2018-02-08

බ්‍රිගේඩියර්ගේ ශීර්ෂඡේදන මුද්‍රාව වීරකමක් ද?

බ්‍රිතාන්‍යයේ ශ්‍රී ලංකා මහ කොමසාරිස් කාර්යාලයට අනුයුක්ත කර සිටින ආරක්ෂක නිලධාරියකු වන බ්‍රිගේඩියර් ප්‍රියංක ප්‍රනාන්දු නිදහස් දා මහ කොමසාරිස් කාර්යාලය ඉදිරිපිට සාමකාමී උද්ඝෝෂණයක යෙදුණු දෙමළ පිරිසක් ඉදිරියේ ගෙල සිඳින ඉරියව්වක් පෑමේ සිද්ධිය මේ වන විට දැවැන්ත ආන්දෝලනයකට හේතු වී තිබේ. පිරිසක් එය දෙමළ ජනයාට එරෙහි රාජ්‍ය මර්දනය ප්‍රකාශ කරන ක්‍රියාවක් ලෙස උලුප්පා දක්වන්නට උත්සාහ කරන අතර තවත් පිරිසක් එය සිංහල වීරකමක් ලෙස පෙන්වන්නට ප්‍රයත්න දරති. මේ දෙක ම වැරදි ය. මෙය වෘත්තීය අපරිණතකම නිසා සිදු කරන ලද මෝඩකමක් පමණි.

මේ වන විට යුද්ධය නිමා වී වසර අටකට වැඩි ය. ලංකාවේ සාපේක්ෂ සාමයක් ඇත. සාමය ස්ථාවර කිරීම සඳහා ජාතීන් අතර සංහිඳියාව හා සහජීවනය ඇති කළ යුතු ය. සුළු ජාතීන්ගේ දේශපාලන ඉල්ලීම් සාකච්ඡා කළ යුතු වන්නේ ඒ නිසා ය. තිබුණේ දේශපාලන අරගලයක් මත පදනම් වූ යුද්ධයක් බව ද, යුද්ධයෙන් කොටි සංවිධානය පරාජය වූ මුත් ඉල්ලීම් අවසන් වී නැති බව ද අප මතක තබා ගත යුතු ය.

යුද්ධවල අතුරු ඵල රැසක් තිබේ. වඩා සුවපහසු ජීවිතයක් සොයා යුරෝපා, ඇමරිකා, ඕස්ට්‍රේලියා මහාද්වීපවලට සංක්‍රමණය වීමට පහසු මාර්ගයක් යුද්ධය නිසා නිර්මානය විය. ඒ ඔස්සේ දෙමළ ජාතිකයන් විශාල පිරිසක් විදේශගත වූ අතර එයින් දෙමළ ඩයස්පෝරාව නිර්මානය විය. එයින් මෙකී සංක්‍රමණය අවසන් වූයේ නැත. ඩයස්පෝරා සම්බන්ධකම් පාවිච්චි කරමින් ලංකාවේ පුද්ගලයෝ අඛණ්ඩව ම ඒ රටවලට සංක්‍රමණය වෙමින් සිටිති.

එහෙත්, රටක පුරවැසිකම ලබා ගැනීම ලෙහෙසි නැත. අධ්‍යාපනය වෙනුවෙන් වීසා ලබා ගැනීමට විශාල මුදලක් අවශ්‍ය ය. වෘත්තික සුදුසුකම් මත තාවකාලික හෝ ස්ථාවර පදිංචි වීසා ලබා ගැනීම සඳහා ඒ රටවලට අවශ්‍ය කුසලතා තිබිය යුතු ය. සංචාරක වීසාවක් ලබා ගැනීම පවා පහසු නැත. හේතුව, ලාංකිකයන් වෙනත් රටකට ගියොත් ආපසු මේ රටට නො එන තරමට රටට ආදරය කරන පිරිසක් නිසා ය. එබැවින්, සංචාරක වීසාවලින්, අධ්‍යයන වීසාවලින් හෝ වීසා නොමැතිව බෝට්ටුවෙන් හෝ ඒ රටවලට ගොස් ආපසු නො එන පිරිස විශාල ය. ඔවුන් කරන්නේ තමන්ට ආපසු සිය රට යා නො හැකි බව කියා දේශපාලන රැකවරණ පැතීමයි.

