කොල්ලන්, බල්ලන්, මීඩියාකාරයන්, සරසවි ඇදුරන්, දොස්තරලා, වාමාංශිකයන් හා නිකමුන් ජාත්‍යන්තර වෙළඳ ගිවිසුම් ගැන විශාරදයන් විය යුතු ද?

තලංගම ජයසිංහගේ කාටුනයකි.
තලංගම ජයසිංහගේ කාටුනයකි.

සිංගප්පූරුව සමග අත්සන් කරන ලද නිදහස් වෙළඳ ගිවිසුමට විරෝධය පෑමට පළමු පියවර ලෙස රජයේ වෛද්‍ය නිලධාරීන්ගේ සංගමය දැනටමත් රෝගීන් ඇපයට තබා වැඩ වර්ජනයක් කර හමාර ය. එහෙත්, තමන් එයට විරුද්ධ ඇයි ද යන්න ගැන ඔවුන්ට පැහැදිලි අදහසක් ඇති බවක් ඔවුන් කරන ප්‍රකාශවලින් දක්නට නො ලැබේ. මේ සම්බන්ධයෙන් රජයේ වෛද්‍ය නිලධාරීන්ගේ සංගමය මෙන් ම ආචාර්ය නිර්මාල් රංජිත් දේවසිරි වැනි විද්‍යාර්ථීන් ද පළ කරන්නේ ගැඹුරක් නැති අදහස් ය. මූලිකව ම ඔවුන් කතා කරන්නේ නොදන්නා මගුලක් ගැන ය.

සාමාන්‍යයෙන් ඒ අදහස් මෙවැනි ය. සංවර්ධන උපාය මාර්ග සහ ජාත්‍යන්තර වෙළෙඳ අමාත්‍ය මලික් සමරවික්‍රම අවිශ්වසනීය පුද්ගලයෙකි. ඒ නිසා මේ පසුපස කොමිස් ජාවාරමක් තිබිය හැකි ය. මේ ගිවිසුම ගැන අප හරියට දන්නේ නැත. ඒ නිසා මෙය කුමන්ත්‍රණයක් විය හැකි ය. මෙයින් ලංකාවේ රැකියා අවස්ථා විදේශිකයන් අතට යා හැකි ය. සිංගප්පූරුවෙන් කරනු ලබන ආනයන හේතුවෙන් ලංකාවේ කර්මාන්ත බිඳ වැටිය හැකි ය.

ලංකාවේ සිටින ඕනැ දේකට විරුද්ධ පිරිස වන වාමාංශිකයන්, රාජ්‍ය සේවක වෘත්තීය සමිතිකාරයන්, අන්තර් විශ්වවිද්‍යාල ශිෂ්‍ය සංගමය, ජාතිවාදීන්, රාජපක්ෂවාදීන් වැනි ඉච්ඡා භංගත්වයට පත් පිරිස් දැන් වහ වහා මේ සිංගප්පූරු විරෝධය පසුපස පෙළ ගැසෙමින් සිටිති. තම තමන්ට රිසි පරිදි අර්ථ නිරූපණ සපයති.

දැන් අප ද මේ විරෝධය සමග එල්ලිය යුතු ද? මූලික වශයෙන් අපි ආර්ථික ජාතිවාදය ප්‍රතික්ෂේප කරන්නෙමු. ලෝකයට ඉදිරියට යා හැක්කේ ආර්ථික ජාතිවාදය පරදවා කලාපීය හා අන්තර් රාජ්‍ය සහයෝගිතාවන් නිර්මානය කර ගැනීමෙන් බව අපි විශ්වාස කරන්නෙමු.

අප මෙන් ම ඉහත සඳහන් කළ අය ද ජාත්‍යන්තර වෙළඳ ගිවිසුම් සම්බන්ධ විශේෂඥයෝ නොවෙති. ඒ නිසා ඔවුන්ගේ නන්දෙඩවීම්වල හරයක් නැත. මේ පිළිබඳ රජයේ පැත්තෙන් ද නිසි පැහැදිලි කිරීමක් තවම සිදු වී නැත. සාමාන්‍යයෙන් සිදු වන පරිදි ම අල්පශ්‍රැතයන් සියල්ල අවුල් කර මිථ්‍යාව වපුරන තෙක් රජය නිකම් බලාගෙන සිටියි.

මේ සම්බන්ධ පැහැදිලි කිරීමක් කළ යුත්තේ කවුරු ද?

මේ රටේ සිටින සියලු කොල්ලන්, බල්ලන්, මීඩියාකාරයන්, සරසවි ඇදුරන්, දොස්තරලා, වාමාංශිකයන් හා නිකමුන් ජාත්‍යන්තර වෙළඳ ගිවිසුම් විශාරදයන් වීම අවශ්‍ය නැත. එසේ ම, සියලු දේශපාලකයන් ද එසේ වන්නේ නැත. මේ හා සම්බන්ධ විශේෂඥයෝ රාජ්‍ය සේවයේ සිටිති. මේ ගිවිසුම් සම්බන්ධ සාකච්ඡා මෙහෙයවන්නේ ද, ගිවිසුම් සම්පාදනය කරන්නේ ද, ඒවා නීතිගත කිරීමට කටයුතු කරන්නේ ද මේ රාජ්‍ය නිලධාරියෝ ය.

