඉල්ලා සිටින්නට බැරි තරම් වූ ඊයම් බරු මෙන් බර ඉතිහාසයක් මේ සංකේත සමග ගැට ගැසී ඇත.


ලංකාවේ ජාතික සංකේතය ලෙස ඇත්තට ම ලංකාවේ පොළවේ ඇති සිංහල, දෙමළ, මුස්ලිම්, මැලේ, බර්ගර්, වැදි වැනි කාටත් පොදු දෙයක් තෝරා ගත යුතු ය. 


මාලදිවයිනේ සිංහ පිළිමය පිළිබඳ සිද්ධිය ගැන ඉන්දි සමරජීව ලියා ඇත්තේ මේවා කරන්නේ පිස්සු මාලදිවයින් ජාතිකයන් සුළු පිරිසක් බවයි. 


ප්‍රජාවන්ගේ සංස්කෘතික හා ආගමික පිළිගැනීම් පිළිබඳ ලිබරල් බුද්ධිමතුන්ට ඊට වඩා ගැඹුරු දැක්මක් අවශ්‍ය ය. 

මේ ලිපියට ඔබ කැමති නම් වෙන අයත් එක්කත් බෙදා ගන්න