කිසිදු රටක් ආවාට ගියාට දේශපාලන රැකවරණ දෙන්නේ නැත. ඒ සඳහා තමන් පෞද්ගලිකව අසාධාරණ මර්දනයකට ඉලක්ක වී ඇති බව පෙන්විය යුතු ය. බොරුකාරයන්ට එය ඔප්පු කිරීම ලෙහෙසි නැත. මේ සම්බන්ධ මගේ පෞද්ගලික අත්දැකීමක් තිබේ. එකල අපි හිරු පුවත්පත මහත් දුෂ්කර තත්වයන් යටතේ මාසිකව පවත්වාගෙන යමින් සිටියෙමු. අපගේ දේශපාලන කණ්ඩායමට සම්බන්ධව සිටි පල්ලියෙන් නෙරපා හරින ලද කතෝලික පූජකවරයකුට සිය සොයුරියගේ රස්තියාදුකාර පුතා මෙසේ විදේශ රටක දේශපාලන රැකවරණ සඳහා යැවීමට ඕනෑ විය. ඒ වෙනුවෙන් හිරු පුවත්පතේ කර්තෘ රෝහිත භාෂණ විසින් ව්‍යාජ හිරු පුවත්පතක් සැලසුම් කරන ලදී. එහි මුල් පිටුවේ උද්ඝෝෂණයක ඡායාරූපයක් පළ කරන ලදී. එම ඡායාරූපය කොළඹ පැවති සත්‍ය උද්ඝෝෂණයක ඡායාරූපයක් තුළට, එම උද්ඝෝෂණයට සම්බන්ධ නො වූ ඉහත කී පුද්ගලයා ෆොටෝෂොප් මගින් ඇතුළු කර සකස් කරන ලද්දකි. මා මෙය විවෘතව කියන්නේ මෑතදී පවා මෙම කණ්ඩායමේ සිටි එක්තරා පුද්ගලයකු මෙම පුවත්පතේ උත්තරීතරකම ගැන පම්පෝරි ගසමින් මට අවලාදයක් නැගූ හෙයිනි.

පසු කලෙක මෙම දේශපාලන කණ්ඩායමේ වැඩි දෙනෙක් විවිධ උප්පරවැට්ටි භාවිතා කරමින් යුරෝපා රටවලට සංක්‍රමණය වූ හ. ඒ අතරට ඉහත පූජකවරයා හා රෝහිත භාෂණ ද ඇතුළත් වූ හ. මෙම කණ්ඩායමේ තවත් අයෙකු දේශපාලනයෙන් අයින් වී යුරෝපයේ ස්ථාවර පදිංචිය ලබා ගැනීමට උත්සාහ කර අසාර්ථක වූ පසු, යළි දේශපාලනයට සම්බන්ධ වී වෙබ් අඩවියක් ආරම්භ කර, එයට තර්ජන ඇති බවට ව්‍යාජයක් මවා පා, එම වෙබ් අඩවිය වසා දමා, දේශපාලන රැකවරණ ලබා ගනිමින් ස්විට්සර්ලන්තයට පැන ගත්තේ ය. මේවාට සම්බන්ධ ඇතැම් පුද්ගලයන් ඉතා ප්‍රසිද්ධ ප්‍රභූ චරිත වන බැවින් මා ඒ ගැන දැනට ඊට වඩා විස්තර ලියන්නේ නැත. මෙවැනි කතා තව රැසක් මා සතුව ඇත. සිංහල වාමාංශික දේශපාලන වීරයන් ගැන ඒ කතා සියල්ල කීවොත් බල්ලන් බත් කන්නේ ද නැත.

තවත් එක් කතාවක් කියමි. මෙම කණ්ඩායම විසින් පසු කලෙක වීඩියෝවක් ජාත්‍යන්තර මාධ්‍ය වෙත ලබා දෙන ලදී. එහි වගකීම ඔවුහු ප්‍රසිද්ධියේ භාර ගත් හ. ඒ අන් කිසිවකට නොව අවුරුදු ගණනාවකට වීසා ප්‍රශ්න හා ආර්ථික ප්‍රශ්න විසඳා ගැනීම සඳහා ය. තරුණයන් පිරිසකට වෙඩි තබන දර්ශනයක් වූ එම වීඩියෝව රූපගත කළ හමුදා සෙබළකු විය හැකි ඇත්ත පුද්ගලයා ඇතැම් විට තර්ජනයට ලක් වන්නට ඇත. එහෙත් එම වීඩියෝව වෙනත් පිරිසක් විසින් විකුණාගෙන කන ලදී. 

