චීනය ඩොලර් බිලියන 50ක බැඳුම්කර මිළ දී ගැනීමට සලකා බලමින් සිටින බව ෂින්හුවා පුවත් ‍සේවය වාර්තා කළේය. චීනය ඊටත් වඩා ආයෝජනය කිරීමට සූදානම් නමුත් ජාත්‍යන්තර මුල්‍ය අරමුදල එතරම් බැඳුම්කර චීනයට ලබා දීමට සූදානම් නැති බව පැවසේ. එයට හේතුව, ජාත්‍යන්තර මුල්‍ය අරමුදල තුළ චීනයේ බලය වැඩි වීම බටහිර රටවල් විසින් නොරිස්සීමයි.

රටවල් 185ක සාමාජිකත්වය හිමි ජාත්‍යන්තර මුල්‍ය අරමුදලට, ගෝලීය ආර්ථික අවපාතයෙන් බැට කන රටවලට ණය දීම සඳහා ප්‍රාග්ධනය ලබා ගැනීමට මෙම බැඳුම්කර නිකුතුව සැලසුම් කර තිබේ.

රුසියාවද ඩොලර් බිලියන 10ක බැඳුම්කර ලබාගැනීමට කැමැත්ත පළ කර ඇති බව පසුගියදා ජාත්‍යන්තර මුල්‍ය අරමුදල නිවේදනය කළේය.

ඩොලර් ට්‍රිලියනයක විදේශ සංචිත හිමි ජපානය පසුගියදා ජාත්‍යන්තර මුල්‍ය අරමුදලට ඩොලර් බිලියන 100ක් ණයට දීම සඳහා ගිවිසුම් අත්සන් කළේය.

ලෝකයේ ඉහළම විදේශ සංචිත හිමිකරුවා චීනයයි. එම ප්‍රමාණය ඩොලර් ට්‍රිලියන 1.9කි.