මේවා ගැන දේශපාලකයන් හරහා ජනතාවට පැහැදිලි කිරීම හරියට කළ හැක්කේ මෙම නිලධාරීන්ට ය. එසේම, ඒ සාකච්ඡා රටට, ජනතාවට හා අනාගතයට හිතකර වන පරිදි සියලු පැතිකඩ සැලකිල්ලට ගනිමින් මෙහෙයවිය යුත්තේ ද එම නිලධාරීන් විසිනි. ඔවුන් එය හරි හැටි කළ යුතු ය. ඒ වෙනුවෙන් මේ රටේ මහජනතාව ඔවුන්ට වැටුප්, වරප්‍රසාද, පුහුණුවීම්, ශිෂ්‍යත්ව, විදේශ චාරිකා ආදිය සපයා තිබේ. ඔවුන් එය හරි හැටි කරනු ඇති බවට විශ්වාසය තැබීමට මේ රටේ මහජනතාවට අයිතියක් නිර්මානය වන්නේ එසේ ය.

රජය එය හරි හැටි කරන්නේ නැතිනම්, එය මේ රාජ්‍ය ක්‍රමය පිළිබඳ බරපතල ගැටලුවකි. එහෙම ගැටලුවක් ඇති බව අපි හැමදාමත් කියන්නෙමු. අප කියන්නේ රජය ප්‍රමාණාත්මකව කුඩා කරමින්, එහි ගුණාත්මකභාවය සංවර්ධනය කරමින්, කාර්යක්ෂම නියාමන යාන්ත්‍රණයක් බවට එය පත් කළ යුතු බව ය.

අප එසේ කියන විට රජය යනු සිල්ලර වෙළඳාම දක්වා ජන ජීවිතයේ හැම දෙයකට ම මැදිහත් විය යුතු අති දැවැන්ත ව්‍යූහයක් බවට පත් විය යුතු බව කියන්නේ ද අප ඉහත කී කොල්ලන්, බල්ලන්, මීඩියාකාරයන්, සරසවි ඇදුරන්, දොස්තරලා, වාමාංශිකයන් හා නිකමුන් ම ය.

කෙසේ වෙතත්, අප නම්, මේ හා සම්බන්ධ සාකච්ඡා හා ගිවිසුම් ක්‍රියාවලිය මෙහෙයවූ රාජ්‍ය නිලධාරීන් හා දේශපාලකයන් පිළිබඳ විශ්වාසය තබා ඔවුන් කියන්නේ කුමක් ද යන්න ගැන විමසිල්ලෙන් සිටිමු. මේ පිළිබඳ පාර්ලිමේන්තු විවාදයක් හෝ පැවැත්විය යුතු ය. කොල්ලන්, බල්ලන්, මීඩියාකාරයන්, සරසවි ඇදුරන්, දොස්තරලා, වාමාංශිකයන් හා නිකමුන්  වෙනුවට මේ ගැන හැදෑරූ විශේෂඥයන් කතා කළ යුතු ය.

එතෙක්, කොල්ලන්, බල්ලන්, මීඩියාකාරයන්, සරසවි ඇදුරන්, දොස්තරලා, වාමාංශිකයන් හා නිකමුන් බල්ලන්ගේ වැඩේ කරන්නට ගොස් ඇන ගන්නා බූරුවන් නොවී සිටිනවා නම් හොඳ ය.

සිංගප්පූරු ශ්‍රී ලංකා වෙළඳ ගිවිසුම
2016 ජුලි 18දා සිංගප්පූරුව හා ශ්‍රී ලංකාව අතර නිදහස් වෙළඳ ගිවිසුම පිළිබඳ සාකච්ඡා ආරම්භ කළ අවස්ථාව. දෙරට අගමැතිවරු හා අදාළ ඇමතිවරු ඡායාරූපයේ සිටිති.
Please follow and like us:

7 thoughts on “කොල්ලන්, බල්ලන්, මීඩියාකාරයන්, සරසවි ඇදුරන්, දොස්තරලා, වාමාංශිකයන් හා නිකමුන් ජාත්‍යන්තර වෙළඳ ගිවිසුම් ගැන විශාරදයන් විය යුතු ද?

  1. මේ ගිවිසුම් හදන්නේ විශ්‍රාම ගිය රජයේ නිධාරියෙකු යොදාගෙන බවත් මිට අදාල වර්තමානයේ සේවයේ නිරත නිලධාරින් මිට සම්බන්ධ කර නොගන්න බවත් ඔබ දන්නේද ?