ලංකාවේ ජාතීන්ගේ ප්‍රශ්නය සම්බන්ධයෙන් රැඩිකල් අතිවාමාංශික ස්ථාවර ගත් හා දැනටත් ගනිමින් සිටින පුද්ගලයන් වැඩි දෙනෙකුගේ උන්නතිකාමී පෞද්ගලික සැලසුම්වල මෙවැනි පටු අරමුණු ඇති බව මම විවෘතව ම කියමි. විශේෂයෙන් ම, මර්දනයක් නැති, මහ පොළවේ ස්වයං නිර්ණය සම්බන්ධ අරගලයක් ද නැති සංදර්භය තුළ අලුතෙන් ස්වයං නිර්ණ වීරයන් පිරිසක් බිහි වීම පසුපස ඇත්තේ මෙවැනි පටු අරමුණු ය. හිරු කණ්ඩායම වීසා නිසා පරිහාණියට පත් වන්නට පෙර, දෙමළ ජනයාගේ ස්වයං නිර්ණ හිමිකම වෙනුවෙන් අවංක, පරිත්‍යාගශීලී අරගලයක් කළ බව රෝහිත භාෂණ වැනි අයගේ මුල් යුගයේ දේශපාලන අවංකභාවය සම්බන්ධයෙන් ගෞරවයෙන් පවසමි. දැන් ස්වයං නිර්ණ අයිතිය සම්බන්ධයෙන් වීරයන් වීමට උත්සාහ කරන ඇතැම් කට්ටිය ඒ කාලයේත් සිටිය හ. ඒ වුණාට අල්ප මාත්‍රයකින් හෝ ඒ වැඩවලට උදව් කළේ නැත.

මගේ මෙම අත්දැකීම මා සටහන් කළේ දෙමළ ඩයස්පෝරාවේ හා එයින් යැපෙන සිංහල කල්ලි ආදියේ ඇත්ත ගැන සාක්ෂි ලෙසයි. මේ ගැන නො දත් මෝඩ නිලධාරීන් කරන බොරු වීර රංගන හා ඒවාට උඩගෙඩි දෙන අය ලබා දෙන්නේ ඉතා පහසු උඩ පන්දු බව ඔවුන් දන්නේ ද නැත.

දෙමළ ඩයස්පෝරාවට සිය ආර්ථික අරමුණු වෙනුවෙන් තවත් දෙයක් අවශ්‍ය ය. ඒ වනාහි ලංකාවේ සිවිල් යුද්ධයක්, ගැටුමක් හෝ අර්බුදයක් ඇති කර ගැනීමයි. ඒ වෙනුවෙන් කළ හැකි හොඳම දෙය හමුදාව හා පොලිසිය කුපිත කිරීමයි. මහින්ද රාජපක්ෂ ජනාධිපති කාලයේ ග්‍රීස් යකුන්ගේ කතාවක් නිර්මානය කරගෙන මෙය කළ ආකාරය මතක ද?

හමුදාව හා පොලිසිය කුපිත කිරීම ගරිල්ලන්ගේ එදා සිට ම තිබුණු උපායකි. තමන්ට සම්බන්ධකම් නැති ගමක පාරක් අයිනේ සැඟව සිට හමුදාවට ප්‍රහාරයක් එල්ල කළ විට හමුදාව කරන්නේ ඒ ගමට කඩා පැන ගම්වැසියන්ට පහර දී ඇතැම් විට මරා දැමීමයි. එවිට එම සිද්ධිය පිළිබඳ ගරිල්ලන්ට පක්ෂ අය, මානව හිමිකම් ක්‍රියාකාරිකයන් හා මාධ්‍ය විසින් හුවා දක්වනු ලැබේ. ඒ මගින් නිර්මානය කරනු ලබන සමාජ අනුකම්පාව මුදල් බවට පත් වී ගරිල්ලා සංවිධාන, දේශපාලන පක්ෂ, රාජ්‍ය නොවන සංවිධාන, මාධ්‍ය ආදිය වෙත ගලා යයි. අනෙක් පාර්ශ්වයට ද වාසි ඇත. මෙමගින් නිර්මානය කරනු ලබන්නේ විෂම චක්‍රයකි.

මෙය තේරුම් ගැනීමට තවත් උදාහරණයක් දැක්විය හැකි ය. අන්තර් විශ්වවිද්‍යාල ශිෂ්‍ය බල මණ්ඩලය මෙහෙයවන පෙසප හා ජවිපෙ සතියක් ගානේ කුමන හෝ හේතුවක් මත විශ්වවිද්‍යාල සිසුන් වීදි බස්සන්නේ ඇයි? එම සිසුන් අතර සිටින ළහිරු වීරසේකර වැනි දේශපාලන ක්‍රියාකාරිකයන් හැම විට ම ඉතා ප්‍රචණ්ඩකාරී ලෙස හැසිරෙන්නේ ඇයි? ඔවුන්ට අවශ්‍ය පොලිසිය හා හමුදාව කුපිත කර ගැනීමයි. රතුපස්වලදී ද මෙය සිදු විය. එසේ කුපිත කර ගත් විට බොහෝ විට හමුදාව, පොලිසිය අතින් මිය යන්නේ අතට අසු වන අහිංසකයන් ය. එවිට එය ආණ්ඩුවට එරෙහිව පාවිච්චි කළ හැකි මෙවලමක් වේ. රාජපක්ෂ ආණ්ඩුව එපා වී සිටි අප පවා එම මෙවලම පාවිච්චි කළෙමු. දේශපාලනය එහෙම තමා ය. (හැබැයි එම සිද්ධිය නිර්මානය කිරීමට හා මිනිසුන් මරණයට යොමු කිරීමට අප සම්බන්ධ වූයේ නැත.)

ළහිරු වීරසේකර අභිමුව ලංකාවේ පොලිසිය විසින් පසුගිය කාලයේ දක්වන ලද වෘත්තිකභාවය ඉතා වැදගත් ය. කිසිම මරණයක් සිදු නො විය යුතු බවට ද, එසේ සිදු වුවහොත් එයට වගකිව යුතු අයට එරෙහිව දැඩි ක්‍රියාමාර්ග ගනු ඇති බව ද රජයේ ප්‍රධානීන් පොලිසියට සන්නිවේදනය කර තිබීම මෙම තත්වයට හේතුවයි.

ආරක්ෂක අංශවල ඉහළ නිලධාරීන් බුද්ධිමත් වෘත්තිකයන් විය යුතු ය. ඊනියා මිනීමරු සෝබනයට පශ්චාත් යුද සමයේදී කළ හැකි කැකිරි ගෙඩියක් නැත. මෝඩ සිංහල ජාතිවාදීන් චූන් කිරීමෙන් තමන්ට හෝ රටට කිසිදු සෙතක් අත් වන්නේ නැත. මෝඩ සිංහල අන්ත ජාතිවාදය යනු දෙමළ ජාතිවාදයේ ම නිවුන් සොහොයුරා ය.

මෙම බ්‍රිගේඩියර්වරයා වහාම රාජ්‍ය තාන්ත්‍රිකභාවය හා ආරක්ෂක කළමනාකරණය පිළිබඳ පුහුණුවකට යැවිය යුතු ය. ඔහු ලංකාවේ නීතියෙහි මූලික දේ දැන ගත යුතු ය. ඔහු කටයුතු කළ යුතුව තිබුණේ මෙසේ නො වේ. කොටින් ම ඔහුගේ අසංවර හැසිරීම උද්ඝෝෂකයන්ගේ අතට ම දුන් ඉතා පහසු උඩ පන්දුවක් බව ඔහු සහ ඔහු වැනි අනෙක් අය දැන්වත් දැන ගත යුතු ය. එම උද්ඝෝෂණය පිළිබඳ සාමාන්‍ය අන්දමින් කටයුතු කළා නම් අඩු ගානේ මෙය වාර්තා වන්නේවත් නැත. දැන් ඉතින් ගලේ පැහැරුවාට පසු බෙට්ට වහන්නට ගලට බෝර දමන්නට සිදු වේ. 


ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.

20 comments:

  1. Very well said Para.

    ReplyDelete
  2. රුවන් ජයතුංග දොස්තර මහත්තයා මේකට හොඳ නමක් දාලා සිරිසඟබෝ මුද්‍රාව කියලා.

    ReplyDelete
  3. Who knows whether he did it for economic benefit ?