    1. විශ්‍රාම ගිය රජයේ නිලධාරියෙකු යොදා ගන්නට ඇත්තේ ඇතැම් විට පළපුරුද්ද වැඩි නිසා විය හැකියි. ඒකෙ වැරැද්ද මොකක් ද? විශ්‍රාම ගිය ගමන් ටක් ගාලා කෙනෙකු අවලංගු වෙනවා ද?
      අනෙක, මේ හා සම්බන්ධ රාජ්‍ය ආයතන හා නිලධාරීන්ගේ කිසිදු මැදිහත් වීමකින් තොරව, අවුරුදු දෙකක් සාකච්ඡා සිදු වෙන්න පුළුවන් ද?
      මෙවැනි කාරණා සම්බන්ධයෙන් අප රාජ්‍ය ආයතන විශ්වාස නො කළ යුත්තේ ඇයි?
      එහෙම අවිශ්වාස කරන්නට නම් අප ඔවුන්ට වැටුප්, වරප්‍රසාද, පුහුණුවීම්, ශිෂ්‍යත්ව, විදේශ චාරිකා ආදිය මහජන මුදලින් සපයන්නේ කුමට ද?
      මේ ගැන දොස්තර සංගමය වැනි අය දන්නා රෙද්ද මොකක් ද?

  2. අප අහන්නේ ඉතා සරල කාරණයක්. මෙවැනි කාරණා සම්බන්ධයෙන් විශේෂඥභාවය සහිත රාජ්‍ය සේවයක් පවතිද්දී මේ හා සම්බන්ධ කිසිවක් නොදන්නා රජයේ වෛද්‍ය නිලධාරීන්ගේ සංගමය වැනි ආයතන විසින් සපයනු ලබන විකෘති අර්ථ නිරූපණවලට රජය ඉඩ දෙන්නේ ඇයි?

    1. සමහර විට උන් කියන්නෙ ඇත්ත වෙන්නැති. ඒකයි රජය සද්ද නැතුව ඉන්නෙ

  3. පැරා,
    මගේ පොඩි මොලේට දැනෙන්නේ ලංකාවේ සම්ප්‍රදායික විද්‍යාර්ථීන් දරන අදහස්වලත් ඇත්තක් නැත්තේම නැති බවයි. මොකද මාතලන් කියන්නැහේ මේ රටේ generic name එක Sri Lanka වුනාට මේ රටේ ඇත්ත නම අම්මට සිරි ලංකාවනේ.
    ලොකුම හොරා සහ දූෂකයා රජය වෙනකොට බස් කොන්දොස්තරගේ සිට supreme court එක හරහා ඉස්පිරිතාලෙට වෙනකල් ඉන්න බහුතරය හොරුනේ. ඒක නිසා මේ විද්‍යාර්ථීන්ගේ සැකය සාධාරණයි.

    රචනයෙන් යෝජනා කරන පරිදි කිසිම රජයේ උසස් නිලධාරියෙක් මේ ගැන කට හොල්ලන එකක් නැහැ..මොකද මේ එකෙකුටවත් රට ගැන හිතක් නැහැ. ඒක නිසා මේ issue එකත් ඔහේ යයි. නමුත්…

    දැන් නම් රටේ ආර්ථිකය හොඳටම කුණු වෙලා තියෙන වෙිලාවක් මේක. සිංගප්පූරුව එක්ක නොවෙයි බං Lucifer එක්ක ගිවිසුමක් ගහලා හරි මේ පිනට කන රජයේ ජනපති, අගමැති , මැති- ඇමතිවරුයි , රජයේ සේවකයන්ටයි කන්න දෙන්න එපායැ..ඒකටනෙ බං මේ රජය තියෙන්නේ. උඹට ඒක අමතක වුනාද?

    කවුරු බොරු කලත් රටේ ඊලඟ අගමැති වීමට potential එකක් තියෙන මුදල් ඇමති සමරවීර කියන කතා බොරු කරන්න රාජපක්ෂවාදීන්ට තියා ආන්ඩුවටත්හැකිද කියා සැක සහිතයි.

    නිකං හිතපං..2019 දී මුලු විදේශ ණය විතරක් 4285 US$ ලංකාව ගෙවිය යුතුයි. ඉන් 77% රාජපක්ෂ හැත්ත බුරුත්ත ලක්සෙට කොඩිය දාන්න ගත්ත වානිජ ණය සඳහා . සිංගප්පූරුවත් එක්ක නොවෙයි මොන යකා එක්ක වුනත් දැන් ඉතින් ඩීල් දාන්නම වෙනවා

    1. රටේ සියලු දෙනාට ජාත්‍යන්තර වෙළඳ ගිවිසුම් විශාරදයන් වන්නට බැහැ. මේ වගේ කරුණුවලදී රජය විශ්වාස කරන්නට බැරි නම් එය දැවැන්ත අර්බුදයක්. රජය විශ්වාස කරන්නට බැරි ය කියන අය ම සිල්ලර වෙළඳාම දක්වා ම විහිදෙන දැවැන්ත රජයක් රැක ගන්නටත් උත්සාහ කරන එක විහිළුවක්.

Leave a Reply

Your email address will not be published. Required fields are marked *