    ReplyDelete
  4. පැහැදිලි මැදහත් විග්‍රහයක්. මේ ගැන ක.මිත් අපූරු ලිපියක් ලිය තිබුණා.

    http://kalahitha.blogspot.com/2018/02/battle-hardened-militants-in-diplomatic.html

    ReplyDelete
  5. //මෝඩ සිංහල ජාතිවාදීන් චූන් කිරීමෙන් තමන්ට හෝ රටට කිසිදු සෙතක් අත් වන්නේ නැත.//

    මොකද නැත්තේ පැරා රටට කෙසේ වෙතත් දියවන්නාව තරණය කරන්න පහසුම මාර්ගයක් තමයි එක.උදාහරණ ඕන තරම්.

    ReplyDelete
  6. මහින්ද පතිරණලා ගෙන් ඉගෙන ගන්නා සිසුන්ට අබ සරණයි.

    - වෛද්‍ය රුවන් එම් ජයතුංග transyl2014.blogspot.com

    කථිකාචාර්ය මහින්ද පතිරණ මහතා ශ්‍රීලන්කන් ගුවන් සේවය මහින්ද රාජපක්ෂ යුගයේ කළමනාකරණය කළ ආකාරය පිළිබඳව දක්වා ඇති අදහස මුග්ධ මෙන්ම අතිශය හාස්‍යජනකය. පතිරණ මහතා ආශ්‍රයෙන් වෛද්‍ය රුවන් ජයතුංග මහතා ශ්‍රී ලංකාවේ විශ්ව විද්‍යාල පද්ධතිය පිළිබඳව දරන අදහසේ බොහෝ සත්‍යතා ඇති නමුත් විශ්ව විද්‍යාල වර්ගීකරණය මත පදනම්ව කෙරෙන විග්‍රහයේ දී ඔහු මීට වඩා ප්‍රවේසම් විය යුතුව තිබිණි.

    මේ කමෙන්ටුව සඳහා මා පාදක කරගනුයේ www.4icu.org හි දත්තයන්ය.

    ශ්‍රී ලංකාව තුළ විශ්ව විද්‍යාල 16 ක් ඇති අතර ඉන් දේශීය වර්ගීකරණය (island ranking) අතර ප්‍රථම ස්ථානය හිමිකරගන්නේ වසර 1921 දී ආරම්භ කළ කොළඹ විශ්ව විද්‍යාලයයි (University of Colombo). ගෝලීය වර්ගීකරණයේදී (global ranking) එයට 1596 වන ස්ථානය හිමිය. ශ්‍රී ලංකාව තුළ ඇති විශ්ව විද්‍යාල අතරින් දේශීය වර්ගීකරණය යටතේ අවසාන එනම් 16 වන ස්ථානය හිමිකර ගන්නේ වසර 1996 දී ආරම්භ කළ අනුරාධපුරයේ භික්ෂු විශ්ව විද්‍යාලයයි. එය ගෝලීය වර්ගීකරණයේදී 7620 වන ස්ථානය හිමිකර ගනී.

    එසේම අපි වෛද්‍ය රුවන් ජයතුංග මහතාගේ අවධානයට ලක්වූ කථිකාචාර්ය මහින්ද පතිරණ මහතා කුමන විශ්ව විද්‍යාලයක ඉගෙනුම ලැබුවාද යන්න මා නොදන්නා නමුත් දැනට ඔහු සේවය කරන වසර 1995 දී ආරම්භ කරන ලද සබරගමුව විශ්වවිද්‍යාලයට දේශීය සහ ගෝලීය වර්ගීකරණයන් යටතේ ලැබෙන ස්ථානයන් විමසා බලමු. දේශීයව එය විශ්ව විද්‍යාල 16 ක් අතරින් 13 වන ස්ථානය හිමිකරගන්නා අතර ගෝලීයව එයට හිමිවන ස්ථානය වෛද්‍ය රුවන් ජයතුංග මහතා සඳහන් කරන පරිදි 5993 නොව මා පරිශීලනය කළ මූලාශ්‍රය අනුව වඩාත් පහල අගයක් වන 6393 ය.

    වෛද්‍ය ජයතුංග මහතා සඳහන් කරන වසර 1950 දී ආරම්භ කරන ලද ඉතියෝපියාවේ Addis Ababa විශ්ව විද්‍යාලය ඉතියෝපියාවේ ප්‍රථම ස්ථානය හිමිකරගන්නා අතර ගෝලීයව 1837 වන ස්ථානය හිමිකර ගනී. එසේම වෛද්‍ය ජයතුංග මහතා සඳහන් කරන වසර 1922 දී ආරම්භ කළ උගන්ඩාවේ Makerere විශ්ව විද්‍යාලය දේශීයව ප්‍රථම ස්ථානයත් ගෝලීයව 2182 වන ස්ථානයත් හිමිකර ගනී.

    දැන් අපි යුක්රේනයේ විශ්ව විද්‍යාලයන්හි තත්වය විමසා බලමු. එහි විශ්ව විද්‍යාලයන් 171 ක් අතුරින් ප්‍රථම ස්ථානය හිමිකර ගන්නා වසර 1898 දී ආරම්භ කළ National Technical University of Ukraine Kyiv Polytechnic Institute ගෝලීය වර්ගීකරනයේදී 1747 වන ස්ථානය හිමිකර ගනී.

    අවසානයේ මා අවධානය යොමු කරනුයේ වෛද්‍ය ජයතුංග මහතා අධ්‍යාපනය ලද වසර 1922 දී ආරම්භ කරන ලද යුක්රේනයේ Vinnitsa National Medical University දේශීය සහ ගෝලීයව වර්ගීකරණයට ලක්ව ඇති ආකාරය පිලිබඳවය. එම විශ්ව විද්‍යාලය යුක්රේනයේ විශ්ව විද්‍යාලයන් 171 ක් අතුරින් 63 වන ස්ථානය හිමිකර ගන්නා අතර ගෝලීයව එයට හිමි ස්ථානය 6734 ය.

    මෙම සටහනෙහි අරමුණ වෛද්‍ය ජයතුංග මහතා, කිසිදු විශ්ව විද්‍යාලයක් හෝ රටක් අපහාසයට ලක් කිරීම නොව දත්ත එක්රැස් කිරීම, විශ්ලේෂණය, නිගමනයන්ට එළඹීම සහ ඒ මත තර්ක ඉදිරිපත් කිරීම යන කාරණයන් හිදී හැඟුම්බරව කටයුතු කිරීමට වඩා උපායශීලීත්වය අගනා බව තරමක් කටුක ආකාරයෙන් සිහිපත් කරවීමටය.

    අවශ්‍යනම් සංවාදයට එළඹෙමු.

    ReplyDelete
    Replies
    1. ඔය දෙදෙනාගෙන් කවුරු ගැනවත් විශේෂ අදහසක් නෑ. ඒත් ඔය කියන්නේ විශ්වවිද්‍යාල වල web ranking වෙන්න ඕන. වෛද්‍ය රුවන් අද පර්යේෂණ පත්‍රිකාවක් පළ කරොත් ඒක ඔය පිටරට සරසවියේ නමින් දාන එකක් නෑ නේද? ඒ අනිත් අතටම ඔය මහින්ද ආචාර්යතුමා ඒ විශ්වවිද්‍යාලයේ ආචාර්ය වරයෙක් නිසා ඔහුට පර්යේෂණ කිරීමේ වගකීමක් තියේවි. මොකද ඔය සමහර ආචාර්යවරු සතියට පැය 2ක් වත් දේශන කරන්නෙ නෑ. තමන්ගේ දේශන තාවකාලික කථිකාචාර්යවරු ලවා කරවනවා. මාසෙම දේශන එක දවසක උදේ ඉඳන් රෑ වෙනකන් කරලා ඒකට දින කිහිපයක අත්සන් ලේඛන දමන අයත් ඉන්නවා. ඒත් මේ හැමෝම ඊනියා කාලසටහනක් පෙන්වනවා, තමන් වැඩ කරනවා කියලා පෙන්වන්න. (අර දොස්තරලත් ඔය වගේ දිනපොතක් හදනවා) ප්‍රශ්නේ, මෙහෙම අයිස් ගගහා ඔය පර්යේෂණ කරනවද? නැත්නම් ටියුෂන් කරනවද?එතකොට ඔවුන්ට ගෙවන පර්යේෂණ දීමනාව?

      Delete
    2. විශ්ව විද්‍යාල මහාචාර්ය කියන්නේ ඒ වෘත්තියේ අවසන් අවස්තාව. ඒ මිනිස්සුන්ට සලකන විදිහ කොහොමද කියල හොයල බලන්න උන්ට බනින්න කලින්

      Delete
    3. ඔබ වැරදියි. මහාචාර්ය ධූරයෙන් ඔබ්බට ලංකාව තුළ ජේෂ්ඨ මහාචාර්ය ධූරය දක්වා ද ගමන් කල හැකියි. ඔය කතා කරන මහින්ද කථිකාචාර්යවරයා මහාචාර්යවරයෙක් නෙවෙයි. මේ ආණ්ඩුව පත් වූ අලුත පිටරට ගිහින් ගිවිසුමට අනුකූලව යළි මෙරටට ආපු නැති ඔය ආචාර්ය වරුන්ට යළි ලංකාවට ඇවිල්ලා මේ ගැටළු නිරාකරණය කර ගන්න හැකි ක්‍රමයක් හැදුවා. මොකද ඔවුන් පිටරට ඉඳන් කියව කියව හිටියනේ තමන්ගේ දැනුමෙන් ලංකාවට සේවය කරන්න දෙන්නෙ නෑ කියලා. අන්තිමට වුනේ, අර රට හිටපු මහා උගතුන් යළි ලංකාවට ඇවිල්ලා, තමන්ගේ වැරදි යට ගහගෙන ආයිමත් රට පනින එක. ඒ හින්දා දැන් ඒ ප්‍රතිපාදනයත් අහෝසි කරලා. තමන්ගේ දේශන වලට 80% සහභාගී නොවන ආචාර්යවරු ඉන්නවා සිසුන්ගෙන් 80% ඉල්ලන. ළමයින්ගේ ඇගයුම් එකතු කරලා තමන්ගේ වැඩක් විදිහට පොත් ගහන අය ඉන්නවා. විශ්ව විද්‍යාලයේ දේශන වලට එන්නේ නෑ, ඒත් ටියුෂන් පන්තිය ගානට වෙලාවට. පුද්ගලික සරසවිවල දවල් කාලේ තමන්ගේ විශ්වවිද්‍යාල දේශනය මඟ හැරලා දේශන කරන ආචාර්යවරු කොච්චර ඉන්නවද?

      Delete
  7. //ආරක්ෂක අංශවල ඉහළ නිලධාරීන් බුද්ධිමත් වෘත්තිකයන් විය යුතු ය. ඊනියා මිනීමරු සෝබනයට පශ්චාත් යුද සමයේදී කළ හැකි කැකිරි ගෙඩියක් නැත. මෝඩ සිංහල ජාතිවාදීන් චූන් කිරීමෙන් තමන්ට හෝ රටට කිසිදු සෙතක් අත් වන්නේ නැත. මෝඩ සිංහල අන්ත ජාතිවාදය යනු දෙමළ ජාතිවාදයේ ම නිවුන් සොහොයුරා ය. // agree

    ReplyDelete
  8. අපේ ගොබබ හැතිකරේට ඕවා කියල වැඩක් නෑ. ඔය වගේ උද්ගෝශන වලට මොලෙන් ගේම දෙන්න ඔනේ. එම්බසිය ගානේ උදගෝශන කරන එවුන තිබහට බොන්න වතුර බෝතල් ටිකක් යවලා, ඔහේ පොටෝ එක ප්‍රසිද්ද කරනවා වගේ වැඩක්. ඌරගේ මාලු ඌරගේ ඇගේ තියල කපනවා වගේ. කොහෙද බ්‍රිගේඩියර් ඌරොත් එක්ක වලි දාගනන ගිහින් මඩ නාගේ ආවනේ.

    ReplyDelete
  9. වර්ෂ 2018 පෙබරවාරි මස 08 වැනි දා,

    අජිත් පැරකුම් ජයසිංහ මයා,
    සංස්කාරක - ඩබ්ලිව් තුන ලංකා වෙබ් අඩවිය,
    සහන නිවේදක - රාජ්‍ය මාධ්‍ය ආයතන.

    ගරු ජයසිංහ මහත්මයාණෙනි,

    ඔබ විසින් රචිත "බ්‍රිගේඩියර්ගේ ශීර්ෂඡේදන මුද්‍රාව වීරකමක් ද?" මැයෙන් පළ වූ වියුණු සටහන සම්බන්‍ධයෙනි.

    පූර්වෝක්ත ශීර්ෂයෙන් යුත් වියුණු සටහනෙහි ඔබ විසින් සඳහන් කරන ලද බොහෝ කරුණු එහි ශිර්ෂයට අදාළ නො වන බව පළමු ව සඳහන් කරනු රිසියෙමු. ඔබ විසින් සමස්ත ලිපියෙන් වැඩි ඡේද ගණනක් වැය කර ඇත්තේ ලාංකීය වාම විප්ලවීය පුවත්පත් කලාවේ සිළුමිණ වූ හිරු පුවත්පතට ද එහි ජ්‍යෙෂ්ඨ කර්තෘ, හිරු නයු, ලාංකීය වාම විප්ලවීය දේශපාලනයේ අවිවාදිත දිදුල තාරකාව වන ධීමත් රෝහිත භාෂණ සහෝදරයාට ද හිරු කණ්ඩායමේ සාමාජිකයකු ව සිටි, වර්තමානයේ දී යුරෝපයේ කීර්තිමත් විශ්වවිද්‍යාලයක මහාචාර්යධුරයක් දරන විද්වතකුට ද අස්ථානීය චෝදනා සහ අපවාද මුසු කලල්පතනයක් සිදුකිරීමට ය.

    ඔබ විසින් සඳහන් කරන ලද අසත්‍ය කරුණු පිළිබඳ පැහැදිලි කිරීමක් පළ කිරීමට අපට අවස්ථාව දෙන මෙන් කාරුණික ව ඉල්ලා සිටිමු. ඔබ අපගේ පැහැදිලි කිරීම ඔබගේ වාරණයේ අයෝමය පාදපාවට යටකර නොදමන්නේ නම් පමණක් අපි එම පැහැදිලි කිරීම සම්පාදනය කරන්නෙමු. ඔබගේ මතවාදයනට පිළිමල් ආලෝචන අපලෝපනය කිරීමේ ඔබගේ අභිනිවේශනීය දුශ්චර්යාව පිළිබඳ අපි මනා ව දනිමු. ඔබගේ අභිනිවේශනකාමය තෘප්ත කරන්නට අපගේ වටිනා කාලය වැයකිරීමට අපි අකැමැති බව සඳහන් කරමු.

    ලෝක ව්‍යාප්තික සහස්සුවහස් හිරු පාඨක සද්ජනීජනයා අජිත් පැරකුම් ජයසිංහයන්ගේ වාඃවෛශ්‍යාකරණය අවඥාව නම් කෙවිටෙන් ඔසවා අතීතයෙහි කසළ වළ හළ බව අවසන් වසයෙන් පවසමු.

    අජිත් පැරකුම් ජයසිංහයන් භාෂණභීතිකාවෙන් ද වාම වෛරයෙන් ද යුරෝපා වීසාපේක්‍ෂාභංගත්වයෙන් ද මිදේවා!

    මනකල් ධීමත් රෝහිත භාෂණයෙනි, චිරං ජයතු!

    ස්තුතියි!

    මීට,
    හිරු පාඨක සංසදය
    (යුරෝපා සහයෝගීතාව)










    ReplyDelete
    Replies
    1. අර යුරෝපා වීසාපේක්ෂාභංගත්වය කියන යෙදුම මරු.උඹලා මචං අන්තිමේදි ඔය ඔක්කොම කරපු දේවල් යුරෝපා වීසාපේක්ෂාවට පාවා දුන් එක තමයි බලුකම.

      ඕක බොහොම පොඩි දෙයක් බව දැන්වත් තේරෙනවද? අපි ඒ යුගය පහු කරලා දැන් සෑහෙන කල්.

      Delete
    2. කාලයක් හිරු එකේ හිටපු set එක ඔන්න දැන් සිදත් සඟරාව අතට අරගෙන...

      Delete
    3. සංසද මහතාණෙනි .
      කෝ අනු අංකය, කෝ ගොනු අංකය,

      මේ වගේ ලියමනක් යවනකොට 'ලියාපදිංචි තැපෑලෙන්' යැවියයුතු බව නොදන්නේද

      Delete
  10. ඔවුන්ට අවශ්‍ය පොලිසිය හා හමුදාව කුපිත කර ගැනීමයි. රතුපස්වලදී ද මෙය සිදු විය. එසේ කුපිත කර ගත් විට බොහෝ විට හමුදාව, පොලිසිය අතින් මිය යන්නේ අතට අසු වන අහිංසකයන් ය. එවිට එය ආණ්ඩුවට එරෙහිව පාවිච්චි කළ හැකි මෙවලමක් වේ. රාජපක්ෂ ආණ්ඩුව එපා වී සිටි අප පවා එම මෙවලම පාවිච්චි කළෙමු. දේශපාලනය එහෙම තමා ය. (හැබැයි එම සිද්ධිය නිර්මානය කිරීමට හා මිනිසුන් මරණයට යොමු කිරීමට අප සම්බන්ධ වූයේ නැත.)
    ..............................................දේශපාලනයේ යථා ස්වරූපය.

    ReplyDelete

මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.